১০. ভিক্খুনিক্খন্ধকো

মহাপজাপতিগোতমীৱত্থুকথাৱণ্ণনা

৪০৩. ভিক্খুনিক্খন্ধকে ‘‘মাতুগামস্স পব্বজিতত্তা’’তি ইদং পঞ্চৱস্সসততো উদ্ধং সদ্ধম্মস্স অপ্পৱত্তনকাৰণদস্সনং. সুক্খৱিপস্সকখীণাসৱৱসেন ৱস্সসহস্সন্তিআদি খন্ধকভাণকানং মতং গহেত্ৱা ৱুত্তং. দীঘনিকাযট্ঠকথাযং পন ‘‘পটিসম্ভিদাপ্পত্তেহি ৱস্সসহস্সং অট্ঠাসি, ছড়ভিঞ্ঞেহি ৱস্সসহস্সং, তেৱিজ্জেহি ৱস্সসহস্সং, সুক্খৱিপস্সকেহি ৱস্সসহস্সং, পাতিমোক্খেহি ৱস্সসহস্সং অট্ঠাসী’’তি (দী. নি. অট্ঠ. ৩.১৬১) ৱুত্তং. অঙ্গুত্তৰ (অ. নি. অট্ঠ. ৩.৮.৫১) -সংযুত্তট্ঠকথাসুপি (সং. নি. অট্ঠ. ২.২.১৫৬) অঞ্ঞথাৱ ৱুত্তং, তং সব্বং অঞ্ঞমঞ্ঞৱিৰুদ্ধম্পি তংতংভাণকানং মতেন লিখিতসীহড়ট্ঠকথাসু আগতনযমেৱ গহেত্ৱা আচৰিযেন লিখিতং ঈদিসে কথাৱিৰোধে সাসনপৰিহানিযা অভাৱতো, সোধনুপাযাভাৱা চ. পৰমত্থৱিৰোধো এৱ হি সুত্তাদিনযেন সোধনীযো, ন কথামগ্গৱিৰোধোতি.

মহাপজাপতিগোতমীৱত্থুকথাৱণ্ণনা নিট্ঠিতা.

ভিক্খুনীউপসম্পদানুজাননকথাৱণ্ণনা

৪০৪-৮. পাড়িযং যদগ্গেনাতি যস্মিং দিৱসে. তদাতি তস্মিংযেৱ দিৱসে. ৱিমানেত্ৱাতি অৱমানং কত্ৱা.

৪১০-১. আপত্তিগামিনিযোতি আপত্তিং আপন্নাযো. কম্মৱিভঙ্গেতি পৰিৱাৰে কম্মৱিভঙ্গে (পৰি. ৪৮২ আদযো).

৪১৩-৫. পাড়িযং দ্ৱে তিস্সো ভিক্খুনিযোতি দ্ৱীহি তীহি ভিক্খুনীহি. ন আৰোচেন্তীতি পাতিমোক্খুদ্দেসকস্স ন আৰোচেন্তি.

৪১৬. দুস্সৱেণিযাতি অনেকদুস্সপট্টে একতো কত্ৱা কতৱেণিযা.

৪১৭. ৱিসেসকন্তি পত্তলেখাদিৱণ্ণৱিসেসং. পকিণন্তীতি ৱিক্কিণন্তি. নমনকন্তি পাসুকট্ঠিনমনকবন্ধনং.

৪২২-৫. সংৱেল্লিযন্তি কচ্ছং বন্ধিত্ৱা নিৱাসনং. তযো নিস্সযেতি ৰুক্খমূলসেনাসনস্স তাসং অলব্ভনতো ৱুত্তং.

৪২৬-৮. অট্ঠেৱ ভিক্খুনিযো যথাৱুড্ঢং পটিবাহন্তীতি অট্ঠ ভিক্খুনিযো ৱুড্ঢপটিপাটিযাৱ গণ্হন্তিযো আগতপটিপাটিং পটিবাহন্তি, নাঞ্ঞাতি অত্থো. অনুৱাদং পট্ঠপেন্তীতি ইস্সৰিযং পৱত্তেন্তীতি অত্থং ৱদন্তি.

৪৩০. ভিক্খুদূতেনাতি ভিক্খুনা দূতভূতেন. সিক্খমানদূতেনাতি সিক্খমানায দূতায.

৪৩১. ন সম্মতীতি নপ্পহোতি. নৱকম্মন্তি ‘‘নৱকম্মং কত্ৱা ৱসতূ’’তি অপলোকেত্ৱা সঙ্ঘিকভূমিযা ওকাসদানং.

৪৩২-৬. সন্নিসিন্নগব্ভাতি দুৱিঞ্ঞেয্যগব্ভা. মহিলাতিত্থেতি ইত্থীনং সাধাৰণতিত্থে.

ভিক্খুনীউপসম্পদানুজাননকথাৱণ্ণনা নিট্ঠিতা.

ভিক্খুনিক্খন্ধকৱণ্ণনানযো নিট্ঠিতো.