ৱস্সূপনাযিকক্খন্ধককথাৱণ্ণনা

২৬০৮. ৱস্সূপনাযিকা ৱুত্তাতি সেসো. পচ্ছিমা চাতি এত্থ ইতি-সদ্দো নিদস্সনে. ৱস্সূপনাযিকাতি ৱস্সূপগমনা. আলযো, ৱচীভেদো ৱা কাতব্বো উপগচ্ছতাতি ইমিনা ৱস্সূপগমনপ্পকাৰো দস্সিতো. উপগচ্ছতা আলযো কত্তব্বো, ৱচীভেদো ৱা কত্তব্বোতি সম্বন্ধো. উপগচ্ছন্তেন চ সেনাসনে অসতি ‘‘ইধ ৱস্সং ৱসিস্সামী’’তি চিত্তুপ্পাদমত্তং ৱা কাতব্বং, সেনাসনে সতি ‘‘ইমস্মিং ৱিহাৰে ইমং তেমাসং ৱস্সং উপেমী’’তি চ ‘‘ইধ ৱস্সং উপেমী’’তি চ ৱচীভেদো ৱা কাতব্বোতি অত্থো.

২৬০৯. জানং ৱস্সূপগমনং অনুপগচ্ছতো ৱাপীতি যোজনা. তেমাসন্তি এত্থ ‘‘পুৰিমং ৱা পচ্ছিমং ৱা’’তি সেসো. চৰন্তস্সাপীতি এত্থ ‘‘চাৰিক’’ন্তি সেসো. পুৰিমং ৱা তেমাসং পচ্ছিমং ৱা তেমাসং অৱসিত্ৱাৱ চাৰিকং চৰন্তস্সাপি দুক্কটন্তি যোজনা. তেমাসন্তি অচ্চন্তসংযোগে উপযোগৱচনং. যথাহ – ‘‘ন, ভিক্খৱে, ৱস্সং উপগন্ত্ৱা পুৰিমং ৱা তেমাসং পচ্ছিমং ৱা তেমাসং অৱসিত্ৱা চাৰিকা পক্কমিতব্বা, যো পক্কমেয্য, আপত্তি দুক্কটস্সা’’তি (মহাৱ. ১৮৫).

২৬১০. ৰুক্খস্স সুসিৰেতি এত্থ ‘‘সুদ্ধে’’তি সেসো. যথাহ – ‘‘ৰুক্খসুসিৰেতি এত্থ সুদ্ধে ৰুক্খসুসিৰেযেৱ ন ৱট্টতি, মহন্তস্স পন ৰুক্খসুসিৰস্স অন্তো পদৰচ্ছদনং কুটিকং কত্ৱা পৱিসনদ্ৱাৰং যোজেত্ৱা উপগন্তুং ৱট্টতী’’তি. ‘‘ৰুক্খস্স সুসিৰে’’তি ইমিনা ৰুক্খেকদেসো ৱিটপোপি সঙ্গহিতো, সোপি সুদ্ধোৱ ন ৱট্টতি. যথাহ – ‘‘ৰুক্খৱিটভিযাতি এত্থাপি সুদ্ধে ৱিটপমত্তে ন ৱট্টতি, মহাৱিটপে পন অট্টকং বন্ধিত্ৱা তত্থ পদৰচ্ছদনং কুটিকং কত্ৱা উপগন্তুং ৱট্টতী’’তি (মহাৱ. অট্ঠ. ২০৩).

‘‘ছত্তেতি এত্থাপি চতূসু থম্ভেসু ছত্তং ঠপেত্ৱা আৱৰণং কত্ৱা দ্ৱাৰং যোজেত্ৱা উপগন্তুং ৱট্টতি, ছত্তকুটিকা নামেসা হোতি. চাটিযাতি এত্থাপি মহন্তেন কপল্লেন ছত্তে ৱুত্তনযেন কুটিং কত্ৱাৱ উপগন্তুং ৱট্টতী’’তি অট্ঠকথাৱচনতো এৱমকতাসু সুদ্ধছত্তচাটীসু নিৱাৰণং ৱেদিতব্বং. ছৱকুটীতি টঙ্কিতমঞ্চাদযো ৱুত্তা. যথাহ – ‘‘ছৱকুটিকা নাম টঙ্কিতমঞ্চাদিভেদা কুটি, তত্থ উপগন্তুং ন ৱট্টতী’’তি (মহাৱ. অট্ঠ. ২০৩).

সুসানে পন অঞ্ঞং কুটিকং কত্ৱা উপগন্তুং ৱট্টতি. ‘‘ছৱসৰীৰং ঝাপেত্ৱা ছাৰিকায, অট্ঠিকানঞ্চ অত্থায কুটিকা কৰীযতী’’তি অন্ধকট্ঠকথাযং ছৱকুটি ৱুত্তা. ‘‘টঙ্কিতমঞ্চোতি কসিকুটিকাপাসাণঘৰন্তি লিখিত’’ন্তি (ৱজিৰ. টী. মহাৱগ্গ ২০৩) ৱজিৰবুদ্ধিত্থেৰো. চতুন্নং পাসাণানং উপৰি পাসাণং অত্থৰিত্ৱা কতো গেহোপি ‘‘টঙ্কিতমঞ্চো’’তি ৱুচ্চতি. দীঘে মঞ্চপাদে মজ্ঝে ৱিজ্ঝিত্ৱা অটনিযো পৱেসেত্ৱা মঞ্চং কৰোন্তীতি তস্স ইদং উপৰি, ইদং হেট্ঠাতি নত্থি, পৰিৱত্তেত্ৱা অত্থতোপি তাদিসোৱ হোতি, তং সুসানে, দেৱট্ঠানে চ ঠপেন্তি, অযম্পি টঙ্কিতমঞ্চো নাম.

২৬১১. ‘‘সতি পচ্চযৱেকল্লে, সৰীৰাফাসুতায ৱা’’তি অৱসেসন্তৰাযানং ৱক্খমানত্তা ‘‘অন্তৰাযো’’তি ইমিনা ৰাজন্তৰাযাদি দসৱিধো গহেতব্বো.

২৬১২-৪. ‘‘অনুজানামি, ভিক্খৱে, সত্তন্নং সত্তাহকৰণীযেন অপ্পহিতেপি গন্তুং, পগেৱ পহিতে ভিক্খুস্স ভিক্খুনিযা সিক্খমানায সামণেৰস্স সামণেৰিযা মাতুযা চ পিতুস্স চা’’তি (মহাৱ. ১৯৮) ৱুত্তনযং দস্সেতুমাহ ‘‘মাতাপিতূন’’ন্তিআদি.

মাতাপিতূনং দস্সনত্থং, পঞ্চন্নং সহধম্মিকানং দস্সনত্থং ৱা নেসং অত্থে সতি ৱা নেসং অন্তৰে গিলানং দট্ঠুং ৱা তদুপট্ঠাকানং ভত্তাদিং পৰিযেসনত্থং ৱা নেসং ভত্তাদিং পৰিযেসনত্থং ৱা তথা নেসং পঞ্চন্নং সহধম্মিকানং অঞ্ঞতৰং অনভিৰতং উক্কণ্ঠিতং অহং গন্ত্ৱা ৱূপকাসেস্সং ৱা ৱূপকাসাপেস্সামি ৱা ধম্মকথমস্স কৰিস্সামীতি ৱা তস্স পঞ্চন্নং সহধম্মিকানং অঞ্ঞতৰস্স উট্ঠিতং উপ্পন্নং দিট্ঠিং ৱিৱেচেস্সামি ৱা ৱিৱেচাপেস্সামি ৱা ধম্মকথমস্স কৰিস্সামীতি ৱা তথা উপ্পন্নং কুক্কুচ্চং ৱিনোদেস্সামীতি ৱা ৱিনোদাপেস্সামীতি ৱা ধম্মকথমস্স কৰিস্সামীতি ৱা এৱং ৱিনযঞ্ঞুনা ভিক্খুনা সত্তাহকিচ্চেন অপেসিতেপি গন্তব্বং, পগেৱ পহিতেতি যোজনা.

ভত্তাদীতি এত্থ আদি-সদ্দেন ভেসজ্জপৰিযেসনাদিং সঙ্গণ্হাতি. যথাহ – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা উপট্ঠহিস্সামি ৱা’’তি. ৱূপকাসেস্সন্তি যত্থ অনভিৰতি উপ্পন্না, ততো অঞ্ঞত্থ গহেত্ৱা গমিস্সামীতি অত্থো.

ৱিনোদেস্সামহন্তি ৱাতি এত্থ ৱা-সদ্দেন ‘‘ইধ পন, ভিক্খৱে, ভিক্খু গৰুধম্মং অজ্ঝাপন্নো হোতি পৰিৱাসাৰহো, সো চে ভিক্খূনং সন্তিকে দূতং পহিণেয্য ‘অহঞ্হি গৰুধম্মং অজ্ঝাপন্নো পৰিৱাসাৰহো, আগচ্ছন্তু ভিক্খূ, ইচ্ছামি ভিক্খূনং আগত’ন্তি. গন্তব্বং, ভিক্খৱে, সত্তাহকৰণীযেন অপ্পহিতেপি, পগেৱ পহিতে ‘পৰিৱাসদানং উস্সুক্কং কৰিস্সামি ৱা অনুস্সাৱেস্সামি ৱা গণপূৰকো ৱা ভৱিস্সামী’’তিআদিনযং (মহাৱ. ১৯৩) সঙ্গণ্হাতি. এৱং সত্তাহকিচ্চেন গচ্ছন্তেন অন্তোউপচাৰসীমায ঠিতেনেৱ ‘‘অন্তোসত্তাহে আগচ্ছিস্সামী’’তি আভোগং কত্ৱা গন্তব্বং. সচে আভোগং অকত্ৱা উপচাৰসীমং অতিক্কমতি, ছিন্নৱস্সো হোতীতি ৱদন্তি.

২৬১৫. ‘‘অযং পনেত্থ পাড়িমুত্তকৰত্তিচ্ছেদৱিনিচ্ছযো’’তি অট্ঠকথাগতং ৰত্তিচ্ছেদৱিনিচ্ছযং দস্সেতুমাহ ‘‘ৱস্সং উপগতেনেত্থা’’তিআদি. এত্থাতি ইমস্মিং সত্তাহকিচ্চাধিকাৰে. অযং পাড়িমুত্তকৱিনিচ্ছযো দট্ঠব্বোতি অত্থো.

২৬১৬. ‘‘অসুকং নাম দিৱস’’ন্তিআদিনা নিমন্তনাকাৰং ৱক্খতি. পুব্বন্তি পঠমং. ৱট্টতীতি সত্তাহকিচ্চেন গন্তুং ৱট্টতি. যথাহ – ‘‘সচে একস্মিং মহাৱাসে পঠমংযেৱ কতিকা কতা হোতি ‘অসুকদিৱসং নাম সন্নিপতিতব্ব’ন্তি, নিমন্তিতোযেৱ নাম হোতি, গন্তুং ৱট্টতী’’তি (মহাৱ. অট্ঠ. ১৯৯). ‘‘উপাসকেহি ‘ইমস্মিং নাম দিৱসে দানাদীনি কৰোম, সব্বে এৱ সন্নিপতন্তূ’তি কতিকাযপি কতায গন্তুং ৱট্টতি, নিমন্তিতোযেৱ নাম হোতী’’তি কেচি.

২৬১৭. ভণ্ডকন্তি অত্তনো চীৱৰভণ্ডং. ন ৱট্টতীতি সত্তাহকিচ্চেন গন্তুং ন ৱট্টতি. পহিণন্তীতি চীৱৰধোৱনাদিকম্মেন পহিণন্তি. আচৰিযুপজ্ঝাযানং আণত্তিযেন কেনচি অনৱজ্জকিচ্চেন সত্তাহকৰণীযেন গন্তুং ৱট্টতীতি ইমিনাৱ দীপিতং হোতি.

২৬১৮. উদ্দেসাদীনমত্থাযাতি পাড়িৱাচনানি সন্ধায. আদি-সদ্দেন পৰিপুচ্ছাদিং সঙ্গণ্হাতি. গৰূনন্তি অগিলানানম্পি আচৰিযুপজ্ঝাযানং. গন্তুং লভতীতি সত্তাহকৰণীযেন গন্তুং লভতি. পুগ্গলোতি পকৰণতো ভিক্খুংযেৱ গণ্হাতি.

২৬১৯. আচৰিযোতি নিদস্সনমত্তং, উপজ্ঝাযেন নিৱাৰিতেপি এসেৱ নযো. ‘‘সচে পন নং আচৰিযো ‘অজ্জ মা গচ্ছা’তি ৱদতি, ৱট্টতী’’তি (মহাৱ. অট্ঠ. ১৯৯) অট্ঠকথানযং দস্সেতুমাহ ‘‘ৰত্তিচ্ছেদে অনাপত্তি, হোতীতি পৰিদীপিতা’’তি. ৰত্তিচ্ছেদেতি ৱস্সচ্ছেদনিমিত্তং. ‘‘ৰত্তিচ্ছেদে’’তি সব্বত্থ ৱস্সচ্ছেদোতি সন্নিট্ঠানং কত্ৱা ৱদন্তি, এৱং সত্তাহকৰণীযেন গতং নং অন্তোসত্তাহেযেৱ পুন আগচ্ছন্তং সচে আচৰিযো ৱা উপজ্ঝাযো ৱা ‘‘অজ্জ মা গচ্ছা’’তি ৱদতি, সত্তাহাতিক্কমেপি অনাপত্তীতি অধিপ্পাযো, ৱস্সচ্ছেদো পন হোতিযেৱাতি দট্ঠব্বং সত্তাহস্স বহিদ্ধা ৱীতিনামিতত্তা.

২৬২০. যস্স কস্সচি ঞাতিস্সাতি মাতাপিতূহি অঞ্ঞস্স ঞাতিজনস্স. ‘‘গচ্ছতো দস্সনত্থাযা’’তি ইমিনা সেসঞাতিকেহি ‘‘মযং গিলানা ভদন্তানং আগমনং ইচ্ছামা’’তি চ ‘‘উপট্ঠাককুলেহি দানং দস্সাম, ধম্মং সোস্সাম, ভিক্খূনং দস্সনং ইচ্ছামা’’তি চ এৱং কত্তব্বং নিদ্দিসিত্ৱা দূতে ৱা পেসিতে সত্তাহকৰণীযেন গচ্ছতো ৰত্তিচ্ছেদো চ দুক্কটঞ্চ ন হোতীতি ৱুত্তং হোতি. যথাহ ‘‘ইধ পন, ভিক্খৱে, ভিক্খুস্স ঞাতকো গিলানো হোতি…পে… গন্তব্বং, ভিক্খৱে, সত্তাহকৰণীযেন পহিতে, ন ত্ৱেৱ অপ্পহিতে’’তি (মহাৱ. ১৯৯) চ ‘‘ইধ পন, ভিক্খৱে, উপাসকেন সঙ্ঘং উদ্দিস্স ৱিহাৰো কাৰাপিতো হোতি…পে… ইচ্ছামি দানঞ্চ দাতুং ধম্মঞ্চ সোতুং ভিক্খূ চ পস্সিতুন্তি. গন্তব্বং, ভিক্খৱে, সত্তাহকৰণীযেন পহিতে, ন ত্ৱেৱ অপ্পহিতে’’তি (মহাৱ. ১৮৮) চ.

২৬২১. ‘‘অহং গামকং গন্ত্ৱা অজ্জেৱ আগমিস্সামী’’তি আগচ্ছং আগচ্ছন্তো সচে পাপুণিতুং ন সক্কোতেৱ, ৱট্টতীতি যোজনা. ৱট্টতীতি এত্থ ‘‘অজ্জেৱ আগমিস্সামী’’তি গন্ত্ৱা আগচ্ছন্তস্স অন্তৰামগ্গে সচে অৰুণুগ্গমনং হোতি, ৱস্সচ্ছেদোপি ন হোতি, ৰত্তিচ্ছেদদুক্কটঞ্চ নত্থীতি অধিপ্পাযো.

২৬২২. ৱজেতি (মহাৱ. অট্ঠ. ২০৩) গোপালকানং নিৱাসনট্ঠানে. সত্থেতি জঙ্ঘসত্থসকটসত্থানং সন্নিৱিট্ঠোকাসে. তীসু ঠানেসু ভিক্খুনো, ৱস্সচ্ছেদে অনাপত্তীতি তেহি সদ্ধিং গচ্ছন্তস্সেৱ নত্থি আপত্তি, তেহি ৱিযুঞ্জিত্ৱা গমনে পন আপত্তিযেৱ, পৱাৰেতুঞ্চ ন লভতি.

ৱজাদীসু ৱস্সং উপগচ্ছন্তেন ৱস্সূপনাযিকদিৱসে তেন ভিক্খুনা উপাসকা ৱত্তব্বা ‘‘কুটিকা লদ্ধুং ৱট্টতী’’তি. সচে কৰিত্ৱা দেন্তি, তত্থ পৱিসিত্ৱা ‘‘ইধ ৱস্সং উপেমী’’তি তিক্খত্তুং ৱত্তব্বং. নো চে দেন্তি, সালাসঙ্খেপেন ঠিতসকটস্স হেট্ঠা উপগন্তব্বং. তম্পি অলভন্তেন আলযো কাতব্বো. সত্থে পন কুটিকাদীনং অভাৱে ‘‘ইধ ৱস্সং উপেমী’’তি ৱচীভেদং কত্ৱা উপগন্তুং ন ৱট্টতি, আলযকৰণমত্তমেৱ ৱট্টতি. আলযো নাম ‘‘ইধ ৱস্সং ৱসিস্সামী’’তি চিত্তুপ্পাদমত্তং.

সচে মগ্গপ্পটিপন্নেযেৱ সত্থে পৱাৰণদিৱসো হোতি, তত্থেৱ পৱাৰেতব্বং. অথ সত্থো অন্তোৱস্সেযেৱ ভিক্খুনা পত্থিতট্ঠানং পত্ৱা অতিক্কমতি. পত্থিতট্ঠানে ৱসিত্ৱা তত্থ ভিক্খূহি সদ্ধিং পৱাৰেতব্বং. অথাপি সত্থো অন্তোৱস্সেযেৱ অন্তৰা একস্মিং গামে তিট্ঠতি ৱা ৱিপ্পকিৰতি ৱা, তস্মিংযেৱ গামে ভিক্খূহি সদ্ধিং ৱসিত্ৱা পৱাৰেতব্বং, অপ্পৱাৰেত্ৱা ততো পৰং গন্তুং ন ৱট্টতি.

নাৱায ৱস্সং উপগচ্ছন্তেনাপি কুটিযংযেৱ উপগন্তব্বং. পৰিযেসিত্ৱা অলভন্তে আলযো কাতব্বো. সচে অন্তোতেমাসং নাৱা সমুদ্দেযেৱ হোতি, তত্থেৱ পৱাৰেতব্বং. অথ নাৱা কূলং লভতি, সযঞ্চ পৰতো গন্তুকামো হোতি, গন্তুং ন ৱট্টতি. নাৱায লদ্ধগামেযেৱ ৱসিত্ৱা ভিক্খূহি সদ্ধিং পৱাৰেতব্বং. সচেপি নাৱা অনুতীৰমেৱ অঞ্ঞত্থ গচ্ছতি, ভিক্খু চ পঠমং লদ্ধগামেযেৱ ৱসিতুকামো, নাৱা গচ্ছতু, ভিক্খুনা তত্থেৱ ৱসিত্ৱা ভিক্খূহি সদ্ধিং পৱাৰেতব্বং.

ইতি ৱজে, সত্থে, নাৱাযন্তি তীসু ঠানেসু নত্থি ৱস্সচ্ছেদে আপত্তি, পৱাৰেতুঞ্চ লভতি.

২৬২৩. সতি পচ্চযৱেকল্লেতি পিণ্ডপাতাদীনং পচ্চযানং ঊনত্তে সতি. সৰীৰাফাসুতায ৱাতি সৰীৰস্স অফাসুতায আবাধে ৱা সতি. ৱস্সং ছেত্ৱাপি পক্কমেতি ৱস্সচ্ছেদং কত্ৱাপি যথাফাসুকট্ঠানং গচ্ছেয্য. অপি-সদ্দেন ৱস্সং অছেত্ৱা ৱস্সচ্ছেদকাৰণে সতি সত্তাহকৰণীযেন গন্তুম্পি ৱট্টতীতি দীপেতি.

২৬২৪. যেন কেনন্তৰাযেনাতি ৰাজন্তৰাযাদীসু যেন কেনচি অন্তৰাযেন. যো ভিক্খু ৱস্সং নোপগতো, তেনাপি ছিন্নৱস্সেন ৱাপি দুতিযা ৱস্সূপনাযিকা উপগন্তব্বাতি যোজনা.

২৬২৫-৬. সত্তাহন্তি অচ্চন্তসংযোগে উপযোগৱচনং. ‘‘ৱীতিনামেতী’’তি ইমিনা সম্বন্ধো. উপগন্ত্ৱাপি ৱা বহিদ্ধা এৱ সত্তাহং ৱীতিনামেতি চে. যো গচ্ছতি, যো চ ৱীতিনামেতি, তস্স ভিক্খুস্স. পুৰিমাপি ন ৱিজ্জতীতি অনুপগতত্তা, ছিন্নৱস্সত্তা চ পুৰিমাপি ৱস্সূপনাযিকা ন ৱিজ্জতি ন লভতি. ইমেসং দ্ৱিন্নং যথাক্কমং উপচাৰাতিক্কমে, সত্তাহাতিক্কমে চ আপত্তি ৱেদিতব্বা.

পটিস্সৱে চ ভিক্খুস্স, হোতি আপত্তি দুক্কটন্তি ‘‘ইধ ৱস্সং ৱসথা’’তি ৱুত্তে ‘‘সাধূ’’তি পটিস্সুণিত্ৱা তস্স ৱিসংৱাদে অসচ্চাপনে আপত্তি হোতি. কতমাতি আহ ‘‘দুক্কট’’ন্তি. ন কেৱলং এতস্সেৱ ৱিসংৱাদে আপত্তি হোতি, অথ খো ইতৰেসম্পি পটিস্সৱানং ৱিসংৱাদে আপত্তি ৱেদিতব্বা. যথাহ – ‘‘পটিস্সৱে চ আপত্তি দুক্কটস্সাতি এত্থ ন কেৱলং ‘ইমং তেমাসং ইধ ৱস্সং ৱসথা’তি এতস্সেৱ পটিস্সৱস্স ৱিসংৱাদে আপত্তি, ‘ইমং তেমাসং ভিক্খং গণ্হথ, উভোপি মযং ইধ ৱস্সং ৱসিস্সাম, একতোৱ উদ্দিসাপেস্সামা’তি এৱমাদিনাপি তস্স তস্স পটিস্সৱস্স ৱিসংৱাদে দুক্কট’’ন্তি (মহাৱ. অট্ঠ. ২০৭). তঞ্চ খো পটিস্সৱকালে সুদ্ধচিত্তস্স পচ্ছা ৱিসংৱাদনপচ্চযা হোতি. পঠমং অসুদ্ধচিত্তস্স পন পটিস্সৱে পাচিত্তিযং, ৱিসংৱাদেন দুক্কটন্তি পাচিত্তিযেন সদ্ধিং দুক্কটং যুজ্জতি.

২৬২৭. ‘‘ৱস্সং উপগন্ত্ৱা পন অৰুণং অনুট্ঠাপেত্ৱা তদহেৱ সত্তাহকৰণীযেন পক্কমন্তস্সাপি অন্তোসত্তাহে নিৱত্তন্তস্স অনাপত্তী’’তি (মহাৱ. অট্ঠ. ২০৭) অট্ঠকথাৱচনতো, ‘‘কো ৱাদো ৱসিত্ৱা বহি গচ্ছতো’’তি ৱক্খমানত্তা চ ‘‘নুট্ঠাপেত্ৱা পনাৰুণ’’ন্তি পাঠো গহেতব্বো. কত্থচি পোত্থকেসু ‘‘উট্ঠাপেত্ৱা পনাৰুণ’’ন্তি পাঠো দিস্সতি, সো ন গহেতব্বো.

২৬২৮. ৱসিত্ৱাতি দ্ৱীহতীহং ৱসিত্ৱা. যথা ৱস্সং ৱসিত্ৱা অৰুণং অনুট্ঠাপেত্ৱাৱ সত্তাহকৰণীযেন গচ্ছতো অনাপত্তি, তথা গতট্ঠানতো অন্তোসত্তাহে আগন্ত্ৱা পুনপি অৰুণং অনুট্ঠাপেত্ৱাৱ সত্তাহকৰণীযেন গচ্ছতো অনাপত্তি. ‘‘সত্তাহৱাৰেন অৰুণো উট্ঠাপেতব্বো’’তি (মহাৱ. অট্ঠ. ২০১) অট্ঠকথাৱচনং সত্তমাৰুণেন পটিবদ্ধদিৱসং সত্তমেন অৰুণেনেৱ সঙ্গহেত্ৱা সত্তমঅৰুণব্ভন্তৰে অনাগন্ত্ৱা অট্ঠমং অৰুণং বহি উট্ঠাপেন্তস্স ৰত্তিচ্ছেদদস্সনপৰং, ন সত্তমঅৰুণস্সেৱ তত্থ উট্ঠাপেতব্বভাৱদস্সনপৰন্তি গহেতব্বং সিক্খাভাজনঅট্ঠকথায, সীহড়গণ্ঠিপদেসু চ তথা ৱিনিচ্ছিতত্তা.

২৬২৯. ‘‘নোপেতি অসতিযা’’তি পদচ্ছেদো, নোপেতীতি ‘‘ইমস্মিং ৱিহাৰে ইমং তেমাসং ৱস্সং উপেমী’’তি ৱচীভেদেন ন উপগচ্ছতি.

২৬৩০. ৱুত্তমেৱত্থং সমত্থেতুমাহ ‘‘ন দোসো কোচি ৱিজ্জতী’’তি.

২৬৩১. ‘‘ইমস্মিং ৱিহাৰে ইমং তেমাসং ৱস্সং উপেমী’’তি তিক্খত্তুং ৱচনে নিচ্ছাৰিতে এৱ ৱস্সং উপগতো সিযাতি যোজনা. ‘‘নিচ্ছাৰিতেৱ তিক্খত্তু’’ন্তি ইদং উক্কংসৱসেন ৱুত্তং, সকিং, দ্ৱিক্খত্তুং ৱা নিচ্ছাৰিতেপি ৱস্সূপগতো নাম হোতীতি. যথাহ – ‘‘ইমস্মিং ৱিহাৰে ইমং তেমাসং ৱস্সং উপেমীতি সকিং ৱা দ্ৱত্তিক্খত্তুং ৱা ৱাচং নিচ্ছাৰেত্ৱাৱ ৱস্সং উপগন্তব্ব’’ন্তি (মহাৱ. অট্ঠ. ১৮৪).

২৬৩২. নৱমিতো পট্ঠায গন্তুং ৱট্টতি, আগচ্ছতু ৱা মা ৱা, অনাপত্তী’’তি (মহাৱ. অট্ঠ. ২০৭) অট্ঠকথানযং দস্সেতুমাহ ‘‘আদিং তু নৱমিং কত্ৱা’’তিআদি. নৱমিং পভুতি আদিং কত্ৱা, নৱমিতো পট্ঠাযাতি ৱুত্তং হোতি. গন্তুং ৱট্টতীতি সত্তাহকৰণীযেনেৱ গন্তুং ৱট্টতি, তস্মা পৱাৰণদিৱসেপি তদহেৱ আগন্তুং অসক্কুণেয্যট্ঠানং পৱাৰণত্থায গচ্ছন্তেন লব্ভমানেন সত্তাহকৰণীযেন গন্তুং ৱট্টতি. ‘‘পৱাৰেত্ৱা পন গন্তুং ৱট্টতি পৱাৰণায তংদিৱসসন্নিস্সিতত্তা’’তি (ৱজিৰ. টী. মহাৱগ্গ ২০৭) হি ৱজিৰবুদ্ধিত্থেৰো. সো পচ্ছা আগচ্ছতু ৱা মা ৱা, দোসো ন ৱিজ্জতীতি যোজনা.

ৱস্সূপনাযিকক্খন্ধককথাৱণ্ণনা.