ভিক্খুনিক্খন্ধককথাৱণ্ণনা

২৯৫২. ৱিৱৰিত্ৱান চীৱৰং অপনেত্ৱা.

২৯৫৩. যং কিঞ্চি সম্পযোজেন্তিযাতি যং কিঞ্চি অনাচাৰং কৰোন্তিযা. ততোতি তেন অনাচাৰসঙ্খাতেন অসদ্ধম্মেন. ভাসন্তিযাতি ৱাচায ভাসন্তিযা.

২৯৫৪-৬. দীঘন্তি একপৰিক্খেপতো দীঘং. ৱিলীৱেন চ পট্টেনাতি সণ্হেহিপি ৱিলীৱেহি কতপট্টেন. চম্মপট্টেনাতি চম্মমযপট্টেন. দুস্সপট্টেনাতি সেতৱত্থেন. দুস্সৱেণিযাতি দুস্সেন গণ্ঠিতৱেণিযা. দুস্সৱট্টিযাতি দুস্সেন কতৱট্টিযা. ন ফাসুকা নমেতব্বাতি মজ্ঝিমস্স তনুভাৱত্থায গামদাৰিকা ৱিয ফাসুলিকা ন নামেতব্বা. জঘনন্তি মুত্তকৰণপ্পদেসং. অট্ঠিকাদিনাতি গোজাণুট্ঠিকাদিনা. ন ঘংসাপেয্যাতি ন ঘট্টাপেয্য. ‘‘অট্ঠিকাদিনা’’তি ইদং ‘‘ন ঘংসাপেয্যা’’তি ইমিনা চ ‘‘কোট্টাপেতী’’তি ইমিনা কিৰিযাপদেন চ সম্বন্ধিতব্বং.

২৯৫৭. ‘‘কোট্টাপেতী’’তি ইদং ‘‘হত্থং ৱা’’তিআদীহি উপযোগন্তপদেহি পচ্চেকং যোজেতব্বং. হত্থন্তি অগ্গবাহং. হত্থকোচ্ছন্তি পিট্ঠিহত্থং. পাদন্তি জঙ্ঘং.

২৯৫৮. ন মুখং লিম্পিতব্বন্তি ছৱিপসাদকৰেন তিলসাসপকক্কাদিনা অনেকৱিধেন লিম্পনেন ন লিম্পিতব্বং. ন চুণ্ণেতব্বন্তি মুখচুণ্ণলেপনং ন কাতব্বং. মনোসিলায মুখং লঞ্জন্তিযা আপত্তি সিযাতি যোজনা.

২৯৫৯. অঙ্গৰাগো ন কাতব্বোতি হলিদ্দিকুঙ্কুমাদীহি সৰীৰচ্ছৱিৰাগো ন কাতব্বো. অৱঙ্গং ন চ কাতব্বন্তি অঞ্জনং বহি অক্খিকোটিযা লেখং ঠপেত্ৱা ন অঞ্জিতব্বং. ন কাতব্বং ৱিসেসকন্তি গণ্ডপদেসে ৱিচিত্ৰসণ্ঠানং ৱিসেসকং ৱত্তভঙ্গং ন কাতব্বং.

২৯৬০. ওলোকনকতোতি ৱাতপানতো. ৰাগাতি কামৰাগেন. ওলোকেতুন্তি অন্তৰৱীথিং ৱিলোকেতুং, সালোকে ন চ ঠাতব্বন্তি যোজনা. সালোকে দ্ৱাৰং ৱিৱৰিত্ৱা উপড্ঢকাযং দস্সেন্তীহি ন ঠাতব্বং. সনচ্চন্তি নটসমজ্জং.

২৯৬১. গণিকং ৱুট্ঠাপেন্তিযা ৱেসিং ৱুট্ঠাপেন্তিযা. ‘‘ৱিক্কিণন্তিযা’’তি ইদং ‘‘সুৰ’’ন্তিআদীহি উপযোগন্তপদেহি পচ্চেকং যোজেতব্বং.

২৯৬৩. ন চেৱুপট্ঠাপেতব্বোতি অত্তনো ৱেয্যাৱচ্চং নেৱ কাৰাপেতব্বো. তিৰচ্ছানগতোপি দাসো ৱা দাসী ৱা তিৰচ্ছানগতোপি কম্মকৰো ৱা ন চেৱ উপট্ঠাপেতব্বো নেৱ অত্তনো ৱেয্যাৱচ্চং কাৰাপেতব্বো. অপি-সদ্দেন পগেৱ মনুস্সভূতোতি দীপেতি.

২৯৬৪. ‘‘সব্বনীলাদি’’ন্তি ইমিনা –

‘‘সব্বনীলকমঞ্জেট্ঠ-কণ্হলোহিতপীতকে;

মহানামমহাৰঙ্গ-ৰত্তেসূ’’তি. (ৱি. ৱি. ৫৯৮) –

ৱুত্তানি অকপ্পিযচীৱৰানি সঙ্গহিতানি. ‘‘নমতকং নাম এড়কলোমেহি কতং অৱাযিমং চম্মখণ্ডপৰিভোগেন পৰিভুঞ্জিতব্ব’’ন্তি (চূড়ৱ. অট্ঠ. ২৬৪) অট্ঠকথায ৱুত্তত্তা, গণ্ঠিপদে চ ‘‘সন্থৰণসদিসো পিলোতিকাহি কতো পৰিক্খাৰৱিসেসো’’তি ৱুত্তত্তা চ নিপজ্জায পৰিভুঞ্জিতব্বো পৰিক্খাৰৱিসেসো নমতকং নাম.

২৯৬৫. ছন্নম্পি পুৰিসব্যঞ্জনং ‘‘এত্থা’’তি চিন্তেত্ৱা ৰাগচিত্তেন ওলোকেন্তিযা দুক্কটং হোতি. সব্বন্তি ৱুত্তপ্পকাৰং সব্বং.

২৯৬৬. ভিক্খুং দূৰতোৱ পস্সিত্ৱা তস্স ভিক্খুনো দূৰতো ওক্কমিত্ৱান মগ্গো দাতব্বোতি যোজনা.

২৯৬৭. ভিক্খং চৰন্তিযা ভিক্খুনিযা ভিক্খুং পস্সিত্ৱা পন যেন ভিক্খায চৰতি, তং পত্তং নীহৰিত্ৱা উপৰি ছাদেত্ৱা ঠিতং সঙ্ঘাটিচীৱৰং অপনেত্ৱা উক্কুজ্জং উদ্ধংমুখং কত্ৱা ভিক্খুনো দস্সেতব্বন্তি যোজনা.

২৯৬৮. উতুনীনং ভিক্খুনীনং উতুকালে সঞ্জাতপুপ্ফে কালে সংৱেল্লিকং কাতুং কচ্ছং বন্ধিতুং মহেসিনা কটিসুত্তকং অনুঞ্ঞাতন্তি যোজনা, ইমিনা অঞ্ঞস্মিং কালে কটিসুত্তকং বন্ধিতুং ন ৱট্টতীতি দীপেতি. যথাহ – ‘‘ন, ভিক্খৱে, ভিক্খুনিযা সব্বকালং কটিসুত্তকং ধাৰেতব্বং, যা ধাৰেয্য, আপত্তি দুক্কটস্স. অনুজানামি, ভিক্খৱে, উতুনিযা কটিসুত্তক’’ন্তি (চূড়ৱ. ৪২২).

২৯৬৯. ইত্থিপোসযুতন্তি ইত্থীহি ৱা পুৰিসেহি ৱা ইত্থিপুৰিসেহি ৱা যুত্তং. ইত্থিপোসযুত্তং হত্থৱট্টকমেৱ ৱা. পাটঙ্কীতি পটপোট্টলিকং.

২৯৭০. গৰুধম্মেতি সঙ্ঘাদিসেসে. মানত্তন্তি পক্খমানত্তং. সম্মন্নিত্ৱাতি ঞত্তিদুতিযায কম্মৱাচায সম্মন্নিত্ৱা.

২৯৭১. যস্সা ইত্থিযা পব্বজিতকালে গব্ভো ৱুট্ঠাতি ৱিজাযতি যদি, পুত্তো চে, তস্সাপি দাৰকমাতু যাৱ সো দাৰকো ৱিঞ্ঞুতং পাপুণাতি, যাৱ খাদিতুং, ভুঞ্জিতুং, নহাযিতুঞ্চ অত্তনো ধম্মতায সক্কোতি, তাৱ দুতিযা ভিক্খুনী তথা সম্মন্নিত্ৱা দাতব্বাতি যোজনা.

২৯৭২. সা পন মাতা ভিক্খুনী অত্তনো পুত্তং পাযেতুং, ভোজেতুং, মণ্ডেতুং, উৰে কত্ৱা সযিতুঞ্চ লভতীতি যোজনা.

২৯৭৩. দুতিযিকায ভিক্খুনিযা দাৰকেন সহসেয্যং ঠপেত্ৱা যথা অঞ্ঞেসু পুৰিসেসু ৱত্তিতব্বং পটিপজ্জিতব্বং, তথা এৱ তস্মিং দাৰকে ৱত্তিতব্বন্তি যোজনা.

২৯৭৪. ৱিব্ভমেনেৱাতি অত্তনো ৰুচিযা সেতৱত্থানং গহণেনেৱ. যথাহ – ‘‘যস্মা সা ৱিব্ভন্তা অত্তনো ৰুচিযা খন্তিযা ওদাতানি ৱত্থানি নিৱত্থা, তস্মাযেৱ সা অভিক্খুনী, ন সিক্খাপচ্চক্খানেনা’’তি (চূড়ৱ. অট্ঠ. ৪৩৪). ইধাতি ইমস্মিং সাসনে.

২৯৭৫. গতাযাতি এত্থ ‘‘সকাৱাসা’’তি সেসো. যথাহ – ‘‘যা সা, ভিক্খৱে, ভিক্খুনী সকাৱাসা তিত্থাযতনং সঙ্কন্তা, সা আগতা ন উপসম্পাদেতব্বা’’তি. ন কেৱলং ন উপসম্পাদেতব্বা, পব্বজ্জম্পি ন লভতি. ওদাতানি গহেত্ৱা ৱিব্ভন্তা পন পব্বজ্জামত্তং লভতি.

২৯৭৬. ৱন্দনন্তি পাদে সম্বাহেত্ৱা ৱন্দনং. সাদিতুং ৱট্টতীতি ‘‘অনুজানামি, ভিক্খৱে, সাদিতু’’ন্তি (চূড়ৱ. ৪৩৪) অনুঞ্ঞাতত্তা ৱট্টতি. তত্ৰেকে আচৰিযা ‘‘সচে একতো ৱা উভতো ৱা অৱস্সুতা হোন্তি সাৰত্তা, যথাৱত্থুকমেৱা’’তি ৱদন্তি. একে আচৰিযা ‘‘নত্থি এত্থ আপত্তী’’তি ৱদন্তীতি এৱং আচৰিযৱাদং দস্সেত্ৱা ‘‘ইদং ওদিস্স অনুঞ্ঞাতং ৱট্টতী’’তি অট্ঠকথাসু ৱুত্তং, তং পমাণং. ‘‘অনুজানামি, ভিক্খৱে, সাদিতু’’ন্তি (চূড়ৱ. ৪৩৪) হি ৱচনেনেৱ কপ্পিযং.

২৯৭৭. যায কাযচি ৱচ্চকুটিযা ৱচ্চো ন কাতব্বো, হেট্ঠা ৱিৱটে উদ্ধং পটিচ্ছন্নে পন ৱচ্চং কাতুং ৱট্টতি. হেট্ঠা ৱিৱটে উপৰি পটিচ্ছন্নেতি অট্ঠকথাযং ‘‘সচে কূপো খতো হোতি, উপৰি পন পদৰমত্তমেৱ সব্বদিসাসু পঞ্ঞাযতি, এৱৰূপেপি ৱট্টতী’’তি (চূড়ৱ. অট্ঠ. ৪৩৫) ৱুত্তং.

২৯৭৮. সব্বত্থাতি ভিক্খুনিউপস্সযঅন্তৰঘৰাদিসব্বট্ঠানেসু. গিলানাযাতি যস্সা ৱিনা পল্লঙ্কং ন ফাসু হোতি. অড্ঢপল্লঙ্কন্তি একপাদং আভুজিত্ৱা কতপল্লঙ্কং. সো একং পণ্হিং ঊৰুমূলাসন্নং কত্ৱা ইতৰং দূৰে কত্ৱা আভুজিতপল্লঙ্কো নাম.

২৯৭৯. নৰতিত্থেতি পুৰিসানং নহানতিত্থে. যথাহ – ‘‘ন, ভিক্খৱে, ভিক্খুনিযা পুৰিসতিত্থে নহাযিতব্বং, যা নহাযেয্য, আপত্তি দুক্কটস্স. অনুজানামি, ভিক্খৱে, মহিলাতিত্থে নহাযিতু’’ন্তি (চূড়ৱ. ৪৩৬).

২৯৮০. যা সমণী গন্ধচুণ্ণেন ৱা ৱাসিতমত্তিযা ৱাসিতকায মত্তিকায ৱা পটিসোতে ৱা ন্হাযেয্য, তস্সা আপত্তি দুক্কটন্তি যোজনা. ৱাসিতৱিসেসনেন অৱাসিতা ৱট্টতীতি দীপেতি. যথাহ – ‘‘অনুজানামি, ভিক্খৱে, পকতিমত্তিক’’ন্তি (চূড়ৱ. ৪৩৬).

২৯৮১. অভুত্ৱাতি এত্থ আমিসঅগ্গং গহণমত্তম্পি অকত্ৱা, পত্তচীৱৰং কতিপযদিৱসানিপি অপৰিভুঞ্জিত্ৱাতি অত্থো. সচে অসপ্পাযং, সব্বম্পি অপনেতুং ৱট্টতি.

২৯৮২. অনুপসম্পন্নে অসন্তে সব্বং ভিক্খূহি পটিগ্গহিতং ৱা অপ্পটিগ্গহিতং ৱা সন্নিধিকতং ৱা সব্বং অজ্ঝোহৰণীযং ভিক্খূহি পটিগ্গহাপেত্ৱা পৰিভুঞ্জিতুং ভিক্খুনীনং ৱট্টতীতি যোজনা. ‘‘ভিক্খুনীনং ৱট্টতী’’তি ইদং পকৰণৱসেন ৱুত্তং. ভিক্খুনীহিপি পটিগ্গহাপেত্ৱা ভিক্খূনম্পি তথাৱিধং পৰিভুঞ্জিতুং ৱট্টতি. যথাহ – ‘‘অনুজানামি, ভিক্খৱে, ভিক্খূনং সন্নিধিং ভিক্খুনীহি পটিগ্গাহাপেত্ৱা পৰিভুঞ্জিতু’’ন্তি (চূড়ৱ. ৪২১).

ভিক্খুনিক্খন্ধককথাৱণ্ণনা.

ইতি ৱিনযত্থসাৰসন্দীপনিযা ৱিনযৱিনিচ্ছযৱণ্ণনায

খন্ধককথাৱণ্ণনা নিট্ঠিতা.