৬. সেনাসনক্খন্ধকো

ৱিহাৰানুজাননকথাৱণ্ণনা

২৯৫. সেনাসনক্খন্ধকে সিসিৰেতি সিসিৰকালে হিমপাতৱসেন সত্তাহৱদ্দলিকাদিৱস্সপাতৱস্সেন চ উপ্পন্নো খৰো সীতসম্ফস্সো অধিপ্পেতোতি আহ ‘‘সম্ফুসিতকো’’তি. ‘‘ততো’’তি ইদং কত্তুঅত্থে নিস্সক্কৱচনং, তেন চ ৱিহাৰেন ৱাতাতপো পটিহঞ্ঞতীতি অত্থোতি আহ ‘‘ৱিহাৰেন পটিহঞ্ঞতী’’তি.

২৯৬. আৱিঞ্ছনছিদ্দন্তি যত্থ অঙ্গুলিং ৱা ৰজ্জুসঙ্খলিকাদিং ৱা পৱেসেত্ৱা কৱাটং আকড্ঢন্তা দ্ৱাৰবাহং ফুসাপেন্তি, তস্সেতং অধিৱচনং. সেনাসনপৰিভোগে অকপ্পিযং নাম নত্থীতি দস্সনত্থং ‘‘সচেপি দীপিনঙ্গুট্ঠেনা’’তিআদি ৱুত্তং. চেতিযে ৱেদিকাসদিসন্তি ৱাতপানদাৰুং ৱা জালং ৱা অট্ঠপেত্ৱা দাৰুট্ঠানে চেতিযে ৱেদিকায পট্টাদীনি ৱিয ইট্ঠকাদীহি উদ্ধং, তিৰিযঞ্চ পট্টিকাদযো দস্সেত্ৱা চতুছিদ্দযুত্তং কতং. থম্ভকৱাতপানং নাম তিৰিযং দাৰূনি অদত্ৱা উদ্ধং ঠপিতদাৰূহি এৱ কতং. চোড়কপাদপুঞ্ছনং বন্ধিতুন্তি ৱাতপানপ্পমাণেন পাদপুঞ্ছনসদিসং চোড়কাদিনা বন্ধিত্ৱা ৱগ্গুলিআদিপ্পৱেসননিৱাৰণত্থং, কথেতুন্তি অত্থো. মিড্ঢকন্তি মঞ্চাকাৰেন কট্ঠমত্তিকাদীহি কতৱেদিকাকাৰং.

২৯৭. চতুৰস্সপীঠন্তি সমচতুৰস্সং. অট্ঠঙ্গুলপাদকং ৱট্টতীতি অট্ঠঙ্গুলপাদকমেৱ ৱট্টতি. পমাণাতিক্কন্তোপি ৱট্টতীতি সমচতুৰস্সমেৱ সন্ধায ৱুত্তং. আযতচতুৰস্সা পন সত্তঙ্গপঞ্চঙ্গাপি উচ্চপাদা ন ৱট্টন্তি. ৱেত্তেহেৱ চতুৰস্সাদিআকাৰেন কতং ভদ্দপীঠন্তি আহ ‘‘ৱেত্তমযং পীঠ’’ন্তি. দাৰুপট্টিকায উপৰীতি অটনিআকাৰেন ঠিতদাৰুপটলস্স হেট্ঠা উদ্ধং পাদং কত্ৱা. পৱেসনকালঞ্হি সন্ধায ‘‘উপৰী’’তি ৱুত্তং. এড়কস্স পচ্ছিমপাদদ্ৱযং ৱিয ৱঙ্কাকাৰেন ঠিতত্তা পনেতং ‘‘এড়কপাদপীঠ’’ন্তি ৱুত্তং. পলোঠেন্তীতি সহ মঞ্চেহি পৱট্টেন্তি. ৰুক্খে, লতা চ মুঞ্চিত্ৱা অৱসেসং গচ্ছাদিকং সব্বম্পি তিণজাতি এৱাতি আহ ‘‘যেসং কেসঞ্চি তিণজাতিকান’’ন্তিআদি.

উপদহন্তীতি ঠপেন্তি. সীসপ্পমাণং নাম যত্থ গীৱায সহ সকলং সীসং ঠপেতুং সক্কা, তস্স চ মুট্ঠিৰতনং ৱিত্থাৰপ্পমাণন্তি দস্সেন্তো ‘‘ৱিত্থাৰতো’’তিআদিমাহ. ইদঞ্চ বিম্বোহনস্স উভোসু অন্তেসু ঠপেতব্বচোড়প্পমাণদস্সনং. তস্স ৱসেন বিম্বোহনস্স ৱিত্থাৰপ্পমাণং পৰিচ্ছিজ্জতি, তং ৱট্টং ৱা চতুৰস্সং ৱা কত্ৱা সিব্বিতং যথা কোটিতো কোটি ৱিত্থাৰতো পুথুলট্ঠানং মুট্ঠিৰতনপ্পমাণং হোতি, এৱং সিব্বিতব্বং. ইতো অধিকং ন ৱট্টতি, তং পন অন্তেসু ঠপিতচোড়ং কোটিযা কোটিং আহচ্চ দিগুণং কতং তিকণ্ণং হোতি. তেসু তীসু কণ্ণেসু দ্ৱিন্নং কণ্ণানমন্তৰং ৱিদত্থিচতুৰঙ্গুলং হোতি, মজ্ঝট্ঠানং কোটিতো কোটিং আহচ্চ মুট্ঠিৰতনং হোতি, ইদমস্স উক্কট্ঠপ্পমাণং. তেনাহ ‘‘তীসু কণ্ণেসূ’’তিআদি.

‘‘কম্বলমেৱ…পে… উণ্ণভিসিসঙ্খ্যমেৱ গচ্ছতী’’তি সামঞ্ঞতো ৱুত্তত্তা গোনকাদিঅকপ্পিযম্পি উণ্ণমযত্থৰণং ভিসিযং পক্খিপিত্ৱা সযিতুং ৱট্টতীতি দট্ঠব্বং.

মসূৰকেতি চম্মমযভিসিযং. চম্মমযং পন বিম্বোহনং তূলপুণ্ণম্পি ন ৱট্টতি. পাড়িযং সেনাসনপৰিক্খাৰদুস্সন্তি সেনাসনপৰিক্খাৰকৰণত্থায দুস্সং. ভিসিং ওনন্ধিতুন্তি ভিসিত্থৱিকায পক্খিপিত্ৱা বন্ধিতুং. পৰিভিজ্জতীতি মঞ্চাদিতো সাৰিযমানা পীঠকোটিআদীসু নিসীদন্তেহি ঘংসিযমানা ভিসি পৰিভিজ্জতি. ওনদ্ধমঞ্চন্তি ভিসিং একাবদ্ধং কত্ৱা বদ্ধমঞ্চং. পাড়িযং ছৱিং উপ্পাটেত্ৱা হৰন্তীতি ভিসিচ্ছৱিং চোৰা হৰন্তি. ফোসিতুন্তি চোৰেহি হৰিতস্স পচ্ছা হৰিতসঞ্ঞাণফুসিতবিন্দূনি দাতুং. ভিত্তিকম্মন্তি নানাৱণ্ণেহি ৱিভিত্তিৰাজিকৰণং. হত্থকম্মন্তি হত্থেন যং কিঞ্চি সঞ্ঞাকৰণং.

২৯৮. পাড়িযং ন নিপততীতি ন অল্লীযতি. পটিবাহেত্ৱাতি ঘংসিত্ৱা. ন নিবন্ধতীতি অনিবন্ধনীযো, ন লগ্গনকোতি অত্থো.

২৯৯. ‘‘কৰোহী’’তি ৱত্তুম্পি ন লব্ভতীতি আণত্তিযা এৱ পটিক্খিত্তত্তা দ্ৱাৰপালং ‘‘কিং ন কৰোসী’’তিআদিনা পৰিযাযেন ৱত্তুং ৱট্টতি. জাতকপকৰণন্তি জাতকপটিসংযুত্তং ইত্থিপুৰিসাদি যং কিঞ্চি ৰূপং অধিপ্পেতং. ‘‘পৰেহি কাৰাপেতু’’ন্তি ৱুত্তত্তা বুদ্ধৰূপম্পি সযং কাতুং ন লভতি. পাড়িযং পঞ্চপটিকন্তি জাতিআদিপঞ্চপ্পকাৰৱণ্ণমট্ঠং.

৩০০. উপচাৰো ন হোতীতি গব্ভস্স বহি সমন্তা অনুপৰিগমনস্স ওকাসো নপ্পহোতি. ৰুক্খং ৱিজ্ঝিত্ৱাতি তচ্ছিতসাৰদাৰুং অগ্গসমীপে ৱিজ্ঝিত্ৱা. কত্ৱাতি ছিদ্দে কত্ৱা. কপ্পকতং ৱিয সাৰখাণুকে আকোটেত্ৱা এৱং কতমেৱ ‘‘আহৰিমং ভিত্তিপাদ’’ন্তি ৱুত্তং. উপত্থম্ভনত্থং ভূমিযং পতিট্ঠাপেতুন্তি জিণ্ণভিত্তিপাদেন বহি সমানভাৰং খাণুকপ্পসীসেন উস্সাপেত্ৱা মূলেন ভূমিযং পতিট্ঠাপেতুং. পৰিত্তাণত্থন্তি উল্লিত্তাৱলিত্তকুটিযা ওৱস্সনট্ঠানস্স পৰিত্তাণত্থং. কিটিকন্তি তালপণ্ণাদীহি কতপদলং. মদ্দিতমত্তিকন্তি ওৱস্সনছিদ্দস্স পিদহনত্থং ৱুত্তং.

উভতোকুট্টং নীহৰিত্ৱা কতপদেসস্সাতি যথা বহি ঠিতা উজুকং অন্তো নিসিন্নে ন পস্সন্তি, এৱং দ্ৱাৰাভিমুখং পিদহনৱসেন ভিত্তিঞ্চ অঞ্ঞতো দ্ৱাৰঞ্চ যোজেত্ৱা কতট্ঠানং ৱদতি. সমন্তা পৰিযাগাৰোতি সমন্ততো আৱিদ্ধপমুখং. ৱংসং দত্ৱাতি পুৰিসপ্পমাণে পাদে নিখণিত্ৱা তেসং উপৰি পিট্ঠিৱংসসদিসং পস্সৱংসং ঠপেত্ৱা ওসাৰেত্ৱা. একং দণ্ডকোটিং অতিউচ্চায ৱিহাৰভিত্তিকোটিযা একং কোটিং নীচে ৱংসপিট্ঠিযং ঠপনৱসেন দণ্ডকে পসাৰেত্ৱা. চক্কলযুত্তো কিটিকোতি কৱাটং ৱিয ৱিৱৰণথকনসুখত্থং চক্কলবন্ধকিটিকং. পাড়িযং উগ্ঘাটনকিটিকন্তি আপণাদীসু অনত্থিককালে উক্খিপিত্ৱা, উপৰি চ বন্ধিত্ৱা পচ্ছা ওতৰণকিটিকং, কপ্পসীসেহি ৱা উপত্থম্ভনীহি উক্খিপিত্ৱা পচ্ছা ওতৰণকিটিকম্পি.

৩০১. পানীযং ওতপ্পতীতি পানীযভাজনেসু ঠপিতপানীযং আতপেন সন্তপ্পতি.

৩০৩. তযো ৱাটেতি তযো পৰিক্খেপে. ৱেড়ুৱাটন্তি সব্বং দাৰুপৰিক্খেপং সঙ্গণ্হাতি. কণ্টকৱাটন্তি সব্বসাখাপৰিক্খেপং.

৩০৫. আলোকো অন্তৰধাযীতি যো বুদ্ধাৰম্মণায পীতিযা আনুভাৱেন মহন্তো ওভাসো অহোসি, যেন চস্স পদীপসহস্সেন ৱিয ৱিগতন্ধকাৰো মগ্গো অহোসি, সো বহিনগৰে ছৱসৰীৰসমাকুলং দুগ্গন্ধং বীভচ্ছং আমকসুসানং পত্তস্স ভযেন পীতিৱেগে মন্দীভূতে অন্তৰধাযি.

সতং হত্থীতি গাথায হত্থিনো সতসহস্সানীতি এৱং পচ্চেকং সহস্স-সদ্দেন যোজেত্ৱা অত্থো ঞাতব্বো. পদৱীতিহাৰস্সাতি ‘‘বুদ্ধং ৱন্দিস্সামী’’তি ৰতনত্তযং উদ্দিস্স গচ্ছতো একপদৱীতিহাৰস্স, তপ্পচ্চযকুসলফলস্সাতি অত্থো. তস্স সোড়সমো ভাগো কলং নাম, তং সোড়সিং কলং যথাৱুত্তা হত্থিআদযো সব্বে নাগ্ঘন্তি নাৰহন্তি, নিদস্সনমত্তঞ্চেতং. অনেকসতসহস্সভাগম্পি নাগ্ঘন্তি.

অন্ধকাৰো অন্তৰধাযীতি পুন বলৱপীতিযা আলোকে সমুপ্পন্নে অন্তৰধাযি. আসত্তিযোতি তণ্হাযো. ৱযকৰণন্তি দেয্যধম্মমূলং নৱকম্মং.

৩০৯. দদেয্যাতি নৱকম্মং অধিট্ঠাতুং ৱিহাৰে ইস্সৰিযং দদেয্যাতি অত্থো. দিন্নোতি নৱকম্মং কাতুং ৱিহাৰো দিন্নো, ৱিহাৰে নৱকম্মং দিন্নন্তি ৱা অত্থো.

৩১৩-৪. সন্থাগাৰেতি সন্নিপাতমণ্ডপে. ওকাসেতি নিৱাসোকাসে. উদ্দিস্স কতন্তি সঙ্ঘং উদ্দিস্স কতং. গিহিৱিকটন্তি গিহীহি কতং পঞ্ঞত্তং, গিহিসন্তকন্তি অত্থো.

ৱিহাৰানুজাননকথাৱণ্ণনা নিট্ঠিতা.

সেনাসনগ্গাহকথাৱণ্ণনা

৩১৮. ‘‘ছমাসচ্চযেন ছমাসচ্চযেনা’’তি ইদং দ্ৱিক্খত্তুং পচ্চযদানকালপৰিচ্ছেদদস্সনং, এৱং উপৰিপি. ‘‘তং ন গাহেতব্ব’’ন্তি ৱচনস্স কাৰণমাহ ‘‘পচ্চযেনেৱ হি ত’’ন্তিআদিনা, পচ্চযঞ্ঞেৱ নিস্সায তত্থ ৱসিত্ৱা পটিজগ্গনা ভৱিস্সন্তীতি অধিপ্পাযো.

উব্ভণ্ডিকাতি উক্খিত্তভণ্ডা ভৱিস্সন্তি. দীঘসালাতি চঙ্কমনসালা. মণ্ডলমাড়োতি উপট্ঠানসালা. অনুদহতীতি পীড়েতি. ‘‘অদাতুং ন লব্ভতী’’তি ইমিনা সঞ্চিচ্চ অদদন্তস্স পটিবাহনে পৱিসনতো দুক্কটন্তি দীপেতি.

‘‘ন গোচৰগামো ঘট্টেতব্বো’’তি ৱুত্তমেৱত্থং ৱিভাৱেতুং ‘‘ন তত্থ মনুস্সা ৱত্তব্বা’’তিআদি ৱুত্তং. ৱিতক্কং ছিন্দিত্ৱাতি ‘‘ইমিনা নীহাৰেন গচ্ছন্তং দিস্ৱা নিৱাৰেত্ৱা পচ্চযে দস্সন্তী’’তি এৱৰূপং ৱিতক্কং অনুপ্পাদেত্ৱা. ভণ্ডপ্পটিচ্ছাদনন্তি পটিচ্ছাদনভণ্ডং. সৰীৰপ্পটিচ্ছাদনচীৱৰন্তি অত্থো. ‘‘সুদ্ধচিত্তত্তাৱ অনৱজ্জ’’ন্তি ইদং পুচ্ছিতক্খণে কাৰণাচিক্খনং সন্ধায ৱুত্তং ন হোতি অসুদ্ধচিত্তস্সপি পুচ্ছিতপঞ্হৱিসজ্জনে দোসাভাৱা. এৱং পন গতে মং পুচ্ছিস্সন্তীতিসঞ্ঞায অগমনং সন্ধায ৱুত্তন্তি দট্ঠব্বং.

পটিজগ্গিতব্বানীতি খণ্ডফুল্লপটিসঙ্খৰণসম্মজ্জনাদীহি পটিজগ্গিতব্বানি. মুদ্দৱেদিকাযাতি চেতিযস্স হম্মিযৱেদিকায ঘটাকাৰস্স উপৰি চতুৰস্সৱেদিকায. কস্মা পুচ্ছিতব্বন্তিআদি যতো পকতিযা লভতি. তত্থাপি পুচ্ছনস্স কাৰণসন্দস্সনত্থং ৱুত্তং.

পটিক্কম্মাতি ৱিহাৰতো অপসক্কিত্ৱা. তমত্থং দস্সেন্তো ‘‘যোজনদ্ৱিযোজনন্তৰে হোতী’’তি আহ. উপনিক্খেপং ঠপেত্ৱাতি ৱড্ঢিযা কহাপণাদিং ঠপেত্ৱা, খেত্তাদীনি ৱা নিযমেত্ৱা. ইতি সদ্ধাদেয্যেতি এৱং হেট্ঠা ৱুত্তনযেন সদ্ধায দাতব্বে ৱস্সাৱাসিকলাভৱিসযেতি অত্থো.

ৱত্থু পনাতি তত্ৰুপ্পাদে উপ্পন্নৰূপিযং, তঞ্চ ‘‘ততো চতুপচ্চযং পৰিভুঞ্জথা’’তি দিন্নখেত্তাদিতো উপ্পন্নত্তা কপ্পিযকাৰকানং হত্থে ‘‘কপ্পিযভণ্ডং পৰিভুঞ্জথা’’তি দাযকেহি দিন্নৱত্থুসদিসং হোতীতি আহ ‘‘কপ্পিযকাৰকানং হী’’তিআদি.

সঙ্ঘসুট্ঠুতাযাতি সঙ্ঘস্স হিতায. পুগ্গলৱসেনাতি ‘‘ভিক্খূ চীৱৰেন কিলমন্তী’’তি এৱং পুগ্গলপৰামাসৱসেন, ন ‘‘সঙ্ঘো কিলমতী’’তি এৱং সঙ্ঘপৰামাসৱসেন.

‘‘কপ্পিযভণ্ডৱসেনা’’তি সামঞ্ঞতো ৱুত্তমেৱত্থং ৱিভাৱেতুং ‘‘চীৱৰতণ্ডুলাদিৱসেনেৱ চা’’তি ৱুত্তং. চ-কাৰো চেত্থ পন-সদ্দত্থে ৱত্ততি, ন সমুচ্চযত্থেতি দট্ঠব্বং. পুগ্গলৱসেনেৱ, কপ্পিযভণ্ডৱসেন চ অপলোকনপ্পকাৰং দস্সেতুং ‘‘তং পন এৱং কত্তব্ব’’ন্তিআদি ৱুত্তং.

চীৱৰপচ্চযং সল্লক্খেত্ৱাতি সদ্ধাদেয্যতত্ৰুপ্পাদাদিৱসেন তস্মিং ৱস্সাৱাসে লব্ভমানং চীৱৰসঙ্খাতং পচ্চযং ‘‘এত্তক’’ন্তি পৰিচ্ছিন্দিত্ৱা. সেনাসনস্সাতি সেনাসনগ্গাহাপনস্স. ‘‘নৱকো ৱুড্ঢতৰস্স, ৱুড্ঢো চ নৱকস্সা’’তি ইদং সেনাসনগ্গাহস্স অত্তনাৱ অত্তনো গহণং অসাৰুপ্পন্তি ৱুত্তং, দ্ৱে অঞ্ঞমঞ্ঞং গাহেস্সন্তীতি অধিপ্পাযো. অট্ঠপি সোড়সপি জনে সম্মন্নিতুং ৱট্টতীতি এককম্মৱাচায সব্বেপি একতো সম্মন্নিতুং ৱট্টতি. নিগ্গহকম্মমেৱ হি সঙ্ঘো সঙ্ঘস্স ন কৰোতি. তেনেৱ সত্তসতিকক্খন্ধকে ‘‘উব্বাহিককম্মসম্মুতিযং অট্ঠপি জনা একতোৱ সম্মতাতি.

আসনঘৰন্তি পটিমাঘৰং. মগ্গোতি উপচাৰসীমব্ভন্তৰগতে গামাভিমুখমগ্গে কতসালা ৱুচ্চতি. এৱং পোক্খৰণীৰুক্খমূলাদীসুপি.

লভন্তীতি তত্ৰৱাসিনো ভিক্খূ লভন্তি. ৱিজটেত্ৱাতি ‘‘একেকস্স পহোনকপ্পমাণেন ৱিযোজেত্ৱা. আৱাসেসু পক্খিপিত্ৱাতি ‘‘ইতো উপ্পন্নং অসুকস্মিং অসুকস্মিঞ্চ আৱাসে ৱসন্তা পাপেত্ৱা গণ্হন্তূ’’তি ৱাচায উপসংহৰিত্ৱা. পৱিসিতব্বন্তি মহালাভে পৰিৱেণে ৱসিত্ৱাৱ লাভো গহেতব্বোতি অধিপ্পাযো.

অযম্পীতি এত্থ যো পংসুকূলিকো পচ্চযং ৱিস্সজ্জেতি. তেনেৱ ৱিস্সট্ঠো অযং চীৱৰপচ্চযোপীতি যোজনা. পাদমূলে ঠপেত্ৱা সাটকং দেন্তীতি পচ্চযদাযকা দেন্তি. এতেন গহট্ঠেহি পাদমূলে ঠপেত্ৱা দিন্নম্পি পংসুকূলিকানম্পি ৱট্টতীতি দস্সেতি. অথ ৱস্সাৱাসিকং দেমাতি ৱদন্তীতি এত্থ পংসুকূলিকানং ন ৱট্টতীতি অজ্ঝাহৰিত্ৱা যোজেতব্বং. ৱস্সংৱুত্থভিক্খূনন্তি পংসুকূলিকতো অঞ্ঞেসং ভিক্খূনং.

উপনিবন্ধিত্ৱা গাহাপেতব্বন্তি ইধ ৰুক্খাদীসু ৱসিত্ৱা চীৱৰং গণ্হথাতি পটিবন্ধং কত্ৱা গাহেতব্বং.

পাটিপদঅৰুণতোতিআদি ৱস্সূপনাযিকদিৱসং সন্ধায ৱুত্তং. অন্তৰামুত্তকং পন পাটিপদং অতিক্কমিত্ৱাপি গাহেতুং ৱট্টতি. নিবদ্ধৱত্তং ঠপেত্ৱাতি সজ্ঝাযমনসিকাৰাদীসু নিৰন্তৰকৰণীযেসু কত্তব্বং কতিকৱত্তং কত্ৱা. কসাৱপৰিভণ্ডন্তি কসাৱৰসেহি ভূমিপৰিকম্মং.

তিৱিধম্পীতি পৰিযত্তিপটিপত্তিপটিৱেধৱসেন তিৱিধম্পি. সোধেত্ৱাতি আচাৰাদীসু উপপৰিক্খিত্ৱা. একচাৰিকৱত্তন্তি ভাৱনাকম্মং. তঞ্হি গণসঙ্গণিকং পহায একচাৰিকেনেৱ ৱত্তিতব্বত্তা এৱং ৱুত্তং. দসৱত্থুককথা নাম অপ্পিচ্ছকথা, সন্তুট্ঠি, পৱিৱেক, অসংসগ্গ, ৱীৰিযাৰম্ভ, সীল, সমাধি, পঞ্ঞা, ৱিমুত্তি, ৱিমুত্তিঞাণদস্সনকথাতি ইমা দস.

দন্তকট্ঠখাদনৱত্তন্তি দন্তকট্ঠমাড়কে নিক্খিত্তেসু দন্তকট্ঠেসু ‘‘দিৱসে দিৱসে একমেৱ দন্তকট্ঠং গহেতব্ব’’ন্তিআদিনা (পাৰা. অট্ঠ. ১.১০৯) অদিন্নাদানে দন্তপোনকথাযং ৱুত্তং ৱত্তং. পত্তং ৱা…পে… ন কথেতব্বন্তি পত্তগুত্তত্থায ৱুত্তং. ৱিসভাগকথাতি তিৰচ্ছানকথা. খন্ধকৱত্তন্তি ৱত্তক্খন্ধকে (চূড়ৱ. ৩৬৫) আগতং পিণ্ডচাৰিকৱত্ততো অৱসিট্ঠৱত্তং তস্স ‘‘ভিক্খাচাৰৱত্ত’’ন্তি ৱিসুং গহিতত্তা.

ইদানি যং দাযকা পচ্ছিমৱস্সংৱুত্থানং ৱস্সাৱাসিকং দেন্তি, তত্থ পটিপজ্জনৱিধিং দস্সেতুং ‘‘পচ্ছিমৱস্সূপনাযিকদিৱসে পনা’’তি আৰদ্ধং. আগন্তুকো সচে ভিক্খূতি চীৱৰে গাহিতে পচ্ছা আগতো আগন্তুকো ভিক্খু. পত্তট্ঠানেতি ৱস্সগ্গেন পত্তট্ঠানে. পঠমৱস্সূপগতাতি আগন্তুকস্স আগমনতো পুৰেতৰমেৱ পচ্ছিমিকায ৱস্সূপনাযিকায ৱস্সূপগতা. লদ্ধং লদ্ধন্তি পুনপ্পুনং দাযকানং সন্তিকা আগতাগতসাটকং.

নেৱ ৱস্সাৱাসিকস্স সামিনোতি ছিন্নৱস্সত্তা ৱুত্তং. পঠমমেৱ কতিকায কতত্তা ‘‘নেৱ অদাতুং লভন্তী’’তি ৱুত্তং, দাতব্বং ৱাৰেন্তানং গীৱা হোতীতি অধিপ্পাযো. তেসমেৱ দাতব্বন্তি ৱস্সূপগতেসু অলদ্ধৱস্সাৱাসিকানং একচ্চানমেৱ দাতব্বং.

ভতিনিৱিট্ঠন্তি পানীযুপট্ঠানাদিভতিং কত্ৱা লদ্ধং. সঙ্ঘিকং পনাতিআদি কেসঞ্চি ৱাদদস্সনং. তত্থ অপলোকনকম্মং কত্ৱা গাহিতন্তি ‘‘ছিন্নৱস্সানং ৱস্সাৱাসিকঞ্চ ইদানি উপ্পজ্জনকৱস্সাৱাসিকঞ্চ ইমেসং দাতুং ৰুচ্চতী’’তি অনন্তৰে ৱুত্তনযেন অপলোকনং কত্ৱা গাহিতং সঙ্ঘেন দিন্নত্তা ৱিব্ভন্তোপি লভতি. পগেৱ ছিন্নৱস্সো. পচ্চযৱসেন গাহিতং পন তেমাসং ৱসিত্ৱা গহেতুং অত্তনা, দাযকেহি চ অনুমতত্তা ভতিনিৱিট্ঠম্পি ছিন্নৱস্সোপি ৱিব্ভন্তোপি ন লভতীতি কেচি আচৰিযা ৱদন্তি. ইদঞ্চ পচ্ছা ৱুত্তত্তা পমাণং. তেনেৱ ৱস্সূপনাযিকদিৱসে এৱ দাযকেহি দিন্নৱস্সাৱাসিকং গহিতভিক্খুনো ৱস্সচ্ছেদং অকত্ৱা ৱাসোৱ হেট্ঠা ৱিহিতো, ন পানীযুপট্ঠানাদিভতিকৰণৱত্তং. যদি হি তং নিৱিট্ঠমেৱ সিযা, ভতিকৰণমেৱ ৱিধাতব্বং. তস্মা ৱস্সগ্গেন গাহিতং ছিন্নৱস্সাদযো ন লভন্তীতি ৱেদিতব্বং.

‘‘সঙ্ঘিকং হোতী’’তি এতেন ৱুত্থৱস্সানম্পি ৱস্সাৱাসিকভাগো সঙ্ঘিকতো অমোচিতো তেসং ৱিব্ভমেন সঙ্ঘিকো হোতীতি দস্সেতি. লভতীতি ‘‘মম পত্তভাগং এতস্স দেথা’’তি দাযকে সম্পটিচ্ছাপেন্তেনেৱ সঙ্ঘিকতো ৱিযোজিতং হোতীতি ৱুত্তং.

ৱৰভাগং সামণেৰস্সাতি তস্স পঠমগাহত্তা, থেৰেন পুব্বে পঠমভাগস্স গহিতত্তা, ইদানি গয্হমানস্স দুতিযভাগত্তা চ ৱুত্তং.

সেনাসনগ্গাহকথাৱণ্ণনা নিট্ঠিতা.

উপনন্দৱত্থুকথাৱণ্ণনা

৩১৯. পাড়িযং উভযত্থ পৰিবাহিৰোতি কমেন উভযস্সপি মুত্তত্তা ৱুত্তং, ন সব্বথা উভযতো পৰিবাহিৰত্তা. তেনাহ ‘‘পচ্ছিমে…পে… তিট্ঠতী’’তি.

৩২০. যং তিণ্ণং পহোতীতি মঞ্চপীঠৱিনিমুত্তং যং আসনং তিণ্ণং সুখং নিসীদিতুং পহোতি, ইদং পচ্ছিমদীঘাসনং. এত্থ মঞ্চপীঠৰহিতেসু অসমানাসনিকাপি তযো নিসীদিতুং লভন্তি. মঞ্চপীঠেসু পন দ্ৱে. অদীঘাসনেসু মঞ্চপীঠেসু সমানাসনিকা এৱ দ্ৱে নিসীদিতুং লভন্তি দুৱগ্গস্সেৱ অনুঞ্ঞাতত্তা.

হত্থিনখো হেট্ঠাভাগে এতস্স অত্থীতি হত্থিনখো, পাসাদো. পাসাদস্স নখো নাম হেট্ঠিমভাগো পাদনখসদিসত্তা, সো সব্বদিসাসু অনেকেহি হত্থিৰূপেহি সমলঙ্কতো ঠিতো. তস্সূপৰি কতো পাসাদো হত্থিকুম্ভে পতিট্ঠিতো ৱিয হোতীতি আহ ‘‘হত্থিকুম্ভে পতিট্ঠিত’’ন্তি. সুৱণ্ণৰজতাদিৱিচিত্ৰানীতি সঙ্ঘিকসেনাসনং সন্ধায ৱুত্তং. পুগ্গলিকং পন সুৱণ্ণাদিৱিচিত্ৰং ভিক্খুস্স সম্পটিচ্ছিতুমেৱ ন ৱট্টতি ‘‘ন কেনচি পৰিযাযেন জাতৰূপৰজতং সাদিতব্ব’’ন্তি (মহাৱ. ২৯৯) ৱুত্তত্তা. তেনেৱেত্থ অট্ঠকথাযং ‘‘সঙ্ঘিকৱিহাৰে ৱা পুগ্গলিকৱিহাৰে ৱা’’তি ন ৱুত্তং, গোনকাদিঅকপ্পিযভণ্ডৱিসযে এৱ ৱুত্তং একভিক্খুস্সাপি তেসং গহণে দোসাভাৱা. গিহিৱিকটনীহাৰেনাতি গিহীহি কতনীহাৰেন, গিহীহি অত্তনো সন্তকং অত্থৰিত্ৱা দিন্ননিযামেনাতি অত্থো. লব্ভন্তীতি নিসীদিতুং লব্ভন্তি.

উপনন্দৱত্থুকথাৱণ্ণনা নিট্ঠিতা.

অৱিস্সজ্জিযৱত্থুকথাৱণ্ণনা

৩২১. অৰঞ্জৰোতি বহুউদকগণ্হনিকা মহাচাটি, জলং গণ্হিতুমলন্তি অৰঞ্জৰো.

থাৱৰেন চ থাৱৰন্তিআদীসু পঞ্চসু কোট্ঠাসেসু পুৰিমদ্ৱযং থাৱৰং, পচ্ছিমত্তযং গৰুভণ্ডন্তি ৱেদিতব্বং. সমকমেৱ দেতীতি এত্থ ঊনকং দেন্তম্পি ৱিহাৰৱত্থুসামন্তং গহেত্ৱা দূৰতৰং দুক্খগোপং ৱিস্সজ্জেতুং ৱট্টতীতি দট্ঠব্বং. ৱক্খতি হি ‘‘ভিক্খূনং চে মহগ্ঘতৰং…পে… সম্পটিচ্ছিতুং ৱট্টতী’’তি (চূড়ৱ. অট্ঠ. ৩২১). জানাপেত্ৱাতি ভিক্খুসঙ্ঘস্স জানাপেত্ৱা, অপলোকেত্ৱাতি অত্থো. ‘‘ননু তুম্হাকং বহুতৰা ৰুক্খাতি ৱত্তব্ব’’ন্তি ইদং সামিকেসু অত্তনো ভণ্ডস্স মহগ্ঘতং অজানিত্ৱা দেন্তেসু তং ঞত্ৱা থেয্যচিত্তেন গণ্হতো অৱহাৰো হোতীতি ৱুত্তং.

ৱিহাৰেন ৱিহাৰো পৰিৱত্তেতব্বোতি সৱত্থুকেন অঞ্ঞেসং ভূমিযং কতপাসাদাদিনা, অৱত্থুকেন ৱা সৱত্থুকং পৰিৱত্তেতব্বং. অৱত্থুকং পন অৱত্থুকেনেৱ পৰিৱত্তেতব্বং. কেৱলং পাসাদস্স ভূমিতো অথাৱৰত্তা. এৱং থাৱৰেসুপি থাৱৰৱিভাগং ঞত্ৱাৱ পৰিৱত্তেতব্বং.

‘‘কপ্পিযমঞ্চা সম্পটিচ্ছিতব্বা’’তি ইমিনা সুৱণ্ণাদিৱিচিত্তং অকপ্পিযমঞ্চং ‘‘সঙ্ঘস্সা’’তি ৱুত্তেপি সম্পটিচ্ছিতুং ন ৱট্টতীতি দস্সেতি. ‘‘ৱিহাৰস্স দেমা’’তি ৱুত্তে সঙ্ঘস্স ৱট্টতি, ন পুগ্গলস্স খেত্তাদি ৱিযাতি দট্ঠব্বং. এতেসূতি মঞ্চাদীসু. কপ্পিযাকপ্পিযং ৱুত্তনযমেৱাতি আসন্দীতূলিকাদিৱিনিচ্ছযেসু ৱুত্তনযমেৱ. অকপ্পিযং ৱাতি আসন্দীআদি, পমাণাতিক্কন্তং বিম্বোহনাদি চ. মহগ্ঘং কপ্পিযং ৱাতি সুৱণ্ণাদিৱিচিত্তং কপ্পিযৱোহাৰেন দিন্নং.

‘‘কাড়লোহ…পে… ভাজেতব্বো’’তি ৱুত্তত্তা ৱট্টকংসলোহমযম্পি ভাজনং পুগ্গলিকম্পি সম্পটিচ্ছিতুম্পি পৰিহৰিতুম্পি ৱট্টতি পুগ্গলপৰিহৰিতব্বস্সেৱ ভাজেতব্বত্তাতি ৱদন্তি. তং উপৰি ‘‘কংসলোহৱট্টলোহভাজনৱিকতি সঙ্ঘিকপৰিভোগেন ৱা গিহিৱিকটা ৱা ৱট্টতী’’তিআদিকেন মহাপচ্চৰিৱচনেন ৱিৰুজ্ঝতি. ইমস্স হি ‘‘ৱট্টলোহকংসলোহানং যেন কেনচি কতো সীহড়দীপে পাদগ্গণ্হনকো ভাজেতব্বো’’তি ৱুত্তস্স মহাঅট্ঠকথাৱচনস্স পটিক্খেপায তং মহাপচ্চৰিৱচনং পচ্ছা দস্সিতং. তস্মা ৱট্টলোহকংসলোহমযং যং কিঞ্চি পাদগ্গণ্হনকৱাৰকম্পি উপাদায অভাজনীযমেৱ. গিহীহি দিয্যমানম্পি পুগ্গলস্স সম্পটিচ্ছিতুম্পি ন ৱট্টতি. পাৰিহাৰিযং ন ৱট্টতীতি পত্তাদিপৰিক্খাৰং ৱিয সযমেৱ পটিসামেত্ৱা পৰিভুঞ্জিতুং ন ৱট্টতি. গিহিসন্তকং ৱিয আৰামিকাদযো চে সযমেৱ গোপেত্ৱা ৱিনিযোগকালে আনেত্ৱা পটিনেন্তি, পৰিভুঞ্জিতুং ৱট্টতি. ‘‘পটিসামেত্ৱা ভিক্খূনং দেথা’’তি ৱত্তুম্পি ৱট্টতি.

পণ্ণসূচি নাম লেখনীতি ৱদন্তি. ‘‘অত্তনা লদ্ধানিপী’’তিআদিনা পটিগ্গহণে দোসো নত্থি, পৰিহৰিত্ৱা পৰিভোগোৱ আপত্তিকৰোতি দস্সেতি. যথা চেত্থ, এৱং উপৰি অভাজনীযৱাসিআদীসু অত্তনো সন্তকেসুপি.

অনামাসম্পীতি সুৱণ্ণাদিমযম্পি সব্বং তং আমসিত্ৱাপি পৰিভুঞ্জিতুং ৱট্টতি. উপক্খৰেতি উপকৰণে. অড্ঢবাহুপ্পমাণা নাম অড্ঢবাহুমত্তা. অড্ঢব্যামমত্তাতিপি ৱদন্তি. যোত্তানীতি চম্মৰজ্জুকা.

অট্ঠঙ্গুলসূচিদণ্ডমত্তোপীতি তসৰদণ্ডাদিসূচিআকাৰতনুদণ্ডকমত্তোপি. ৰিত্তপোত্থকোপীতি অলিখিতপোত্থকো. ইদঞ্চ পণ্ণপ্পসঙ্গেন ৱুত্তং.

‘‘ঘট্টনফলকং ঘট্টনমুগ্গৰো’’তি ইদং ৰজিতচীৱৰং একস্মিং মট্ঠে দণ্ডমুগ্গৰে ৱেঠেত্ৱা একস্স মট্ঠফলকস্স উপৰি ঠপেত্ৱা উপৰি অপৰেন মট্ঠফলকেন নিকুজ্জিত্ৱা একো উপৰি অক্কমিত্ৱা তিট্ঠতি. দ্ৱে জনা উপৰি ফলকং দ্ৱীসু কোটীসু গহেত্ৱা অপৰাপৰং আকড্ঢনৱিকড্ঢনং কৰোন্তি, এতং সন্ধায ৱুত্তং. হত্থে ঠপাপেত্ৱা হত্থেন পহৰণং পন নিট্ঠিতৰজনস্স চীৱৰস্স অল্লকালে কাতব্বং. ইদং পন ফলকমুগ্গৰেহি ঘট্টনং সুক্খকালে থদ্ধভাৱৱিমোচনত্থন্তি দট্ঠব্বং. অম্বণন্তি একদোণিকনাৱাফলকেহি পোক্খৰণীসদিসং কতং. পানীযভাজনন্তিপি ৱদন্তি. ৰজনদোণীতি একদাৰুনাৱ কতং ৰজনভাজনং. উদকদোণীপি একদাৰুনাৱ কতং উদকভাজনং.

ভূমত্থৰণং কাতুং ৱট্টতীতি অকপ্পিযচম্মং সন্ধায ৱুত্তং. তত্থ ভূমত্থৰণসঙ্খেপেন সযিতুম্পি ৱট্টতিযেৱ. ‘‘পচ্চত্থৰণগতিক’’ন্তি ইমিনা মঞ্চাদীসু অত্থৰিতব্বং মহাচম্মং এড়কচম্মং নামাতি দস্সেতি.

ছত্তমুট্ঠিপণ্ণন্তি তালপণ্ণং সন্ধায ৱুত্তং. পত্তকটাহন্তি পত্তপচনকটাহং.

অৱিস্সজ্জিযৱত্থুকথাৱণ্ণনা নিট্ঠিতা.

নৱকম্মদানকথাৱণ্ণনা

৩২৩. পাড়িযং পিণ্ডনিক্খেপনমত্তেনাতিআদীসু খণ্ডফুল্লট্ঠানে মত্তিকাপিণ্ডট্ঠপনং পিণ্ডনিক্খেপনং নাম. নৱকম্মন্তি নৱকম্মসম্মুতি. অগ্গড়ৱট্টি নাম কৱাটবন্ধো. ছাদনং নাম তিণাদীহি গেহচ্ছাদনং. বন্ধনং নাম দণ্ডৱল্লিআদীহি ছদনবন্ধনমেৱ. চতুহত্থৱিহাৰেতি ৱিত্থাৰপ্পমাণতো ৱুত্তং. উব্বেধতো পন অনেকভূমকত্তা ৱড্ঢকীহত্থেন ৱীসতিহত্থোপি নানাসণ্ঠানৱিচিত্তোপি হোতি. তেনস্স চতুৱস্সিকং নৱকম্মং ৱুত্তং. এৱং সেসেসুপি.

পাড়িযং সব্বে ৱিহাৰেতি ভুম্মত্থে উপযোগবহুৱচনং. একস্স সব্বেসু ৱিহাৰেসু নৱকম্মং দেতীতি অত্থো. সব্বকালং পটিবাহন্তীতি নৱকম্মিকা অত্তনো গাহিতং ৱৰসেয্যং সম্পত্তানং যথাৱুড্ঢং অকত্ৱা উতুকালেপি পটিবাহন্তি.

‘‘সচে সো আৱাসো জীৰতী’’তিআদি পাড়িমুত্তকৱিনিচ্ছযো. মঞ্চট্ঠানং দত্ৱাতি মঞ্চট্ঠানং পুগ্গলিকং দত্ৱা. তিভাগন্তি ততিযভাগং. এৱং ৱিস্সজ্জনম্পি থাৱৰেন থাৱৰপৰিৱত্তনট্ঠানে এৱ পৱিসতি, ন ইতৰথা সব্বসেনাসনানং ৱিনস্সনতো. সচে সদ্ধিৱিহাৰিকানং দাতুকামো হোতীতি সচে সো সঙ্ঘস্স ভণ্ডকট্ঠপনট্ঠানং ৱা অঞ্ঞেসং ভিক্খূনং ৱসনট্ঠানং ৱা দাতুং ন ইচ্ছতি, অত্তনো সদ্ধিৱিহাৰিকানঞ্ঞেৱ দাতুকামো হোতি, তাদিসস্স তুয্হং পুগ্গলিকমেৱ কত্ৱা জগ্গাতি ন সব্বং তস্স দাতব্বন্তি অধিপ্পাযো. তত্থ পন কত্তব্বৱিধিং দস্সেন্তো আহ ‘‘কম্ম’’ন্তিআদি. এৱঞ্হীতিআদিম্হি ৱযানুৰূপং ততিযভাগে ৱা উপড্ঢভাগে ৱা গহিতে তং ভাগং দাতুং লভতীতি অত্থো.

যেনাতি তেসু দ্ৱীসু ভিক্খূসু যেন. সো সামীতি তস্সা ভূমিযা ৱিহাৰকৰণে সোৱ সামী, তং পটিবাহিত্ৱা ইতৰেন ন কাতব্বন্তি অধিপ্পাযো. সো হি পঠমং গহিতো. অকতট্ঠানেতি চযাদীনং অকতপুব্বট্ঠানে. চযং ৱা পমুখং ৱাতি সঙ্ঘিকসেনাসনং নিস্সায ততো বহি চযং বন্ধিত্ৱা, একং সেনাসনং ৱা. বহিকুট্টেতি কুট্টতো বহি, অত্তনো কতট্ঠানেতি অত্থো.

নৱকম্মদানকথাৱণ্ণনা নিট্ঠিতা.

অঞ্ঞত্ৰপৰিভোগপটিক্খেপাদিকথাৱণ্ণনা

৩২৪. ৱড্ঢিকম্মত্থাযাতি যথা তম্মূলগ্ঘতো ন পৰিহাযতি, এৱং কত্তব্বস্স এৱং নিপ্ফাদেতব্বস্স মঞ্চপীঠাদিনো অত্থায.

চক্কলিকন্তি পাদপুঞ্ছনত্থং চক্কাকাৰেন কতং. পৰিভণ্ডকতভূমি ৱাতি কাড়ৱণ্ণাদিকতসণ্হভূমি ৱা. সেনাসনং ৱাতি মঞ্চপীঠাদি ৱা.

‘‘তথেৱ ৱড়ঞ্জেতুং ৱট্টতী’’তি ইমিনা নেৱাসিকেহি ধোতপাদাদীহি ৱড়ঞ্জনট্ঠানে সঞ্চিচ্চ অধোতপাদাদীহি ৱড়ঞ্জন্তস্সেৱ আপত্তি পঞ্ঞত্তাতি দস্সেতি.

‘‘দ্ৱাৰম্পী’’তিআদিনা সামঞ্ঞতো ৱুত্তত্তা দ্ৱাৰৱাতপানাদযো অপৰিকম্মকতাপি ন অপস্সযিতব্বা. অজানিত্ৱা অপস্সযন্তস্সপি ইধ লোমগণনায আপত্তি.

অঞ্ঞত্ৰপৰিভোগপটিক্খেপাদিকথাৱণ্ণনা নিট্ঠিতা.

সঙ্ঘভত্তাদিঅনুজাননকথাৱণ্ণনা

৩২৫. উদ্দেসভত্তং নিমন্তনন্তি ইমং ৱোহাৰং পত্তানীতি এত্থ ইতি-সদ্দো আদিঅত্থো, উদ্দেসভত্তং নিমন্তনন্তিআদিৱোহাৰং পত্তানীতি অত্থো. তম্পীতি সঙ্ঘভত্তম্পি.

সঙ্ঘভত্তাদিঅনুজাননকথাৱণ্ণনা নিট্ঠিতা.

উদ্দেসভত্তকথাৱণ্ণনা

ভোজনসালাযাতি ভত্তুদ্দেসট্ঠানং সন্ধায ৱুত্তং. একৱড়ঞ্জন্তি একদ্ৱাৰেন ৱড়ঞ্জিতব্বং. নানানিৱেসনেসূতি নানাকুলস্স নানূপচাৰেসু নিৱেসনেসু.

নিসিন্নস্সপি নিদ্দাযন্তস্সপীতি অনাদৰে সামিৱচনং, ৱুড্ঢতৰে নিদ্দাযন্তে নৱকস্স গাহিতং সুগ্গহিতন্তি অত্থো.

ৱিস্সট্ঠদূতোতি যথাৰুচি ৱত্তুং লভনতো নিৰাসঙ্কদূতো. পুচ্ছাসভাগেনাতি পুচ্ছাৱচনপটিভাগেন. ‘‘একা কূটট্ঠিতিকা নামা’’তি ৱুত্তমেৱত্থং ৱিভাৱেতুং ‘‘ৰঞ্ঞো ৱা হী’’তিআদি ৱুত্তং.

সব্বং পত্তস্সামিকস্স হোতীতি চীৱৰাদিকম্পি সব্বং পত্তস্সামিকস্সেৱ হোতি, মযা ভত্তমেৱ সন্ধায ৱুত্তং, ন চীৱৰাদিন্তি ৱত্ৱা গহেতুং ন ৱট্টতীতি অত্থো.

অকতভাগোনামাতি আগন্তুকভাগো নাম, অদিন্নপুব্বভাগোতি অত্থো.

কিং আহৰীযতীতি অৱত্ৱাতি ‘‘কতৰভত্তং ৱা তযা আহৰীযতী’’তি দাযকং অপুচ্ছিত্ৱা. পকতিট্ঠিতিকাযাতি উদ্দেসভত্তট্ঠিতিকায.

উদ্দেসভত্তকথাৱণ্ণনা নিট্ঠিতা.

নিমন্তনভত্তকথাৱণ্ণনা

ৱিচ্ছিন্দিত্ৱাতি ‘‘ভত্তং গণ্হথা’’তি পদং অৱত্ৱা. তেনেৱাহ ‘‘ভত্তন্তি অৱদন্তেনা’’তি.

আলোপসঙ্খেপেনাতি একেকপিণ্ডৱসেন, এৱঞ্চ ভাজনং উদ্দেসভত্তে ন ৱট্টতি. তত্থ হি একস্স পহোনকপ্পমাণেনেৱ ভাজেতব্বং.

আৰুড়্হাযেৱ মাতিকং, সঙ্ঘতো অট্ঠ ভিক্খূতি এত্থ যে মাতিকং আৰুড়্হা, তে অট্ঠ ভিক্খূতি যোজেতব্বং. উদ্দেসভত্তনিমন্তনভত্তাদিসঙ্ঘিকভত্তমাতিকাসু নিমন্তনভত্তমাতিকায ঠিতিৱসেন আৰুড়্হে ভত্তুদ্দেসকেন ৱা সযং ৱা সঙ্ঘতো উদ্দিসাপেত্ৱা গহেত্ৱা গন্তব্বং, ন অত্তনো ৰুচিতে গহেত্ৱাতি অধিপ্পাযো. মাতিকং আৰোপেত্ৱাতি ‘‘সঙ্ঘতো গণ্হামী’’তিআদিনা ৱুত্তমাতিকাভেদং দাযকস্স ৱিঞ্ঞাপেত্ৱাতি অত্থো.

পটিবদ্ধকালতো পন পট্ঠাযাতি তত্থেৱ ৱাসস্স নিবদ্ধকালতো পট্ঠায.

নিমন্তনভত্তকথাৱণ্ণনা নিট্ঠিতা.

সলাকভত্তকথাৱণ্ণনা

উপনিবন্ধিত্ৱাতি লিখিত্ৱা. গামৱসেনপীতি যেভুয্যেন সমলাভগামৱসেনপি. বহূনি সলাকভত্তানীতি তিংসং ৱা চত্তাৰীসং ৱা ভত্তানি. ‘‘সচে হোন্তী’’তি অজ্ঝাহৰিত্ৱা যোজেতব্বং.

সল্লক্খেত্ৱাতি তানি ভত্তানি পমাণৱসেন সল্লক্খেত্ৱা. নিগ্গহেন দত্ৱাতি দূৰং গন্তুং অনিচ্ছন্তস্স নিগ্গহেন সম্পটিচ্ছাপেত্ৱা দত্ৱা. পুন ৱিহাৰং আগন্ত্ৱাতি এত্থ ৱিহাৰং অনাগন্ত্ৱা ভত্তং গহেত্ৱা পচ্ছা ৱিহাৰে অত্তনো পাপেত্ৱা ভুঞ্জিতুম্পি ৱট্টতি.

একগেহৱসেনাতি ৱীথিযম্পি একপস্সে ঘৰপাড়িযা ৱসেন. উদ্দিসিত্ৱাপীতি অসুককুলে সলাকভত্তানি তুয্হং পাপুণন্তীতি ৱত্ৱা.

ৱাৰগামেতি অতিদূৰত্তা ৱাৰেন গন্তব্বগামে. সট্ঠিতো ৱা পণ্ণাসতো ৱাতি দণ্ডকম্মত্থায উদকঘটং সন্ধায ৱুত্তং. ৱিহাৰৱাৰোতি সব্বভিক্খূসু ভিক্খত্থায গতেসু ৱিহাৰৰক্খণৱাৰো.

তেসন্তি ৱিহাৰৱাৰিকানং. ফাতিকম্মমেৱাতি ৱিহাৰৰক্খণকিচ্চস্স পহোনকপটিপাদনমেৱ. একস্সেৱ পাপুণন্তীতি দিৱসে দিৱসে একেকস্সেৱ পাপিতানীতি অত্থো.

ৰসসলাকন্তি উচ্ছুৰসসলাকং. ‘‘সলাকৱসেন গাহিতত্তা পন ন সাদিতব্বা’’তি ইদং অসাৰুপ্পৱসেন ৱুত্তং, ন ধুতঙ্গভেদৱসেন. ‘‘সঙ্ঘতো নিৰামিসসলাকা…পে… ৱট্টতিযেৱা’’তি (ৱিসুদ্ধি. ১.২৬) হি ৱিসুদ্ধিমগ্গে ৱুত্তং. অগ্গভিক্খামত্তন্তি এককটচ্ছুভিক্খামত্তং. লদ্ধা ৱা অলদ্ধা ৱা স্ৱেপি গণ্হেয্যাসীতি লদ্ধেপি অপ্পমত্ততায ৱুত্তং. তেনাহ ‘‘যাৱদত্থং লভতি…পে… অলভিত্ৱা ‘স্ৱে গণ্হেয্যাসী’তি ৱত্তব্বো’’তি.

তত্থাতি তস্মিং দিসাভাগে. তং গহেত্ৱাতি তং ৱাৰগামে সলাকং অত্তনো গহেত্ৱা. তেনাতি দিসংগমিকতো অঞ্ঞেন তস্মিং দিসংগমিকে. দেৱসিকং পাপেতব্বাতি উপচাৰসীমায ঠিতস্স যস্স কস্সচি ৱস্সগ্গেন পাপেতব্বা. এৱং এতেসু অগতেসু আসন্নৱিহাৰে ভিক্খূনং ভুঞ্জিতুং ৱট্টতি ইতৰথা সঙ্ঘিকতো.

অম্হাকং গোচৰগামেৱাতি সলাকভত্তদাযকানং গামং সন্ধায ৱুত্তং. ৱিহাৰে থেৰস্স পত্তসলাকভত্তন্তি ৱিহাৰে একেকস্সেৱ ওহীনত্থেৰস্স সব্বসলাকানং অত্তনো পাপনৱসেন পত্তসলাকভত্তং.

সলাকভত্তকথাৱণ্ণনা নিট্ঠিতা.

পক্খিকভত্তাদিকথাৱণ্ণনা

‘‘স্ৱে পক্খো’’তি অজ্জ পক্খিকং ন গাহেতব্বন্তি অট্ঠমিযা ভুঞ্জিতব্বং সত্তমিযা ভুঞ্জনত্থায ন গাহেতব্বং, দাযকেহি নিযমিতদিৱসেনেৱ গাহেতব্বন্তি অত্থো. তেনাহ ‘‘সচে পনা’’তিআদি. স্ৱে লূখন্তি অজ্জ আৱাহমঙ্গলাদিকৰণতো অতিপণীতভোজনং কৰীযতি, স্ৱে তথা ন ভৱিস্সতি, অজ্জেৱ ভিক্খূ ভোজেস্সামীতি অধিপ্পাযো.

পক্খিকভত্ততো উপোসথিকস্স ভেদং দস্সেন্তো আহ ‘‘উপোসথঙ্গানি সমাদিযিত্ৱা’’তিআদি. নিবন্ধাপিতন্তি ‘‘অসুকৱিহাৰে আগন্তুকা ভুঞ্জন্তূ’’তি নিযমিতং.

গমিকো আগন্তুকভত্তম্পীতি গামন্তৰতো আগন্ত্ৱা অৱূপসন্তেন গমিকচিত্তেন ৱসিত্ৱা পুন অঞ্ঞত্থ গচ্ছন্তং সন্ধায ৱুত্তং. আৱাসিকস্স পন গন্তুকামস্স গমিকভত্তমেৱ লব্ভতি. ‘‘লেসং ওড্ডেত্ৱা’’তি ৱুত্তত্তা লেসাভাৱে যাৱ গমনপৰিবন্ধো ৱিগচ্ছতি, তাৱ ভুঞ্জিতুং ৱট্টতীতি ঞাপিতন্তি দট্ঠব্বং.

তণ্ডুলাদীনি পেসেন্তি…পে… ৱট্টতীতি অভিহটভিক্খত্তা ৱট্টতি. তথা পটিগ্গহিতত্তাতি ভিক্খানামেন পটিগ্গহিতত্তা.

অৱিভত্তং সঙ্ঘিকং ভণ্ডন্তি কুক্কুচ্চুপ্পত্তিআকাৰদস্সনং. এৱং কুক্কুচ্চং কত্ৱা পুচ্ছিতব্বকিচ্চং নত্থি, অপুচ্ছিত্ৱা দাতব্বন্তি অধিপ্পাযো.

পক্খিকভত্তাদিকথাৱণ্ণনা নিট্ঠিতা.

সেনাসনক্খন্ধকৱণ্ণনানযো নিট্ঠিতো.