৯. পাতিমোক্খট্ঠপনক্খন্ধকো

পাতিমোক্খুদ্দেসযাচনকথাৱণ্ণনা

৩৮৩. পাতিমোক্খট্ঠপনক্খন্ধকে পাড়িযং নন্দিমুখিযাতি ওদাতদিসামুখতায তুট্ঠমুখিযা. ‘‘উদ্ধস্তং অৰুণ’’ন্তি ৱত্ৱাপি ‘‘উদ্দিসতু, ভন্তে, ভগৱা’’তি পাতিমোক্খুদ্দেসযাচনং অনুপোসথে উপোসথকৰণপটিক্খেপস্স সিক্খাপদস্স অপঞ্ঞত্তত্তা থেৰেন কতন্তি দট্ঠব্বং. কস্মা পন ভগৱা এৱং তুণ্হীভূতোৱ তিযামৰত্তিং ৱীতিনামেসীতি? অপৰিসুদ্ধায পৰিসায উপোসথাদিসংৱাসকৰণস্স সাৱজ্জতং ভিক্খুসঙ্ঘে পাকটং কাতুং, তঞ্চ আযতিং ভিক্খূনং তথাপটিপজ্জনত্থং সিক্খাপদং ঞাপেতুং. কেচি পনেত্থ ‘‘অপৰিসুদ্ধম্পি পুগ্গলং তস্স সম্মুখা ‘অপৰিসুদ্ধো’তি ৱত্তুং মহাকৰুণায অৱিসহন্তো ভগৱা তথা নিসীদী’’তি কাৰণং ৱদন্তি. তং অকাৰণং পচ্ছাপি অৱত্তব্বতো, মহামোগ্গল্লানত্থেৰেনাপি তং বাহাযং গহেত্ৱা বহি নীহৰণস্স অকত্তব্বতাপসঙ্গতো. তস্মা যথাৱুত্তমেৱেত্থ কাৰণন্তি. তেনেৱ ‘‘অট্ঠানমেতং, ভিক্খৱে, অনৱকাসো, যং তথাগতো অপৰিসুদ্ধায পৰিসায উপোসথং কৰেয্য, পাতিমোক্খং উদ্দিসেয্যা’’তি (অ. নি. ৮.২০; চূড়ৱ. ৩৮৬; উদা. ৪৫) ৱত্ৱা ‘‘ন চ, ভিক্খৱে, সাপত্তিকেন পাতিমোক্খং সোতব্ব’’ন্তিআদিনা (চূড়ৱ. ৩৮৬) সাপত্তিকপৰিসায কত্তব্বৱিধি দস্সিতো.

সঙ্কস্সৰসমাচাৰন্তি কিঞ্চিদেৱ অসাৰুপ্পং দিস্ৱা ‘‘ইদং ইমিনা কতং ভৱিস্সতী’’তি পৰেহি সঙ্কায সৰিতব্বসমাচাৰং, অত্তনা ৱা ‘‘মম অনাচাৰং এতে জানন্তী’’তি সঙ্কায সৰিতব্বসমাচাৰং. সমণৱেসধাৰণেন, সঙ্ঘিকপচ্চযভাগগহণাদিনা চ জীৱিকং কপ্পেন্তো ‘‘অহং সমণো’’তি পটিঞ্ঞং অদেন্তোপি অত্থতো দেন্তো ৱিয হোতীতি ‘‘সমণপটিঞ্ঞং ব্ৰহ্মচাৰিপটিঞ্ঞ’’ন্তি ৱুত্তং. অৱস্সুতন্তি কিলেসাৱস্সনেন তিন্তং. সঞ্জাতদুস্সিল্যকচৱৰত্তা কসম্বুজাতং, অসাৰতায ৱা কসম্বু ৱিয জাতং. বহিদ্ৱাৰকোট্ঠকা নিক্খামেত্ৱাতি দ্ৱাৰসালতো বহি নিক্খমাপেত্ৱা.

৩৮৪. মহাসমুদ্দে অভিৰমন্তীতি বহুসো দস্সনপৱিসনাদিনা মহাসমুদ্দে অভিৰতিং ৱিন্দন্তি. ন আযতকেনেৱ পপাতোতি ছিন্নতটমহাসোব্ভো ৱিয ন আদিতোৱ নিন্নোতি অত্থো. ঠিতধম্মোতি অৱট্ঠিতসভাৱো. পূৰত্তন্তি পুণ্ণত্তং. নাগাতি সপ্পজাতিকা.

পাতিমোক্খুদ্দেসযাচনকথাৱণ্ণনা নিট্ঠিতা.

পাতিমোক্খসৱনাৰহকথাদিৱণ্ণনা

৩৮৬. উদাহৰিতব্বন্তি পাড়িযা অৱত্ৱা তমত্থং যায কাযচি ভাসায উদাহটম্পি উদাহটমেৱাতি দট্ঠব্বং.

পুৰে ৱা পচ্ছা ৱাতি ঞত্তিআৰম্ভতো পুব্বে ৱা ঞত্তিনিট্ঠানতো পচ্ছা ৱা.

৩৮৭. কতঞ্চ অকতঞ্চ উভযং গহেত্ৱাতি যস্স কতাপি অত্থি অকতাপি. তস্স তদুভযং গহেত্ৱা. ধম্মিকং সামগ্গিন্তি ধম্মিকং সমগ্গকম্মং. পচ্চাদিযতীতি উক্কোটনাধিপ্পাযেন পুন কাতুং আদিযতি.

৩৮৮. আকাৰাদিসঞ্ঞা ৱেদিতব্বাতি আকাৰলিঙ্গনিমিত্তনামানি ৱুত্তানীতি ৱেদিতব্বানি.

পাতিমোক্খসৱনাৰহকথাদিৱণ্ণনা নিট্ঠিতা.

অত্তাদানঅঙ্গকথাদিৱণ্ণনা

৩৯৮. পুন চোদেতুং অত্তনা আদাতব্বং গহেতব্বং অধিকৰণং অত্তাদানন্তি আহ ‘‘সাসনং সোধেতুকামো’’তিআদি. ৱস্সাৰত্তোতি ৱস্সকালো. সোপি হি দুব্ভিক্খাদিকালো ৱিয অধিকৰণৱূপসমত্থং লজ্জিপৰিসায দূৰতো আনযনস্স, আগতানঞ্চ পিণ্ডায চৰণাদিসমাচাৰস্স দুক্কৰত্তা অকালো এৱ.

সমনুস্সৰণকৰণন্তি অনুস্সৰিতানুস্সৰিতক্খণে পীতিপামোজ্জজননতো অনুস্সৰণুপ্পাদকং. ৱিগতূপক্কিলেস…পে… সংৱত্ততীতি এত্থ যথা অব্ভহিমাদিউপক্কিলেসৱিৰহিতানং চন্দিমসূৰিযানং সস্সিৰীকতা হোতি, এৱমস্সাপি চোদকস্স পাপপুগ্গলূপক্কিলেসৱিগমেন সস্সিৰীকতা হোতীতি অধিপ্পাযো.

৩৯৯. অধিগতং মেত্তচিত্তন্তি অপ্পনাপ্পত্তং মেত্তঝানং.

৪০০-১. ‘‘দোসন্তৰো’’তি এত্থ অন্তৰ-সদ্দো চিত্তপৰিযাযোতি আহ ‘‘ন দুট্ঠচিত্তো হুত্ৱা’’তি.

কাৰুঞ্ঞং নাম কৰুণা এৱাতি আহ ‘‘কাৰুঞ্ঞতাতি কৰুণাভাৱো’’তি. কৰুণন্তি অপ্পনাপ্পত্তং ৱদতি. তথা মেত্তন্তি.

অত্তাদানঅঙ্গকথাদিৱণ্ণনা নিট্ঠিতা.

পাতিমোক্খট্ঠপনক্খন্ধকৱণ্ণনানযো নিট্ঠিতো.