১. পাৰাজিককণ্ডং

১. উব্ভজাণুমণ্ডলিকসিক্খাপদৱণ্ণনা

৬৫৬. ভিক্খুনীৱিভঙ্গে মিগাৰমাতুযাতি মিগাৰমাতু, ৱিসাখাযাতি অত্থো. পাড়িযং ‘‘এহি ভিক্খুনীতি ভিক্খুনী, তীহি সৰণগমনেহি উপসম্পন্নাতি ভিক্খুনী’’তি ইদং ভিক্খুৱিভঙ্গপাড়িযা সমদস্সনত্থং অট্ঠগৰুধম্মপ্পটিগ্গহণেন লদ্ধূপসম্পদং মহাপজাপতিগোতমিঞ্চেৱ তায সহ নিক্খন্তা ভগৱতো আণায ভিক্খূনঞ্ঞেৱ সন্তিকে একতোউপসম্পন্না পঞ্চসতসাকিযানিযো চ সন্ধায ৱুত্তং. তা হি ভগৱতা আনন্দত্থেৰস্স যাচনায পব্বজ্জং অনুজানন্তেন ‘‘এথ ভিক্খুনিযো, মম সাসনে তুম্হেপি পৱিসথা’’তি ৱুত্তা ৱিয জাতা. সাকিযানিযো এৱ সৰণসীলানি দত্ৱা কম্মৱাচায উপসম্পাদিতত্তা ‘‘তীহি সৰণগমনেহি উপসম্পন্না’’তি ৱুত্তা. ন হি এতাহি অঞ্ঞা এহিভিক্খুনিভাৱাদিনা উপসম্পন্না নাম সন্তি. যং পন থেৰীগাথাসু ভদ্দায কুণ্ডলকেসিযা –

‘‘নিহচ্চ জাণুং ৱন্দিত্ৱা, সম্মুখা অঞ্জলিং অকং;

‘এহি ভদ্দে’তি মং অৱোচ, সা মে আসূপসম্পদা’’তি. (থেৰীগা. ১০৯) –

ৱুত্তং. যঞ্চ অপদানেপি –

‘‘আযাচিতো তদা আহ, ‘এহি ভদ্দে’তি নাযকো;

তদাহং উপসম্পন্না, পৰিত্তং তোযমদ্দস’’ন্তি. (অপ. থেৰী ২.৩.৪৪) –

ৱুত্তং. তম্পি ‘‘এহি ত্ৱং ভিক্খুনীনং সন্তিকে পব্বজ্জং, উপসম্পদঞ্চ গণ্হাহী’’তি ভগৱতো আণা উপসম্পদায কাৰণত্তা উপসম্পদা অহোসীতি ইমমত্থং সন্ধায ৱুত্তং. তথা হি ৱুত্তং থেৰীগাথাট্ঠকথাযং ‘‘এহি ভদ্দে, ভিক্খুনুপস্সযং গন্ত্ৱা ভিক্খুনীনং সন্তিকে পব্বজ্জ উপসম্পজ্জস্সূতি মং অৱচ আণাপেসি, সা সত্থু আণা ময্হং উপসম্পদায কাৰণত্তা উপসম্পদা আসি অহোসী’’তি (থেৰীগা. অট্ঠ. ১১১).

৬৫৭. সাধাৰণপাৰাজিকেহীতি মেথুনাদীহি চতূহি. তানি, পন অঞ্ঞানি চ সাধাৰণসিক্খাপদানি যস্মা ভিক্খুৱিভঙ্গে ৱুত্তনিদানৱত্থাদীসু এৱ সাধাৰণৱসেন পঞ্ঞত্তানি, পচ্ছা পন তানি ভিক্খুনীনং পাতিমোক্খুদ্দেসং অনুজানন্তেন ভগৱতা তাসং সিক্খাপচ্চক্খানাভাৱেন ‘‘যা পন ভিক্খুনী ছন্দসো মেথুনং ধম্মং পটিসেৱেয্যা’’তিআদিনা তদনুৰূপৱসেন পৰিৱত্তেত্ৱা অসাধাৰণসিক্খাপদেহি সদ্ধিং সংসন্দেত্ৱা ভিক্খুনিপাতিমোক্খুদ্দেসৱসেন একতো সঙ্গহিতানি. যস্মা চ নেসং ভিক্খুৱিভঙ্গে (পাৰা. ৪৪ আদযো) ৱুত্তনযেনেৱ সব্বোপি ৱিনিচ্ছযো সক্কা ঞাতুং, তস্মা তানি ৱজ্জেত্ৱা অসাধাৰণানং এৱ ইধ ৱিভঙ্গো ৱুত্তোতি ৱেদিতব্বং.

৬৫৯. ভিক্খূনং ‘‘কাযসংসগ্গং সাদিযেয্যা’’তি অৱত্ৱা ‘‘সমাপজ্জেয্যা’’তি ৱুত্তত্তা ‘‘ভিক্খু আপত্তিযা ন কাৰেতব্বো’’তি ৱুত্তং. তব্বহুলনযেনাতি কিৰিযাসমুট্ঠানস্সেৱ বহুলভাৱতো, এতেন অকিৰিযাসমুট্ঠানাপি অযং আপত্তি হোতীতি দস্সেতি. কিঞ্চাপি দস্সেতি, মযং পনেত্থ এৱং তক্কযাম ‘‘কাযসংসগ্গক্খণে সাদিযন্তিযা কিৰিযায অভাৱেপি ততো পুব্বে পৱত্তিতানং পটিচ্ছন্নট্ঠানগমনইঙ্গিতাকাৰদস্সনাদিকিৰিযানং ৱসেনেৱ কিৰিযাসমউট্ঠানমেৱ, পৰেহি মগ্গে কৰিযমানুপক্কমেন নিচ্চলস্স সাদিযতো সুক্কৱিস্সট্ঠি ৱিয পুব্বপযোগাভাৱেপি ৱা তস্মিঞ্ঞেৱ খণে পৰূপক্কমেন জনিযমানায অত্তনো কাযচলনাদিসঙ্খাতায কিৰিযায, সা হি সাদিযমানেন তস্সা চিত্তেনাপি সমুট্ঠিতা কিৰিযা নাম হোতি অৱাযমিত্ৱা পৰূপক্কমেন মেথুনসাদিযনে ৱিয, ভিক্খূনং পন পৰূপক্কমজনিতং কিৰিযং অব্বোহাৰিকং কত্ৱা অত্তনা কৰিযমানপযোগৱসেনেৱ ‘কাযসংসগ্গং সমাপজ্জেয্যা’তি এৱং ৱিসেসেত্ৱাৱ সিক্খাপদস্স পঞ্ঞত্তত্তা সাদিযমানেপি ন দোসো. ইতৰথা হি তব্বহুলনযেনেত্থ কিৰিযত্তে গয্হমানে অঞ্ঞেসম্পি কিৰিযাকিৰিযসিক্খাপদানং কিৰিযত্তগ্গহণপ্পসঙ্গো সিযা’’তি. তস্মা ৱীমংসিত্ৱা গহেতব্বং. সাতি কিৰিযাসমুট্ঠানতা. তথেৱাতি কাযসংসগ্গৰাগী এৱ.

উব্ভজাণুমণ্ডলিকসিক্খাপদৱণ্ণনা নিট্ঠিতা.

২. ৱজ্জপটিচ্ছাদিকসিক্খাপদৱণ্ণনা

৬৬৬. দুতিযে পুৰিমেনাতিআদি সুন্দৰীনন্দায ৱজ্জপটিচ্ছাদনে পঞ্ঞত্ততং সন্ধায ৱুত্তং. ‘‘অট্ঠন্ন’’ন্তি ৱুত্তত্তা ৱজ্জপটিচ্ছাদনস্সাপি পটিচ্ছাদনে পাৰাজিকমেৱাতি দট্ঠব্বং. ‘‘ধুৰং নিক্খিত্তমত্তে’’তি ৱুত্তত্তা পণ্ণত্তিং অজানন্তিযাপি ‘‘ইদং ৱজ্জং ন পকাসেস্সামী’’তি ছন্দেন ধুৰং নিক্খেপক্খণে পাৰাজিকন্তি দট্ঠব্বং. তং পন পটিচ্ছাদনং যস্মা ‘‘পেসলা ঞত্ৱা গৰহিস্সন্তী’’তি ভযেনেৱ হোতি, ভযঞ্চ কোধচিত্তসম্পযুত্তং, তস্মা ইদং ‘‘দুক্খৱেদন’’ন্তি ৱুত্তং. যং পন সাৰত্থদীপনিযং (সাৰত্থ. টী. পাৰাজিককণ্ড ৩.৬৬৬) ‘‘কিঞ্চাপি ৱজ্জপটিচ্ছাদনং পেমৱসেন হোতি, তথাপি সিক্খাপদৱীতিক্কমচিত্তং দোমনস্সিতমেৱ হোতী’’তি এৱং পণ্ণত্তিৱীতিক্কমচিত্তেনেৱ ছাদনং দোমনস্সত্তে কাৰণং ৱুত্তং, তং অকাৰণং পণ্ণত্তিৱিজাননং ৱিনাপি আপজ্জিতব্বতোৱ.

ৱজ্জপটিচ্ছাদিকসিক্খাপদৱণ্ণনা নিট্ঠিতা.

৬৬৯. ততিযং উত্তানমেৱ.

৪. অট্ঠৱত্থুকসিক্খাপদৱণ্ণনা

৬৭৫. চতুত্থে লোকস্সাদসঙ্খাতং মিত্তেহি অঞ্ঞমঞ্ঞং কাতব্বং সন্থৱং. ৱুত্তমেৱত্থং পৰিযাযন্তৰেন দস্সেতুং ‘‘কাযসংসগ্গৰাগেনা’’তি ৱুত্তং.

তিস্সিত্থিযো মেথুনং তং ন সেৱেতি যা তিস্সো ইত্থিযো, তাসু ৱুত্তং তং মেথুনং ন সেৱেয্য. অনৰিযপণ্ডকেতি তযো অনৰিযে, তযো পণ্ডকে চ উপসঙ্কমিত্ৱা মেথুনং ন সেৱেতি অত্থো. অনৰিযাতি চেত্থ উভতোব্যঞ্জনকা অধিপ্পেতা. ব্যঞ্জনস্মিন্তি অত্তনো ৱচ্চমুখমগ্গেপি. ছেদো এৱ ছেজ্জং, পাৰাজিকং.

ৱণ্ণাৱণ্ণোতি দ্ৱীহি সুক্কৱিস্সট্ঠি ৱুত্তা. গমনুপ্পাদনন্তি সঞ্চৰিত্তং. ‘‘মেথুনধম্মস্স পুব্বভাগত্তা পচ্চযো হোতী’’তি ইমিনা কাৰিযোপচাৰেন কাযসংসগ্গো মেথুনধম্মোতি ৱুত্তোতি দস্সেতি. সব্বপদেসূতি সঙ্ঘাটিকণ্ণগ্গহণাদিপদেসু. কাযসংসগ্গৰাগো, সউস্সাহতা, অট্ঠমৱত্থুস্স পূৰণন্তি তীণেত্থ অঙ্গানি.

অট্ঠৱত্থুকসিক্খাপদৱণ্ণনা নিট্ঠিতা.

পাৰাজিকৱণ্ণনানযো নিট্ঠিতো.