৭. সঙ্ঘভেদকক্খন্ধকো

ছসক্যপব্বজ্জাকথাদিৱণ্ণনা

৩৩০. সঙ্ঘভেদকক্খন্ধকে পাড়িযং অনুপিযং নামাতি অনুপিযা নাম. হেট্ঠা পাসাদাতি পাসাদতো হেট্ঠা হেট্ঠিমতলং, ‘‘হেট্ঠাপাসাদ’’ন্তিপি পাঠো. অভিনেতব্বন্তি ৱপিতখেত্তেসু পৱেসেতব্বং. নিন্নেতব্বন্তি ততো নীহৰিতব্বং. নিদ্ধাপেতব্বন্তি সস্সদূসকতিণাদীনি উদ্ধৰিতব্বং. উজুং কাৰাপেতব্বন্তি পুঞ্জং কাৰাপেতব্বং, অযমেৱ ৱা পাঠো.

৩৩২. পৰদত্তোতি পৰেহি দিন্নপচ্চযেহি পৱত্তমানো. মিগভূতেন চেতসাতি কত্থচি অলগ্গতায মিগস্স ৱিয জাতেন চিত্তেন.

৩৩৩. মনোমযং কাযন্তি ঝানমনেন নিব্বত্তং ব্ৰহ্মকাযং, ‘‘কিং নু খো অহং পসাদেয্যং, যস্মিং মে পসন্নে বহুলাভসক্কাৰো উপ্পজ্জেয্যা’’তি পঠমং উপ্পন্নপৰিৱিতক্কস্স মন্দপৰিযুট্ঠানতায দেৱদত্তস্স তস্মিং খণে ঝানপৰিহানি নাহোসি, পচ্ছা এৱ অহোসীতি দট্ঠব্বং. তেনাহ ‘‘সহ চিত্তুপ্পাদা’’তিআদি. দ্ৱে ৱা তীণি ৱা মাগধকানি গামখেত্তানীতি এত্থ মগধৰট্ঠে খুদ্দকং গামখেত্তং গাৱুতমত্তং, মজ্ঝিমং পন দিযড্ঢগাৱুতমত্তং, মহন্তং অনেকযোজনম্পি হোতি. তেসু মজ্ঝিমেন গামখেত্তেন দ্ৱে ৱা খুদ্দকেন তীণি ৱা গামখেত্তানি, তস্স সৰীৰং তিগাৱুতপ্পমাণো অত্তভাৱোতি ৱুত্তং হোতি.

৩৩৪. সত্থাৰোতি গণসত্থাৰো. নাস্সস্সাতি ন এতস্স ভৱেয্য. তন্তি সত্থাৰং. তেনাতি অমনাপেন. সম্মন্নতীতি চীৱৰাদিনা অম্হাকং সম্মানং কৰোতি, পৰেহি ৱা অযং সত্থা সম্মানীযতীতি অত্থো.

৩৩৫. নাসায পিত্তং ভিন্দেয্যুন্তি অচ্ছপিত্তং ৱা মচ্ছপিত্তং ৱা নাসাপুটে পক্খিপেয্যুং. অস্সতৰীতি ৱড়ৱায কুচ্ছিস্মিং গদ্ৰভস্স জাতা. তস্সা হি গহিতগব্ভায ৱিজাযিতুমসক্কোন্তিযা উদৰং ফালেত্ৱা পোতকং নীহৰন্তি. তেনাহ ‘‘অত্তৱধায গব্ভং গণ্হাতী’’তি.

৩৩৯. পোত্থনিকন্তি ছুৰিকং, ‘‘খৰ’’ন্তিপি ৱুচ্চতি.

৩৪২. মা কুঞ্জৰ নাগমাসদোতি হে কুঞ্জৰ বুদ্ধনাগং ৱধকচিত্তেন মা উপগচ্ছ. দুক্খন্তি দুক্খকাৰণত্তা দুক্খং. ইতোতি ইতো জাতিতো. যতোতি যস্মা, যন্তস্স ৱা, গচ্ছন্তস্সাতি অত্থো. মা চ মদোতি মদো তযা ন কাতব্বোতি অত্থো.

৩৪৩. তিকভোজনন্তি তীহি ভুঞ্জিতব্বং ভোজনং, ততো অধিকেহি একতো পটিগ্গহেত্ৱা ভুঞ্জিতুং ন ৱট্টনকং গণভোজনপটিপক্খং ভোজনন্তি অত্থো. কোকালিকোতিআদীনি দেৱদত্তপৰিসায গণপামোক্খানং নামানি. কপ্পন্তি মহানিৰযে আযুকপ্পং, তং অন্তৰকপ্পন্তি কেচি. কেচি পন ‘‘অসঙ্খ্যেয্যকপ্প’’ন্তি.

ছসক্যপব্বজ্জাকথাদিৱণ্ণনা নিট্ঠিতা.

সঙ্ঘভেদককথাৱণ্ণনা

৩৪৫. পৰস্স চিত্তং ঞত্ৱা কথনং আদেসনাপাটিহাৰিযং. কেৱলং ধম্মদেসনা অনুসাসনীপাটিহাৰিযং. তদুভযম্পি ধম্মী কথা নাম. তায থেৰো ওৱদি. ইদ্ধিৱিধং ইদ্ধিপাটিহাৰিযং নাম. তেন সহিতা অনুসাসনী এৱ ধম্মী কথা. তায থেৰো ওৱদি.

‘‘থুল্লচ্চযং দেসাপেহী’’তি ইদং ভেদপুৰেক্খাৰস্স উপোসথাদিকৰণে থুল্লচ্চযস্স উপোসথক্খন্ধকাদীসু পঠমমেৱ পঞ্ঞত্তত্তা ৱুত্তং, ইতৰথা এতেসং আদিকম্মিকত্তা অনাপত্তিযেৱ সিযা.

৩৪৬. সৰসীতি সৰো. মহিং ৱিক্ৰুব্বতোতি মহিং দন্তেহি ৱিলিখন্তস্স. ইদঞ্চ হত্থীনং সভাৱদস্সনং. নদীসূতি সৰেসু. ভিসং ঘসমানস্সাতি যোজনা. জগ্গতোতি যূথং পালেন্তস্স.

৩৪৭. দূতেয্যং গন্তুন্তি দূতকম্মং পত্তুং, দূতকম্মং কাতুন্তি অত্থো. সহিতাসহিতস্সাতি যুত্তাযুত্তস্স, যং ৱত্তুং, কাতুঞ্চ যুত্তং, তত্থ কুসলো. অথ ৱা অধিপ্পেতানাধিপ্পেতস্স ৱচনস্স কুসলো, ব্যঞ্জনমত্তে ন তিট্ঠতি, অধিপ্পেতত্থমেৱ আৰোচেতীতি অত্থো.

৩৫০. গাথাসু জাতূতি একংসেন. মা উদপজ্জথ মা হোতূতি অত্থো. পাপিচ্ছানং যথাগতীতি পাপিচ্ছানং পুগ্গলানং যাদিসী গতি অভিসম্পৰাযো. তং অত্থজাতং. ইমিনাপি কাৰণেন জানাথাতি দেৱদত্তস্স ‘‘পণ্ডিতো’’তিআদিনা উপৰি ৱক্খমানাকাৰং দস্সেতি.

পমাদং অনুচিণ্ণোতি পমাদং আপন্নো. আসীসাযন্তি অৱস্সংভাৱীঅত্থসিদ্ধিযং. সা হি ইধ আসীসাতি অধিপ্পেতা, ন পত্থনা. ঈদিসে অনাগতত্থে অতীতৱচনং সদ্দৱিদূ ইচ্ছন্তি.

দুব্ভেতি দুব্ভেয্য. ৱিসকুম্ভেনাতি একেন ৱিসপুণ্ণকুম্ভেন. সোতি সো পুগ্গলো. ন পদূসেয্য ৱিসমিস্সং কাতুং ন সক্কোতীতি অত্থো. ভযানকোতি ৱিপুলগম্ভীৰভাৱেন ভযানকো. তেনাপি দূসেতুং ন সক্কুণেয্যতং দস্সেতি. ৱাদেনাতি দোসকথনেন. উপহিংসতীতি বাধতি.

সঙ্ঘভেদককথাৱণ্ণনা নিট্ঠিতা.

উপালিপঞ্হাকথাৱণ্ণনা

৩৫১. ন পন এত্তাৱতা সঙ্ঘো ভিন্নো হোতীতি সলাকগ্গাহাপনমত্তেন সঙ্ঘভেদানিব্বত্তিতো ৱুত্তং. উপোসথাদিসঙ্ঘকম্মে কতে এৱ হি সঙ্ঘো ভিন্নো হোতি. তত্থ চ উপোসথপৱাৰণাসু ঞত্তিনিট্ঠানেন, সেসকম্মেসু অপলোকনাদিকম্মপৰিযোসানেন সঙ্ঘভেদো সমত্থোতি দট্ঠব্বো.

‘‘অভব্বতা ন ৱুত্তা’’তি ইদং ‘‘ভিক্খৱে, দেৱদত্তেন পঠমং আনন্তৰিযকম্মং উপচিত’’ন্তিআদিনা আনন্তৰিযত্তং ৱদতা ভগৱতা তস্স অভব্বতাসঙ্খাতা পাৰাজিকতা ন পঞ্ঞত্তা. এতেন আপত্তি ৱিয অভব্বতাপি পঞ্ঞত্তিঅনন্তৰমেৱ হোতি, ন ততো পুৰেতি দস্সেতি. ইধ পন আদিকম্মিকস্সপি অনাপত্তিযা অৱুত্তত্তা দেৱদত্তাদযোপি ন মুত্তাতি দট্ঠব্বং.

তযো সতিপট্ঠানাতিআদীসু তযো এৱ সতিপট্ঠানা, ন ততো পৰন্তি একস্স সতিপট্ঠানস্স পটিক্খেপোৱ ইধ অধম্মো, ন পন তিণ্ণং সতিপট্ঠানত্তৱিধানং তস্স ধম্মত্তা. এৱং সেসেসুপি হাপনকোট্ঠাসেসু. ৱড্ঢনেসু পন ছ ইন্দ্ৰিযানীতি অনিন্দ্ৰিযস্সপি একস্স ইন্দ্ৰিযত্তৱিধানমেৱ অধম্মো. এৱং সেসেসুপি. ন কেৱলঞ্চ এতেৱ, ‘‘চত্তাৰো খন্ধা, তেৰসাযতনানী’’তিআদিনা যত্থ কত্থচি ৱিপৰীততো পকাসনং সব্বং অধম্মো. যাথাৱতো পকাসনঞ্চ সব্বং ধম্মোতি দট্ঠব্বং. পকাসনন্তি চেত্থ তথা তথা কাযৱচীপযোগসমুট্ঠাপিকা অৰূপক্খন্ধাৱ অধিপ্পেতা, এৱমেত্থ দসকুসলকম্মপথাদীসু অনৱজ্জট্ঠেন সৰূপতো ধম্মেসু, অকুসলকম্মপথাদীসু সাৱজ্জট্ঠেন সৰূপতো অধম্মেসু চ তদঞ্ঞেসু চ অব্যাকতেসু যস্স কস্সচি কোট্ঠাসস্স ভগৱতা পঞ্ঞত্তক্কমেনেৱ পকাসনং ‘‘ধম্মো’’তি চ ৱিপৰীততো পকাসনং ‘‘অধম্মো’’তি চ দস্সিতন্তি দট্ঠব্বং. কামঞ্চেত্থ ৱিনযাদযোপি যথাভূততো, অযথাভূততো চ পকাসনৱসেন ধম্মাধম্মেসু এৱ পৱিসন্তি, ৱিনযাদিনামেন পন ৱিসেসেত্ৱা ৱিসুং গহিতত্তা তদৱসেসমেৱ ধম্মাধম্মকোট্ঠাসে পৱিসতীতি দট্ঠব্বং.

ইমং অধম্মং ধম্মোতি কৰিস্সামাতিআদি ধম্মঞ্চ অধম্মঞ্চ যাথাৱতো ঞত্ৱাৱ পাপিচ্ছং নিস্সায ৱিপৰীততো পকাসেন্তস্সেৱ সঙ্ঘভেদো হোতি, ন পন তথাসঞ্ঞায পকাসেন্তস্সাতি দস্সনত্থং ৱুত্তং. এস নযো ‘‘অৱিনযং ৱিনযোতি দীপেন্তী’’তিআদীসুপি. তত্থ নিয্যানিকন্তি উক্কট্ঠন্তি অত্থো. ‘‘তথেৱা’’তি ইমিনা ‘‘এৱং অম্হাকং আচৰিযকুল’’ন্তিআদিনা ৱুত্তমত্থং আকড্ঢতি.

সংৱৰো পহানং পটিসঙ্খাতি সংৱৰৱিনযো, পহানৱিনযো, পটিসঙ্খাৱিনযো চ ৱুত্তো. তেনাহ ‘‘অযং ৱিনযো’’তি. ‘‘পঞ্ঞত্তং অপঞ্ঞত্ত’’ন্তি দুকং ‘‘ভাসিতং অভাসিত’’ন্তি দুকেন অত্থতো সমানমেৱ, তথা দুট্ঠুল্লদুকং গৰুকদুকেন. তেনেৱ তেসং ‘‘চত্তাৰো সতিপট্ঠানা…পে… ইদং অপঞ্ঞত্তং নামা’’তিআদিনা সদিসনিদ্দেসো কতো. সাৱসেসাপত্তিন্তি অৱসেসসীলেহি সহিতাপত্তিং. নত্থি এতিস্সং আপন্নাযং সীলাৱসেসাতি অনৱসেসাপত্তি.

৩৫৪. পাড়িযং সমগ্গানঞ্চ অনুগ্গহোতি যথা সমগ্গানং সামগ্গী ন ভিজ্জতি, এৱং অনুগ্গহণং অনুবলপ্পদানং.

৩৫৫. সিযা নু খোতি সম্ভৱেয্য নু খো. তস্মিং অধম্মদিট্ঠীতি অত্তনো ‘‘অধম্মং ধম্মো’’তি এতস্মিং দীপনে অযুত্তদিট্ঠি. ভেদে অধম্মদিট্ঠীতি ‘‘অধম্মং ধম্মো’’তি দীপেত্ৱা অনুস্সাৱনসলাকগ্গাহাপনাদিনা অত্তানং মুঞ্চিত্ৱা চতুৱগ্গাদিকং সঙ্ঘং একসীমাযমেৱ ঠিততো চতুৱগ্গাদিসঙ্ঘতো ৱিযোজেত্ৱা এককম্মাদিনিপ্ফাদনৱসেন সঙ্ঘভেদকৰণে অধম্মদিট্ঠিকো হুত্ৱাতি অত্থো. ৱিনিধায দিট্ঠিন্তি যা তস্মিং ‘‘অধম্মং ধম্মো’’তি দীপনে অত্তনো অধম্মদিট্ঠি উপ্পজ্জতি, তং ৱিনিধায পটিচ্ছাদেত্ৱা ‘‘ধম্মো এৱায’’ন্তি ৱিপৰীততো পকাসেত্ৱাতি অত্থো. এৱং সব্বত্থ অত্থো ৱেদিতব্বো.

ভেদে ধম্মদিট্ঠীতি যথাৱুত্তনযেন সঙ্ঘভেদনে দোসো নত্থীতি লদ্ধিকো. অযং পন ‘‘অধম্মং ধম্মো’’তি দীপনে অধম্মদিট্ঠিকো হুত্ৱাপি তং দিট্ঠিং ৱিনিধায কৰণেন সঙ্ঘভেদকো অতেকিচ্ছো জাতো. এৱং ভেদে ৱেমতিকোতি ইমস্স পন ভেদে ৱেমতিকদিট্ঠিযা ৱিনিধানম্পি অত্থি. সেসং সমমেৱ. তস্মিং ধম্মদিট্ঠিভেদে অধম্মদিট্ঠীতি অযং পন ভেদে অধম্মদিট্ঠিং ৱিনিধায কতত্তা সঙ্ঘভেদকো অতেকিচ্ছো জাতো. সুক্কপক্খে পন সব্বত্থ ‘‘অধম্মং ধম্মো’’তিআদিদীপনে ৱা ভেদে ৱা ধম্মদিট্ঠিতায দিট্ঠিং অৱিনিধাযেৱ কতত্তা সঙ্ঘভেদকোপি সতেকিচ্ছো জাতো. তস্মা ‘‘অধম্মং ধম্মো’’তিআদিদীপনে ৱা সঙ্ঘভেদে ৱা উভোসুপি ৱা অধম্মদিট্ঠি ৱা ৱেমতিকো ৱা হুত্ৱা তং দিট্ঠিং, ৱিমতিঞ্চ ৱিনিধায ‘‘ধম্মো’’তি পকাসেত্ৱা ৱুত্তনযেন সঙ্ঘভেদং কৰোন্তস্সেৱ আনন্তৰিযং হোতীতি ৱেদিতব্বং.

উপালিপঞ্হাকথাৱণ্ণনা নিট্ঠিতা.

সঙ্ঘভেদকক্খন্ধকৱণ্ণনানযো নিট্ঠিতো.