২. পাৰিৱাসিকক্খন্ধকো

পাৰিৱাসিকৱত্তকথাৱণ্ণনা

৭৫. পাৰিৱাসিকক্খন্ধকে অন্তমসো মূলাযপটিকস্সনাৰহাদীনম্পীতি আদি-সদ্দেন মানত্তাৰহমানত্তচাৰিকঅব্ভানাৰহে সঙ্গণ্হাতি. তে হি পাৰিৱাসিকানং, পাৰিৱাসিকা চ তেসং পকতত্তট্ঠানে এৱ তিট্ঠন্তি. অধোতপাদট্ঠপনকন্তি যত্থ ঠত্ৱা পাদে ধোৱন্তি, তাদিসং দাৰুফলকখণ্ডাদিং. পাদঘংসনন্তি সক্খৰকথলাদিং. ‘‘ৱত্তং কৰোন্তী’’তি এত্তকমত্তস্সেৱ ৱুত্তত্তা সদ্ধিৱিহাৰিকাদীহিপি অভিৱাদনাদিং কাতুং ন ৱট্টতি.

‘‘পাৰিসুদ্ধিউপোসথে কৰিযমানে’’তি ইদং পৱাৰণাদিৱসেসু সঙ্ঘে পৱাৰেন্তে অনুপগতছিন্নৱস্সাদীহি কৰিযমানপাৰিসুদ্ধিউপোসথম্পি সন্ধায ৱুত্তং. অত্তনো পাড়িযাতি নৱকানং পুৰতো.

‘‘পাৰিৱাসিকস্সেৱা’’তি ইদং অব্ভানাৰহপৰিযোসানে সব্বে গৰুকট্ঠে সন্ধায ৱুত্তং. তেসম্পি পচ্চেকং ওণোজনস্স অনুঞ্ঞাতত্তা তদৱসেসা পকতত্তা এৱ তং ন লভন্তি.

চতুস্সালভত্তন্তি ভোজনসালায পটিপাটিযা দিয্যমানভত্তং. হত্থপাসে ঠিতেনাতি দাযকস্স হত্থপাসে পটিগ্গহণৰুহনট্ঠানেতি অধিপ্পাযো. মহাপেড়ভত্তেপীতি মহন্তেসু ভত্তপচ্ছিআদিভাজনেসু ঠপেত্ৱা দিয্যমানভত্তেসুপি.

৭৬. পাপিট্ঠতৰাতি পাৰাজিকাপত্তীতি উক্কংসৱসেন ৱুত্তং. সঞ্চৰিত্তাদিপণ্ণত্তিৱজ্জতো পন সুক্কৱিস্সট্ঠাদিকা লোকৱজ্জাৱ, তত্থাপি সঙ্ঘভেদাদিকা পাপিট্ঠতৰা এৱ.

‘‘কম্মন্তি পাৰিৱাসিককম্মৱাচা’’তি এতেন কম্মভূতা ৱাচাতি কম্মৱাচা-সদ্দস্স অত্থোপি সিদ্ধোতি ৱেদিতব্বো. সৱচনীযন্তি এত্থ ‘‘সদোস’’ন্তি (সাৰত্থ. টী. চূড়ৱগ্গ. ৩.৭৬) অত্থং ৱদতি. অত্তনো ৱচনে পৱত্তনকম্মন্তি এৱমেত্থ অত্থো দট্ঠব্বো, ‘‘মা পক্কমাহী’’তি ৱা ‘‘এহি ৱিনযধৰানং সম্মুখীভাৱ’’ন্তি ৱা এৱং অত্তনো আণায পৱত্তনককম্মং ন কাতব্বন্তি অধিপ্পাযো. এৱঞ্হি কেনচি সৱচনীযে কতে অনাদৰেন অতিক্কমিতুং ন ৱট্টতি, বুদ্ধস্স সঙ্ঘস্স আণা অতিক্কন্তা নাম হোতি.

ৰজোহতভূমীতি পণ্ণসালাৱিসেসনং. পচ্চযন্তি ৱস্সাৱাসিকচীৱৰং. সেনাসনং ন লভতীতি ৱস্সগ্গেন ন লভতি.

অপণ্ণকপটিপদাতি অৱিৰদ্ধপটিপদা. সচে ৱাযমন্তোপীতি এত্থ অৱিসযভাৱং ঞত্ৱা অৱাযমন্তোপি সঙ্গয্হতি.

৮১. অৱিসেসেনাতি পাৰিৱাসিকুক্খিত্তকানং সামঞ্ঞেন. পঞ্চৱণ্ণচ্ছদনবদ্ধট্ঠানেসূতি পঞ্চপ্পকাৰচ্ছদনেহি ছন্নট্ঠানেসু.

ওবদ্ধন্তি উট্ঠানাদিব্যাপাৰপটিবদ্ধং. পীড়িতন্তি অত্থো. মঞ্চে ৱা পীঠে ৱাতি এত্থ ৱা-সদ্দো সমুচ্চযত্থো, তেন তট্টিকাচম্মখণ্ডাদীসু দীঘাসনেসুপি নিসীদিতুং ন ৱট্টতীতি দীপিতং হোতি.

ন ৱত্তভেদদুক্কটন্তি ৱুড্ঢতৰস্স জানন্তস্সাপি ৱত্তভেদে দুক্কটং নত্থীতি দস্সেতি. ‘‘ৱত্তং নিক্খিপাপেত্ৱা’’তি ইদং পাৰিৱাসাদিমেৱ সন্ধায ৱুত্তং.

পাৰিৱাসিকৱত্তকথাৱণ্ণনা নিট্ঠিতা.

পাৰিৱাসিকক্খন্ধকৱণ্ণনানযো নিট্ঠিতো.