ভিক্খুনিৱিভঙ্গো

১৭০. ৱিনযস্স ৱিনিচ্ছযে ভিক্খূনং পাটৱত্থাযাতি ভিক্খুনীনং পাটৱস্সাপি তদধীনত্তা পধানদস্সনৱসেন ৱুত্তং. অথ ৱা দস্সনলিঙ্গন্তৰসাধাৰণত্তে ইচ্ছিতে পুল্লিঙ্গেন, নপুংসকলিঙ্গেন ৱা নিদ্দেসো সদ্দসত্থানুযোগতোতি ‘‘ভিক্খূন’’ন্তি পুল্লিঙ্গেন ৱুত্তং.

১৭১. নন্দন্তী সাদিযন্তী.

১৭২. তিস্সো আপত্তিযো ফুসেতি যোজনা. জাণুস্স উদ্ধং, অক্খকস্স অধো গহণং সাদিযন্তিযা তস্সা পাৰাজিকন্তি যোজনা.

১৭৩. কাযপটিবদ্ধে ৱা গহণং সাদিযন্তিযা দুক্কটং.

১৭৪. ৱজ্জন্তি অঞ্ঞিস্সা ভিক্খুনিযা পাৰাজিকাপত্তিং.

১৭৬. তং লদ্ধিন্তি উক্খিত্তস্স যং লদ্ধিং অত্তনো ৰোচেসি, তং লদ্ধিং ন নিস্সজ্জন্তীতি যোজনা.

১৭৮. ‘‘ইধ আগচ্ছা’’তি পদচ্ছেদো. ‘‘ৱুত্তা আগচ্ছতী’’তি পদচ্ছেদো.

১৭৯. হত্থপাসপ্পৱেসনেতি হত্থপাসূপগমনে. ‘‘হত্থগতপ্পৱেসনে’’তি ৱা পাঠো, সোযেৱ অত্থো.

ইতি উত্তৰে লীনত্থপকাসনিযা ভিক্খুনিৱিভঙ্গে

পাৰাজিককথাৱণ্ণনা নিট্ঠিতা.

১৮০. একস্সাতি অত্তনো অত্তনো অট্টকাৰস্স ৱা. আৰোচনেতি ৱত্তব্বস্স ৱোহাৰিকানং নিৱেদনে.

১৮১. দুতিযাৰোচনেতি দুতিযস্স, দুতিযং এৱং আৰোচনে.

১৮২. দ্ৱীহীতি দ্ৱীহি কম্মৱাচাহি. কম্মৱাচোসানেতি কম্মৱাচাওসানে.

১৮৩. পৰিক্খেপে অতিক্কন্তেতি অত্তনো গামতো গন্ত্ৱা ইতৰং গামং পৱিসন্তিযা পঠমেন পাদেন তস্স গামস্স পৰিক্খেপে অতিক্কন্তে, পঠমপাদে পৰিক্খেপং অতিক্কমেত্ৱা অন্তোগামসঙ্খেপং গতেতি অত্থো.

১৮৪. দুতিযেনাতি গামপৰিক্খেপতো বহি ঠিতেন দুতিযপাদেন. অতিক্কন্তেতি তস্মিং গামপৰিক্খেপে অতিক্কন্তে, তস্মিং পাদে অন্তোগামং পৱেসিতেতি অত্থো. সেসং উত্তানত্থমেৱ.

ইতি উত্তৰে লীনত্থপকাসনিযা ভিক্খুনিৱিভঙ্গে

সঙ্ঘাদিসেসকথাৱণ্ণনা নিট্ঠিতা.

১৯৩. ইহ ভিক্খুনী পত্তসন্নিচযং কৰোন্তী হোতি, সা একং নিস্সগ্গিযং পাচিত্তিযংযেৱ ফুসেতি যোজনা.

১৯৪. অকালচীৱৰং কালচীৱৰং কত্ৱা ভাজাপেন্তিযাতি যোজনা. পযোগেতি ভাজনপযোগে.

১৯৫. ছিন্নেতি অচ্ছিন্নে.

১৯৬. ততো পৰন্তি ততো পঠমতো অঞ্ঞং.

ইতি উত্তৰে লীনত্থপকাসনিযা ভিক্খুনিৱিভঙ্গে

নিস্সগ্গিযকথাৱণ্ণনা নিট্ঠিতা.

১৯৯. লসুণং খাদতি চে, দ্ৱে আপত্তিযো ফুটাতি যোজনা.

২০০. পযোগেতি সংহাৰাপনপযোগে. সংহটেতি অত্তনা সংহটে, পৰেন সংহৰাপিতে চ আপত্তি পাচিত্তি হোতি.

২০১. কতেতি তলঘাতে কতে.

২০২. জতুনা মট্ঠকন্তি জতুনা কতং মট্ঠদণ্ডকং. ‘‘দুক্কটং আদিন্নে’’তি পদচ্ছেদো.

২০৪. ভুঞ্জমানস্স ভিক্খুস্স হত্থপাসেতি যোজনা. হিত্ৱা হত্থপাসং.

২০৫. ৱিঞ্ঞাপেত্ৱাতি অন্তমসো মাতৰম্পি যাচিত্ৱা. অজ্ঝোহাৰে পাচিত্তিং দীপযেতি যোজনা.

২০৬. উচ্চাৰাদিন্তি আদি-সদ্দেন ৱিঘাসসঙ্কাৰমুত্তানং গহণং.

লসুণৱগ্গৱণ্ণনা পঠমা.

২০৯. ইধ ইমস্মিং ৰত্তন্ধকাৰৱগ্গে. পঠমে, দুতিযে, ততিযে, চতুত্থেপি ৱিনিচ্ছযো লসুণৱগ্গস্স ছট্ঠেন সিক্খাপদেন তুল্যো সদিসোতি যোজনা.

২১০. আসনেতি পল্লঙ্কে তস্সোকাসভূতে. সামিকে অনাপুচ্ছাতি তস্মিং কুলে যং কিঞ্চি ৱিঞ্ঞুমনুস্সং অনাপুচ্ছা.

২১১. অনোৱস্সন্তি ভিত্তিযা বহি নিব্বকোসব্ভন্তৰং. দুতিযাতিক্কমেতি দুতিযেন পাদেন নিব্বকোসস্স উদকপাতট্ঠানাতিক্কমে.

২১২. নিসীদিতেতি নিসিন্নে.

২১৩. পযোগেতি উজ্ঝাপনপযোগে.

২১৪. নিৰযাদিনা অত্তানং ৱা পৰং ৱা অভিসপ্পেন্তী সপথং কৰোন্তী দ্ৱে ফুসেতি যোজনা. অভিসপ্পিতেতি অভিসপিতে.

২১৫. ৱধিত্ৱাতি হত্থাদীহি পহৰিত্ৱা. ‘‘কৰোতি এক’’ন্তি পদচ্ছেদো.

ৰত্তন্ধকাৰৱগ্গৱণ্ণনা দুতিযা.

২১৬. নগ্গাতি অনিৱত্থা ৱা অপাৰুতা ৱা. পযোগেতি চুণ্ণমত্তিকাঅভিসঙ্খৰণাদিপযোগে.

২১৭. পমাণাতিক্কন্তন্তি ‘‘দীঘসোচতস্সো ৱিদত্থিযো সুগতৱিদত্থিযা, তিৰিযং দ্ৱে ৱিদত্থিযো’’তি (পাচি. ৮৮৮) ৱুত্তপমাণমতিক্কন্তং. পযোগেতি কাৰাপনপযোগে.

২১৮. ৱিসিব্বেত্ৱাতি দুস্সিব্বিতং পুন সিব্বনত্থায ৱিসিব্বেত্ৱা.

২১৯. পঞ্চ অহানি পঞ্চাহং, পঞ্চাহমেৱ পঞ্চাহিকং. সঙ্ঘাটীনং চাৰো সঙ্ঘাটিচাৰো, পৰিভোগৱসেন ৱা ওতাপনৱসেন ৱা সঙ্ঘটিতট্ঠেন ‘‘সঙ্ঘাটী’’তি লদ্ধনামানং ‘‘তিচীৱৰং, উদকসাটিকা, সংকচ্চিকা’’তি ইমেসং পঞ্চন্নং চীৱৰানং পৰিৱত্তনং. অতিক্কমেতি ভিক্খুনী অতিক্কমেয্য. অস্সা পন একাৱ পাচিত্তি পৰিদীপিতাতি যোজনা.

২২০. সঙ্কমনীযন্তি সঙ্কমেতব্বং. অঞ্ঞিস্সা সন্তকং অনাপুচ্ছা গহিতং পুন দাতব্বং পঞ্চন্নং অঞ্ঞতৰং.

২২১. গণচীৱৰলাভস্সাতি ভিক্খুনিসঙ্ঘেন লভিতব্বচীৱৰস্স. অন্তৰাযং কৰোতীতি যথা তে দাতুকামা ন দেন্তি, এৱং পৰক্কমতি.

২২২. ধম্মিকন্তি সমগ্গেন সঙ্ঘেন সন্নিপতিত্ৱা কৰিযমানং. পটিবাহন্তীতি পটিসেধেন্তী. পটিবাহিতে পটিসেধিতে.

২২৩. অগাৰিকাদিনোতি আদি-সদ্দেন ‘‘পৰিব্বাজকস্স ৱা পৰিব্বাজিকায ৱা’’তি (পাৰা. ৯১৭) ৱুত্তে সঙ্গণ্হাতি. সমণচীৱৰন্তি কপ্পকতং নিৱাসনপাৰুপনুপগং. পযোগেতি দানপযোগে.

২২৪. চীৱৰে দুব্বলাসাযাতি দুব্বলচীৱৰপচ্চাসায ‘‘সচে সক্কোম, দস্সামা’’তি এত্তকমত্তং সুত্ৱা উপ্পাদিতায আসাযাতি অত্থো. কালন্তি চীৱৰকালসমযং. সমতিক্কমেতি ভিক্খুনীহি কালচীৱৰে ভাজিযমানে ‘‘আগমেথ, অয্যে, অত্থি সঙ্ঘস্স চীৱৰপচ্চাসা’’তি ৱত্ৱা তং চীৱৰৱিভঙ্গং সমতিক্কমেয্য.

২২৫. ধম্মিকং কথিনুদ্ধাৰন্তি সমগ্গেন সঙ্ঘেন কৰিযমানং কথিনস্স অন্তৰুব্ভাৰং. পটিবাহন্তিযাতি নিৱাৰেন্তিযা.

ন্হানৱগ্গৱণ্ণনা ততিযা.

২২৬. তুৱট্টেয্যুন্তি নিপজ্জেয্যুং. ইতৰং পাচিত্তিযং.

২২৭. পযোগেতি ভিক্খুনিযা অফাসুককৰণপযোগে কৰিযমানে.

২২৮. দুক্খিতন্তি গিলানং. নুপট্ঠাপেন্তিযা ৱাপীতি তস্সা উপট্ঠানং পৰেহি অকাৰাপেন্তিযা, সযং ৱা অকৰোন্তিযা.

২২৯. উপস্সযং দত্ৱাতি কৱাটবন্ধং অত্তনো পুগ্গলিকৱিহাৰং দত্ৱা. কড্ঢিতেতি নিক্কড্ঢিতে.

২৩০. সংসট্ঠাতি গহপতিনা ৱা গহপতিপুত্তেন ৱা সংসট্ঠৱিহাৰী ভিক্খুনী সঙ্ঘেন সংসট্ঠৱিহাৰতো নিৱত্তিযমানা. ঞত্তিযা দুক্কটং ফুসেতি সমনুভাসনকম্মঞত্তিযা দুক্কটং আপজ্জেয্য.

২৩১. অন্তোৰট্ঠেতি যস্স ৱিজিতে ৱিহৰতি, তস্স ৰট্ঠে. পটিপন্নাযাতি চাৰিকং কপ্পেন্তিযা. সেসকন্তি পাচিত্তিযং.

তুৱট্টৱগ্গৱণ্ণনা চতুত্থা.

২৩৩. ৰাজাগাৰাদিকন্তি আদি-সদ্দেন চিত্তাগাৰাদীনং গহণং.

২৩৫. পযোগেতি কপ্পাসৱিচাৰণং আদিং কত্ৱা সব্বপযোগে. উজ্জৱুজ্জৱনেতি যত্তকং হত্থেন অঞ্ছিতং হোতি, তস্মিং তক্কম্হি ৱেঠিতে.

২৩৭. পযোগেতি অগাৰিকস্স ৱা পৰিব্বাজকস্স ৱা পৰিব্বাজিকায ৱা সহত্থা খাদনীযাদীনং দানপযোগে.

২৩৮. ‘‘সমং আপত্তিপভেদতো’’তি পদচ্ছেদো.

২৩৯. তিৰচ্ছানগতং ৱিজ্জন্তি যং কিঞ্চি বাহিৰকং অনত্থসংহিতং পৰূপঘাতকৰং হত্থিসিক্খাদিসিপ্পং. পঠন্তিযাতি সিক্খন্তিযা. পযোগেতি দুৰুপসঙ্কমনাদিপযোগে. পদে পদেতি পদাদিৱসেন পৰিযাপুণন্তিযা পদে পদে অক্খৰপদানং ৱসেন.

২৪০. নৱমে ‘‘পৰিযাপুণাতী’’তি পদং, দসমে ‘‘ৱাচেতী’’তি পদন্তি এৱং পদমত্তমেৱ উভিন্নং ৱিসেসকং ভেদকং.

চিত্তাগাৰৱগ্গৱণ্ণনা পঞ্চমা.

২৪১. তমাৰামন্তি যত্থ ভিক্খূ ৰুক্খমূলেপি ৱসন্তি, তং সভিক্খুকং পদেসং.

২৪৩. অক্কোসতীতি দসন্নং অক্কোসৱত্থূনং অঞ্ঞতৰেন সম্মুখা ৱা পৰম্মুখা ৱা অক্কোসতি. পৰিভাসতীতি ভযদস্সনেন তজ্জেতি. ‘‘পাচিত্তি অক্কোসিতে’’তি পদচ্ছেদো.

২৪৪. চণ্ডিকভাৱেনাতি কোধেন. গণন্তি ভিক্খুনিসঙ্ঘং. পৰিভাসতীতি ‘‘বালা এতা’’তিআদীহি ৱচনেহি অক্কোসতি. পযোগেতি পৰিভাসনপযোগে. পৰিভট্ঠেতি অক্কোসিতে. ইতৰং পাচিত্তিযং.

২৪৫. নিমন্তিতাতি গণভোজনে ৱুত্তনযেন নিমন্তিতা. পৱাৰিতাতি পৱাৰণসিক্খাপদে ৱুত্তনযেন ৱাৰিতা. খাদনং ভোজনম্পি ৱাতি যাগুপূৱখজ্জকং, যাৱকালিকং মূলখাদনীযাদিখাদনীযং, ওদনাদিভোজনম্পি ৱা যা ভিক্খুনী ভুঞ্জন্তী হোতি, সা পন দ্ৱেযেৱ আপত্তিযো ফুসেতি যোজনা.

২৪৭. মচ্ছৰাযন্তীতি মচ্ছৰং কৰোন্তী, অত্তনো পচ্চযদাযককুলস্স অঞ্ঞেহি সাধাৰণভাৱং অসহন্তীতি অত্থো. পযোগেতি তদনুৰূপে কাযৱচীপযোগে. মচ্ছৰিতেতি মচ্ছৰৱসেন কতপযোগে নিপ্ফন্নে.

২৪৮. অভিক্খুকে পনাৱাসেতি যতো ভিক্খুনুপস্সযতো অদ্ধযোজনব্ভন্তৰে ওৱাদদাযকা ভিক্খূ ন ৱসন্তি, মগ্গো ৱা অখেমো হোতি, ন সক্কা অনন্তৰাযেন গন্তুং, এৱৰূপে আৱাসে. পুব্বকিচ্চেসূতি ‘‘ৱস্সং ৱসিস্সামী’’তি সেনাসনপঞ্ঞাপনপানীযউপট্ঠাপনাদিপুব্বকিচ্চে পন কৰিযমানে দুক্কটং ভৱেতি যোজনা.

২৪৯. ৱস্সংৱুত্থাতি পুৰিমং ৱা পচ্ছিমং ৱা তেমাসং ৱুত্থা. উভতোসঙ্ঘেতি ভিক্খুনিসঙ্ঘে, ভিক্খুসঙ্ঘে চ. তীহিপি ঠানেহীতি ‘‘দিট্ঠেন ৱা’’তিআদিনা ৱুত্তেহি তীহি কাৰণেহি.

২৫০. ওৱাদত্থাযাতি গৰুধম্মোৱাদনত্থায. সংৱাসত্থাযাতি উপোসথপুচ্ছনত্থায চেৱ পৱাৰণত্থায চ. ন গচ্ছতীতি ভিক্খুং ন উপগচ্ছতি.

২৫১. ওৱাদম্পি ন যাচন্তীতি উপোসথাদিৱসেন ওৱাদূপসঙ্কমনং ভিক্খুং ন যাচন্তী ন পুচ্ছন্তী. উপোসথন্তি উপোসথদিৱসতো পুৰিমদিৱসে তেৰসিযং ৱা চাতুদ্দসিযং ৱা উপোসথং ন পুচ্ছন্তী.

২৫২. অপুচ্ছিত্ৱাৱ সঙ্ঘং ৱাতি সঙ্ঘং ৱা গণং ৱা অনপলোকেত্ৱাৱ. ‘‘ভেদাপেতী’’তি ইদং নিদস্সনমত্তং ‘‘ফালাপেয্য ৱা ধোৱাপেয্য ৱা আলিম্পাপেয্য ৱা বন্ধাপেয্য ৱা মোচাপেয্য ৱা’’তি ইমেসম্পি কিৰিযাৱিকপ্পানং সঙ্গহেতব্বত্তা. পসাখজন্তি নাভিযা হেট্ঠা, জাণুমণ্ডলানং উপৰি পদেসে জাতং গণ্ডং ৱা ৰুধিতং ৱা. পযোগেতি ভেদাপনাদিপযোগে.

আৰামৱগ্গৱণ্ণনা ছট্ঠা.

২৫৩. গব্ভিনিন্তি আপন্নসত্তং সিক্খমানং. ৱুট্ঠাপেন্তীতি উপজ্ঝাযা হুত্ৱা উপসম্পাদেন্তী. পযোগেতি গণপৰিযেসনাদিপযোগে. ৱুট্ঠাপিতেতি উপসম্পাদিতে, কম্মৱাচাপৰিযোসানেতি অত্থো.

২৫৫. সহজীৱিনিন্তি সদ্ধিৱিহাৰিনিং. নানুগ্গণ্হন্তীতি উদ্দেসদানাদীহি ন সঙ্গণ্হন্তী.

গব্ভিনিৱগ্গৱণ্ণনা সত্তমা.

২৫৮. ‘‘অলং ৱুট্ঠাপিতেনা’’তি ৱুচ্চমানা ভিক্খুনীহি নিৱাৰিযমানা. খীযতীতি অঞ্ঞাসং ব্যত্তানং লজ্জীনং ৱুট্ঠানসম্মুতিং দীযমানং দিস্ৱা ‘‘অহমেৱ নূন বালা’’তিআদিনা ভণমানা খীযতি. পযোগেতি খীযমানপযোগে. খীযিতেতি খীযনপযোগে নিট্ঠিতে.

কুমাৰিভূতৱগ্গৱণ্ণনা অট্ঠমা.

২৬০. ছত্তুপাহনন্তি ৱুত্তলক্খণং ছত্তঞ্চ উপাহনাযো চ. পযোগেতি ধাৰণপযোগে.

২৬১. যানেনাতি ৱয্হাদিনা. যাযন্তীতি সচে যানেন গতা হোতি.

২৬২. সঙ্ঘাণিন্তি যং কিঞ্চি কটূপগং. ধাৰেন্তিযাতি কটিযং পটিমুচ্চন্তিযা.

২৬৩. গন্ধৱণ্ণেনাতি যেন কেনচি ৱণ্ণেন চ যেন কেনচি গন্ধেন চ. গন্ধো নাম চন্দনালেপাদি. ৱণ্ণো নাম কুঙ্কুমহলিদ্দাদি. পযোগেতি গন্ধাদিপযোগে ৰচনতো পট্ঠায পুব্বপযোগে.

২৬৬. অনাপুচ্ছাতি ‘‘নিসীদামি, অয্যা’’তি অনাপুচ্ছিত্ৱা. নিসীদিতে ভিক্খুস্স উপচাৰে অন্তমসো ছমায নিসিন্নে.

২৬৭. অনোকাসকতন্তি ‘‘অসুকস্মিং নাম ঠানে পুচ্ছিস্সামী’’তি এৱং অকতওকাসং.

২৬৮. পৱিসন্তিযাতি ৱিনিচ্ছযং আৰামৱগ্গস্স পঠমেনেৱ সিক্খাপদেন সদিসং কত্ৱা ৱদেয্যাতি যোজনা.

ছত্তুপাহনৱগ্গৱণ্ণনা নৱমা.

ইতি উত্তৰে লীনত্থপকাসনিযা ভিক্খুনিৱিভঙ্গে

পাচিত্তিযকথাৱণ্ণনা নিট্ঠিতা.

২৬৯-৭০. অট্ঠসু পাটিদেসনীযসিক্খাপদেসুপি দ্ৱিধা আপত্তি হোতীতি যোজনা. ততোতি গহণহেতু. সব্বেসূতি পাটিদেসনীযসিক্খাপদেসু.

পাটিদেসনীযকথাৱণ্ণনা.

২৭১-২. ইমং পৰমং উত্তমং নিৰুত্তৰং কেনচি ৱা ৱত্তব্বেন উত্তৰেন ৰহিতং নিদ্দোসং উত্তৰং এৱংনামকং ধীৰো পঞ্ঞৱা ভিক্খু অত্থৱসেন ৱিদিত্ৱা দুৰুত্তৰং কিচ্ছেন উত্তৰিতব্বং পঞ্ঞত্তমহাসমুদ্দং ৱিনযমহাসাগৰং সুখেনেৱ যস্মা উত্তৰতি, তস্মা কঙ্খচ্ছেদে ৱিনযৱিচিকিচ্ছায ছিন্দনে সত্থে সত্থসদিসে অস্মিং সত্থে ইমস্মিং উত্তৰপকৰণে উস্মাযুত্তো কম্মজতেজোধাতুযা সমন্নাগতো জীৱমানো ভিক্খু নিচ্চং নিৰন্তৰং সত্তো অভিৰতো নিচ্চং যোগং সততাভিযোগং কাতুং যুত্তো অনুৰূপোতি যোজনা.

ভিক্খুনিৱিভঙ্গো নিট্ঠিতোতি এত্থাপি উপ্পত্তি ৱুত্তনযেনেৱ ৱেদিতব্বা.

ইতি উত্তৰে লীনত্থপকাসনিযা

ভিক্খুনিৱিভঙ্গৱণ্ণনা নিট্ঠিতা.