১০. কোসম্বকক্খন্ধকো

কোসম্বকৱিৱাদকথাৱণ্ণনা

৪৫১. কোসম্বকক্খন্ধকে সচে হোতি, দেসেস্সামীতি ৱিনযধৰস্স ৱচনেন আপত্তিদিট্ঠিং পটিলভিত্ৱা এৱমাহ. তেনেৱ পাড়িযং ‘‘সো তস্সা আপত্তিযা অনাপত্তিদিট্ঠি হোতী’’তি ৱুত্তং. নত্থি আপত্তীতি উদকস্স ঠপনভাৱং অজানিত্ৱা ৱা ঠপিতং ছড্ডেত্ৱা ৱিস্সৰিত্ৱা ৱা গমনে অসঞ্চিচ্চ অসতিযা অনাপত্তিপক্খোপি সম্ভৱতীতি ৱিনযধৰো তত্থ অনাপত্তিদিট্ঠিং পটিলভিত্ৱা এৱমাহ. তেনেৱ পাড়িযং ‘‘অঞ্ঞে ভিক্খূ তস্স আপত্তিযা অনাপত্তিদিট্ঠিনো হোন্তী’’তি ৱুত্তং. পৰিসাযপিস্স অনাপত্তিদিট্ঠিযা উপ্পন্নত্তা ‘‘অঞ্ঞে’’তি বহুৱচনং কতং. অনাপত্তিদিট্ঠি অহোসীতি সুত্তন্তিকত্থেৰস্স ৱিনযে অপকতঞ্ঞুতায ৱিনযধৰস্স ৱচনমত্তেন সো এৱমহোসি, সা পনস্স আপত্তি এৱ উদকাৱসেসস্স ঠপনভাৱং ঞত্ৱা ঠপিতত্তা. ৱত্থুমত্তজাননে এৱ হি সেখিযা সচিত্তকা, ন পণ্ণত্তিৱিজাননে. তেনেৱ পাড়িযং ‘‘তস্সা আপত্তিযা অনাপত্তিদিট্ঠি হোতী’’তি সব্বত্থ আপত্তি ইচ্চেৱ ৱুত্তং. ‘‘আপত্তিং আপজ্জমানো’’তি ইদং ৱিনযধৰত্থেৰো ‘‘তযা ইদং উদকং ঠপিত’’ন্তি অত্তনা পুট্ঠেন সুত্তন্তিকত্থেৰেন ‘‘আমাৱুসো’’তি ৱুত্তৱচনং সৰিত্ৱা পণ্ণত্তিঅকোৱিদতায সঞ্চিচ্চেৱ অকাসীতি আপত্তিদিট্ঠি হুত্ৱাৱ অৱোচ. তেনেৱ পাড়িযং ‘‘অঞ্ঞে ভিক্খূ তস্সা আপত্তিযা আপত্তিদিট্ঠিনো হোন্তী’’তি ৱুত্তং.

৪৫৩. ‘‘ন তাৱ ভিন্নো’’তি ইদং উক্খিপনতদনুৱত্তনমত্তেন সঙ্ঘো ভিন্নো নাম ন হোতি, তং নিস্সায পন উভযপক্খিকানং পক্খং পৰিযেসিত্ৱা অঞ্ঞমঞ্ঞং কোধৱসেন কাযৱচীকলহৱড্ঢনেনেৱ হোতীতি ইমমত্থং সন্ধায ৱুত্তং. তেনাহ ‘‘সো চ খো কলহৱসেনা’’তি. সম্ভমঅত্থৱসেনাতি তুৰিতত্থৱসেন.

৪৫৪. অকাৰণেতিআদি অনুক্খিপিত্ৱাৱ উপাযেন সঞ্ঞাপেত্ৱা হিতেসিতায আপত্তিতো মোচেতুং যুত্তট্ঠানে কোধচিত্তৱসেন ৱিহেঠনত্থায কতভাৱং সন্ধায ৱুত্তং, ন পন কম্মঙ্গস্স অভাৱং সন্ধায. তেনেৱ পাড়িযং ‘‘আপত্তি এসা, ভিক্খৱে, নেসা অনাপত্তি…পে… উক্খিত্তো এসো ভিক্খূ’’তিআদি ৱুত্তং.

৪৫৫. ‘‘অধম্মৱাদীনং পক্খে নিসিন্নো’’তি ইদং উপলক্খণমত্তং, ধম্মৱাদীনং পক্খে নিসীদিত্ৱা অধম্মৱাদীনং লদ্ধিং গণ্হন্তোপি ধম্মৱাদীনং নানাসংৱাসকো হোতি এৱ. কম্মং কোপেতীতি তং ৱিনা গণস্স অপূৰণপক্খং সন্ধায ৱুত্তং. যত্থ ৱা তত্থ ৱাতি ধম্মৱাদীনং পক্খে ৱা অধম্মৱাদীনং পক্খে ৱাতি অত্থো. ইমে ধম্মৱাদিনোতি গণ্হাতীতি তংতংপক্খগতে ভিক্খূ যাথাৱতো ৱা অযাথাৱতো ৱা ‘‘ইমে ধম্মৱাদিনো’’তি গণ্হাতি, অযং তংতংপক্খগতানং অত্তানং সমানসংৱাসকং কৰোতি.

৪৫৬. উপদংসেন্তীতি পৱত্তেন্তি. পাড়িযং এত্তাৱতাতি ‘‘এত্তকপদেসং মুঞ্চিত্ৱা নিসিন্না মযং কোধচিত্তে উপ্পন্নেপি অঞ্ঞমঞ্ঞং অননুলোমিকং কাযকম্মাদিং পৱত্তেতুং ন সক্খিস্সামা’’তি সল্লেক্খেত্ৱা দূৰে নিসীদিতব্বন্তি অধিপ্পাযো. তেনাহ ‘‘উপচাৰং মুঞ্চিত্ৱা’’তি.

৪৫৭. পাড়িযং ভণ্ডনজাতাতিআদীসু কলহস্স পুব্বভাগো ভণ্ডনং নাম. হত্থপৰামাসাদি কলহো নাম. ৱিৰুদ্ধৱাদো ৱিৱাদো নাম.

৪৫৮. পৰিপুণ্ণকোসকোট্ঠাগাৰোতি এত্থ কোসো নাম সুৱণ্ণমণিআদিভণ্ডাগাৰসাৰগব্ভো. কোট্ঠং ৱুচ্চতি ধঞ্ঞস্স আৱসনট্ঠানং, কোট্ঠভূতং অগাৰং কোট্ঠাগাৰং, ধঞ্ঞসঙ্গহট্ঠানং. অব্ভুয্যাসীতি যুদ্ধায অভিমুখো নিক্খমীতি অত্থো. একসঙ্ঘাতম্পীতি একযুদ্ধম্পি. ধোৱনন্তি ধোৱনুদকং.

৪৬৩. পৰিযাদিন্নৰূপাতি কোধচিত্তেন পৰিগ্গহিতসভাৱা.

৪৬৪. তং ন জানন্তীতি তং কলহং ন জানন্তি. যে উপনয্হন্তীতি যথাৱুত্তং কোধাকাৰং চিত্তে বন্ধন্তি. পাকটপৰিস্সযেতি সীহাদিকে. পটিচ্ছন্নপৰিস্সযেতি ৰাগাদিকে. পাড়িযং নত্থি বালে ৯৭ সহাযতাতি বালং নিস্সায সীলাদিগুণসঙ্খাতা সহাযতা নত্থি, ন সক্কা লদ্ধুন্তি অত্থো.

৪৬৬. অত্তকামৰূপাতি অত্তনো হিতকামযমানসভাৱা. অনুৰুদ্ধাতি একসেসনযেন তিণ্ণম্পি কুলপুত্তানং আলপনং, তেনেৱ বহুৱচননিদ্দেসো কতো. খমনীযং সৰীৰং যাপনীযং জীৱিতং ‘‘কচ্চি ৱো সৰীৰঞ্চ ধাৰেতুং, জীৱিতঞ্চ যাপেতুং সক্কা’’তি পুচ্ছতি. তগ্ঘাতি একংসত্থে নিপাতো, একংসেন মযং ভন্তেতি অত্থো. যথা কথন্তি এত্থ যথাতি নিপাতমত্তং, যথাকথন্তি ৱা একো নিপাতো কাৰণপুচ্ছনত্থো, কেন পকাৰেনাতি অত্থো. একঞ্চ পন মঞ্ঞে চিত্তন্তি একস্স চিত্তৱসেন ইতৰেসম্পি পৱত্তনতো সব্বেসং নো একং ৱিয চিত্তন্তি অত্থো. কচ্চি পন ৱো অনুৰুদ্ধাতি এত্থ ৱোতি নিপাতমত্তং, পচ্চত্তৱচনং ৱা, কচ্চি তুম্হেতি অত্থো. অম্হাকন্তি নিদ্ধাৰণে সামিৱচনং, অম্হেসু তীসু যো পঠমং পটিক্কমতীতি অত্থো.

কোসম্বকৱিৱাদকথাৱণ্ণনা নিট্ঠিতা.

পালিলেয্যকগমনকথাৱণ্ণনা

৪৬৭. যেন পালিলেয্যকন্তি পচ্চত্তে উপযোগৱচনং, যত্থ পালিলেয্যকো গামো, তত্থ অৱসৰীতি অত্থো. দহৰপোতকেহীতি ভিঙ্কচ্ছাপেহি. ‘‘ওগাহি’’ন্তিপি পাঠো, নহানপোক্খৰণিন্তি অত্থো.

উদানগাথাযং পন – ৰথঈসসদিসদন্তস্স নাগস্স হত্থিনো এতং ৱিৱেকনিন্নং চিত্তং নাগেন বুদ্ধনাগস্স ৱিৱেকনিন্নচিত্তেন সমেতি. কস্মা? যং যস্মা একোৱ ৰমতি ৱনে, তস্মা এৱং যোজনা দট্ঠব্বা.

পালিলেয্যকগমনকথাৱণ্ণনা নিট্ঠিতা.

অট্ঠাৰসৱত্থুকথাৱণ্ণনা

৪৬৮. যথা ধম্মো তথা তিট্ঠাহীতি যথা ধম্মো চ ৱিনযো চ ঠিতো, তথা তিট্ঠ, ধম্মৱাদীপক্খে তিট্ঠাতি অত্থো.

৪৭৩. ‘‘যো পটিবাহেয্য, আপত্তি দুক্কটস্সা’’তি ইদং সামগ্গীভেদস্স অকাৰকে সন্ধায ৱুত্তং. যে পন ভেদকাৰকা ৱিৰুদ্ধা অলজ্জিনো, তেসং পটিবাহিতুং ৱট্টতি তেসং সন্তকস্সপি সেনাসনস্স ৱিনাসনৱচনতো. ‘‘ৱিৱিত্তং কত্ৱাপি দাতব্ব’’ন্তি ৱুত্তত্তা পন যথাৱুড্ঢং ৱৰসেনাসনং অদত্ৱা ৱুড্ঢানম্পি অসঞ্ঞতানং সঞ্ঞতেহি ৱিৱিত্তং কত্ৱা দাতব্বন্তি দট্ঠব্বং.

৪৭৫. কম্মৱাচায ওসাৰেত্ৱাতি এত্থ উক্খিত্তস্স ভিক্খুনো আপত্তিযাপন্নভাৱং পটিজানিত্ৱা সম্মাৱত্তনেন উক্খেপকানং সমুপ্পন্নওসাৰণচ্ছন্দস্স পগেৱ ঞাতত্তা পটিপ্পস্সম্ভনকম্মৱাচায উক্খিত্তানুৱত্তকা সযমেৱ নং ওসাৰেসুন্তি দট্ঠব্বং.

৪৭৬. অত্থতো অপগতাতি সামগ্গীঅত্থৱিৰহিতা, তুচ্ছব্যঞ্জনাতি অত্থো.

৪৭৭. অপ্পটিচ্ছন্নাচাৰোতি অপ্পটিচ্ছাদেতব্বসুন্দৰাচাৰো. অনপগতন্তি কাৰণতো অনপেতং. আদাতব্বতো গহেতব্বতো আদাযন্তি আচৰিযৱাদো ৱুত্তোতি আহ ‘‘আদাযং অত্তনো আচৰিযৱাদ’’ন্তি.

অট্ঠহি দূতঙ্গেহীতি ‘‘সোতা চ হোতি সাৱেতা চ উগ্গহেতা চ ধাৰেতা চ ৱিঞ্ঞাতা চ ৱিঞ্ঞাপেতা চ কুসলো চ সহিতাসহিতস্স নো চ কলহকাৰকো’’তি (অ. নি. ৮.১৬) এৱং ৱুত্তেহি অট্ঠহি দূতঙ্গেহি. সেসমেত্থ, হেট্ঠা চ সব্বত্থ সুৱিঞ্ঞেয্যমেৱাতি.

অট্ঠাৰসৱত্থুকথাৱণ্ণনা নিট্ঠিতা.

কোসম্বকক্খন্ধকৱণ্ণনানযো নিট্ঠিতো.

ইতি সমন্তপাসাদিকায ৱিনযট্ঠকথায ৱিমতিৱিনোদনিযং

মহাৱগ্গৱণ্ণনানযো নিট্ঠিতো.

নমো তস্স ভগৱতো অৰহতো সম্মাসম্বুদ্ধস্স

চূড়ৱগ্গৱণ্ণনা