চতুব্বিধকম্মকথাৱণ্ণনা

২৯৮৩. অপলোকনসঞ্ঞিতং কম্মং, ঞত্তিকম্মং, ঞত্তিদুতিযকম্মং, ঞত্তিচতুত্থকম্মন্তি ইমানি চত্তাৰি কম্মানীতি যোজনা. তত্থ চত্তাৰীতি গণনপৰিচ্ছেদো. ইমানীতি অনন্তৰমেৱ ৱক্খমানত্তা আসন্নপচ্চক্খৱচনং. কম্মানীতি পৰিচ্ছিন্নকম্মনিদস্সনং. ‘‘অপলোকনসঅঞত’’ন্তিআদি তেসং সৰূপদস্সনং.

তত্ৰাযং সঙ্খেপতো ৱিনিচ্ছযো (চূড়ৱ. অট্ঠ. ২১৫; পৰি. অট্ঠ. ৪৮২) – অপলোকনকম্মং নাম সীমট্ঠকসঙ্ঘং সোধেত্ৱা ছন্দাৰহানং ছন্দং আহৰিত্ৱা সমগ্গস্স সঙ্ঘস্স অনুমতিযা তং তং ৱত্থুং কিত্তেত্ৱা ‘‘ৰুচ্চতি সঙ্ঘস্সা’’তি তিক্খত্তুং সাৱেত্ৱা কত্তব্বং কম্মং ৱুচ্চতি. ঞত্তিকম্মং নাম ৱুত্তনযেনেৱ সমগ্গস্স সঙ্ঘস্স অনুমতিযা একায ঞত্তিযা কত্তব্বং কম্মং. ঞত্তিদুতিযকম্মং নাম ৱুত্তনযেনেৱ সমগ্গস্স সঙ্ঘস্স অনুমতিযা একায ঞত্তিযা, একায চ অনুস্সাৱনাযাতি এৱং ঞত্তিদুতিযায অনুস্সাৱনায কত্তব্বং কম্মং. ঞত্তিচতুত্থকম্মং নাম ৱুত্তনযেনেৱ সমগ্গস্স সঙ্ঘস্স অনুমতিযা একায ঞত্তিযা, তীহি চ অনুস্সাৱনাহীতি এৱং ঞত্তিচতুত্থাহি তীহি অনুস্সাৱনাহি কত্তব্বং কম্মং. ঞত্তি দুতিযা যস্স অনুস্সাৱনস্স তং ঞত্তিদুতিযং, তেন কত্তব্বং কম্মং ঞত্তিদুতিযকম্মং. ঞত্তি চতুত্থা যস্স অনুস্সাৱনত্তযস্স তং ঞত্তিচতুত্থং, তেন কাতব্বং কম্মং ঞত্তিচতুত্থকম্মং.

২৯৮৪-৭. তেসং ঠানৱসেন ভেদং দস্সেতুমাহ ‘‘অপলোকনকম্ম’’ন্তিআদি. নৱন্নং ঠানানং সমাহাৰো নৱট্ঠানং, ‘‘গচ্ছতী’’তি ইমিনা সম্বন্ধো. ঞত্তিকম্মন্তি গমনকিৰিযাকত্তুনিদস্সনং. নৱট্ঠানন্তি কম্মনিদস্সনং. দুতিযন্তি ঞত্তিদুতিযকম্মং. সত্ত ঠানানি গচ্ছতীতি যোজনা.

ইদানি তং ঠানভেদং সৰূপতো দস্সেতুমাহ ‘‘নিস্সাৰণঞ্চা’’তিআদি. নিস্সাৰণাদি কম্মৱিসেসানং সঞ্ঞা. অপলোকনকম্মঞ্হি নিস্সাৰণং…পে… পঞ্চমং কম্মলক্খণন্তি ইমানি পঞ্চ ঠানানি গচ্ছতীতি যোজনা.

এৱং নামৱসেন দস্সিতানি নিস্সাৰণাদীনি অত্থতো ৱিভজিত্ৱা দস্সেতুমাহ ‘‘নিস্সাৰণঞ্চা’’তিআদি. সমণুদ্দেসতোতি কণ্টকসামণেৰতো নিস্সাৰণঞ্চ ওসাৰণঞ্চ ৱদেতি যোজনা. তত্থ কণ্টকসামণেৰস্স নিস্সাৰণা তাদিসানংযেৱ সম্মাৱত্তং দিস্ৱা পৱেসনা ‘‘ওসাৰণা’’তি ৱেদিতব্বা.

পব্বজন্তেন হেতুভূতেন ভণ্ডুকং ভণ্ডুকম্মপুচ্ছনং ৱদেয্যাতি অত্থো. পব্বজ্জাপেক্খস্স কেসচ্ছেদনপুচ্ছনং ভণ্ডুকম্মং নাম. ছন্নেন হেতুভূতেন ব্ৰহ্মদণ্ডকং কম্মং ৱদেতি যোজনা. তথাৰূপস্সাতি ছন্নসদিসস্স মুখৰস্স ভিক্খূ দুৰুত্তৱচনেন ঘট্টেন্তস্স. কাতব্বোতি ‘‘ভন্তে, ইত্থন্নামো ভিক্খু মুখৰো ভিক্খূ দুৰুত্তৱচনেহি ঘট্টেন্তো ৱিহৰতি, সো ভিক্খু যং ইচ্ছেয্য, তং ৱদেয্য. ভিক্খূহি ইত্থন্নামো ভিক্খু নেৱ ৱত্তব্বো, ন ওৱদিতব্বো, ন অনুসাসিতব্বো. সঙ্ঘং, ভন্তে, পুচ্ছামি ‘ইত্থন্নামস্স ভিক্খুনো ব্ৰহ্মদণ্ডস্স দানং ৰুচ্চতি সঙ্ঘস্সা’তি. দুতিযম্পি পুচ্ছামি… ততিযম্পি পুচ্ছামি ‘ইত্থন্নামস্স, ভন্তে, ভিক্খুনো ব্ৰহ্মদণ্ডস্স দানং ৰুচ্চতি সঙ্ঘস্সা’’তি (পৰি. অট্ঠ. ৪৯৫-৪৯৬) এৱং ব্ৰহ্মদণ্ডো কাতব্বো.

২৯৮৮-৯. ‘‘আপুচ্ছিত্ৱানা’’তি পুব্বকিৰিযায ‘‘গহিতাযা’’তি অপৰকিৰিযা অজ্ঝাহৰিতব্বা, ‘‘ৰুচিযা’’তি এতস্স ৱিসেসনং. দেতীতি এত্থ ‘‘অচ্ছিন্নচীৱৰাদীন’’ন্তি সেসো. সব্বো সঙ্ঘো সন্নিপতিত্ৱান সব্বসো সব্বে সীমট্ঠে আগতাগতে ভিক্খূ আপুচ্ছিত্ৱান ‘‘ইত্থন্নামেন পৰিক্খাৰেন ভৱিতব্বং, ৰুচ্চতি তস্স দান’’ন্তি ৱিসুং পুচ্ছিত্ৱা গহিতায ভিক্খূনং ৰুচিযা তিক্খত্তুং অপলোকেত্ৱা চীৱৰাদিপৰিক্খাৰং অচ্ছিন্নচীৱৰাদীনং দেতি, যং এৱংভূতং সঙ্ঘস্স দানং, তং তস্স অপলোকনকম্মস্স কম্মলক্খণং হোতীতি যোজনা. লক্খীযতীতি লক্খণং, কম্মমেৱ লক্খণং, ন নিস্সাৰণাদীনীতি কম্মলক্খণং.

২৯৯০-১. এৱং অপলোকনকম্মস্স পঞ্চ ঠানানি উদ্দেসনিদ্দেসৱসেন দস্সেত্ৱা ইদানি ঞত্তিকম্মস্স কম্মলক্খণং তাৱ দস্সেতুমাহ ‘‘নিস্সাৰণ’’ন্তিআদি. ইতি ‘‘ঞত্তিযা নৱ ঠানানী’’তি অযমুদ্দেসো ৱক্খমানেন ‘‘ৱিনিচ্ছযে’’তিআদিনিদ্দেসেনেৱ ৱিভাৱীযতি.

২৯৯২. ৱিনিচ্ছযেতি উব্বাহিকৱিনিচ্ছযে. অসম্পত্তেতি নিট্ঠং অগতে. থেৰস্সাতি ধম্মকথিকস্স. তেনেৱাহ ‘‘অৱিনযঞ্ঞুনো’’তি. তস্স ‘‘সুণন্তু মে আযস্মন্তা, অযং ইত্থন্নামো ভিক্খু ধম্মকথিকো, ইমস্স নেৱ সুত্তং আগচ্ছতি, নো সুত্তৱিভঙ্গো, সো অত্থং অসল্লক্খেত্ৱা ব্যঞ্জনচ্ছাযায অত্থং পটিবাহতি, যদাযস্মন্তানং পত্তকল্লং, ইত্থন্নামং ভিক্খুং ৱুট্ঠাপেত্ৱা অৱসেসা ইমং অধিকৰণং ৱূপসমেয্যামা’’তি (চূড়ৱ. ২৩৩) এৱং উব্বাহিকৱিনিচ্ছযে ধম্মকথিকস্স ভিক্খুনো যা নিস্সৰণা ৱুত্তা, সা ঞত্তিকম্মে ‘‘নিস্সাৰণা’’তি ৱুত্তাতি যোজনা.

২৯৯৩-৪. উপসম্পদাপেক্খস্স ‘‘সুণাতু মে, ভন্তে সঙ্ঘো, ইত্থন্নামো ইত্থন্নামস্স আযস্মতো উপসম্পদাপেক্খো, অনুসিট্ঠো সো মযা, যদি সঙ্ঘস্স পত্তকল্লং, ইত্থন্নামো আগচ্ছেয্যাতি. আগচ্ছাহী’’তি (মহাৱ. ১২৬) ৱচনপটিসংযুত্তস্স সঙ্ঘস্স সম্মুখানযনং, সা ওসাৰণা নাম. ‘‘আগচ্ছ ওসাৰণা’’তি পদচ্ছেদো.

উপোসথৱসেনাপি, পৱাৰণাৱসেনাপি. ঞত্তিযা ঠপিতত্তাতি ‘‘সুণাতু মে, ভন্তে সঙ্ঘো, অজ্জুপোসথো পন্নৰসো, যদি সঙ্ঘস্স পত্তকল্লং, সঙ্ঘো উপোসথং কৰেয্য’’ (মহাৱ. ১৩৪), ‘‘সুণাতু মে, ভন্তে সঙ্ঘো, অজ্জ পৱাৰণা পন্নৰসী, যদি সঙ্ঘস্স পত্তকল্লং, সঙ্ঘো পৱাৰেয্যা’’তি (মহাৱ. ২১০) উপোসথপৱাৰণাৱসেন ঞত্তিযা ঠপিতত্তা উপোসথো, পৱাৰণা ৱাতি ইমানি দ্ৱে ঞত্তিকম্মানি.

‘‘উপসম্পদাপেক্খঞ্হি, অনুসাসেয্যহন্তি চা’’তি ইমিনা ‘‘সুণাতু মে, ভন্তে সঙ্ঘো, ইত্থন্নামো ইত্থন্নামস্স আযস্মতো উপসম্পদাপেক্খো, যদি সঙ্ঘস্স পত্তকল্লং, অহং ইত্থন্নামং অনুসাসেয্য’’ন্তি (মহাৱ. ১২৬) অযং একা ঞত্তি গহিতা.

২৯৯৫. ‘‘ইত্থন্নামমহং ভিক্খুং, পুচ্ছেয্যং ৱিনযন্তি চা’’তি ইমিনা ‘‘সুণাতু মে, ভন্তে সঙ্ঘো, যদি সঙ্ঘস্স পত্তকল্লং, অহং ইত্থন্নামং ৱিনযং পুচ্ছেয্য’’ন্তি (মহাৱ. ১৫১) অযং একা ঞত্তি গহিতা. এৱমাদীতি আদি-সদ্দেন ‘‘যদি সঙ্ঘস্স পত্তকল্লং, ইত্থন্নামো ইত্থন্নামং অনুসাসেয্যা’’তি, ‘‘যদি সঙ্ঘস্স পত্তকল্লং, অহং ইত্থন্নামং অন্তৰাযিকে ধম্মে পুচ্ছেয্য’’ন্তি (মহাৱ. ১২৬), ‘‘যদি সঙ্ঘস্স পত্তকল্লং, ইত্থন্নামো ইত্থন্নামং অন্তৰাযিকে ধম্মে পুচ্ছেয্যা’’তি, ‘‘যদি সঙ্ঘস্স পত্তকল্লং, ইত্থন্নামো ইত্থন্নামং ৱিনযং পুচ্ছেয্যা’’তি (মহাৱ. ১৫১), ‘‘যদি সঙ্ঘস্স পত্তকল্লং, অহং ইত্থন্নামেন ৱিনযং পুট্ঠো ৱিস্সজ্জেয্য’’ন্তি (মহাৱ. ১৫২), ‘‘যদি সঙ্ঘস্স পত্তকল্লং, ইত্থন্নামো ইত্থন্নামেন ৱিনযং পুট্ঠো ৱিস্সজ্জেয্যা’’তি – (মহাৱ. ১৫২) ইমা ছ ঞত্তিযো গহিতা. এৱং পুৰিমা দ্ৱে, ইমা চ ছাতি এদিসা ইমা অট্ঠ ঞত্তিযো ‘‘সম্মুতী’’তি ৱুত্তা.

২৯৯৬. নিস্সট্ঠচীৱৰাদীনং দানন্তি ‘‘সুণাতু মে, ভন্তে সঙ্ঘো, ইদং চীৱৰং ইত্থন্নামস্স ভিক্খুনো নিস্সগ্গিযং সঙ্ঘস্স নিস্সট্ঠং, যদি সঙ্ঘস্স পত্তকল্লং, সঙ্ঘো ইমং চীৱৰং ইত্থন্নামস্স ভিক্খুনো দদেয্যা’’তি (পাৰা. ৪৬৪) এৱং নিস্সট্ঠচীৱৰপত্তাদীনং দানং ‘‘দান’’ন্তি ৱুচ্চতি. আপত্তীনং পটিগ্গাহোতি ‘‘সুণাতু মে, ভন্তে সঙ্ঘো, অযং ইত্থন্নামো ভিক্খু আপত্তিং সৰতি ৱিৱৰতি উত্তানিং কৰোতি দেসেতি, যদি সঙ্ঘস্স পত্তকল্লং, অহং ইত্থন্নামস্স ভিক্খুনো আপত্তিং পটিগ্গণ্হেয্য’’ন্তি (চূড়ৱ. ২৩৯), ‘‘যদাযস্মন্তানং পত্তকল্লং, অহং ইত্থন্নামস্স ভিক্খুনো আপত্তিং পটিগ্গণ্হেয্য’’ন্তি (চূড়ৱ. ২৩৯). তেন ৱত্তব্বো ‘‘পস্সসী’’তি. ‘‘আম পস্সামী’’তি. ‘‘আযতিং সংৱৰেয্যাসী’’তি. এৱং আপত্তীনং পটিগ্গাহো ‘‘পটিগ্গাহো’’তি ৱুচ্চতি.

২৯৯৭. পৱাৰুক্কড্ঢনাতি পৱাৰণুক্কড্ঢনা. গাথাবন্ধৱসেন ণ-কাৰলোপো. অথ ৱা পৱাৰণং পৱাৰোতি পৱাৰণ-সদ্দপৰিযাযো পৱাৰ-সদ্দো. ‘‘ইমং উপোসথং কত্ৱা, কাড়ে পৱাৰযামী’’তি ইমিনা ‘‘সুণন্তু মে আযস্মন্তা আৱাসিকা, যদাযস্মন্তানং পত্তকল্লং, ইদানি উপোসথং কৰেয্যাম, পাতিমোক্খং উদ্দিসেয্যাম, আগমে কাড়ে পৱাৰেয্যামা’’তি (মহাৱ. ২৪০) অযং ঞত্তি উপলক্খণতো দস্সিতা. এৱং কতপৱাৰণা ‘‘পচ্চুক্কড্ঢনা’’তি মতা. এত্থ চ কাড়েতি পুব্বকত্তিকমাসস্স কাড়পক্খুপোসথে. ইমিনা চ ‘‘আগমে জুণ্হে পৱাৰেয্যামা’’তি অযং ঞত্তি চ উপলক্খিতা. জুণ্হেতি অপৰকত্তিকজুণ্হপক্খউপোসথে.

২৯৯৮. তিণৱত্থাৰকেতি তিণৱত্থাৰকসমথে. সব্বপঠমা ঞত্তীতি সব্বসঙ্গাহিকা ঞত্তি ৱুচ্চতি. ইতৰা চাতি উভযপক্খে পচ্চেকং ঠপিতা দ্ৱে ঞত্তিযো চাতি এৱং তিধা পৱত্তং এতং ঞত্তিকম্মং কম্মলক্খণং ইতি এৱং ৱুত্তনযেন ‘‘ৱিনিচ্ছযে’’তিআদিনা ঞত্তিযা নৱ ঠানানি ৱেদিতব্বানীতি যোজনা.

২৯৯৯-৩০০০. এৱং ঞত্তিকম্মে নৱ ঠানানি দস্সেত্ৱা ইদানি ঞত্তিদুতিযকম্মে সত্ত ঠানানি দস্সেতুমাহ ‘‘ঞত্তিদুতিযকম্মম্পী’’তিআদি. ‘‘ঞত্তিদুতিযকম্ম’’ন্তিআদিকা উদ্দেসগাথা উত্তানত্থাৱ.

নিদ্দেসে পত্তনিক্কুজ্জনাদীতি আদি-সদ্দেন পত্তুক্কুজ্জনং গহিতং. নিস্সাৰোসাৰণা মতাতি ‘‘নিস্সাৰণা, ওসাৰণা’’তি চ মতা. তত্থ ভিক্খূনং অলাভায পৰিসক্কনাদিকেহি অট্ঠহি অঙ্গেহি সমন্নাগতস্স উপাসকস্স সঙ্ঘেন অসম্ভোগকৰণত্থং পত্তনিক্কুজ্জনৱসেন নিস্সাৰণা চ তস্সেৱ সম্মা ৱত্তন্তস্স পত্তুক্কুজ্জনৱসেন ওসাৰণা চ ৱেদিতব্বা. সা খুদ্দকৱত্থুক্খন্ধকে ৱড্ঢলিচ্ছৱিৱত্থুস্মিং (চূড়ৱ. ২৬৫) ৱুত্তা.

৩০০১. সীমাদিসম্মুতি সম্মুতি নাম. সা পঞ্চদসধা মতাতি সীমাসম্মুতি তিচীৱৰেনঅৱিপ্পৱাসসম্মুতি সন্থতসম্মুতি ভত্তুদ্দেসক সেনাসনগ্গাহাপক ভণ্ডাগাৰিক চীৱৰপটিগ্গাহক যাগুভাজক ফলভাজক খজ্জভাজক অপ্পমত্তকৱিস্সজ্জক সাটিযগ্গাহাপক পত্তগ্গাহাপক আৰামিকপেসক সামণেৰপেসকসম্মুতীতি এৱং সা সম্মুতি পঞ্চদসৱিধা মতাতি অত্থো. কথিনস্স ৱত্থং, তস্স. মতোযেৱ মতকো, মতকস্স ৱাসো মতকৱাসো, তস্স মতকৱাসসো, মতকচীৱৰস্স.

৩০০২. আনিসংসখেত্তভূতপঞ্চমাসব্ভন্তৰেযেৱ উব্ভাৰো অন্তৰুব্ভাৰো. কুটিৱত্থুস্স, ৱিহাৰস্স ৱত্থুনো চ দেসনা দেসনা নামাতি যোজনা.

৩০০৩. তিণৱত্থাৰকে দ্ৱিন্নং পক্খানং সাধাৰণৱসেন ঠপেতব্বঞত্তি চ পচ্ছা পক্খদ্ৱযে ৱিসুং ৱিসুং ঠপেতব্বা দ্ৱে ঞত্তিযো চাতি তিস্সো ঞত্তিযো কম্মৱাচায অভাৱেন ঞত্তিকম্মে ‘‘কম্মলক্খণ’’ন্তি দস্সিতা, পচ্ছা ৱিসুং ৱিসুং দ্ৱীসু পক্খেসু ৱত্তব্বা দ্ৱে ঞত্তিদুতিযকম্মৱাচা ঞত্তিদুতিযকম্মে ‘‘কম্মলক্খণ’’ন্তি দস্সিতাতি তং দস্সেতুমাহ ‘‘তিণৱত্থাৰকে কম্মে’’তি. ‘‘মোহাৰোপনতাদিসূ’’তি ইমিনা পাচিত্তিযেসু দস্সিতমোহাৰোপনকম্মঞ্চ অঞ্ঞৱাদকৱিহেসকাৰোপনকম্মাদিঞ্চ সঙ্গণ্হাতি. এত্থাতি ইমস্মিং ঞত্তিদুতিযকম্মে. কম্মলক্খণমেৱ কম্মলক্খণতা.

৩০০৪-৫. ইতি এৱং যথাৱুত্তনযেন ইমে সত্ত ঠানভেদা ঞত্তিদুতিযকম্মস্স. এৱং ঞত্তিদুতিযকম্মে সত্ত ঠানানি দস্সেত্ৱা ঞত্তিচতুত্থকম্মে ঠানভেদং দস্সেতুমাহ ‘‘তথা’’তিআদি.

৩০০৬. তজ্জনাদীনন্তি আদি-সদ্দেন নিযস্সাদীনং গহণং. তেসং সত্তন্নং কম্মানং. পস্সদ্ধি ৱূপসমো.

৩০০৭. ‘‘ভিক্খুনীনং ওৱাদো’’তি ভিক্খুনোৱাদকসম্মুতি ফলূপচাৰেন ৱুত্তা.

৩০০৮-৯. মূলপটিক্কস্সো মূলায পটিকস্সনা, গাথাবন্ধৱসেন ক-কাৰস্স দ্ৱেভাৱো. উক্খিত্তস্সানুৱত্তিকাতি উক্খিত্তানুৱত্তিকা একা যাৱততিযকা, অট্ঠ সঙ্ঘাদিসেসা, অৰিট্ঠো চণ্ডকাড়ী চ দ্ৱে, ইমে একাদস যাৱততিযকা ভৱন্তি. ইমেসং ৱসাতি উক্খিত্তানুৱত্তিকাদীনি পুগ্গলাধিট্ঠানেন ৱুত্তানি, ইমেসং সমনুভাসনকম্মানং ৱসেন. দসেকাতি একাদস.

৩০১১. এৱং চতুন্নম্পি কম্মানং ঠানভেদং দস্সেত্ৱা অন্ৱযতো, ব্যতিৰেকতো চ কাতব্বপ্পকাৰং দস্সেতুমাহ ‘‘অপলোকনকম্মঞ্চা’’তিআদি. ঞত্তিযাপি ন কাৰযে, ঞত্তিদুতিযেনপি ন কাৰযেতি যোজনা.

৩০১২. অপলোকনকম্মে ৱুত্তলক্খণেন ঞত্তিকম্মাদীনম্পি কাতব্বপ্পকাৰো সক্কা ৱিঞ্ঞাতুন্তি তং অদস্সেত্ৱা ঞত্তিদুতিযকম্মে লব্ভমানৱিসেসং দস্সেতুমাহ ‘‘ঞত্তিদুতিযকম্মানী’’তিআদি. অপলোকেত্ৱা কাতব্বানি লহুকানিপি ঞত্তিদুতিযকম্মানি অত্থীতি যোজনা. তানি পন কতমানীতি আহ ‘‘সব্বা সম্মুতিযো সিযু’’ন্তি. এত্থ সীমাসম্মুতিং ৱিনা সেসা তিচীৱৰেনঅৱিপ্পৱাসসম্মুতিআদযো সব্বাপি সম্মুতিযোতি অত্থো.

৩০১৩. সেসানীতি যথাৱুত্তেহি সেসানি সীমাসম্মুতিআদীনি ছ কম্মানি. ন ৱট্টতীতি ন ৱট্টন্তি, গাথাবন্ধৱসেন ন-কাৰলোপো. যথাহ ‘‘সীমাসম্মুতি, সীমাসমূহননং, কথিনদানং, কথিনুদ্ধাৰো, কুটিৱত্থুদেসনা, ৱিহাৰৱত্থুদেসনাতি ইমানি ছ কম্মানি গৰুকানি অপলোকেত্ৱা কাতুং ন ৱট্টন্তি, ঞত্তিদুতিযকম্মৱাচং সাৱেত্ৱাৱ কাতব্বানী’’তি (পৰি. অট্ঠ. ৪৮২). ‘‘অপলোকেত্ৱা কাতুং পন ন ৱট্টতী’’তি ইদং নিদস্সনমত্তং, ঞত্তিচতুত্থকম্মৱসেনাপি কাতুং ন ৱট্টন্তেৱ. তেনেৱাহ ‘‘যথাৱুত্তনযেনেৱ, তেন তেনেৱ কাৰযে’’তি, যো যো নযো তং তং কম্মং কাতুং ৱুত্তো, তেনেৱ তেনেৱ নযেনাতি অত্থো.

চতুব্বিধকম্মকথাৱণ্ণনা.