পাৰিৱাসিকক্খন্ধককথাৱণ্ণনা

২৭৪৮. এৱং মহাৱগ্গৱিনিচ্ছযং সঙ্খেপেন দস্সেত্ৱা চূড়ৱগ্গাগতৱিনিচ্ছযং দস্সেতুমাহ ‘‘তজ্জনীয’’ন্তিআদি. তজ্জনীযন্তি কলহকাৰকানং ভিক্খূনং ততো ৱিৰমনত্থায নিগ্গহৱসেন অনুঞ্ঞাতং ঞত্তিচতুত্থং তজ্জনীযকম্মঞ্চ. নিযস্সন্তি বালস্স অব্যত্তস্স আপত্তিবহুলস্স অনপদানস্স অননুলোমিকেহি গিহিসংসগ্গেহি সংসট্ঠস্স ৱিহৰতো ভিক্খুনো নিগ্গহৱসেন নিস্সায ৱসনত্থায কাতুং অনুঞ্ঞাতং ঞত্তিচতুত্থং নিযস্সকম্মঞ্চ.

পব্বাজন্তি কুলদূসকস্স ভিক্খুনো যত্থ তেন কুলদূসনং কতং, তত্থ ন লভিতব্বআৱাসত্থায নিগ্গহৱসেন অনুঞ্ঞাতং ঞত্তিচতুত্থং পব্বাজনীযকম্মঞ্চ. পটিসাৰণন্তি সদ্ধস্স উপাসকস্স দাযকস্স কাৰকস্স সঙ্ঘুপট্ঠাকস্স জাতিআদীহি অক্কোসৱত্থূহি অক্কোসকস্স ভিক্খুনো তংখমাপনত্থায নিগ্গহৱসেন অনুঞ্ঞাতং ঞত্তিচতুত্থং পটিসাৰণীযকম্মঞ্চ.

তিৱিধুক্খেপনন্তি আপত্তিযা অদস্সনে, আপত্তিযা অপ্পটিকম্মে, পাপিকায দিট্ঠিযা অপ্পটিনিস্সগ্গে চ ততো ওৰমিতুং নিগ্গহৱসেন অনুঞ্ঞাতং ঞত্তিচতুত্থং তিৱিধং উক্খেপনীযকম্মঞ্চাতি. দীপযেতি পাড়িযা, অট্ঠকথায চ ৱুত্তনযেন পকাসেয্যাতি অত্থো.

তজ্জনীযাদিকম্মানং ওসাৰণনিস্সাৰণৱসেন পচ্চেকং দুৱিধত্তেপি তং ভেদং অনামসিত্ৱা কেৱলং জাতিৱসেন ‘‘সত্ত কম্মানী’’তি ৱুত্তন্তি ৱেদিতব্বং. যথা দস্সিতো পনেতেসং ৱিসেসো অত্থুপ্পত্তিৱসেনাতি দট্ঠব্বো. ৱিত্থাৰো পনেসং কম্মক্খন্ধকতো ৱেদিতব্বো.

২৭৪৯. খন্ধকে কম্মসঙ্খাতে খন্ধকে আগতানি তেচত্তালীস ৱত্তানি. তদনন্তৰেতি তস্স কম্মক্খন্ধকস্স অনন্তৰে. খন্ধকেতি পাৰিৱাসিকক্খন্ধকে. নৱ অধিকানি যেসং তে নৱাধিকানি তিংসেৱ ৱত্তানি, একূনচত্তালীস ৱত্তানীতি ৱুত্তং হোতি.

কম্মক্খন্ধকে তাৱ –

‘‘আপত্তিযা অদস্সনে উক্খেপনীযকম্মকতেন, ভিক্খৱে, ভিক্খুনা সম্মা ৱত্তিতব্বং. তত্ৰাযং সম্মাৱত্তনা – ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো, ন ভিক্খুনোৱাদকসম্মুতি সাদিতব্বা, সম্মতেনাপি ভিক্খুনিযো ন ওৱদিতব্বা, যায আপত্তিযা সঙ্ঘেন আপত্তিযা অদস্সনে উক্খেপনীযকম্মং কতং হোতি, সা আপত্তি ন আপজ্জিতব্বা, অঞ্ঞা ৱা তাদিসিকা, ততো ৱা পাপিট্ঠতৰা, কম্মং ন গৰহিতব্বং, কম্মিকা ন গৰহিতব্বা, ন পকতত্তস্স ভিক্খুনো অভিৱাদনং পচ্চুট্ঠানং অঞ্জলিকম্মং সামীচিকম্মং আসনাভিহাৰো সেয্যাভিহাৰো পাদোদকং পাদপীঠং পাদকথলিকং পত্তচীৱৰপটিগ্গহণং নহানে পিট্ঠিপৰিকম্মং সাদিতব্বং, ন পকতত্তো ভিক্খু সীলৱিপত্তিযা অনুদ্ধংসেতব্বো, ন আচাৰৱিপত্তিযা অনুদ্ধংসেতব্বো, ন দিট্ঠিৱিপত্তিযা অনুদ্ধংসেতব্বো, ন আজীৱৱিপত্তিযা অনুদ্ধংসেতব্বো, ন ভিক্খু ভিক্খূহি ভেদেতব্বো, ন গিহিদ্ধজো ধাৰেতব্বো, ন তিত্থিযদ্ধজো ধাৰেতব্বো, ন তিত্থিযা সেৱিতব্বা, ভিক্খূ সেৱিতব্বা, ভিক্খুসিক্খায সিক্খিতব্বং, ন পকতত্তেন ভিক্খুনা সদ্ধিং একচ্ছন্নে আৱাসে ৱত্থব্বং, ন একচ্ছন্নে অনাৱাসে ৱত্থব্বং, ন একচ্ছন্নে আৱাসে ৱা অনাৱাসে ৱা ৱত্থব্বং, পকতত্তং ভিক্খুং দিস্ৱা আসনা ৱুট্ঠাতব্বং, ন পকতত্তো ভিক্খু আসাদেতব্বো অন্তো ৱা বহি ৱা, ন পকতত্তস্স ভিক্খুনো উপোসথো ঠপেতব্বো, ন পৱাৰণা ঠপেতব্বা, ন সৱচনীযং কাতব্বং, ন অনুৱাদো পট্ঠপেতব্বো, ন ওকাসো কাৰেতব্বো, ন চোদেতব্বো, ন সাৰেতব্বো, ন ভিক্খূহি সম্পযোজেতব্ব’’ন্তি (চূড়ৱ. ৫১) –

এৱং চেতানি তেচত্তালীস ৱত্তানি সন্ধায ৱুত্তং ‘‘তেচত্তালীস ৱত্তানি, খন্ধকে কম্মসঞ্ঞিতে’’তি.

পাৰিৱাসিকক্খন্ধকে (চূড়ৱ. ৭৬-৮২) –

‘‘পাৰিৱাসিকেন, ভিক্খৱে, ভিক্খুনা সম্মা ৱত্তিতব্বং. তত্ৰাযং সম্মাৱত্তনা – ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো, ন ভিক্খুনোৱাদকসম্মুতি সাদিতব্বা, সম্মতেনপি ভিক্খুনিযো ন ওৱদিতব্বা, যায আপত্তিযা সঙ্ঘেন পৰিৱাসো দিন্নো হোতি, সা আপত্তি ন আপজ্জিতব্বা, অঞ্ঞা ৱা তাদিসিকা, ততো ৱা পাপিট্ঠতৰা, কম্মং ন গৰহিতব্বং, কম্মিকা ন গৰহিতব্বা, ন পকতত্তস্স ভিক্খুনো উপোসথো ঠপেতব্বো, ন পৱাৰণা ঠপেতব্বা, ন সৱচনীযং কাতব্বং, ন অনুৱাদো পট্ঠপেতব্বো, ন ওকাসো কাৰেতব্বো, ন চোদেতব্বো, ন সাৰেতব্বো, ন ভিক্খূহি সম্পযোজেতব্বং.

‘‘ন, ভিক্খৱে, পাৰিৱাসিকেন ভিক্খুনা পকতত্তস্স ভিক্খুনো পুৰতো গন্তব্বং, ন পুৰতো নিসীদিতব্বং, যো হোতি সঙ্ঘস্স আসনপৰিযন্তো সেয্যাপৰিযন্তো ৱিহাৰপৰিযন্তো, সো তস্স পদাতব্বো, তেন চ সো সাদিতব্বো.

‘‘ন, ভিক্খৱে, পাৰিৱাসিকেন ভিক্খুনা পকতত্তস্স ভিক্খুনো পুৰেসমণেন ৱা পচ্ছাসমণেন ৱা কুলানি উপসঙ্কমিতব্বানি, ন আৰঞ্ঞিকঙ্গং সমাদাতব্বং, ন পিণ্ডপাতিকঙ্গং সমাদাতব্বং, ন চ তপ্পচ্চযা পিণ্ডপাতো নীহৰাপেতব্বো ‘মা মং জানিংসূ’তি.

‘‘পাৰিৱাসিকেন, ভিক্খৱে, ভিক্খুনা আগন্তুকেন আৰোচেতব্বং, আগন্তুকস্স আৰোচেতব্বং, উপোসথে আৰোচেতব্বং, পৱাৰণায আৰোচেতব্বং, সচে গিলানো হোতি, দূতেনপি আৰোচেতব্বং.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা অভিক্খুকো আৱাসো গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা অভিক্খুকো অনাৱাসো গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা অভিক্খুকো আৱাসো ৱা অনাৱাসো ৱা গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা অভিক্খুকো আৱাসো গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা অভিক্খুকো অনাৱাসো গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা অভিক্খুকো আৱাসো ৱা অনাৱাসো ৱা গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা অভিক্খুকো আৱাসো গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা অভিক্খুকো অনাৱাসো গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা অভিক্খুকো আৱাসো ৱা অনাৱাসো ৱা গন্তব্বো অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা সভিক্খুকো আৱাসো গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা সভিক্খুকো অনাৱাসো গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা সভিক্খুকো আৱাসো ৱা অনাৱাসো ৱা গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা সভিক্খুকো আৱাসো গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা সভিক্খুকো অনাৱাসো গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা সভিক্খুকো আৱাসো ৱা অনাৱাসো ৱা গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা সভিক্খুকো আৱাসো গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা সভিক্খুকো অনাৱাসো গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা. ন, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা সভিক্খুকো আৱাসো ৱা অনাৱাসো ৱা গন্তব্বো যত্থস্সু ভিক্খূ নানাসংৱাসকা অঞ্ঞত্ৰ পকতত্তেন অঞ্ঞত্ৰ অন্তৰাযা.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা আৱাসা সভিক্খুকো আৱাসো যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা আৱাসা সভিক্খুকো অনাৱাসো যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা আৱাসা সভিক্খুকো আৱাসো ৱা অনাৱাসো ৱা যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা সভিক্খুকো আৱাসো যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা সভিক্খুকো অনাৱাসো যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা অনাৱাসা সভিক্খুকো আৱাসো ৱা অনাৱাসো ৱা যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা সভিক্খুকো আৱাসো যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা সভিক্খুকো অনাৱাসো যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘গন্তব্বো, ভিক্খৱে, পাৰিৱাসিকেন ভিক্খুনা সভিক্খুকা আৱাসা ৱা অনাৱাসা ৱা সভিক্খুকো আৱাসো ৱা অনাৱাসো ৱা যত্থস্সু ভিক্খূ সমানসংৱাসকা যং জঞ্ঞা ‘সক্কোমি অজ্জেৱ গন্তু’ন্তি.

‘‘ন, ভিক্খৱে, পাৰিৱাসিকেন ভিক্খুনা পকতত্তেন ভিক্খুনা সদ্ধিং একচ্ছন্নে আৱাসে ৱত্থব্বং, ন একচ্ছন্নে অনাৱাসে ৱত্থব্বং, ন একচ্ছন্নে আৱাসে ৱা অনাৱাসে ৱা ৱত্থব্বং, পকতত্তং ভিক্খুং দিস্ৱা আসনা ৱুট্ঠাতব্বং, পকতত্তো ভিক্খু আসনেন নিমন্তেতব্বো, ন পকতত্তেন ভিক্খুনা সদ্ধিং একাসনে নিসীদিতব্বং, ন নীচে আসনে নিসিন্নে উচ্চে আসনে নিসীদিতব্বং, ন ছমাযং নিসিন্নে আসনে নিসীদিতব্বং, ন একচঙ্কমে চঙ্কমিতব্বং, ন নীচে চঙ্কমে চঙ্কমন্তে উচ্চে চঙ্কমে চঙ্কমিতব্বং, ন ছমাযং চঙ্কমন্তে চঙ্কমে চঙ্কমিতব্বং.

‘‘ন, ভিক্খৱে, পাৰিৱাসিকেন ভিক্খুনা পাৰিৱাসিকেন ৱুড্ঢতৰেন ভিক্খুনা সদ্ধিং…পে… মূলাযপটিকস্সনাৰহেন ভিক্খুনা সদ্ধিং…পে… মানত্তাৰহেন ভিক্খুনা সদ্ধিং…পে… মানত্তচাৰিকেন ভিক্খুনা সদ্ধিং…পে… অব্ভানাৰহেন ভিক্খুনা সদ্ধিং একচ্ছন্নে আৱাসে ৱত্থব্বং, ন একচ্ছন্নে অনাৱাসে ৱত্থব্বং, ন একচ্ছন্নে আৱাসে ৱা অনাৱাসে ৱা ৱত্থব্বং, ন একাসনে নিসীদিতব্বং, ন নীচে আসনে নিসিন্নে উচ্চে আসনে নিসীদিতব্বং, ন ছমাযং নিসিন্নে আসনে নিসীদিতব্বং, ন একচঙ্কমে চঙ্কমিতব্বং, ন নীচে চঙ্কমে চঙ্কমন্তে উচ্চে চঙ্কমে চঙ্কমিতব্বং, ন ছমাযং চঙ্কমন্তে চঙ্কমে চঙ্কমিতব্বং.

‘‘পাৰিৱাসিকচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য, অকম্মং ন চ কৰণীয’’ন্তি (চূড়ৱ. ৭৬-৮২) –

এৱং পাৰিৱাসিকানং চতুনৱুতি ৱত্তানি.

সা চ নেসং চতুনৱুতিসঙ্খা এৱং ৱেদিতব্বা – নউপসম্পাদনাদিনকম্মিকগৰহপৰিযোসানানি নৱ ৱত্তানি, ততো পকতত্তস্স উপোসথট্ঠপনাদিভিক্খূহিসম্পযোজনপৰিযোসানানি অট্ঠ, ততো নপুৰতোগমনাদী পঞ্চ, নপুৰেগমনাদী চত্তাৰি, আগন্তুকেন আৰোচনাদী চত্তাৰীতি তিংস, সভিক্খুকাৱাসাদিতো অভিক্খুকাৱাসাদিগমনপঅসংযুত্তানি তীণি নৱকানি চাতি সত্তপঞ্ঞাস, ততো নপকতত্তেন সদ্ধিং একচ্ছন্নৱাসাদিপটিসংযুত্তানি একাদস, ততো নপাৰিৱাসিকৱুড্ঢতৰমূলাযপটিকস্সনাৰহমানত্তাৰহমানত্তচাৰিকঅব্ভানাৰহেহি সদ্ধিং একচ্ছন্নৱাসাদিপটিসংযুত্তানি পচ্চেকং একাদস কত্ৱা পঞ্চপঞ্ঞাসায ৱত্তেসু পাৰিৱাসিকৱুড্ঢতৰমূলাযপটিকস্সনাৰহমানত্তাৰহানং তিণ্ণং সমানত্তা তেসু একং একাদসকং, মানত্তচাৰিকঅব্ভানাৰহানং দ্ৱিন্নং সমানত্তা তেসু একং একাদসকন্তি দুৱে একাদসকানি, অন্তে পাৰিৱাসিকচতুত্থস্স সঙ্ঘস্স পৰিৱাসাদিদানচতুক্কে গণপূৰণত্থদোসতো নিৱত্তিৱসেন চত্তাৰি চত্তাৰীতি চতুনৱুতি ৱত্তানি. তানি অগ্গহিতগ্গহণেন একূনচত্তালীসৱত্তানি নাম. আদিতো নৱ, উপোসথট্ঠপনাদীনি অট্ঠ, পকতত্তেন একচ্ছন্নৱাসাদী চত্তাৰি চাতি একৱীসতি ৱত্তানি কম্মক্খন্ধকে গহিতত্তা ইধ গণনায অগ্গহেত্ৱা ততো সেসেসু তেসত্ততিযা ৱত্তেসু পাৰিৱাসিকৱুড্ঢতৰাদীহি একচ্ছন্নে ৱাসাদিপটিসংযুত্তানি দ্ৱাৱীসতি ৱত্তানি পকতত্তেহি সমানত্তা তানি চ ‘‘গন্তব্বো ভিক্খৱে’’তিআদিকং নৱকং তথা গচ্ছন্তস্স অনাপত্তিদস্সনপৰং, ন আৱাসতো গচ্ছন্তস্স আপত্তিদস্সনপৰন্তি তঞ্চ অগ্গহেত্ৱা অৱসেসেসু দ্ৱাচত্তালীসৱত্তেসু পাৰিৱাসিকচতউত্থাদিকম্মচতুক্কং গৰুকাপত্তিৱুট্ঠানায গণপূৰণত্থসামঞ্ঞেন একং কত্ৱা তযো অপনেত্ৱা গণিতানি একূনচত্তালীসানি হোন্তীতি ৱুত্তং ‘‘নৱাধিকানি তিংসেৱ, খন্ধকে তদনন্তৰে’’তি.

২৭৫০. ইমানি একূনচত্তালীস ৱত্তানি পুৰিমেহি তেচত্তালীসৱত্তেহি সদ্ধিং দ্ৱাসীতি হোন্তীতি আহ ‘‘এৱং সব্বানি…পে… গহিতাগহণেন তূ’’তি.

এৱং কম্মক্খন্ধকপাৰিৱাসিকক্খন্ধকেসু মহেসিনা ৱুত্তানি খন্ধকৱত্তানি গহিতাগহণেন দ্ৱাসীতি এৱ হোন্তীতি যোজনা. এৱমেত্থ দ্ৱাসীতিক্খন্ধকৱত্তানি দস্সিতানি.

আগমট্ঠকথাৱণ্ণনাযং পন –

‘‘পাৰিৱাসিকানং ভিক্খূনং ৱত্তং পঞ্ঞপেস্সামীতি (চূড়ৱ. ৭৫) আৰভিত্ৱা ‘ন উপসম্পাদেতব্বং…পে… ন ছমাযং চঙ্কমন্তে চঙ্কমে চঙ্কমিতব্ব’ন্তি (চূড়ৱ. ৭৬-৮১) ৱুত্তাৱসানানি ছসট্ঠি, ততো পৰং ‘ন, ভিক্খৱে, পাৰিৱাসিকেন ভিক্খুনা পাৰিৱাসিকেন ৱুড্ঢতৰেন ভিক্খুনা সদ্ধিং, মূলাযপটিকস্সনাৰহেন, মানত্তাৰহেন, মানত্তচাৰিকেন, অব্ভানাৰহেন ভিক্খুনা সদ্ধিং একচ্ছন্নে আৱাসে ৱত্থব্ব’ন্তিআদীনং (চূড়ৱ. ৮২) পকতত্তে চৰিতব্বেহি অনঞ্ঞত্তা ৱিসুং তে অগণেত্ৱা পাৰিৱাসিকৱুড্ঢতৰাদীসু পুগ্গলন্তৰেসু চৰিতব্বত্তা তেসং ৱসেন সম্পিণ্ডেত্ৱা একেকং কত্ৱা গণিতানি পঞ্চাতি একসত্ততি ৱত্তানি, উক্খেপনীযকম্মকতৱত্তেসু ৱত্তপঞ্ঞাপনৱসেন ৱুত্তং ‘ন পকতত্তস্স ভিক্খুনো অভিৱাদনং …পে… নহানে পিট্ঠিপৰিকম্মং সাদিতব্ব’ন্তি (চূড়ৱ. ৫১) ইদং অভিৱাদনাদীনং অসাদিযনং একং, ‘ন পকতত্তো ভিক্খু সীলৱিপত্তিযা অনুদ্ধংসেতব্বো’তিআদীনি চ দসাতি এৱমেতানি দ্ৱাসীতি হোন্তি. এতেস্ৱেৱ কানিচি তজ্জনীযকম্মাদিৱত্তানি, কানিচি পাৰিৱাসিকাদিৱত্তানীতি অগ্গহিতগ্গহণেন দ্ৱাসীতি এৱা’’তি (ম. নি. টী. ২.২৫; সাৰত্থ. টী. ২.৩৯; ৱি. ৱি. টী. ১.৩৯) –

ৱুত্তং. এতানি পন ৱত্তানি কদাচি তজ্জনীযকম্মকতাদিকালে, পাৰিৱাসিকাদিকালে চ চৰিতব্বানি খুদ্দকৱত্তানীতি গহেতব্বানি আগন্তুকৱত্তাদীনং চুদ্দসমহাৱত্তানং ৱক্খমানত্তা.

২৭৫১. ইদানি পাৰিৱাসিকস্স ভিক্খুনো ৰত্তিচ্ছেদং, ৱত্তভেদঞ্চ দস্সেতুমাহ ‘‘পৰিৱাসঞ্চ ৱত্তঞ্চা’’তিআদি. পৰিৱাসঞ্চ ৱত্তঞ্চ সমাদিন্নস্সাতি ‘‘পৰিৱাসং সমাদিযামী’’তি পৰিৱাসঞ্চ ‘‘ৱত্তং সমাদিযামী’’তি ৱত্তঞ্চ পকতত্তস্স ভিক্খুনো সন্তিকে উক্কুটিকং নিসীদিত্ৱা অঞ্জলিং পগ্গহেত্ৱা ৱচীভেদং কত্ৱা সমাদিন্নস্স. ভিক্খুনোতি পাৰিৱাসিকস্স ভিক্খুনো.

২৭৫২. সহৱাসাদযো ‘‘একচ্ছন্নে’’তিআদিনা সযমেৱ ৱক্খতি. সহৱাসো, ৱিনাৱাসো, অনাৰোচনমেৱ চাতি ইমেহি তীহি পাৰিৱাসিকভিক্খুস্স ৰত্তিচ্ছেদো চ দুক্কটঞ্চ হোতীতি যোজনা.

২৭৫৩. উদকপাতেন সমন্তা নিব্বকোসস্স উদকপাতট্ঠানেন. একচ্ছন্নেতি একচ্ছন্নে পৰিচ্ছন্নে ৱা অপৰিচ্ছন্নে ৱা আৱাসে. পকতত্তেন ভিক্খুনা সহ উক্খিত্তস্স নিৱাসো নিৱাৰিতোতি যোজনা. ‘‘নিৱাৰিতো’’তি ইমিনা দুক্কটং হোতীতি দীপেতি.

২৭৫৪. অন্তোযেৱাতি একচ্ছন্নস্স আৱাসপৰিচ্ছেদস্স অন্তোযেৱ. ‘‘ন লব্ভতী’’তি ইমিনা ৰত্তিচ্ছেদো চ দুক্কটঞ্চ হোতীতি দীপেতি.

২৭৫৫. মহাঅট্ঠকথাদিসূতি আদি-সদ্দেন কুৰুন্দট্ঠকথাদিং সঙ্গণ্হাতি. উভিন্নন্তি উক্খিত্তকপাৰিৱাসিকানং. ইতি অৱিসেসেন নিদ্দিট্ঠন্তি যোজনা.

২৭৫৬. ইমিনা সহৱাসেন ৰত্তিচ্ছেদঞ্চ দুক্কটঞ্চ দস্সেত্ৱা ৱিনাৱাসেন দস্সেতুমাহ ‘‘অভিক্খুকে পনাৱাসে’’তি. আৱাসেতি ৱসনত্থায কতসেনাসনে. অনাৱাসেতি ৱাসত্থায অকতে চেতিযঘৰে ৱা বোধিঘৰে ৱা সম্মজ্জনিঅট্টকে ৱা দাৰুঅট্টকে ৱা পানীযমাড়ে ৱা ৱচ্চকুটিযং ৱা দ্ৱাৰকোট্ঠকে ৱা অঞ্ঞত্ৰ ৱা যত্থ কত্থচি এৱৰূপে ঠানে. ৱিপ্পৱাসং ৱসন্তস্সাতি পকতত্তেন ৱিনা ৱাসং কপ্পেন্তস্স. ৰত্তিচ্ছেদো চ দুক্কটন্তি ৰত্তিচ্ছেদো চেৱ ৱত্তভেদদুক্কটঞ্চ হোতি.

২৭৫৭. এৱং ৱিপ্পৱাসেন ৰত্তিচ্ছেদদুক্কটানি দস্সেত্ৱা অনাৰোচনেন দস্সেতুমাহ ‘‘পাৰিৱাসিকভিক্খুস্সা’’তিআদি. ভিক্খুং দিস্ৱানাতি আকাসেনাপি গচ্ছন্তং সমানসংৱাসকং আগন্তুকং ভিক্খুং দিস্ৱা. তঙ্খণেতি তস্মিং দিট্ঠক্খণেযেৱ. ‘‘অনাৰোচেন্তস্স এৱ এতস্সা’’তি পদচ্ছেদো. এৱকাৰেন ৰত্তিচ্ছেদো চ দুক্কটঞ্চাতি উভযং এতস্স হোতীতি দীপেন্তেন অদিট্ঠো চে, ৰত্তিচ্ছেদোৱ হোতীতি ঞাপেতি. যথাহ – ‘‘সোপিস্স ৰত্তিচ্ছেদং কৰোতি, অঞ্ঞাতত্তা পন ৱত্তভেদদুক্কটং নত্থী’’তি (চূড়ৱ. অট্ঠ. ৭৫). নানাসংৱাসকেন সহ ৱিনযকম্মং কাতুং ন ৱট্টতি, তস্স অনাৰোচনেপি ৰত্তিচ্ছেদো ন হোতি.

২৭৫৮-৯. পাৰিৱাসিকো ভিক্খু যত্থ সঙ্ঘনৱকট্ঠানে ঠিতো, তত্থেৱ তস্মিংযেৱ ঠানে ঠত্ৱা যথাৱুড্ঢং পকতত্তেহিপি সদ্ধিং ৱুড্ঢপটিপাটিযা পঞ্চ কিচ্চানি কাতুং ৱট্টতীতি যোজনা.

তানি সৰূপতো দস্সেতুমাহ ‘‘উপোসথপৱাৰণ’’ন্তিআদি. উপোসথপৱাৰণং যথাৱুড্ঢং কাতুং লভতীতি যোজনা. দেন্তীতি এত্থ ‘‘ঘণ্টিং পহৰিত্ৱা’’তি সেসো. সঙ্ঘদাযকাতি কম্মধাৰযসমাসো. সঙ্ঘস্স একত্তেপি গৰূসু বহুৱচননিদ্দেসো. ‘‘দেতি চে সঙ্ঘদাযকো’’তিপি পাঠো. তত্থ ঘণ্টিং পহৰিত্ৱা ভাজেত্ৱা দেন্তো সঙ্ঘো ৱস্সিকসাটিকং দেতি চে, পাৰিৱাসিকো যথাৱুড্ঢং অত্তনো পত্তট্ঠানে লভতীতি যোজনা.

ওণোজনন্তি ৱিস্সজ্জনং, সঙ্ঘতো অত্তনো পত্তানং দ্ৱিন্নং, তিণ্ণং ৱা উদ্দেসভত্তাদীনং অত্তনো পুগ্গলিকভত্তপচ্চাসায পটিগ্গহেত্ৱা ‘‘ময্হং অজ্জ ভত্তপচ্চাসা অত্থি, স্ৱে গণ্হিস্সামী’’তি ৱত্ৱা সঙ্ঘৱিস্সজ্জনং লভতীতি ৱুত্তং হোতি. ভত্তন্তি আগতাগতেহি ৱুড্ঢপটিপাটিযা গহেত্ৱা গন্তব্বং ৱিহাৰে সঙ্ঘস্স চতুস্সালভত্তং. তথা পাৰিৱাসিকো যথাৱুড্ঢং লভতীতি যোজনা. ইমে পঞ্চাতি ৱুত্তমেৱত্থং নিগমযতি.

তত্ৰাযং ৱিনিচ্ছযো (চূড়ৱ. অট্ঠ. ৭৫) – উপোসথপৱাৰণে তাৱ পাতিমোক্খে উদ্দিস্সমানে হত্থপাসে নিসীদিতুং ৱট্টতি. মহাপচ্চৰিযং পন ‘‘পাড়িযা অনিসীদিত্ৱা পাড়িং ৱিহায হত্থপাসং অমুঞ্চন্তেন নিসীদিতব্ব’’ন্তি ৱুত্তং. পাৰিসুদ্ধিউপোসথে কৰিযমানে সঙ্ঘনৱকট্ঠানে নিসীদিত্ৱা তত্থেৱ নিসিন্নেন অত্তনো পাড়িযা পাৰিসুদ্ধিউপোসথো কাতব্বোৱ. পৱাৰণাযপি সঙ্ঘনৱকট্ঠানে নিসীদিত্ৱা তত্থেৱ নিসিন্নেন অত্তনো পাড়িযা পৱাৰেতব্বং. সঙ্ঘেন ঘণ্টিং পহৰিত্ৱা ভাজিযমানং ৱস্সিকসাটিকম্পি অত্তনো পত্তট্ঠানে গহেতুং ৱট্টতি.

ওণোজনে সচে পাৰিৱাসিকস্স দ্ৱে তীণি উদ্দেসভত্তাদীনি পাপুণন্তি, অঞ্ঞা চস্স পুগ্গলিকভত্তপচ্চাসা হোতি, তানি পটিপাটিযা গহেত্ৱা ‘‘ভন্তে, হেট্ঠা গাহেথ, অজ্জ ময্হং ভত্তপচ্চাসা অত্থি, স্ৱেৱ গণ্হিস্সামী’’তি ৱত্ৱা ৱিস্সজ্জেতব্বানি, এৱং তানি পুনদিৱসেসু গণ্হিতুং লভতি. ‘‘পুনদিৱসে সব্বপঠমং এতস্স দাতব্ব’’ন্তি কুৰুন্দিযং ৱুত্তং. যদি পন ন গণ্হাতি ন ৱিস্সজ্জেতি, পুনদিৱসে ন লভতি. ইদং ওণোজনং নাম পাৰিৱাসিকস্সেৱ ওদিস্স অনুঞ্ঞাতং. কস্মা? তস্স হি সঙ্ঘনৱকট্ঠানে নিসিন্নস্স ভত্তগ্গে যাগুখজ্জকাদীনি পাপুণন্তি ৱা ন ৱা, তস্মা ‘‘সো ভিক্খাহাৰেন মা কিলমিত্থা’’তি ইদমস্স সঙ্গহকৰণত্থায ওদিস্স অনুঞ্ঞাতং.

ভত্তে চতুস্সালভত্তং যথাৱুড্ঢং লভতি, পাড়িযা পন গন্তুং ৱা ঠাতুং ৱা ন লভতি. তস্মা পাড়িতো ওসক্কিত্ৱা হত্থপাসে ঠিতেন হত্থং পসাৰেত্ৱা যথা সেনো নিপতিত্ৱা গণ্হাতি, এৱং গণ্হিতব্বং. আৰামিকসমণুদ্দেসেহি আহৰাপেতুং ন লভতি. সচে সযমেৱ আহৰন্তি, ৱট্টতি. ৰঞ্ঞো মহাপেড়ভত্তেপি এসেৱ নযো. চতুস্সালভত্তে পন সচে ওণোজনং কত্তুকামো হোতি, অত্তনো অত্থায উক্খিত্তে পিণ্ডে ‘‘অজ্জ মে ভত্তং অত্থি, স্ৱেৱ গণ্হিস্সামী’’তি ৱত্তব্বং. ‘‘পুনদিৱসে দ্ৱে পিণ্ডে লভতী’’তি (চূড়ৱ. অট্ঠ. ৭৫) মহাপচ্চৰিযং ৱুত্তং. উদ্দেসভত্তাদীনিপি পাড়িতো ওসক্কিত্ৱাৱ গহেতব্বানি. যত্থ পন নিসীদাপেত্ৱা পৰিৱিসন্তি, তত্থ সামণেৰানং জেট্ঠকেন ভিক্খূনং সঙ্ঘনৱকেন হুত্ৱা নিসীদিতব্বন্তি.

পাৰিৱাসিকক্খন্ধককথাৱণ্ণনা.