৩. সমুচ্চযক্খন্ধকো

সুক্কৱিস্সট্ঠিকথাৱণ্ণনা

৯৭. সমুচ্চযক্খন্ধকে ৱেদযামহন্তি জানাপেমি অহং, আৰোচেমীতিঅত্থো. অনুভৱামীতিপিস্স অত্থং ৱদন্তি. পুৰিমং পন পসংসন্তি আৰোপনৱচনত্তা. আৰোচেত্ৱা নিক্খিপিতব্বন্তি দুক্কটপৰিমোচনত্থং ৱুত্তং. কেচি পন ‘‘তদহেৱ পুন ৱত্তং সমাদিযিত্ৱা অৰুণং উট্ঠাপেতুকামস্স ৰত্তিচ্ছেদপৰিহাৰত্থম্পী’’তি ৱদন্তি.

‘‘সভাগা ভিক্খূ ৱসন্তী’’তি ৱুত্তত্তা ৱিসভাগানং ৱসনট্ঠানে ৱত্তং অসমাদিযিত্ৱা বহি এৱ কাতুম্পি ৱট্টতীতি দট্ঠব্বং. ‘‘দ্ৱে লেড্ডুপাতে অতিক্কমিত্ৱা’’তি ইদং ৱিহাৰে ভিক্খূনং সজ্ঝাযাদিসদ্দসৱনূপচাৰৱিজহনত্থং ৱুত্তং. ‘‘মহামগ্গতো ওক্কম্মা’’তি ইদং মগ্গপটিপন্নানং ভিক্খূনং উপচাৰাতিক্কমনত্থং ৱুত্তং. গুম্বেন ৱাতিআদি দস্সনূপচাৰৱিজহনত্থং.

‘‘সোপি কেনচি কম্মেন পুৰে অৰুণে এৱ গচ্ছতী’’তি ইমিনা আৰোচনায কতায সব্বেসুপি ভিক্খূসু ৱিহাৰগতেসু ঊনে গণে চৰণদোসো ৱা ৱিপ্পৱাসদোসো ৱা ন হোতি আৰোচিতত্তা সহৱাসস্সাতি দস্সেতি. তেনাহ ‘‘অযঞ্চা’’ তিআদি. অব্ভানং কাতুং ন ৱট্টতীতি কতম্পি অকতমেৱ হোতীতি অত্থো.

সুক্কৱিস্সট্ঠিকথাৱণ্ণনা নিট্ঠিতা.

পটিচ্ছন্নপৰিৱাসকথাৱণ্ণনা

১০২. সুদ্ধস্সাতি সভাগসঙ্ঘাদিসেসং অনাপন্নস্স, ততো ৱুট্ঠিতস্স ৱা. অঞ্ঞস্মিন্তি সুদ্ধন্তপৰিৱাসৱসেন আপত্তিৱুট্ঠানতো অঞ্ঞস্মিং আপত্তিৱুট্ঠানে. পাড়িযং ‘‘পটিকস্সিতো সঙ্ঘেন উদাযি ভিক্খু অন্তৰা একিস্সা আপত্তিযা…পে… মূলাযপটিকস্সনা’’তি ইদং কৰণৱসেন ৱিপৰিণামেত্ৱা মূলাযপটিকস্সনায পটিকস্সিতোতি যোজেতব্বং. অথ ৱা ‘‘মূলায পটিকস্সনা খমতি সঙ্ঘস্সা’’তি উত্তৰপদেন সহ পচ্চত্তৱসেনেৱ যোজেতুম্পি ৱট্টতি.

‘‘উদাযিং ভিক্খুং অন্তৰা একিস্সা আপত্তিযা…পে… মূলায পটিকস্সিত্ৱা’’তি এত্থ অন্তৰা একিস্সা আপত্তিযা হেতুভূতায উদাযিং ভিক্খুং মূলায পটিকস্সিত্ৱা মূলদিৱসে আকড্ঢিত্ৱা তস্সা অন্তৰাপত্তিযা সমোধানপৰিৱাসং দেতূতি যোজনা. আৱিকাৰাপেত্ৱা ৱিস্সজ্জেতব্বোতি তস্স অতেকিচ্ছভাৱং তেনেৱ সঙ্ঘস্স পাকটং কাৰেত্ৱা লজ্জিগণতো ৱিযোজনৱসেন ৱিস্সজ্জেতব্বো.

সতং আপত্তিযোতি কাযসংসগ্গাদিৱসেন একদিৱসে আপন্না সতং আপত্তিযো. দসসতন্তি সহস্সা আপত্তিযো. ৰত্তিসতং ছাদযিত্ৱানাতি যোজেতব্বো. সব্বপৰিৱাসকম্মৱাচাৱসানেতি হেট্ঠা দস্সিতানং দ্ৱিন্নং সুদ্ধন্তপৰিৱাসানং, তিণ্ণং সমোধানপৰিৱাসানঞ্চাতি ইমেসং সব্বেসং পৰিৱাসানং কম্মৱাচাপৰিযোসানে. পুৰিমনযেনেৱাতি পটিচ্ছন্নপৰিৱাসে ৱুত্তনযেন.

ৱিহাৰূপচাৰতোপীতি বহিগামে ভিক্খূনং ৱিহাৰূপচাৰতোপি. ‘‘দ্ৱে লেড্ডুপাতা অতিক্কমিতব্বা’’তি ইদং ভিক্খূনং সৱনূপচাৰাতিক্কমনং ৱুত্তং. গামস্সাতি ন ৱুত্তন্তি গামস্স উপচাৰং মুঞ্চিতুং ৱট্টতীতি ন ৱুত্তং. তেন গামূপচাৰে ঠিতাপি তত্থ দস্সনসৱনূপচাৰে অতিক্কমিত্ৱা ঠিতা ভিক্খূ চ ভিক্খুনিযো চ তস্সা ৰত্তিচ্ছেদং ন কৰোন্তীতি দীপেতি.

অনিক্খিত্তৱত্তভিক্খূনং ৱুত্তনযেনেৱাতি উপচাৰসীমায পৱিট্ঠানং ৱসেন ৰত্তিচ্ছেদং সন্ধায ৱুত্তং. তস্মিং গামেতি ভিক্খুনীনং নিৱাসনগামে. অত্তানং দস্সেত্ৱাতি যথা আৰোচেতুং সক্কা, তথা দস্সেত্ৱা. ‘‘সম্মন্নিত্ৱা দাতব্বা’’তি ইমিনা সম্মতায সহৱাসেপি ৰত্তিচ্ছেদো ন হোতীতি দস্সেতি.

মূলাযপটিকস্সিতস্সাতি মূলাযপটিকস্সিতস্স পুন পৰিৱুত্থপৰিৱাসস্সাতি অত্থো. তিস্সন্নন্তি মূলাপত্তিযা সহ দ্ৱিন্নং অন্তৰাপত্তীনঞ্চ.

১০৮. সচে পটিচ্ছন্নাতি নিক্খিত্তৱত্তেনাপন্নাপত্তিং সন্ধায ৱুত্তং. পাড়িযং পঞ্চাহপ্পটিচ্ছন্নৱাৰে অন্তৰাপত্তিকথাযং ‘‘এৱঞ্চ পন, ভিক্খৱে, ছাৰত্তং মানত্তং দাতব্ব’’ন্তি ইদং মূলাযপটিকস্সনাকম্মৱাচানন্তৰমেৱ দাতুং ৱুত্তং ন হোতি. মূলাযপটিকস্সিতস্স পন পঞ্চদিৱসানি পৰিৱসিত্ৱা যাচিতস্স মানত্তচৰণকালে আপন্নায ততিযায অন্তৰাপত্তিযা অপ্পটিচ্ছন্নায মানত্তদানং সন্ধায ৱুত্তং. এৱঞ্চ দিন্নমানত্তস্স একেন ছাৰত্তেন পুব্বে দিন্নমানত্তাহি তীহি আপত্তীহি সহ চতস্সন্নম্পি আপত্তীনং মানত্তং চিণ্ণমেৱ হোতি. ইমিনা পন নযেন অব্ভানাৰহকালে আপন্নায অন্তৰাপত্তিযা, পক্খপ্পটিচ্ছন্নৱাৰে অন্তৰাপত্তীসু চ পটিপজ্জনং ৱেদিতব্বং. ‘‘একাহপ্পটিচ্ছন্নাদিৱসেন পঞ্চা’’তি ইদং একাহপ্পটিচ্ছন্নাদীনং চতুন্নং পচ্চেকপৰিৱাসদানমানত্তদানঅব্ভানানি একেকং কত্ৱা ৱুত্তং. ‘‘অন্তৰাপত্তিৱসেন চতস্সো’’তি ইদম্পি মানত্তদানঅব্ভানানি তস্মিং তস্মিং মূলাযপটিকস্সনে একত্তং আৰোপেত্ৱা ৱুত্তং.

পটিচ্ছন্নপৰিৱাসকথাৱণ্ণনা নিট্ঠিতা.

সমোধানপৰিৱাসকথাৱণ্ণনা

১২৫. ‘‘যস্মা পটিচ্ছন্না অন্তৰাপত্তী’’তি ইদং সমোধানপৰিৱাসদানস্স কাৰণৱচনং, ন পন চিণ্ণপৰিৱুত্থদিৱসানং মক্খিতভাৱস্স, অপ্পটিচ্ছন্নায অন্তৰাপত্তিযা মূলাযপটিকস্সনে কতেপি তেসং মক্খিতভাৱসম্ভৱতো. তস্মা ‘‘মানত্তচিণ্ণদিৱসাপি পৰিৱুত্থদিৱসাপি সব্বে মক্খিতাৱ হোন্তী’’তি ইমস্সানন্তৰং ‘‘সমোধানপৰিৱাসো চস্স দাতব্বো’’তি এৱমেত্থ যোজনা কাতব্বা. তেনাহ ‘‘তেনেৱা’’তিআদি.

সমোধানপৰিৱাসকথাৱণ্ণনা নিট্ঠিতা.

অগ্ঘসমোধানপৰিৱাসকথাৱণ্ণনা

১৩৪. ‘‘একাপত্তিমূলকঞ্চা’’তি ইমিনা ‘‘একা আপত্তি একাহপ্পটিচ্ছন্না, একা আপত্তি দ্ৱীহপ্পটিচ্ছন্না’’তিআদিনযং দস্সেতি. অপ্পটিচ্ছন্নভাৱং দস্সেতুন্তি অজাননাদিনা পটিচ্ছন্নাযপি আপত্তিযা মানত্তাৰহতাৱচনেন অপ্পটিচ্ছন্নভাৱং দস্সেতুং. ‘‘একস্স, আৱুসো, মাসস্স ভিক্খু মানত্তাৰহো’’তি (চূড়ৱ. ১৫৩) হি ৱুত্তং. এত্থ একস্স অজাননপটিচ্ছন্নমাসস্স পৰিৱাসাৰহো ন হোতি, কেৱলং আপত্তিযা অপ্পটিচ্ছন্নত্তা মানত্তাৰহো হোতীতি অধিপ্পাযো. পাড়িযং মক্খধম্মোতি মদ্দিতুকামতা. সঙ্ঘাদিসেসানং পৰিৱাসদানাদিসব্বৱিনিচ্ছযস্স সমুচ্চযত্তা পনেস সমুচ্চযক্খন্ধকোতি ৱুত্তোতি ৱেদিতব্বো.

অগ্ঘসমোধানপৰিৱাসকথাৱণ্ণনা নিট্ঠিতা.

সমুচ্চযক্খন্ধকৱণ্ণনানযো নিট্ঠিতো.