২. সঙ্ঘাদিসেসকণ্ডং

১. পঠমসঙ্ঘাদিসেসসিক্খাপদৱণ্ণনা

৬৭৯. সঙ্ঘাদিসেসকণ্ডে ‘‘দুতিযস্স আৰোচেতী’’তি এত্থাপি দ্ৱীসুপি অড্ডকাৰকেসু যস্স কস্সচি দুতিযস্স কথং যো কোচি আৰোচেতীতি এৱমত্থো গহেতব্বোতি আহ ‘‘এসেৱ নযো’’তি.

গতিগতন্তি চিৰকালপ্পৱত্তং. আপত্তীতি আপজ্জনং. ‘‘নিস্সাৰণীয’’ন্তি ইদং কত্তুঅত্থে সিদ্ধন্তি আহ ‘‘নিস্সাৰেতী’’তি. আপন্নং ভিক্খুনিং সঙ্ঘতো ৱিযোজেতি, ৱিযোজনহেতু হোতীতি অত্থো.

গীৱাযেৱাতি আণত্তিযা অভাৱতো. তেসং অনত্থকামতাযাতি ‘‘চোৰো’’তি ৱুত্তং মম ৱচনং সুত্ৱা কেচি দণ্ডিস্সন্তি জীৱিতা ৱোৰোপেস্সন্তীতি এৱং সঞ্ঞায. এতেন কেৱলং ভযেন ৱা পৰিক্খাৰগ্গহণত্থং ৱা সহসা ‘‘চোৰো’’তি ৱুত্তে দণ্ডিতেপি ন দোসোতি দস্সেতি. ৰাজপুৰিসানঞ্হি ‘‘চোৰো অয’’ন্তি উদ্দিস্স কথনে এৱ গীৱা, ভিক্খূনং, পন আৰামিকাদীনং ৱা সম্মুখা ‘‘অসুকো চোৰো এৱমকাসী’’তি কেনচি ৱুত্তৱচনং নিস্সায আৰামিকাদীসু ৰাজপুৰিসানং ৱত্ৱা দণ্ডাপেন্তেসুপি ভিক্খুস্স ন গীৱা ৰাজপুৰিসানং অৱুত্তত্তা. যেসঞ্চ ৱুত্তং, তেহি সযং চোৰস্স অদণ্ডিতত্তাতি গহেতব্বং. ‘‘ত্ৱং এতস্স সন্তকং অচ্ছিন্দা’’তি আণত্তোপি হি সচে অঞ্ঞেন অচ্ছিন্দাপেতি, আণাপকস্স অনাপত্তি ৱিসঙ্কেতত্তা. ‘‘অত্তনো ৱচনকৰ’’ন্তি ইদং সামীচিৱসেন ৱুত্তং. ৱচনং অকৰোন্তানং ৰাজপুৰিসানম্পি ‘‘ইমিনা গহিতপৰিক্খাৰং আহৰাপেহি, মা চস্স দণ্ডং কৰোহী’’তি উদ্দিস্স ৱদন্তস্সাপি দণ্ডে গহিতেপি ন গীৱা এৱ দণ্ডগ্গহণস্স পটিক্খিত্তত্তা, ‘‘অসুকভণ্ডং অৱহৰা’’তি আণাপেত্ৱা ৱিপ্পটিসাৰে উপ্পন্নে পুন পটিক্খিপনে (পাৰা. ১২১) ৱিয.

দাসাদীনং সম্পটিচ্ছনে ৱিয তদত্থায অড্ডকৰণে ভিক্খূনম্পি দুক্কটন্তি আহ ‘‘অকপ্পিযঅড্ডো নাম ন ৱট্টতী’’তি. কেনচি পন ভিক্খুনা খেত্তাদিঅত্থায ৱোহাৰিকানং সন্তিকং গন্ত্ৱা অড্ডে কতেপি তং খেত্তাদিসম্পটিচ্ছনে ৱিয সব্বেসং অকপ্পিযং ন হোতি পুব্বে এৱ সঙ্ঘস্স সন্তকত্তা, ভিক্খুস্সেৱ পন পযোগৱসেন আপত্তিযো হোন্তি. দাসাদীনম্পি পন অত্থায ৰক্খং যাচিতুং ৱোহাৰিকেন পুট্ঠেন সঙ্ঘস্স উপ্পন্নং কপ্পিযক্কমং ৱত্তুং, আৰামিকাদীহি চ অড্ডং কাৰাপেতুঞ্চ ৱট্টতি এৱ. ৱিহাৰৱত্থাদিকপ্পিযঅড্ডং পন ভিক্খুনো সযম্পি কাতুং ৱট্টতি.

ভিক্খুনীনং ৱুত্তোতি ৰক্খং যাচন্তীনং ভিক্খুনীনং ৱুত্তো উদ্দিস্সঅনুদ্দিস্সৱসেন ৰক্খাযাচনৱিনিচ্ছযো, ন সব্বো সিক্খাপদৱিনিচ্ছযো অসাধাৰণত্তা সিক্খাপদস্স. তেনাহ ‘‘ভিক্খুনোপী’’তিআদি. অনাকড্ঢিতায অড্ডকৰণং, অড্ডপৰিযোসানন্তি দ্ৱে অঙ্গানি.

পঠমসঙ্ঘাদিসেসসিক্খাপদৱণ্ণনা নিট্ঠিতা.

২. দুতিযসঙ্ঘাদিসেসসিক্খাপদৱণ্ণনা

৬৮৩. পাড়িযং দুতিযে মল্লগণভটিপুত্তগণাদিকন্তিআদীসু মল্লৰাজূনং গণো মল্লগণো. ভটিপুত্তা নাম কেচি গণৰাজানো, তেসং গণো. কেচি পন ‘‘নাৰাযনভত্তিকো পুঞ্ঞকাৰগণো মল্লগণো. তথা কুমাৰভত্তিকো চ গণো ভটিপুত্তগণো’’তিপি (সাৰত্থ. টী. সংঘাদিসেসকণ্ড ৩.৬৮৩) ৱদন্তি. ধম্মগণোতি সাসনে, লোকে ৱা অনেকপ্পকাৰপুঞ্ঞকাৰকো গণো. গন্ধৱিকতিকাৰকো গণো গন্ধিকসেণী. পেসকাৰাদিগণো দুস্সিকসেণী. কপ্পগতিকন্তি কপ্পিযভাৱগতং, পব্বজিতপুব্বন্তি অত্থো.

৬৮৫. পাড়িযং ৱুট্ঠাপেতীতি উপসম্পাদেতি. অকপ্পগতম্পি পব্বাজেন্তিযা দুক্কটন্তি ৱদন্তি. খীণাসৱাযপি আপজ্জিতব্বতো ‘‘তিচিত্ত’’ন্তি ৱুত্তং. চোৰিতা, তং ঞত্ৱা অননুঞ্ঞাতকাৰণা ৱুট্ঠাপনন্তি দ্ৱে অঙ্গানি.

দুতিযসঙ্ঘাদিসেসসিক্খাপদৱণ্ণনা নিট্ঠিতা.

৩. ততিযসঙ্ঘাদিসেসসিক্খাপদৱণ্ণনা

৬৯২. ততিযে পৰিক্খেপং অতিক্কামেন্তিযাতি গামন্তৰস্স পৰিক্খেপং অতিক্কামেন্তিযা. ‘‘গামন্তৰং গচ্ছেয্যা’’তি হি ৱুত্তং. ৱিকালগামপ্পৱেসনসিক্খাপদে ৱিয ‘‘অপৰিক্খিত্তস্স উপচাৰং ওক্কমন্তিযা’’তি অৱত্ৱা ‘‘অতিক্কামেন্তিযা’’তি পাড়িযং ৱুত্তত্তা গামং পৱিসন্তিযা ঘৰূপচাৰে ঠিতস্স দুতিযলেড্ডুপাতসঙ্খাতস্স উপচাৰস্স অতিক্কমো নাম পঠমলেড্ডুপাতট্ঠানসঙ্খাতস্স পৰিক্খেপাৰহট্ঠানস্স অতিক্কমো এৱাতি আহ ‘‘পৰিক্খেপাৰহট্ঠানং একেন পাদেন অতিক্কমতী’’তি.

মজ্ঝেতি গামমজ্ঝে. পচ্ছাতি অপৰকালে. ‘‘চতুগামসাধাৰণত্তা’’তি ইমিনা ৱিহাৰতো চতূসু গামেসু যত্থ কত্থচি পৱিসিতুং ৱট্টতীতি এত্থ কাৰণমাহ.

পৰতীৰমেৱ অক্কমন্তিযাতি নদিং অনোতৰিত্ৱা ওৰিমতীৰতো লঙ্ঘিত্ৱা ৱা আকাসাদিনা ৱা পৰতীৰমেৱ অতিক্কামেন্তিযা. ওৰিমতীৰমেৱ আগচ্ছতি, আপত্তীতি পাৰগমনায ওতিণ্ণত্তা ৱুত্তং.

তাদিসে অৰঞ্ঞেতি ইন্দখীলতো বহিভাৱলক্খণে অৰঞ্ঞে. ‘‘তেনেৱা’’তিআদিনা দস্সনূপচাৰে ৱিৰহিতে সৱনূপচাৰস্স ৱিজ্জমানত্তেপি আপত্তি হোতীতি দস্সেতি. অঞ্ঞং মগ্গং গণ্হাতীতি মগ্গমূড়্হত্তা গণ্হাতি, ন দুতিযিকং ওহিযিতুং. তস্মা অনাপত্তি. অনন্তৰাযেন একভাৱো, অনাপদায গামন্তৰগমনাদীসু একন্তি দ্ৱে অঙ্গানি.

ততিযসঙ্ঘাদিসেসসিক্খাপদৱণ্ণনা নিট্ঠিতা.

৪. চতুত্থসঙ্ঘাদিসেসসিক্খাপদৱণ্ণনা

৬৯৪. চতুত্থে কাৰকগণস্সাতি ইমস্স কম্মং কাতব্বন্তি যেহি সন্নিট্ঠানং কতং, তে সন্ধায ৱুত্তং. কম্মৱাচক্খণে সহঠিতেতি কেচি. নেত্থাৰৱত্তেতি নিত্থৰণহেতুম্হি ৱত্তে.

৬৯৮. পাড়িযং অসন্তে কাৰকসঙ্ঘেতি এত্থ ৱিজ্জমানং সুদূৰম্পি গন্ত্ৱা আপুচ্ছিতব্বং. অন্তৰাযে পন সতি সম্মা ৱত্তন্তং ওসাৰেতুং ৱট্টতীতি. ধম্মকম্মেন উক্খিত্ততা, অননুঞ্ঞাতকাৰণা ওসাৰণন্তি দ্ৱে অঙ্গানি.

চতুত্থসঙ্ঘাদিসেসসিক্খাপদৱণ্ণনা নিট্ঠিতা.

৫. পঞ্চমসঙ্ঘাদিসেসসিক্খাপদৱণ্ণনা

৭০১. পঞ্চমে তন্তি মহাঅট্ঠকথাযং অৱচনং ‘‘অনৱস্সুতোতি জানন্তী পটিগ্গণ্হাতী’’তিআদি পাড়িযা সমেতি. উভতো অৱস্সুতভাৱো, উদকদন্তপোনতো অঞ্ঞং সহত্থা গহেত্ৱা অজ্ঝোহৰণন্তি দ্ৱে অঙ্গানি.

পঞ্চমসঙ্ঘাদিসেসসিক্খাপদৱণ্ণনা নিট্ঠিতা.

৬. ছট্ঠসঙ্ঘাদিসেসসিক্খাপদৱণ্ণনা

৭০৫. ছট্ঠে পটিগ্গহো তেন ন ৱিজ্জতীতি তেনেৱ ‘‘ন দেতী’’তি ৱুত্তকাৰণেন উয্যোজিতায হত্থতো ইতৰায পটিগ্গহোপি নত্থি. পৰিভোগপচ্চযাতি উয্যোজিতায ভোজনপৰিযোসানপচ্চযাতি অত্থো. মনুস্সপুৰিসস্স অৱস্সুততা, তং ঞত্ৱা অননুঞ্ঞাতকাৰণা উয্যোজনা, তেন ইতৰিস্সা গহেত্ৱা ভোজনপৰিযোসানন্তি তীণি অঙ্গানি.

ছট্ঠসঙ্ঘাদিসেসসিক্খাপদৱণ্ণনা নিট্ঠিতা.

৭০৯-৭২৭. সত্তমতো যাৱদসমপৰিযোসানানি উত্তানানেৱ.

সঙ্ঘাদিসেসৱণ্ণনানযো নিট্ঠিতো.