ৱত্তক্খন্ধককথাৱণ্ণনা

২৯১৪-৫. আগন্তুকো চ আৱাসিকো চ পিণ্ডচাৰিকো চ সেনাসনঞ্চ আৰঞ্ঞকো চ অনুমোদনা চাতি ৱিগ্গহো, তাসু ৱত্তানি, ইতৰীতৰযোগদ্ৱন্দসমাসস্স উত্তৰপদলিঙ্গত্তা ইত্থি লিঙ্গনিদ্দেসো. ভত্তে ভত্তগ্গে, উত্তৰপদলোপো. ‘‘ভত্তে’’তিআদীহি পদেহি ‘‘ৱত্তানী’’তি পচ্চেকং যোজেতব্বং.

আচৰিযো চ উপজ্ঝাযকো চ সিস্সো চ সদ্ধিৱিহাৰিকো চ, তেসং ৱত্তানীতি ৱিগ্গহো. সব্বসোতি সব্বাৱযৱভেদেহি. চতুদ্দসেৱাতি অৱযৱভেদেহি বহুৱিধানিপি ৱত্তানি ৱিসযভেদেন চুদ্দস এৱ ৱুত্তানি. ৱিসুদ্ধচিত্তেনাতি সৱাসনসকলসংকিলেসপ্পহানতো অচ্চন্তপৰিসুদ্ধচিত্তসন্তানেন. ৱিনাযকেনাতি সত্তে ৱিনেতীতি ৱিনাযকো, অনুত্তৰপুৰিসদম্মসাৰথিভাৱেন দম্মদেৱব্ৰহ্মনাগাদিকে সত্তে নানাৱিধেন ৱিনযনুপাযেন দমেতীতি অত্থো. অথ ৱা ৱিগতো নাযকো অস্সাতি ৱিনাযকো, তেন.

২৯১৬. আৰামন্তি এত্থ তংসমীপে তব্বোহাৰো. যথাহ ‘‘ইদানি ‘আৰামং পৱিসিস্সামী’তি ইমিনা উপচাৰসীমসমীপং দস্সেতি, তস্মা উপচাৰসীমং পত্ৱা উপাহনাওমুঞ্চনাদি সব্বং কাতব্ব’’ন্তি (চূড়ৱ. অট্ঠ. ৩৫৭). ‘‘পন অপনেতব্ব’’ন্তি পদচ্ছেদো. মুঞ্চিতব্বাতি উপাহনা পাদতো অপনেতব্বা.

২৯১৭. ওগুণ্ঠনন্তি সসীসপাৰুপনং. সীসে চীৱৰমেৱ ৱা ন কাতব্বন্তি সম্বন্ধো. তেনাতি আগন্তুকেন. পানীযৱাৰিনাতি পাতব্বজলেন.

২৯১৮. পুচ্ছিত্ৱাতি ৱস্সগণনং পুচ্ছিত্ৱা. ৱিহাৰে ৱুড্ঢভিক্খুনো আগন্তুকেন ভিক্খুনা ৱন্দিতব্বাৱ. কালেতি কালস্সেৱ. তেন আগন্তুকেন ভিক্খুনা সেনাসনং ‘‘ময্হং কতৰং সেনাসনং পাপুণাতী’’তি পুচ্ছিতব্বঞ্চাতি যোজনা.

২৯১৯. ‘‘পুচ্ছিতব্ব’’ন্তি ইদং ‘‘ৱচ্চট্ঠান’’ন্তিআদিকেহি সব্বেহি উপযোগন্তপদেহি পচ্চেকং যোজেতব্বং. পানীযমেৱ চাতি ‘‘কিং ইমিস্সা পোক্খৰণিযা পানীযমেৱ পিৱন্তি, উদাহু নহানাদিপৰিভোগম্পি কৰোন্তী’’তি (চূড়ৱ. অট্ঠ. ৩৫৭) অট্ঠকথাগতনযেন পানীযঞ্চ. তথা পৰিভোজনীযঞ্চ. সঙ্ঘকতিকন্তি ‘‘কেসুচি ঠানেসু ৱাড়মিগা ৱা অমনুস্সা ৱা হোন্তি, তস্মা কং কালং পৱিসিতব্বং, কং কালং নিক্খমিতব্ব’’ন্তি অট্ঠকথাগতনযেন সঙ্ঘস্স কতিকসণ্ঠানঞ্চ. গোচৰাদিকন্তি এত্থ চ ‘‘গোচৰো পুচ্ছিতব্বোতি ‘গোচৰগামো আসন্নে, উদাহু দূৰে, কালস্সেৱ চ পিণ্ডায চৰিতব্বং, উদাহু নো’তি এৱং ভিক্খাচাৰো পুচ্ছিতব্বো’’তি (চূড়ৱ. অট্ঠ. ৩৫৭) ৱুত্তনযেন গোচৰঞ্চ. আদি-সদ্দেন অগোচৰং গহিতং. ‘‘অগোচৰো নাম মিচ্ছাদিট্ঠিকানং ৱা গামো পৰিচ্ছিন্নভিক্খো ৱা গামো, যত্থ একস্স ৱা দ্ৱিন্নং ৱা ভিক্খা দিয্যতি, সোপি পুচ্ছিতব্বো’’তি (চূড়ৱ. অট্ঠ. ৩৫৭) ৱুত্তনযেন অগোচৰঞ্চ.

২৯২০. এৱং আগন্তুকৱত্তং দস্সেত্ৱা ইদানি আৱাসিকৱত্তং দস্সেতুমাহ ‘‘ৱুড্ঢ’’ন্তিআদি. পচ্চুগ্গন্ত্ৱা পত্তঞ্চ চীৱৰঞ্চ পটিগ্গহেতব্বন্তি যোজনা. চ-সদ্দো লুত্তনিদ্দিট্ঠো.

২৯২১. তস্সাতি আগন্তুকস্স. পাদোদকঞ্চাতি চ-সদ্দেন ধোতাধোতপাদা যত্থ ঠপীযন্তি, তং পাদপীঠং, পাদকথলিকঞ্চ উপনিক্খিপিতব্বন্তি এতং গহিতং. পুচ্ছিতব্বঞ্চ ৱাৰিনাতি ‘‘পানীযেন পুচ্ছন্তেন সচে সকিং আনীতং পানীযং সব্বং পিৱতি, ‘পুন আনেমী’তি পুচ্ছিতব্বোযেৱা’’তি ৱুত্তনযেন পানীযেন পুচ্ছিতব্বো. ইধ চ-সদ্দেন –

‘‘অপিচ বীজনেনপি বীজিতব্বো, বীজন্তেন সকিং পাদপিট্ঠিযং বীজিত্ৱা সকিং মজ্ঝে, সকিং সীসে বীজিতব্বং, ‘অলং হোতূ’তি ৱুত্তেন ততো মন্দতৰং বীজিতব্বং. পুন ‘অল’ন্তি ৱুত্তেন ততো মন্দতৰং বীজিতব্বং. ততিযৱাৰং ৱুত্তেন বীজনী ঠপেতব্বা. পাদাপিস্স ধোৱিতব্বা, ধোৱিত্ৱা সচে অত্তনো তেলং অত্থি, তেন মক্খেতব্বা. নো চে অত্থি, তস্স সন্তকেন মক্খেতব্বা’’তি (চূড়ৱ. অট্ঠ. ৩৫৯) –

ৱুত্তৱত্তানি সঙ্গণ্হাতি.

২৯২২-৩. ৱন্দেয্যোতি ৱুড্ঢাগন্তুকো ৱন্দিতব্বো. পঞ্ঞপেতব্বন্তি ‘‘কত্থ ময্হং সেনাসনং পাপুণাতী’’তি পুচ্ছিতেন সেনাসনং পঞ্ঞপেতব্বং, ‘‘এতং সেনাসনং তুম্হাকং পাপুণাতী’’তি এৱং আচিক্খিতব্বন্তি অত্থো. ‘‘ৱত্তব্বো’’তি ইদং ‘‘অজ্ঝাৱুত্থমৱুত্থ’’ন্তিআদীহি পদেহি তংতংলিঙ্গৱচনানুৰূপেন পৰিৱত্তেত্ৱা পচ্চেকং যোজেতব্বং. অজ্ঝাৱুত্থন্তি পঞ্ঞত্তসেনাসনস্স ভিক্খূহি পঠমং ৱুত্থভাৱং. অৱুত্থং ৱাতি চীৱৰকালং তস্মিং ভিক্খূহি অনজ্ঝাৱুত্থভাৱং ৱা. গোচৰাগোচৰং ৱুত্তমেৱ.

সেক্খকুলানি চাতি লদ্ধসেক্খসম্মুতিকানি কুলানি চ ৱত্তব্বানি. ‘‘পৱেসে নিক্খমে কালো’’তি ইদং ‘‘সঙ্ঘকতিক’’ন্তি এত্থ ৱুত্তত্থমেৱ. পানীযাদিকন্তি আদি-সদ্দেন পৰিভোজনীযকত্তৰযট্ঠীনং আচিক্খনং সঙ্গণ্হাতি.

২৯২৪. যথানিসিন্নেনেৱাতি অত্তনা নিসিন্নট্ঠানেযেৱ নিসিন্নেন. অস্সাতি নৱকস্স.

২৯২৫. ‘‘অত্ৰ পত্তং ঠপেহি, ইদমাসনং নিসীদাহী’’তি ইচ্চেৱং ইমিনা পকাৰেন সব্বং ৱত্তব্বন্তি যোজনা. দেয্যং সেনাসনম্পি চাতি সেনাসনঞ্চ দাতব্বং. চ-সদ্দেন ‘‘অৱুত্থং ৱা অজ্ঝাৱুত্থং ৱা আচিক্খিতব্ব’’ন্তিআদিনা ৱুত্তং সম্পিণ্ডেতি. মহাআৱাসেপি অত্তনো সন্তিকং সম্পত্তস্স আগন্তুকস্স ৱত্তং অকাতুং ন লব্ভতি.

২৯২৬. ‘‘মাতিকায নিদ্দিট্ঠক্কমেনেৱ ৱত্তানি কাতব্বানি, উদাহু যথানুপ্পত্তিৱসেনা’’তি কোচি মঞ্ঞেয্যাতি মাতিকাক্কমেনেৱ কাতব্বন্তি নিযমো নত্থি, যথানুপ্পত্তৱসেনেৱ কাতব্বন্তি ৱিঞ্ঞাপেতুং মাতিকাক্কমমনাদিযিত্ৱা গমিকৱত্তং আৰদ্ধং. অথ ৱা ৱত্তিচ্ছানুপুব্বকত্তা সদ্দপযোগস্স মাতিকাক্কমমনাদিযিত্ৱা যথিচ্ছং নিদ্দেসো কতোতি ৱেদিতব্বোতি. দাৰুমত্তিকভণ্ডানীতি মঞ্চপীঠাদীনি চেৱ ৰজনভাজনানি চ. পটিসামেত্ৱাতি গুত্তট্ঠানে ঠপেত্ৱা. আৱসথম্পি থকেত্ৱাতি আৱসথে দ্ৱাৰকৱাটাদীনি চ থকেত্ৱা.

২৯২৭. আপুচ্ছিত্ৱাপীতি ভিক্খুস্স ৱা সামণেৰস্স ৱা আৰামিকস্স ৱা ‘‘ইমং পটিজগ্গাহী’’তি নিয্যাদেত্ৱা ৱা. পুচ্ছিতব্বে অসন্তেপীতি এত্থ পি-সদ্দো পন-সদ্দত্থো. গোপেত্ৱা ৱাপি সাধুকন্তি ‘‘চতূসু পাসাণেসু মঞ্চং পঞ্ঞপেত্ৱা মঞ্চে মঞ্চং আৰোপেত্ৱা’’তিআদিনা (চূড়ৱ. ৩৬০) ৱুত্তনযেন সম্মা পটিসামেত্ৱা গন্তব্বন্তি যোজনা.

২৯২৮. পিণ্ডচাৰিকৱত্তং দস্সেতুমাহ ‘‘সহসা’’তিআদি. পিণ্ডচাৰিকো ভিক্খু অন্তৰঘৰং পৱিসন্তো সহসা ন পৱিসে সীঘং ন পৱিসেয্য, নিক্খমন্তো সহসা ন নিক্খমে সীঘং ন নিক্খমেয্য, ভিক্খুসাৰুপ্পেন পৱিসেয্য, নিক্খমেয্য চ. পিণ্ডচাৰিনা ভিক্খুনা গেহদ্ৱাৰং সম্পত্তেন অতিদূৰে ন ঠাতব্বং নিব্বকোসতো অতিদূৰট্ঠানে ন ঠাতব্বং. অচ্চাসন্নে ন ঠাতব্বং নিব্বকোসতো আসন্নতৰে ঠানে ন ঠাতব্বং.

২৯২৯. উচ্চাৰেত্ৱাতি উপনামেত্ৱা. ভাজনন্তি পত্তং. দক্খিণেন পণামেত্ৱাতি দক্খিণেন হত্থেন উপনামেত্ৱা. ভিক্খং গণ্হেয্যাতি এত্থ ‘‘উভোহি হত্থেহি পটিগ্গহেত্ৱা’’তি সেসো. যথাহ – ‘‘উভোহি হত্থেহি পত্তং পটিগ্গহেত্ৱা ভিক্খা গহেতব্বা’’তি (চূড়ৱ. ৩৬৬).

২৯৩০. সূপং দাতুকামা ৱা অদাতুকামা ৱা ইতি মুহুত্তকং সল্লক্খেয্য তিট্ঠেয্য. অন্তৰাতি ভিক্খাদানসমযে. ন ভিক্খাদাযিকাতি ইত্থী ৱা হোতু পুৰিসো ৱা, ভিক্খাদানসমযে মুখং ন ওলোকেতব্বন্তি.

২৯৩১. পিণ্ডচাৰিকৱত্তং দস্সেত্ৱা আৰঞ্ঞিকৱত্তং দস্সেতুমাহ ‘‘পানীযাদী’’তিআদি. পানীযাদীতি আদি-সদ্দেন পৰিভোজনীযঅগ্গিঅৰণিসহিতকত্তৰযট্ঠীনং গহণং. তত্ৰাযং ৱিনিচ্ছযো – পানীযং উপট্ঠাপেতব্বন্তি সচে ভাজনানি নপ্পহোন্তি, পানীযমেৱ পৰিভোজনীযম্পি কত্ৱা উপট্ঠাপেতব্বং. ভাজনং অলভন্তেন ৱেড়ুনাড়িকাযপি উপট্ঠাপেতব্বং. তম্পি অলভন্তস্স যথা সমীপে খুদ্দকআৱাটো হোতি, এৱং কাতব্বং. অৰণিসহিতে অসতি অগ্গিং অকাতুম্পি চ ৱট্টতি. যথা চ আৰঞ্ঞিকস্স, এৱং কন্তাৰপটিপন্নস্সাপি অৰণিসহিতং ইচ্ছিতব্বং. গণৱাসিনো পন তেন ৱিনাপি ৱট্টতীতি.

নক্খত্তন্তি অস্সযুজাদিসত্তৱীসতিৱিধং নক্খত্তং জানিতব্বন্তি সম্বন্ধো. কথং জানিতব্বন্তি আহ ‘‘তেন যোগো চা’’তি, তেন নক্খত্তেন চন্দস্স যোগো ঞাতব্বোতি অত্থো. জানিতব্বা দিসাপি চাতি অৰঞ্ঞে ৱিহৰন্তেন অট্ঠপি দিসা অসম্মোহতো জানিতব্বা.

২৯৩২. অঞ্ঞৱত্তং দস্সেতুমাহ ‘‘ৱচ্চপস্সাৱতিত্থানী’’তিআদি. পটিপাটিযা ভৱন্তীতি গতানুক্কমেন সেৱিতব্বা ভৱন্তি. যথাহ – ‘‘ৱচ্চকুটিযং, পস্সাৱট্ঠানে, ন্হানতিত্থেতি তীসুপি আগতপটিপাটিযেৱ পমাণ’’ন্তি (চূড়ৱ. অট্ঠ. ৩৭৩). যথাৱুড্ঢং কৰোন্তস্সাতি গতপটিপাটিং ৱিনা ৱুড্ঢপটিপাটিযা কৰোন্তস্স.

২৯৩৩. ৱচ্চকুটিং পৱিসন্তো সহসা ন পৱিসেয্য. উব্ভজিত্ৱাতি চীৱৰং উক্খিপিত্ৱা.

২৯৩৪. নিত্থুনন্তেন ভিক্খুনা ৱচ্চং ন কাতব্বন্তি যোজনা. ‘‘ৱচ্চস্স দুন্নিগ্গমনেন উপহতো হুত্ৱা নিত্থুনতি চে, ন দোসো’’তি সিক্খাভাজনৱিনিচ্ছযে ৱুত্তং. দণ্ডকট্ঠং খাদতো ৱচ্চং কৰোতো ভিক্খুনো দুক্কটং হোতীতি যোজনা.

২৯৩৬. খৰেনাতি ফৰুসেন ৱা ফালিতকট্ঠেন ৱা গণ্ঠিকেন ৱা কণ্টকেন ৱা সুসিৰেন ৱা পূতিনা ৱা দণ্ডেন ন অৱলেখেয্য ন পুঞ্ছেয্য. ন কট্ঠং ৱচ্চকূপকে ছড্ডেয্যাতি তং কট্ঠং ৱচ্চকূপে ন ছড্ডেয্য. পস্সাৱদোণিযা খেড়ং ন পাতেয্যাতি যোজনা.

২৯৩৭. পাদুকাসূতি ৱচ্চপস্সাৱপাদুকাসু. নিক্খমনে নিক্খমনকালে. তত্থেৱাতি ৱচ্চপস্সাৱপাদুকাস্ৱেৱ. পটিচ্ছাদেয্যাতি উক্খিত্তং চীৱৰং ওতাৰেত্ৱা সৰীৰং পটিচ্ছাদেয্য.

২৯৩৮. যো ৱচ্চং কত্ৱা সলিলে সতি সচে নাচমেয্য উদককিচ্চং ন কৰেয্য, তস্স দুক্কটং উদ্দিট্ঠন্তি যোজনা. মোহনাসিনাতি সৱাসনস্স মোহস্স, তেন সহজেকট্ঠপহানেকট্ঠানং সকলসংকিলেসানঞ্চ পহাযিনা আসৱক্খযঞাণেন সমুচ্ছিন্দতা মুনিনা সব্বঞ্ঞুনা সম্মাসম্বুদ্ধেন. ‘‘সলিলে সতী’’তি ইমিনা অসতি নিদ্দোসতং দীপেতি. যথাহ –

‘‘সতি উদকেতি এত্থ সচে উদকং অত্থি, পটিচ্ছন্নট্ঠানং পন নত্থি, ভাজনেন নীহৰিত্ৱা আচমিতব্বং. ভাজনে অসতি পত্তেন নীহৰিতব্বং. পত্তেপি অসতি অসন্তং নাম হোতি. ‘ইদং অতিৱিৱটং, পুৰতো অঞ্ঞং উদকং ভৱিস্সতী’তি গতস্স উদকং অলভন্তস্সেৱ ভিক্খাচাৰৱেলা হোতি, কট্ঠেন ৱা কেনচি ৱা পুঞ্ছিত্ৱা গন্তব্বং, ভুঞ্জিতুম্পি অনুমোদনম্পি কাতুং ৱট্টতী’’তি (চূড়ৱ. অট্ঠ. ৩৭৩).

২৯৩৯. সসদ্দন্তি উদকসদ্দং কত্ৱা. ‘‘পাসাণাদিট্ঠানে পহৰিত্ৱা উদকং সদ্দাযতি চে, ন দোসো’’তি সিক্খাভাজনৱিনিচ্ছযে ৱুত্তং. চপু চপূতি চাতি তাদিসং অনুকৰণং কত্ৱা নাচমেতব্বন্তি যোজনা. আচমিত্ৱাতি উদককিচ্চং কত্ৱা. সৰাৱে আচমনভাজনে উদকং ন সেসেতব্বন্তি যোজনা, ইদং পন সব্বসাধাৰণট্ঠানং সন্ধায ৱুত্তং. যথাহ অট্ঠকথাযং –

‘‘আচমনসৰাৱকেতি সব্বসাধাৰণট্ঠানং সন্ধাযেতং ৱুত্তং. তত্ৰ হি অঞ্ঞে অঞ্ঞে আগচ্ছন্তি, তস্মা উদকং ন সেসেতব্বং. যং পন সঙ্ঘিকেপি ৱিহাৰে একদেসে নিবদ্ধগমনত্থায কতং ঠানং হোতি পুগ্গলিকট্ঠানং ৱা, তস্মিং ৱট্টতি. ৱিৰেচনং পিৱিত্ৱা পুনপ্পুনং পৱিসন্তস্সাপি ৱট্টতিযেৱা’’তি (চূড়ৱ. অট্ঠ. ৩৭৪).

২৯৪০. ঊহতম্পীতি অঞ্ঞেন ৱা অত্তনা ৱা অসঞ্চিচ্চ ঊহতং মলেন দূসিতট্ঠানং. অধোৱিত্ৱাতি জলে সতি অসোধেত্ৱা জলে অসতি কট্ঠেন ৱা কেনচি ৱা পুঞ্ছিত্ৱা গন্তব্বং. যথাহ – ‘‘উদকং অত্থি ভাজনং নত্থি, অসন্তং নাম হোতি, ভাজনং অত্থি উদকং নত্থি, এতম্পি অসন্তং, উভযে পন অসতি অসন্তমেৱ, কট্ঠেন ৱা কেনচি ৱা পুঞ্ছিত্ৱা গন্তব্ব’’ন্তি (চূড়ৱ. অট্ঠ. ৩৭৪). উক্লাপাপি সচে হোন্তীতি ৱচ্চপস্সাৱট্ঠানানি সচে কচৱৰাকিণ্ণানি হোন্তি. ‘‘অসেসতো সোধেতব্ব’’ন্তি ইমিনা ততো কস্সচি কচৱৰস্স অপনযনং সোধনং নাম ন হোতি, নিস্সেসকচৱৰাপনযনমেৱ সোধনন্তি দীপেতি.

২৯৪১. পিঠৰোতি অৱলেখনকট্ঠনিক্খেপনভাজনং. কুম্ভী চে ৰিত্তাতি আচমনকুম্ভী সচে তুচ্ছা.

২৯৪২. এৱং ৱচ্চকুটিৱত্তং দস্সেত্ৱা সেনাসনৱত্তং দস্সেতুমাহ ‘‘অনজ্ঝিট্ঠো’’তিআদি. অনজ্ঝিট্ঠোতি অননুঞ্ঞাতো.

২৯৪৩. ৱুড্ঢং আপুচ্ছিত্ৱা কথেন্তস্সাতি যোজনা. ৱুড্ঢতৰাগমেতি যং আপুচ্ছিত্ৱা কথেতুমাৰদ্ধো, ততোপি ৱুড্ঢতৰস্স ভিক্খুনো আগমে সতি.

২৯৪৪. একৱিহাৰস্মিন্তি একস্মিং গেহে. ‘‘অনাপুচ্ছা’’তি ইদং ৱক্খমানেহি যথাৰহং যোজেতব্বং.

২৯৪৫. পঠমং যত্থ কত্থচি ৱুড্ঢানং সন্নিধানে কত্তব্বৱত্তং নিদ্দিট্ঠন্তি ইদানি একৱিহাৰে ৱসন্তেনাপি তস্স কাতব্বতং দস্সেতুং পুনপি ‘‘ন চ ধম্মো কথেতব্বো’’তি আহ. ধম্মচক্খুনাতি ধম্মলোচনেন ধম্মগৰুকেন, ইমিনা অতাদিসস্স কতো ৱাৰো নিৰত্থকোতি দীপেতি.

২৯৪৬. কাতব্বোতি জালেতব্বো. সোতি দীপো. ‘‘দ্ৱাৰং নাম যস্মা মহাৱড়ঞ্জং, তস্মা তত্থ আপুচ্ছনকিচ্চং নত্থী’’তি (চূড়ৱ. অট্ঠ. ৩৬৯) ৱচনতো তং অৱত্ৱা আপত্তিক্খেত্তমেৱ দস্সেতুমাহ ‘‘ৱাতপানকৱাটানি, থকেয্য ৱিৱৰেয্য নো’’তি.

২৯৪৭. ৱুড্ঢতো পৰিৱত্তযেতি যেন ৱুড্ঢো, ততো পৰিৱত্তযে, পিট্ঠিং অদস্সেত্ৱা ৱুড্ঢাভিমুখো তেন পৰিৱত্তযেতি অত্থো. চীৱৰকণ্ণেন ৱা কাযেন ৱা তং ৱুড্ঢং ন চ ঘট্টযে.

২৯৪৮. এৱং সেনাসনৱত্তং দস্সেত্ৱা জন্তাঘৰৱত্তং দস্সেতুমাহ ‘‘পুৰতো’’তিআদি. থেৰানং পুৰতো নেৱ ন্হাযেয্য, উপৰি পটিসোতে ন চ ন্হাযেয্য, ওতৰন্তানং ৱুড্ঢানং উত্তৰং উত্তৰন্তো মগ্গং দদেয্য, ন ঘট্টযে কাযেন ৱা চীৱৰেন ৱা ন ঘট্টযেয্যাতি যোজনা.

‘‘তিমণ্ডলং পটিচ্ছাদেন্তেন পৰিমণ্ডলং নিৱাসেত্ৱা কাযবন্ধনং বন্ধিত্ৱা’’তিআদিনা (চূড়ৱ. ৩৬৪) নযেন ৱুত্তানং ভত্তগ্গৱত্তানং সেখিযকথায ৱুত্তত্তা চ উপজ্ঝাযৱত্তাদীনং মহাখন্ধককথায ৱুত্তত্তা চ অনুমোদনৱত্তানং ‘‘অনুজানামি, ভিক্খৱে, ভত্তগ্গে চতূহি পঞ্চহি থেৰানুথেৰেহি ভিক্খূহি আগমেতু’’ন্তিআদিনা (চূড়ৱ. ৩৬২) নযেন ভত্তগ্গৱত্তেযেৱ অন্তোগধভাৱেন ৱুত্তত্তা চ নিদ্দেসে তানি ন ৱুত্তানি, তথাপি তেসু অনুমোদনৱত্তং এৱং ৱেদিতব্বং (চূড়ৱ. অট্ঠ. ৩৬২) – সঙ্ঘত্থেৰে অনুমোদনত্থায নিসিন্নে হেট্ঠা পটিপাটিযা চতূহি নিসীদিতব্বং. অনুথেৰে নিসিন্নে মহাথেৰেন চ হেট্ঠা চ তীহি নিসীদিতব্বং. পঞ্চমে নিসিন্নে উপৰি চতূহি নিসীদিতব্বং. সঙ্ঘত্থেৰেন হেট্ঠা দহৰভিক্খুস্মিং অজ্ঝিট্ঠেপি সঙ্ঘত্থেৰতো পট্ঠায চতূহি নিসীদিতব্বমেৱ. সচে পন অনুমোদকো ভিক্খু ‘‘গচ্ছথ, ভন্তে, আগমেতব্বকিচ্চং নত্থী’’তি ৱদতি, গন্তুং ৱট্টতি. মহাথেৰেন ‘‘গচ্ছাম, আৱুসো’’তি ৱুত্তে ‘‘গচ্ছথা’’তি ৱদতি, এৱম্পি ৱট্টতি. ‘‘বহিগামে আগমেস্সামা’’তি আভোগং কত্ৱাপি বহিগামং গন্ত্ৱা অত্তনো নিস্সিতকে ‘‘তুম্হে তস্স আগমনং আগমেথা’’তি ৱত্ৱাপি গন্তুং ৱট্টতিযেৱ. সচে পন মনুস্সা অত্তনো ৰুচিতেন একেন অনুমোদনং কাৰেন্তি, নেৱ তস্স অনুমোদতো আপত্তি, ন চ মহাথেৰস্স ভাৰো হোতি. উপনিসিন্নকথাযমেৱ হি মনুস্সেসু কথাপেন্তেসু মহাথেৰো আপুচ্ছিতব্বো, মহাথেৰেন চ অনুমোদনায অজ্ঝিট্ঠোৱ আগমেতব্বোতি ইদমেত্থ লক্খণন্তি.

২৯৪৯. ৱত্তন্তি যথাৱুত্তং আভিসমাচাৰিকৱত্তং. যথাহ – ‘‘আভিসমাচাৰিকং অপৰিপূৰেত্ৱা সীলং পৰিপূৰেস্সতীতি নেতং ঠানং ৱিজ্জতী’’তি. ন ৱিন্দতীতি ন লভতি.

২৯৫০. অনেকগ্গোতি ৱিক্খিত্তত্তাযেৱ অসমাহিতচিত্তো. ন চ পস্সতীতি ঞাণচক্খুনা ন পস্সতি, দট্ঠুং সমত্থো ন হোতীতি অত্থো. দুক্খাতি জাতিদুক্খাদিদুক্খতো.

২৯৫১. তস্মাতি যস্মা দুক্খা ন পৰিমুচ্চতি, তস্মা. ওৱাদং কত্ৱা কিং ৱিসেসং পাপুণাতীতি আহ ‘‘ওৱাদং বুদ্ধসেট্ঠস্স, কত্ৱা নিব্বানমেহিতী’’তি. এহিতি পাপুণিস্সতি.

ৱত্তক্খন্ধককথাৱণ্ণনা.