৩. নিস্সগ্গিযকণ্ডং

২. দুতিযনিস্সগ্গিযাদিপাচিত্তিযসিক্খাপদৱণ্ণনা

৭৩৩. নিস্সগ্গিযেসুপি পঠমং উত্তানমেৱ.

৭৪০. দুতিযে অয্যায দম্মীতি এৱং পটিলদ্ধন্তি নিস্সট্ঠপটিলদ্ধং, নিস্সট্ঠং পটিলভিত্ৱাপি যং উদ্দিস্স দাযকেহি দিন্নং, তত্থেৱ দাতব্বং. তেনাহ ‘‘যথাদানেযেৱ উপনেতব্ব’’ন্তি. অকালচীৱৰতা, তং ঞত্ৱা কালচীৱৰন্তি লেসেন ভাজাপনং, পটিলাভোতি তীণি অঙ্গানি.

৭৪৩. ততিযে মেতন্তি মমেৱেতং চীৱৰং. উপসম্পন্নতা, পৰিৱত্তিতৱিকপ্পনুপগচীৱৰস্স সকসঞ্ঞায অচ্ছিন্দনাদীতি দ্ৱে অঙ্গানি.

৭৪৮-৭৫২. চতুত্থে আহটসপ্পিং দত্ৱাতি অত্তনো দত্ৱা. যমকং পচিতব্বন্তি সপ্পিঞ্চ তেলঞ্চ একতো পচিতব্বং. লেসেন গহেতুকামতা, অঞ্ঞস্স ৱিঞ্ঞত্তি, পটিলাভোতি তীণি অঙ্গানি.

৭৫৩. পঞ্চমে সাতি থুল্লনন্দা. অযন্তি সিক্খমানা. চেতাপেত্ৱাতি জানাপেত্ৱাতি ইধ ৱুত্তং, মাতিকাট্ঠকথাযং পন ‘‘অত্তনো কপ্পিযভণ্ডেন ‘ইদং নাম আহৰা’তি অঞ্ঞং পৰিৱত্তাপেত্ৱা’’তি (কঙ্খা. অট্ঠ. অঞ্ঞচেতাপনসিক্খাপদৱণ্ণনা) ৱুত্তং.

৭৫৮. ছট্ঠে পাৱাৰিকস্সাতি দুস্সৱাণিজকস্স.

৭৬৪. সত্তমে সঞ্ঞাচিতকেনাতি সযং যাচিতকেনপীতি অত্থো.

৭৬৯-৭৮৯. অট্ঠমতো যাৱদ্ৱাদসমা উত্তানমেৱ.

নিস্সগ্গিযৱণ্ণনানযো নিট্ঠিতো.