ভেসজ্জক্খন্ধককথাৱণ্ণনা

২৬৬৫. গহপতিস্স ভূমি, সম্মুতিভূমি, উস্সাৱনন্তিকাভূমি, গোনিসাদিভূমীতি কপ্পিযভূমিযো চতস্সো হোন্তীতি ৱুত্তা ভগৱতাতি যোজনা.

২৬৬৬. কথং কপ্পিযং কত্তব্বন্তি ‘‘অনুজানামি, ভিক্খৱে, চতস্সো কপ্পিযভূমিযো উস্সাৱনন্তিকং গোনিসাদিকং গহপতিং সম্মুতি’’ন্তি (মহাৱ. ২৯৫) এৱং চতস্সো ভূমিযো উদ্ধৰিত্ৱা তাসং সামঞ্ঞলক্খণং দস্সেতুমাহ ‘‘সঙ্ঘস্সা’’তিআদি. সঙ্ঘস্স সন্তকং ৱাসত্থায কতং গেহং ৱা ভিক্খুনো সন্তকং ৱাসত্থায কতং গেহং ৱাতি যোজনা. কপ্পিযং কত্তব্বন্তি কপ্পিযট্ঠানং কত্তব্বং. সহসেয্যপ্পহোনকন্তি সব্বচ্ছন্নপৰিচ্ছন্নাদিলক্খণেন সহসেয্যাৰহং.

২৬৬৭. ইদানি চতস্সোপি ভূমিযো সৰূপতো দস্সেতুমাহ ‘‘ঠপেত্ৱা’’তিআদি. ভিক্খুং ঠপেত্ৱা অঞ্ঞেহি কপ্পিযভূমিযা অত্থায দিন্নং ৱা তেসং সন্তকং ৱা যং গেহং, ইদং এৱ গহপতিভূমি নামাতি যোজনা.

২৬৬৮. যা পন কুটি সঙ্ঘেন সম্মতা ঞত্তিদুতিযায কম্মৱাচায, সা সম্মুতিকা নাম. তস্সা সম্মন্ননকালে কম্মৱাচং অৱত্ৱা অপলোকনং ৱা কাতুং ৱট্টতেৱাতি যোজনা.

২৬৬৯-৭০. পঠমইট্ঠকায ৱা পঠমপাসাণস্স ৱা পঠমত্থম্ভস্স ৱা আদি-গ্গহণেন পঠমভিত্তিপাদস্স ৱা ঠপনে পৰেসু মনুস্সেসু উক্খিপিত্ৱা ঠপেন্তেসু সমন্ততো পৰিৱাৰেত্ৱা ‘‘কপ্পিযকুটিং কৰোম, কপ্পিযকুটিং কৰোমা’’তি অভিক্খণং ৱদন্তেহি আমসিত্ৱা ৱা সযমেৱ উক্খিপিত্ৱা ৱা ইট্ঠকা ঠপেয্য পাসাণো ৱা থম্ভো ৱা ভিত্তিপাদো ৱা ঠপেয্য ঠপেতব্বো, অযং উস্সাৱনন্তিকা কুটীতি যোজনা.

২৬৭১. ইট্ঠকাদিপতিট্ঠানন্তি পঠমিট্ঠকাদীনং ভূমিযং পতিট্ঠানং. ৱদতন্তি ‘‘কপ্পিযকুটিং কৰোম, কপ্পিযকুটিং কৰোমা’’তি ৱদন্তানং. সমকালং তু ৱট্টতীতি এককালং ৱট্টতি, ইমিনা ‘‘সচে হি অনিট্ঠিতে ৱচনে থম্ভো পতিট্ঠাতি, অপ্পতিট্ঠিতে ৱা তস্মিং ৱচনং নিট্ঠাতি, অকতা হোতি কপ্পিযকুটী’’তি (মহাৱ. অট্ঠ. ২৯৫) অট্ঠকথাৱিনিচ্ছযো সূচিতো.

২৬৭২. আৰামো সকলো অপৰিক্খিত্তো ৱা যেভুয্যতো অপৰিক্খিত্তো ৱাতি দুৱিধোপি ৱিঞ্ঞূহি ৱিনযধৰেহি ‘‘গোনিসাদী’’তি ৱুচ্চতি. পৱেসনিৱাৰণাভাৱেন পৱিট্ঠানং গুন্নং নিসজ্জাযোগতো তথা ৱুচ্চতীতি যোজনা.

২৬৭৩. পযোজনং দস্সেতুমাহ ‘‘এত্থ পক্কঞ্চা’’তিআদি. আমিসন্তি পুৰিমকালিকদ্ৱযং. ‘‘আমিস’’ন্তি ইমিনা নিৰামিসং ইতৰকালিকদ্ৱযং অকপ্পিযকুটিযং ৱুত্থম্পি পক্কম্পি কপ্পতীতি দীপেতি.

২৬৭৪-৫. ইমা কপ্পিযকুটিযো কদা জহিতৱত্থুকা হোন্তীতি আহ ‘‘উস্সাৱনন্তিকা যা সা’’তিআদি. যা উস্সাৱনন্তিকা যেসু থম্ভাদীসু অধিট্ঠিতা, সা তেসু থম্ভাদীসু অপনীতেসু তদঞ্ঞেসুপি থম্ভাদীসু তিট্ঠতীতি যোজনা.

সব্বেসু থম্ভাদীসু অপনীতেসু সা জহিতৱত্থুকা সিযাতি যোজনা. গোনিসাদিকুটি পৰিক্খিত্তা ৱতিআদীহি জহিতৱত্থুকা সিযা. পৰিক্খিত্তাতি চ ‘‘আৰামো পন উপড্ঢপৰিক্খিত্তোপি বহুতৰং পৰিক্খিত্তোপি পৰিক্খিত্তোযেৱ নামা’’তি (মহাৱ. অট্ঠ. ২৯৫) কুৰুন্দিমহাপচ্চৰিযাদীসু ৱুত্তত্তা ন কেৱলং সব্বপৰিক্খিত্তাৱ, উপড্ঢপৰিক্খিত্তাপি যেভুয্যপৰিক্খিত্তাপি গহেতব্বা.

সেসাতি গহপতিসম্মুতিকুটিযো. ছদননাসতো জহিতৱত্থুকা সিযুন্তি যোজনা. ছদননাসতোতি এত্থ ‘‘গোপানসিমত্তং ঠপেত্ৱা’’তি সেসো. সচে গোপানসীনং উপৰি একম্পি পক্খপাসমণ্ডলং অত্থি, ৰক্খতি. যত্ৰ পনিমা চতস্সোপি কপ্পিযভূমিযো নত্থি, তত্থ কিং কাতব্বং? অনুপসম্পন্নস্স দত্ৱা তস্স সন্তকং কত্ৱা পৰিভুঞ্জিতব্বং.

২৬৭৬. ভিক্খুং ঠপেত্ৱা অঞ্ঞেসং হত্থতো পটিগ্গহো চ তেসং সন্নিধি চ তেসং অন্তোৱুত্থঞ্চ ভিক্খুস্স ৱট্টতীতি যোজনা.

২৬৭৭. ভিক্খুস্স সন্তকং সঙ্ঘিকম্পি ৱা অকপ্পিযভূমিযং সহসেয্যপ্পহোনকে গেহে অন্তোৱুত্থঞ্চ অন্তোপক্কঞ্চ ভিক্খুস্স ন ৱট্টতি. ভিক্খুনিযা সন্তকং সঙ্ঘিকম্পি ৱা অকপ্পিযভূমিযং সহসেয্যপ্পহোনকে গেহে অন্তোৱুত্থঞ্চ অন্তোপক্কঞ্চ ভিক্খুনিযা ন ৱট্টতীতি এৱং উভিন্নং ভিক্খুভিক্খুনীনং ন ৱট্টতীতি যোজনা.

২৬৭৮. অকপ্পকুটিযাতি অকপ্পিযকুটিযা, ‘‘অকপ্পিযভূমিযং সহসেয্যপ্পহোনকে গেহে’’তি অট্ঠকথাযং ৱুত্তায অকপ্পিযভূমিযাতি অত্থো. আদি-সদ্দেন নৱনীততেলমধুফাণিতানং গহণং.

২৬৭৯. তেহেৱ অন্তোৱুত্থেহি সপ্পিআদীহি সত্তাহকালিকেহি সহ ভিক্খুনা পক্কং তং যাৱজীৱিকং নিৰামিসং সত্তাহং পৰিভুঞ্জিতুং ৱট্টতেৱাতি যোজনা.

২৬৮০. পক্কং সামংপক্কং তং যাৱজীৱিকং সচে আমিসসংসট্ঠং পৰিভুঞ্জতি, অন্তোৱুত্থঞ্চ ভুঞ্জতি, কিঞ্চ ভিয্যো সামংপক্কঞ্চ ভুঞ্জতীতি যোজনা. যাৱজীৱিকস্স আমিসসংসট্ঠস্স আমিসগতিকত্তা ‘‘অন্তোৱুত্থ’’ন্তি ৱুত্তং.

২৬৮২. উদকং ন হোতি কালিকং চতূসু কালিকেসু অসঙ্গহিতত্তা.

২৬৮৩. তিকালিকা যাৱকালিকা যামকালিকা সত্তাহকালিকাতি তযো কালিকা পটিগ্গহৱসেনেৱ অত্তনো অত্তনো কালং অতিক্কমিত্ৱা ভুত্তা দোসকৰা হোন্তি, ততিযং সত্তাহাতিক্কমে নিস্সগ্গিযপাচিত্তিযৱত্থুত্তা অভুত্তম্পি দোসকৰন্তি যোজনা.

‘‘ভুত্তা দোসকৰা’’তি ইমিনা পুৰিমকালিকদ্ৱযং পটিগ্গহেত্ৱা কালাতিক্কমনমত্তেন আপত্তিযা কাৰণং ন হোতি, ভুত্তমেৱ হোতি. সত্তাহকালিকং কালাতিক্কমেন অপৰিভুত্তম্পি আপত্তিযা কাৰণং হোতীতি দীপেতি. তেসু সত্তাহকালিকেযেৱ ৱিসেসং দস্সেতুমাহ ‘‘অভুত্তং ততিযম্পি চা’’তি. চ-সদ্দো তু-সদ্দত্থে. যাৱজীৱিকং পন পটিগ্গহেত্ৱা যাৱজীৱং পৰিভুঞ্জিযমানং ইতৰকালিকসংসগ্গং ৱিনা দোসকৰং ন হোতীতি ন গহিতং.

২৬৮৪. অম্বাদযো সদ্দা ৰুক্খানং নামভূতা তংতংফলেপি ৱত্তমানা ইধ উপচাৰৱসেন তজ্জে পানকে ৱুত্তা, তেনেৱাহ ‘‘পানকং মত’’ন্তি. চোচং অট্ঠিককদলিপানং. মোচং ইতৰকদলিপানং. মধূতি মুদ্দিকফলানং ৰসং. মুদ্দিকাতি সীতোদকে মদ্দিতানং মুদ্দিকফলানং পানং. ‘‘সালূকপানন্তি ৰত্তুপ্পলনীলুপ্পলাদীনং সালূকে মদ্দিত্ৱা কতপান’’ন্তি পাড়িযং, অট্ঠকথায (মহাৱ. অট্ঠ. ৩০০) চ সালূক-সদ্দস্স দীঘৱসেন সংযোগদস্সনতো ‘‘সালু ফাৰুসকঞ্চা’’তি গাথাবন্ধৱসেন ৰস্সো কতো.

সালূকং কুমুদুপ্পলানং ফলৰসং. খুদ্দসিক্খাৱণ্ণনাযং পন ‘‘সালূকপানং নাম ৰত্তুপ্পলনীলুপ্পলাদীনং কিঞ্জক্খৰেণূহি কতপান’’ন্তি ৱুত্তং. ‘‘ফাৰুসক’ন্তিআদীসু একো ৰুক্খো’’তি গণ্ঠিপদে ৱুত্তং. তস্স ফলৰসো ফাৰুসকং নাম. এতেসং অট্ঠন্নং ফলানং ৰসো উদকসম্ভিন্নো ৱট্টতি, সীতুদকে মদ্দিতো পসন্নো নিক্কসটোৱ ৱট্টতি, উদকেন পন অসম্ভিন্নো ৰসো যাৱকালিকো.

২৬৮৫. ফলন্তি অম্বাদিফলং. সৱত্থুকপটিগ্গহোতি পানৱত্থুকানং ফলানং পটিগ্গহো. ৱসতি এত্থ পানন্তি ৱত্থু, ফলং, ৱত্থুনা সহ ৱট্টতীতি সৱত্থুকং, পানং, সৱত্থুকস্স পটিগ্গহো সৱত্থুকপটিগ্গহো. সৱত্থুকস্স পটিগ্গহং নাম ৱত্থুপটিগ্গহণমেৱাতি কত্ৱা ৱুত্তং ‘‘পানৱত্থুকানং ফলানং পটিগ্গহো’’তি.

২৬৮৬. ‘‘সুকোট্টেত্ৱা’’তি ৱুচ্চমানত্তা ‘‘অম্বপক্ক’’ন্তি আমকমেৱ অম্বফলং ৱুচ্চতি. উদকেতি সীতোদকে. পৰিস্সৱং পৰিস্সাৱিতং. কত্ৱাতি মধুআদীহি অভিসঙ্খৰিত্ৱা. যথাহ – ‘‘তদহুপটিগ্গহিতেহি মধুসক্কৰকপ্পূৰাদীহি যোজেত্ৱা কাতব্ব’’ন্তি (মহাৱ. অট্ঠ. ৩০০). পাতুং ৱট্টতীতি এত্থ ৱিনিচ্ছযো ‘‘এৱং কতং পুৰেভত্তমেৱ কপ্পতি, অনুপসম্পন্নেহি কতং লভিত্ৱা পন পুৰেভত্তং পটিগ্গহিতং পুৰেভত্তং সামিসপৰিভোগেনাপি ৱট্টতি, পচ্ছাভত্তং নিৰামিসপৰিভোগেন যাৱ অৰুণুগ্গমনা ৱট্টতিযেৱ. এস নযো সব্বপানেসূ’’তি অট্ঠকথাযং ৱুত্তো.

২৬৮৭. সেসপানকেসুপীতি জম্বুপানকাদীসুপি.

২৬৮৮. উচ্ছুৰসো অন্তোগধত্তা ইধ ৱুত্তো, ন পন যামকালিকত্তা, সো পন সত্তাহকালিকোযেৱ.

২৬৮৯. মধুকস্স ৰসন্তি মধুকপুপ্ফস্স ৰসং. এত্থ মধুকপুপ্ফৰসো অগ্গিপাকো ৱা হোতু আদিচ্চপাকো ৱা, পচ্ছাভত্তং ন ৱট্টতি. পুৰেভত্তম্পি যং পানং গহেত্ৱা মজ্জং কৰোন্তি, সো আদিতো পট্ঠায ন ৱট্টতি. মধুকপুপ্ফং পন অল্লং ৱা সুক্খং ৱা ভজ্জিতং ৱা তেন কতফাণিতং ৱা যতো পট্ঠায মজ্জং ন কৰোন্তি, তং সব্বং পুৰেভত্তং ৱট্টতি.

পক্কডাকৰসন্তি পক্কস্স যাৱকালিকস্স ৰসং. সব্বো পত্তৰসো যামকালিকো ৱুত্তোতি যোজনা. অট্ঠকথাযং ‘‘যাৱকালিকপত্তানঞ্হি পুৰেভত্তংযেৱ ৰসো কপ্পতী’’তি (মহাৱ. অট্ঠ. ৩০০) ইমমেৱ সন্ধায ৱুত্তং.

২৬৯০. সানুলোমানং সত্তন্নং ধঞ্ঞানং ফলজং ৰসং ঠপেত্ৱা সব্বো ফলজো ৰসো ৱিকালে যামসঞ্ঞিতে অনুলোমতো পৰিভুঞ্জিতুং অনুঞ্ঞাতোতি যোজনা.

২৬৯১. যাৱকালিকপত্তানং সীতুদকে মদ্দিত্ৱা কতো ৰসোপি অপক্কো, আদিচ্চপাকোপি ৱিকালে পন ৱট্টতীতি যোজনা.

২৬৯২-৩. সত্তধঞ্ঞানুলোমানি সৰূপতো দস্সেতুমাহ ‘‘তালঞ্চনাড়িকেৰঞ্চা’’তিআদি. অপৰণ্ণং মুগ্গাদি. ‘‘সত্তধঞ্ঞানুলোমিক’’ন্তি ইমিনা এতেসং ৰসো যাৱকালিকো যামকালসঙ্খাতে ৱিকালে পৰিভুঞ্জিতুং ন ৱট্টতীতি দস্সেতি.

২৬৯৫. এৱমাদীনং খুদ্দকানং ফলানং ৰসো পন অট্ঠপানানুলোমত্তা অনুলোমিকে যামকালিকানুলোমিকে নিদ্দিট্ঠো কথিতোতি যোজনা.

২৬৯৬. ইধ ইমস্মিং লোকে সানুলোমস্স ধঞ্ঞস্স ফলজং ৰসং ঠপেত্ৱা অযামকালিকো অঞ্ঞো ফলৰসো নত্থীতি যোজনা, সব্বো যামকালিকোযেৱাতি দীপেতি.

ভেসজ্জক্খন্ধককথাৱণ্ণনা.