চতুৱিপত্তিকথাৱণ্ণনা

২৭৩. ইদানি উভযসাধাৰণং কত্ৱা ৱিপত্তিৱাৰাদীনং ৱিসিট্ঠৱাৰানং সঙ্গহং কাতুমাহ ‘‘কতি আপত্তিযো’’তিআদি.

২৭৪. ভিক্খুনী সচে ছাদেতি, চুতা হোতি. সচে ৱেমতিকা ছাদেতি, থুল্লচ্চযং সিযাতি যোজনা.

২৭৫. সঙ্ঘাদিসেসন্তি পৰস্স সঙ্ঘাদিসেসং.

২৭৬. ‘‘কতি আচাৰৱিপত্তিপচ্চযা’’তি পদচ্ছেদো.

২৭৭. আচাৰৱিপত্তিন্তি অত্তনো ৱা পৰস্স ৱা আচাৰৱিপত্তিং.

২৭৯. পাপিকং দিট্ঠিন্তি অহেতুকঅকিৰিযনত্থিকদিট্ঠিআদিং লামিকং দিট্ঠিং.

২৮১. মনুস্সুত্তৰিধম্মন্তি উত্তৰিমনুস্সধম্মং.

২৮২. আজীৱহেতু সঞ্চৰিত্তং সমাপন্নোতি যোজনা. পৰিযাযৱচনেতি ‘‘যো তে ৱিহাৰে ৱসতি, সো ভিক্খু অৰহা’’তিআদিকে লেসৱচনে. ঞাতেতি যং উদ্দিস্স ৱদতি, তস্মিং মনুস্সজাতিকে ৱচনসমনন্তৰমেৱ ঞাতে.

২৮৩. ৱত্ৱাতি অগিলানো অত্তনো অত্থায ৱিঞ্ঞাপেত্ৱা. ভিক্খুনী পন সচে এৱং হোতি, ভিক্খুনী অগিলানা অত্তনো অত্থায পণীতভোজনং ৱিঞ্ঞাপেত্ৱা ভুত্তাৱিনী সচে হোতীতি অধিপ্পাযো. তস্সা পাটিদেসনীযং সিযাতি যোজনা.

২৮৪. ‘‘অত্তনো অত্থায ৱিঞ্ঞাপেত্ৱানা’’তি ইমিনা পৰস্স ঞাতকপৱাৰিতে তস্সেৱত্থায ৱিঞ্ঞাপেত্ৱা তেন দিন্নং ৱা তস্স ৱিস্সাসেন ৱা পৰিভুঞ্জন্তস্স তেসং অত্তনো অঞ্ঞাতকঅপ্পৱাৰিতে সুদ্ধচিত্ততায অনাপত্তীতি দীপেতি.

ইতি উত্তৰে লীনত্থপকাসনিযা

চতুৱিপত্তিকথাৱণ্ণনা নিট্ঠিতা.