৯. চম্পেয্যক্খন্ধকো

কস্সপগোত্তভিক্খুৱত্থুকথাদিৱণ্ণনা

৩৮০. চম্পেয্যক্খন্ধকে তন্তিবদ্ধোতি তন্তি ৱুচ্চতি ব্যাপাৰো, তত্থ বদ্ধো, উস্সুক্কং আপন্নোতি অত্থো. তেনাহ ‘‘তস্মিং আৱাসে’’তিআদি.

৩৮৭-৮. হাপনং ৱা অঞ্ঞথা কৰণং ৱা নত্থীতি ঞত্তিকম্মস্স ঞত্তিযা একত্তা হাপনং ন সম্ভৱতি, তস্সা একত্তা এৱ পচ্ছা ঞত্তিঠপনৱসেন, দ্ৱিক্খত্তুং ঠপনৱসেন চ অঞ্ঞথা কৰণং নত্থি. পৰতোতি পৰিৱাৰে. তন্তি পব্বাজনীযকম্মং, তস্সাতি অত্থো.

কস্সপগোত্তভিক্খুৱত্থুকথাদিৱণ্ণনা নিট্ঠিতা.

দ্ৱেনিস্সৰণাদিকথাৱণ্ণনা

৩৯৫. এসাতি ‘‘বালো’’তিআদিনা নিদ্দিট্ঠপুগ্গলো, অপ্পত্তোতি সম্বন্ধো. তত্থ কাৰণমাহ ‘‘যস্মা’’তিআদি. তত্থ আৱেণিকেন লক্খণেনাতি পব্বাজনীযকম্মস্স নিমিত্তভাৱেন পাড়িযং ৱুত্তত্তা অসাধাৰণভূতেন কুলদূসকভাৱেন. যদি হেস তং কম্মং অপ্পত্তো, কথং পন সুনিস্সাৰিতোতি আহ ‘‘যস্মা পনস্স আকঙ্খমানো সঙ্ঘো পব্বাজনীযকম্মং কৰেয্যাতি ৱুত্তং, তস্মা সুনিস্সাৰিতো’’তি. তত্থ ৱুত্তন্তি কম্মক্খন্ধকে (চূড়ৱ. ২৭) ৱুত্তং.

এত্থ পন কুলদূসককম্মং কত্ৱা পব্বাজনীযকম্মকতস্স তেৰসককণ্ডকট্ঠকথাযং ‘‘যস্মিং ৱিহাৰে ৱসন্তেন যস্মিং গামে কুলদূসককম্মং কতং হোতি, তস্মিং ৱিহাৰে ৱা তস্মিং গামে ৱা ন ৱসিতব্ব’’ন্তিআদিনা (পাৰা. অট্ঠ. ২.৪৩৩) যা সম্মাৱত্তনা ৱুত্তা, সা ইতৰেনাপি পূৰেতব্বা. যং পন পটিপ্পস্সদ্ধকম্মস্স কুলদূসকস্স তত্থেৱ অট্ঠকথাযং ‘‘যেসু কুলেসু কুলদূসককম্মং কতং, ততো পচ্চযা ন গহেতব্বা’’তিআদি ৱুত্তং, তং ন পূৰেতব্বং কুলসঙ্গহস্স অকতত্তা. এৱং সেসকম্মেসুপি. যদি এৱং ‘‘তজ্জনীযকম্মাৰহস্স নিযসকম্মং কৰোতি…পে… এৱং খো, উপালি, অধম্মকম্মং হোতী’’তিআদিৱচনং (মহাৱ. ৪০২) ৱিৰুজ্ঝতীতি? ন ৱিৰুজ্ঝতি সঙ্ঘসন্নিট্ঠানৱসেন তজ্জনীযাদিকম্মাৰহত্তস্স সিজ্ঝনতো. যস্স হি সঙ্ঘো ‘‘তজ্জনীযকম্মং কৰোমা’’তি সন্নিট্ঠানং কত্ৱা কম্মৱাচং সাৱেন্তো পব্বাজনীযকম্মৱাচং সাৱেতি, তস্স কম্মং অধম্মকম্মং হোতি. সচে পন ‘‘তস্সেৱ পব্বাজনীযকম্মমেৱ কৰোমা’’তি সন্নিট্ঠানং কত্ৱা তদেৱ কৰোতি, তস্স তং কম্মং ধম্মকম্মন্তি ৱেদিতব্বং.

এৱমিধ ‘‘নিস্সাৰণ’’ন্তি অধিপ্পেতস্স পব্বাজনীযকম্মস্স ৱসেন অত্থং দস্সেত্ৱা ইদানি তদঞ্ঞেসং তজ্জনীযাদীনং ৱসেন নিস্সাৰণে অধিপ্পেতে ‘‘অপ্পত্তো নিস্সাৰণ’’ন্তি ইমস্স পটিপক্খৱসেন সম্পত্তো নিস্সাৰণং, ‘‘তঞ্চে সঙ্ঘো নিস্সাৰেতি. সুনিস্সাৰিতো’’তি অত্থসম্ভৱং দস্সেতুং পুন ‘‘তঞ্চে সঙ্ঘো নিস্সাৰেতীতি সচে সঙ্ঘো’’তিআদি ৱুত্তং. তত্থ তত্থাতি তজ্জনীযাদিকম্মৱিসযে, একেনাপি অঙ্গেন নিস্সাৰণা অনুঞ্ঞাতাতি যোজনা. পাড়িযং অপ্পত্তো নিস্সাৰণন্তি এত্থ আপন্নো আৱেণিকৱসেন তজ্জনীযাদিসঙ্খাতং নিস্সাৰণং পত্তোতি অত্থো গহেতব্বো.

দ্ৱেনিস্সৰণাদিকথাৱণ্ণনা নিট্ঠিতা.

চম্পেয্যক্খন্ধকৱণ্ণনানযো নিট্ঠিতো.