৮. ৱত্তক্খন্ধকো

আগন্তুকৱত্তকথাৱণ্ণনা

৩৫৭. ৱত্তক্খন্ধকে পত্থৰিতব্বন্তি আতপে পত্থৰিতব্বং. পাড়িযং অভিৱাদাপেতব্বোতি ৱন্দনত্থায ৱস্সং পুচ্ছনেন নৱকো সযমেৱ ৱন্দতীতি ৱুত্তং. নিল্লোকেতব্বোতি ওলোকেতব্বো.

আগন্তুকৱত্তকথাৱণ্ণনা নিট্ঠিতা.

আৱাসিকৱত্তকথাৱণ্ণনা

৩৫৯. ‘‘যথাভাগ’’ন্তি ঠপিতট্ঠানং অনতিক্কমিত্ৱা মঞ্চপীঠাদিং পপ্ফোটেত্ৱা পত্থৰিত্ৱা উপৰি পচ্চত্থৰণং দত্ৱা দানম্পি সেনাসনপঞ্ঞাপনমেৱাতি দস্সেন্তো আহ ‘‘পপ্ফোটেত্ৱা হি পত্থৰিতুং পন ৱট্টতিযেৱা’’তি.

আৱাসিকৱত্তকথাৱণ্ণনা নিট্ঠিতা.

অনুমোদনৱত্তকথাৱণ্ণনা

৩৬২. পঞ্চমে নিসিন্নেতি অনুমোদনত্থায নিসিন্নে. ন মহাথেৰস্স ভাৰো হোতীতি অনুমোদকং আগমেতুং ন ভাৰো. অজ্ঝিট্ঠোৱ আগমেতব্বোতি অত্তনা অজ্ঝিট্ঠেহি ভিক্খূহি অনুমোদন্তেযেৱ নিসীদিতব্বন্তি অত্থো.

অনুমোদনৱত্তকথাৱণ্ণনা নিট্ঠিতা.

ভত্তগ্গৱত্তকথাৱণ্ণনা

৩৬৪. মনুস্সানং পৰিৱিসনট্ঠানন্তি যত্থ অন্তোৱিহাৰেপি মনুস্সা সপুত্তদাৰা আৱসিত্ৱা ভিক্খূ নেত্ৱা ভোজেন্তি. আসনেসু সতীতি নিসীদনট্ঠানেসু সন্তেসু. ইদং, ভন্তে, আসনং উচ্চন্তি আসন্নে সমভূমিভাগে পঞ্ঞত্তং থেৰাসনেন সমকং আসনং সন্ধায ৱুত্তং, থেৰাসনতো পন উচ্চতৰে আপুচ্ছিত্ৱাপি নিসীদিতুং ন ৱট্টতি. যদি তং আসন্নম্পি নীচতৰং হোতি, অনাপুচ্ছাপি নিসীদিতুং ৱট্টতি. মহাথেৰস্সেৱ আপত্তীতি আসনেন পটিবাহনাপত্তিযা আপত্তি. অৱত্থৰিত্ৱাতি পাৰুতসঙ্ঘাটিং অৱত্থৰিত্ৱা, অনুক্খিপিত্ৱাতি অত্থো.

পাড়িযং ‘‘উভোহি হত্থেহি…পে… ওদনো পটিগ্গহেতব্বো’’তি ইদং হত্থতলে ৱা পচ্ছিপিট্ঠিআদিদুস্সণ্ঠিতাধাৰে ৱা পত্তং ঠপেত্ৱা ওদনস্স গহণকালে পত্তস্স অপতনত্থায ৱুত্তং, সুসজ্জিতে পন আধাৰে পত্তং ঠপেত্ৱা একেন হত্থেন তং পৰামসিত্ৱাপি ওদনং পটিগ্গহেতুং ৱট্টতি এৱ. উভোহি হত্থেহি…পে… উদকং পটিগ্গহেতব্বন্তি এত্থাপি এসেৱ নযো.

হত্থধোৱনউদকন্তি ভোজনাৱসানে উদকং. তেনাহ ‘‘পানীযং পিৱিত্ৱা হত্থা ধোৱিতব্বা’’তি. তেন পৰিযোসানে ধোৱনমেৱ পটিক্খিত্তং, ভোজনন্তৰে পন পানীযপিৱনাদিনা নযেন হত্থং ধোৱিত্ৱা পুন ভুঞ্জিতুং ৱট্টতীতি দস্সেতি. পোত্থকেসু পন ‘‘পানীযং পিৱিত্ৱা হত্থা ন ধোৱিতব্বা’’তি লিখন্তি, তং পুৰিমৱচনেন ন সমেতি পৰিযোসানে উদকস্সেৱ ‘‘হত্থধোৱনউদক’’ন্তি ৱুত্তত্তা. সচে মনুস্সা ধোৱথ, ভন্তেতিআদি নিট্ঠিতভত্তং নিসিন্নং থেৰং সন্ধায ৱুত্তং. ধুৰে দ্ৱাৰসমীপে.

ভত্তগ্গৱত্তকথাৱণ্ণনা নিট্ঠিতা.

পিণ্ডচাৰিকৱত্তকথাদিৱণ্ণনা

৩৬৬. পাড়িযং ঠাপেতি ৱাতি তিট্ঠ ভন্তেতি ৱদন্তি.

৩৬৭. অত্থি, ভন্তে, নক্খত্তপদানীতি নক্খত্তপদৱিসযানি ঞাতানি অত্থি, অস্সযুজাদিনক্খত্তং জানাথাতি অধিপ্পাযো. তেনাহ ‘‘ন জানাম, আৱুসো’’তি. অত্থি, ভন্তে, দিসাভাগন্তি এত্থাপি এসেৱ নযো. কেনজ্জ, ভন্তে, যুত্তন্তি কেন নক্খত্তেন চন্দো যুত্তোতি অত্থো.

৩৬৯. অঙ্গণেতি অব্ভোকাসে. এৱমেৱ পটিপজ্জিতব্বন্তি উদ্দেসদানাদি আপুচ্ছিতব্বন্তি দস্সেতি.

৩৭৪. নিবদ্ধগমনত্থাযাতি অত্তনোৱ নিৰন্তৰগমনত্থায. ঊহদিতাতি এত্থ হদ-ধাতুস্স ৱচ্চৱিস্সজ্জনত্থতাযাহ ‘‘বহি ৱচ্চমক্খিতা’’তি.

পিণ্ডচাৰিকৱত্তকথাদিৱণ্ণনা নিট্ঠিতা.

ৱত্তক্খন্ধকৱণ্ণনানযো নিট্ঠিতো.