১১. পঞ্চসতিকক্খন্ধকো

খুদ্দানুখুদ্দকসিক্খাপদকথাৱণ্ণনা

৪৩৭. পঞ্চসতিকক্খন্ধকে পাড়িযং ‘‘অপাৱুসো, অম্হাকং সত্থাৰং জানাসী’’তি ইদং থেৰো সযং ভগৱতো পৰিনিব্বুতভাৱং জানন্তোপি অত্তনা সহগতভিক্খুপৰিসায ঞাপনত্থমেৱ, সুভদ্দস্স ৱুড্ঢপব্বজিতস্স সাসনস্স পটিপক্খৱচনং ভিক্খূনং ৱিঞ্ঞাপনত্থঞ্চ এৱং পুচ্ছি. সুভদ্দো হি কুসিনাৰাযং ভগৱতি অভিপ্পসন্নায খত্তিযাদিগহট্ঠপৰিসায মজ্ঝে ভগৱতো পৰিনিব্বানং সুত্ৱা হট্ঠপহট্ঠোপি ভযেন পহট্ঠাকাৰং ৱাচায পকাসেতুং ন সক্খিস্সতি, ইধেৱ পন ৱিজনপদেসে সুত্ৱা যথাজ্ঝাসযং অত্তনো পাপলদ্ধিং পকাসেস্সতি, ততো তমেৱ পচ্চযং দস্সেত্ৱা ভিক্খূ সমুস্সাহেত্ৱা ধম্মৱিনযসঙ্গহং কাৰেত্ৱা এতস্স পাপভিক্খুস্স, অঞ্ঞেসঞ্চ ঈদিসানং মনোৰথৱিঘাতং, সাসনট্ঠিতিঞ্চ কৰিস্সামীতি জানন্তোৱ তং পুচ্ছীতি ৱেদিতব্বং. তেনেৱ থেৰো ‘‘একমিদাহং, আৱুসো, সময’’ন্তিআদিনা সুভদ্দৱচনমেৱ দস্সেত্ৱা ধম্মৱিনযং সঙ্গাযাপেসি. নানাভাৱোতি সৰীৰেন নানাদেসভাৱো, ৱিপ্পৱাসোতি অত্থো. ৱিনাভাৱোতি মৰণেন ৱিযুজ্জনং. অঞ্ঞথাভাৱোতি ভৱন্তৰূপগমনেন অঞ্ঞাকাৰপ্পত্তি.

৪৪১. ‘‘আকঙ্খমানো…পে… সমূহনেয্যা’’তি ইদং ভগৱা মযা ‘‘আকঙ্খমানো’’তি ৱুত্তত্তা একসিক্খাপদম্পি সমূহনিতব্বং অপস্সন্তা, সমূহনে চ দোসং দিস্ৱা ধম্মসঙ্গহকা ভিক্খূ ‘‘অপঞ্ঞত্তং ন পঞ্ঞাপেস্সাম, পঞ্ঞত্তং ন সমুচ্ছিন্দিস্সামা’’তিআদিনা পুন ‘‘পঞ্ঞত্তিসদিসায অকুপ্পায কম্মৱাচায সাৱেত্ৱা সমাদায ৱত্তিস্সন্তি, ততো যাৱ সাসনন্তৰধানা অপ্পটিবাহিযানি সিক্খাপদানি ভৱিস্সন্তী’’তি ইমিনা অধিপ্পাযেন অৱোচাতি দট্ঠব্বং. তেনেৱ মহাথেৰাপি তথেৱ পটিপজ্জিংসু.

গিহিগতানীতি গিহীসু গতানি. খত্তিযমহাসাৰাদিগিহীহি ঞাতানীতি অত্থো. চিতকধূমকালো অত্তনো পৱত্তিপৰিযোসানভূতো এতস্সাতি ধূমকালিকং.

৪৪৩. ওড়াৰিকে নিমিত্তে কৰিযমানেপীতি ‘‘আকঙ্খমানো, আনন্দ, তথাগতো কপ্পং ৱা তিট্ঠেয্য কপ্পাৱসেসং ৱা’’তি এৱং থূলতৰে ‘‘তিট্ঠতু, ভগৱা, কপ্প’’ন্তি যাচনহেতুভূতে ওকাসনিমিত্তে কম্মে কৰিযমানে. মাৰেন পৰিযুট্ঠিতচিত্তোতি মাৰেন আৱিট্ঠচিত্তো.

৪৪৫. উজ্জৱনিকাযাতি পটিসোতগামিনিযা. কুচ্ছিতো লৱো ছেদো ৱিনাসো কুলৱো, নিৰত্থকৱিনিযোগো. তং ন গচ্ছন্তীতি ন কুলৱং গমেন্তি.

খুদ্দানুখুদ্দকসিক্খাপদকথাৱণ্ণনা নিট্ঠিতা.

পঞ্চসতিকক্খন্ধকৱণ্ণনানযো নিট্ঠিতো.