৮. চীৱৰক্খন্ধকো

জীৱকৱত্থুকথাদিৱণ্ণনা

৩২৯. চীৱৰক্খন্ধকে কম্মৱিপাকন্তি কম্মপচ্চযউতুচিত্তাহাৰসমুট্ঠিতং অপ্পটিবাহিযৰোগং সন্ধায ৱুত্তং কম্মজস্স ৰোগস্স অভাৱা.

৩৩০. পাড়িযং সংযমস্সাতি সঙ্গহণস্স. অৱিসজ্জনস্সাতি অত্থো ‘‘যো সংযমো সো ৱিনাসো’’তিআদীসু (পে. ৱ. ২৩৭) ৱিয. এতস্স সংযমস্স ফলং উপজানামাতি যোজনা. তমেৱ ফলং দস্সেন্তী আহ ‘‘ৱৰমেতং…পে… আসিত্ত’’ন্তি. কেচি পন ‘‘সংযমস্সাতি আনিসংসস্স, উপযোগত্থে চেতং সামিৱচন’’ন্তি (সাৰত্থ. টী. মহাৱগ্গ ৩.৩২৯-৩৩০) অত্থং ৱদন্তি.

৩৩৬. উস্সন্নদোসোতি সঞ্জাতপিত্তাদিদোসো. সব্বত্থাতি সকলসৰীৰে.

৩৩৭. মহাপিট্ঠিযকোজৱন্তি হত্থিপিট্ঠিযং অত্থৰিতব্বতায ‘‘মহাপিট্ঠিয’’ন্তি লদ্ধসমঞ্ঞং উণ্ণামযত্থৰণং.

৩৩৮-৯. উপড্ঢকাসিনং খমমানন্তি অড্ঢকাসিঅগ্ঘনকং. পাড়িযং কিং নু খোতি কতমং নু খো.

৩৪০-৩৪২. উপচাৰেতি সুসানস্স আসন্নে পদেসে. ছড্ডেত্ৱা গতাতি কিঞ্চি অৱত্ৱা এৱ ছড্ডেত্ৱা গতা, এতেন ‘‘ভিক্খূ গণ্হন্তূ’’তি ছড্ডিতে এৱ অকামা ভাগদানং ৱিহিতং, কেৱলং ছড্ডিতে পন কতিকায অসতি একতো বহূসু পৱিট্ঠেসু যেন গহিতং, তেন অকামভাগো ন দাতব্বোতি দস্সেতি. সমানা দিসা পুৰত্থিমাদিভেদা এতেসন্তি সদিসাতি আহ ‘‘একদিসায ৱা ওক্কমিংসূ’’তি. ধুৰৱিহাৰট্ঠানেতি ৱিহাৰস্স সম্মুখট্ঠানে.

জীৱকৱত্থুকথাদিৱণ্ণনা নিট্ঠিতা.

ভণ্ডাগাৰসম্মুতিআদিকথাৱণ্ণনা

৩৪৩. ৱিহাৰমজ্ঝেতি সব্বেসং জাননত্থায ৱুত্তং. ৱণ্ণাৱণ্ণং কত্ৱাতি পটিৱীসপ্পহোনকতাজাননত্থং হলিদ্দিযাদীহি খুদ্দকমহন্তৱণ্ণেহি যুত্তে সমে কোট্ঠাসে কত্ৱা. তেনাহ ‘‘সমে পটিৱীসে ঠপেত্ৱা’’তি. ইদন্তি সামণেৰানং উপড্ঢপটিৱীসদানং. ফাতিকম্মন্তি পহোনককম্মং. যত্তকেন ৱিনযাগতেন সম্মুঞ্জনীবন্ধনাদিহত্থকম্মেন ৱিহাৰস্স ঊনকতা ন হোতি, তত্তকং কত্ৱাতি অত্থো. সব্বেসন্তি তত্ৰুপ্পাদৱস্সাৱাসিকং গণ্হন্তানং সব্বেসং ভিক্খূনং, সামণেৰানঞ্চ. ভণ্ডাগাৰিকচীৱৰেপীতি অকালচীৱৰং সন্ধায ৱুত্তং. এতন্তি উক্কুট্ঠিযা কতায সমভাগদানং. ৱিৰজ্ঝিত্ৱা কৰোন্তীতি কত্তব্বকালেসু অকত্ৱা যথাৰুচিতক্খণে কৰোন্তি.

এত্তকেন মম চীৱৰং পহোতীতি দ্ৱাদসগ্ঘনকেনেৱ মম চীৱৰং পৰিপুণ্ণং হোতি, ন ততো ঊনেনাতি সব্বং গহেতুকামোতি অত্থো.

ভণ্ডাগাৰসম্মুতিআদিকথাৱণ্ণনা নিট্ঠিতা.

চীৱৰৰজনকথাদিৱণ্ণনা

৩৪৪. এৱঞ্হি কতেতি ৱট্টাধাৰস্স অন্তো ৰজনোদকং, বহি ছল্লিকঞ্চ কত্ৱা ৱিযোজনে কতে. ন উত্তৰতীতি কেৱলং উদকতো ফেণুট্ঠানাভাৱা ন উত্তৰতি. ৰজনকুণ্ডন্তি পক্কৰজনট্ঠপনকং মহাঘটং.

৩৪৫. অনুৱাতাদীনং দীঘপত্তানন্তি আযামতো, ৱিত্থাৰতো চ অনুৱাতং. আদি-সদ্দেন দ্ৱিন্নং খন্ধানং অন্তৰা মাতিকাকাৰেন ঠপিতপত্তঞ্চ ‘‘দীঘপত্ত’’ন্তি দট্ঠব্বং. আগন্তুকপত্তন্তি দিগুণচীৱৰস্স উপৰি অঞ্ঞং পট্টং অপ্পেন্তি, তং সন্ধায ৱুত্তং. তং কিৰ ইদানি ন কৰোন্তি.

৩৪৬. পাড়িযং নন্দিমুখিযাতি তুট্ঠিমুখিযা, পসন্নদিসামুখাযাতি অত্থো.

৩৪৮. অচ্ছুপেয্যন্তি পতিট্ঠপেয্যং. হতৱত্থকানন্তি পুৰাণৱত্থানং. অনুদ্ধৰিত্ৱাৱাতি অগ্গড়ে ৱিয দুব্বলট্ঠানং অনপনেত্ৱাৱ.

৩৪৯-৩৫১. ৱিসাখৱত্থুম্হি কল্লকাযাতি অকিলন্তকাযা. গতীতি ঞাণগতি অধিগমো. অভিসম্পৰাযোতি ‘‘সকিদেৱ ইমং লোকং আগন্ত্ৱা দুক্খস্সন্তং কৰোতী’’তিআদিনা (সং. নি. ৫.১০৪৮) ৱুত্তো ঞাণাভিসম্পৰাযো, মগ্গঞাণযুত্তেহি গন্তব্বগতিৱিসেসোতি অত্থো. তং ভগৱা ব্যাকৰিস্সতি. ‘‘দদাতি দান’’ন্তি ইদং অন্নপানৱিৰহিতানং সেসপচ্চযানং দানৱসেন ৱুত্তং. সোৱগ্গিকন্তি সগ্গসংৱত্তনিকং.

৩৫৯. অট্ঠপদকচ্ছন্নেনাতি অট্ঠপদকসঙ্খাতজূতফলকলেখাসণ্ঠানেন.

৩৬২. পাড়িযং নদীপাৰং গন্তুন্তি ভিক্খুনো নদীপাৰগমনং হোতীতি অত্থো. অগ্গড়গুত্তিযেৱ পমাণন্তি ইমেহি চতূহি নিক্খেপকাৰণেহি ঠপেন্তেনপি অগ্গড়গুত্তিৱিহাৰে এৱ ঠপেতুং ৱট্টতীতি অধিপ্পাযো. নিস্সীমাগতন্তি ৱস্সানসঙ্খাতং কালসীমং অতিক্কন্তং, তং ৱস্সিকসাটিকচীৱৰং ন হোতীতি অত্থো.

চীৱৰৰজনকথাদিৱণ্ণনা নিট্ঠিতা.

সঙ্ঘিকচীৱৰুপ্পাদকথাৱণ্ণনা

৩৬৩. পঞ্চ মাসেতি অচ্চন্তসংযোগে উপযোগৱচনং. ৱড্ঢিং পযোজেত্ৱা ঠপিতউপনিক্খেপতোতি ৱস্সাৱাসিকস্সত্থায দাযকেহি ৱড্ঢিং পযোজেত্ৱা ঠপিতউপনিক্খেপতো. ‘‘ইধ ৱস্সংৱুত্থসঙ্ঘস্সা’’তি ইদং অভিলাপমত্তং. ইধ-সদ্দং পন ৱিনা ‘‘ৱস্সংৱুত্থসঙ্ঘস্স দেমা’’তি ৱুত্তেপি সো এৱ নযো. অনত্থতকথিনস্সাপি পঞ্চ মাসে পাপুণাতীতি ৱস্সাৱাসিকলাভৱসেন উপ্পন্নত্তা অনত্থতকথিনস্সাপি ৱুত্থৱস্সস্স পঞ্চ মাসে পাপুণাতি. ৱক্খতি হি ‘‘চীৱৰমাসতো পট্ঠায যাৱ হেমন্তস্স পচ্ছিমো দিৱসো, তাৱ ৱস্সাৱাসিকং দেমাতি ৱুত্তে কথিনং অত্থতং ৱা হোতু অনত্থতং ৱা, অতীতৱস্সংৱুত্থানমেৱ পাপুণাতী’’তি (মহাৱ. অট্ঠ. ৩৭৯). ততো পৰন্তি পঞ্চমাসতো পৰং, গিম্হানস্স পঠমদিৱসতো পট্ঠাযাতি অত্থো. ‘‘কস্মা? পিট্ঠিসমযে উপ্পন্নত্তা’’তি ইদং ‘‘উদাহু অনাগতৱস্সে’’তি ইমস্সানন্তৰং দট্ঠব্বং. পোত্থকেসু পন ‘‘অনত্থতকথিনস্সাপি পঞ্চ মাসে পাপুণাতী’’তি ইমস্সানন্তৰং ‘‘কস্মা পিট্ঠিসমযে উপ্পন্নত্তা’’তি ইদং লিখন্তি, তং পমাদলিখিতং পিট্ঠিসমযে উপ্পন্নং সন্ধায ‘‘অনত্থতকথিনস্সাপী’’তি ৱত্তব্বতো. ৱুত্থৱস্সে হি সন্ধায ‘‘অনত্থতকথিনস্সাপী’’তি ৱুত্তং, ন চ পিট্ঠিসমযে উপ্পন্নং ৱুত্থৱস্সস্সেৱ পাপুণাতীতি সম্মুখীভূতানং সব্বেসম্পি পাপুণনতো. তেনেৱ ৱক্খতি ‘‘সচে পন গিম্হানং পঠমদিৱসতো পট্ঠায এৱং ৱদতি, তত্ৰ সম্মুখীভূতানং সব্বেসং পাপুণাতি. কস্মা? পিট্ঠিসমযে উপ্পন্নত্তা’’তি (মহাৱ. অট্ঠ. ১৭৯).

দুগ্গহিতানীতি অগ্গহিতানি. সঙ্ঘিকানেৱাতি অত্থো. ইতোৱাতি থেৰানং দাতব্বতোৱ, ইদানেৱাতি ৱা অত্থো.

সঙ্ঘিকচীৱৰুপ্পাদকথাৱণ্ণনা নিট্ঠিতা.

উপনন্দসক্যপুত্তৱত্থুকথাৱণ্ণনা

৩৬৪. ‘‘সত্তাহৱাৰেন অৰুণমেৱ উট্ঠাপেতী’’তি ইদং নানাসীমাৱিহাৰেসু কত্তব্বনযেন একস্মিম্পি ৱিহাৰে দ্ৱীসু সেনাসনেসু নিৱুত্থভাৱদস্সনত্থং ৱুত্তং, অৰুণুট্ঠাপনেনেৱ তত্থ ৱুত্থো হোতি, ন পন ৱস্সচ্ছেদপৰিহাৰায. অন্তোউপচাৰসীমাযপি যত্থ কত্থচি অৰুণং উট্ঠাপেন্তো অত্তনা গহিতসেনাসনং অপ্পৱিট্ঠোপি ৱুত্থৱস্সো এৱ হোতি, গহিতসেনাসনে পন নিৱুত্থো নাম ন হোতি, তত্থ চ অৰুণুট্ঠাপনে পন সতি হোতি. তেনাহ ‘‘পুৰিমস্মিং বহুতৰং নিৱসতি নামা’’তি, এতেন চ ইতৰস্মিং সত্তাহৱাৰেনাপি অৰুণুট্ঠাপনে সতি এৱ অপ্পকতৰং নিৱসতি নাম হোতি, নাসতীতি দীপিতং হোতি. নানালাভেহীতি ৱিসুং ৱিসুং নিবদ্ধৱস্সাৱাসিকলাভেহি. নানূপচাৰেহীতি নানাপৰিক্খেপনানাদ্ৱাৰেহি. একসীমাৱিহাৰেহীতি দ্ৱিন্নং ৱিহাৰানং একেন পাকাৰেন পৰিক্খিত্তত্তা একায উপচাৰসীমায অন্তোগতেহি দ্ৱীহি ৱিহাৰেহি. সেনাসনগ্গাহো পটিপ্পস্সম্ভতীতি পঠমং গহিতো পটিপ্পস্সম্ভতি. তত্থাতি যত্থ সেনাসনগ্গাহো পটিপ্পস্সদ্ধো, তত্থ.

উপনন্দসক্যপুত্তৱত্থুকথাৱণ্ণনা নিট্ঠিতা.

গিলানৱত্থুকথাৱণ্ণনা

৩৬৫-৬. ভূমিযং পৰিভণ্ডং অকাসীতি গিলানেন নিপন্নভূমিযং কিলিট্ঠট্ঠানং ধোৱিত্ৱা হৰিতূপলিত্তং কাৰেসীতি অত্থো. ভেসজ্জং যোজেতুং অসমত্থোতি পৰেহি ৱুত্তৱিধিম্পি কাতুং অসমত্থো. পাড়িযং গিলানুপট্ঠাকানং চীৱৰদানে সামণেৰানং তিচীৱৰাধিট্ঠানাভাৱা ‘‘চীৱৰঞ্চ পত্তঞ্চা’’তিআদি সব্বত্থ ৱুত্তং. সচেপি সহস্সং অগ্ঘতি, গিলানুপট্ঠাকানঞ্ঞেৱ দাতব্বন্তি সম্বন্ধো.

গিলানৱত্থুকথাৱণ্ণনা নিট্ঠিতা.

মতসন্তককথাদিৱণ্ণনা

৩৬৯. অঞ্ঞন্তি চীৱৰপত্ততো অঞ্ঞং. অপ্পগ্ঘন্তি অতিজিণ্ণাদিভাৱেন নিহীনং. ততোতি অৱসেসপৰিক্খাৰতো. সব্বন্তি পত্তং, তিচীৱৰঞ্চ.

তত্থ তত্থ সঙ্ঘস্সেৱাতি তস্মিং তস্মিং ৱিহাৰে সঙ্ঘস্সেৱ. পাড়িযং অৱিস্সজ্জিকং অৱেভঙ্গিকন্তি আগতানাগতস্স চাতুদ্দিসস্স সঙ্ঘস্সেৱ সন্তকং হুত্ৱা কস্সচি অৱিস্সজ্জিকং অৱেভঙ্গিকং ভৱিতুং অনুজানামীতি অত্থো.

৩৭১-২. অক্কনাড়মযন্তি অক্কদণ্ডমযং. অক্কদুস্সানীতি অক্কৱাকেন কতদুস্সানি, পোত্থকগতিকানি দুক্কটৱত্থুকানীতি অত্থো. দুপট্টচীৱৰস্স ৱা মজ্ঝেতি যং নিট্ঠিতে তিপট্টচীৱৰং হোতি, তস্স মজ্ঝে পটলং কত্ৱা দাতব্বানীতি অত্থো.

৩৭৪. ‘‘সন্তে পতিৰূপে গাহকে’’তি ৱুত্তত্তা গাহকে অসতি অদত্ৱা ভাজিতেপি সুভাজিতমেৱাতি দট্ঠব্বং.

৩৭৬. দক্খিণোদকং পমাণন্তি ‘‘এত্তকানি চীৱৰানি দস্সামী’’তি পঠমং উদকং পাতেত্ৱা পচ্ছা দেন্তি. তং যেহি গহিতং, তে ভাগিনোৱ হোন্তীতি অধিপ্পাযো. পৰসমুদ্দেতি জম্বুদীপে. তম্বপণ্ণিদীপঞ্হি উপাদাযেস এৱং ৱুত্তো.

মতসন্তককথাদিৱণ্ণনা নিট্ঠিতা.

অট্ঠচীৱৰমাতিকাকথাৱণ্ণনা

৩৭৯. পুগ্গলাধিট্ঠাননযেন ৱুত্তন্তি ‘‘সীমায দান’’ন্তিআদিনা ৱত্তব্বে ‘‘সীমায দেতী’’তিআদি পুগ্গলাধিট্ঠানেন ৱুত্তং. ‘‘অপিচা’’তিআদিনা পঠমলেড্ডুপাতভূতপৰিক্খেপাৰহট্ঠানতো বহি দুতিযলেড্ডুপাতোপি উপচাৰসীমা এৱাতি দস্সেতি. ধুৱসন্নিপাতট্ঠানাদিকম্পি পৰিযন্তে ঠিতমেৱ গহেতব্বং. লোকে গামসীমাদযো ৱিয লাভসীমা নাম ৱিসুং পসিদ্ধা নাম নত্থি, কেনাযং অনুঞ্ঞাতাতি আহ ‘‘নেৱ সম্মাসম্বুদ্ধেনা’’তিআদি. এতেন নাযং সাসনৱোহাৰসিদ্ধা, লোকৱোহাৰসিদ্ধা এৱাতি দস্সেতি. ‘‘জনপদপৰিচ্ছেদো’’তি ইদং লোকপসিদ্ধসীমাসদ্দত্থৱসেন ৱুত্তং. পৰিচ্ছেদব্ভন্তৰং পন সব্বং জনপদসীমাতি গহেতব্বং, জনপদো এৱ জনপদসীমা. এৱং ৰট্ঠসীমাদীসুপি. তেনাহ ‘‘আণাপৱত্তিট্ঠান’’ন্তিআদি.

পথৱীৱেমজ্ঝে গতস্সাতি যাৱ উদকপৰিযন্তা খণ্ডসীমত্তা ৱুত্তং, উপচাৰসীমাদীসু পন অবদ্ধসীমাসু হেট্ঠাপথৱিযং সব্বত্থ ঠিতানং ন পাপুণাতি, কূপাদিপৱেসাৰহট্ঠানে ঠিতানঞ্ঞেৱ পাপুণাতীতি হেট্ঠা সীমাকথাযং ৱুত্তনযেন তংতংসীমট্ঠভাৱো ৱেদিতব্বো. চক্কৱাড়সীমায পন দিন্নং পথৱীসন্ধাৰকউদকট্ঠানেপি ঠিতানং পাপুণাতি সব্বত্থ চক্কৱাড়ৱোহাৰত্তা.

বুদ্ধাধিৱুত্থোতি বুদ্ধেন ভগৱতা নিৱুত্থো. পাকৱট্টন্তি নিবদ্ধদানং. ৱত্ততীতি পৱত্ততি. তেহীতি যেসং সম্মুখে এস দেতি, তেহি ভিক্খূহি. দুতিযভাগে পন থেৰাসনং আৰুড়্হেতি যাৱ সঙ্ঘনৱকা একৱাৰং সব্বেসং ভাগং দত্ৱা চীৱৰে অপৰিক্খীণে পুন সব্বেসং দাতুং দুতিযভাগে থেৰস্স দিন্নেতি অত্থো. পংসুকূলিকানম্পি ৱট্টতীতি এত্থ ‘‘তুয্হং দেমা’’তি অৱুত্তত্তাতি কাৰণং ৱদন্তি. যদি এৱং ‘‘সঙ্ঘস্স দেমা’’তি ৱুত্তেপি ৱট্টেয্য, ‘‘ভিক্খূনং দেম, থেৰানং দেম, সঙ্ঘস্স দেমা’’তি (মহাৱ. অট্ঠ. ৩৭৯) ৱচনতো ভেদো ন দিস্সতি. ৱীমংসিতব্বমেত্থ কাৰণং.

পাৰুপিতুং ৱট্টতীতি পংসুকূলিকানং ৱট্টতি. ভিক্খুসঙ্ঘস্স চ ভিক্খুনীনঞ্চ দম্মীতি ৱুত্তে পন ন মজ্ঝে ভিন্দিত্ৱা দাতব্বন্তি এত্থ যস্মা ভিক্খুনিপক্খে সঙ্ঘস্স পচ্চেকং অপৰামট্ঠত্তা ভিক্খুনীনং গণনায ভাগো দাতব্বোতি দাযকস্স অধিপ্পাযোতি সিজ্ঝতি, তথা দানঞ্চ ভিক্খূপি গণেত্ৱা দিন্নে এৱ যুজ্জতি. ইতৰথা হি কিত্তকং ভিক্খূনং দাতব্বং, কিত্তকং ভিক্খুনীনন্তি ন ৱিঞ্ঞাযতি, তস্মা ‘‘ভিক্খুসঙ্ঘস্সা’’তি ৱুত্তৱচনম্পি ‘‘ভিক্খূন’’ন্তি ৱুত্তৱচনসদিসমেৱাতি আহ ‘‘ভিক্খূ চ ভিক্খুনিযো চ গণেত্ৱা দাতব্ব’’ন্তি. তেনাহ ‘‘পুগ্গলো …পে… ভিক্খুসঙ্ঘগ্গহণেন অগ্গহিতত্তা’’তি. ভিক্খুসঙ্ঘ-সদ্দেন ভিক্খূনঞ্ঞেৱ গহিতত্তা, পুগ্গলস্স পন ‘‘তুয্হঞ্চা’’তি ৱিসুং গহিতত্তা চ তত্থস্স অগ্গহিততা দট্ঠব্বা, ‘‘ভিক্খূনঞ্চ ভিক্খুনীনঞ্চ তুয্হঞ্চা’’তি ৱুত্তট্ঠানসদিসত্তাতি অধিপ্পাযো. পুগ্গলপ্পধানো হেত্থ সঙ্ঘ-সদ্দো দট্ঠব্বো. কেচি পন ‘‘ভিক্খুসঙ্ঘগ্গহণেন গহিতত্তা’’তি (সাৰত্থ. টী. মহাৱগ্গ ৩.৩৭৯) পাঠং লিখন্তি, তং ন সুন্দৰং তস্স ৱিসুং লাভগ্গহণে কাৰণৱচনত্তা. তথা হি ৱিসুং সঙ্ঘগ্গহণেন গহিতত্তাতি ৱিসুং পুগ্গলস্সপি ভাগগ্গহণে কাৰণং ৱুত্তং. যথা চেত্থ পুগ্গলস্স অগ্গহণং, এৱং উপৰি ‘‘ভিক্খুসঙ্ঘস্স চ তুয্হঞ্চা’’তিআদীসুপি সঙ্ঘাদি-সদ্দেহি পুগ্গলস্স অগ্গহণং দট্ঠব্বং. যদি হি গহণং সিযা, সঙ্ঘতোপি, ৱিসুম্পীতি ভাগদ্ৱযং লভেয্য উভযত্থ গহিতত্তা.

পূজেতব্বন্তিআদি গিহিকম্মং ন হোতীতি দস্সনত্থং ৱুত্তং. ‘‘ভিক্খুসঙ্ঘস্স হৰা’’তি ইদং পিণ্ডপাতহৰণং সন্ধায ৱুত্তং. তেনাহ ‘‘ভুঞ্জিতুং ৱট্টতী’’তি. ‘‘অন্তোহেমন্তে’’তি ইমিনা অনত্থতে কথিনে ৱস্সানং পচ্ছিমে মাসে দিন্নং পুৰিমৱস্সংৱুত্থানঞ্ঞেৱ পাপুণাতি, ততো পৰং হেমন্তে দিন্নং পচ্ছিমৱস্সংৱুত্থানম্পি ৱুত্থৱস্সত্তা পাপুণাতি. হেমন্ততো পন পৰং পিট্ঠিসমযে ‘‘ৱস্সংৱুত্থসঙ্ঘস্সা’’তি এৱং ৱত্ৱা দিন্নং অনন্তৰে ৱস্সে ৱা ততো পৰেসু ৱা যত্থ কত্থচি তস্মিং ৱুত্থৱস্সানং সব্বেসং পাপুণাতি. যে পন সব্বথা অৱুত্থৱস্সা, তেসং ন পাপুণাতীতি দস্সেতি. সব্বেসম্পীতি হি তস্মিং ভিক্খুভাৱে ৱুত্থৱস্সানং সব্বেসম্পীতি অত্থো দট্ঠব্বো. ‘‘ৱস্সংৱুত্থসঙ্ঘস্সা’’তি ৱুত্তত্তা সম্মুখীভূতানং সব্বেসন্তি এত্থাপি এসেৱ নযো. অতীতৱস্সন্তি অনন্তৰাতীতৱস্সং.

উদ্দেসং গহেতুং আগতোতি উদ্দেসে অগ্গহিতেপি অন্তেৱাসিকোৱাতি ৱুত্তং. গহেত্ৱা গচ্ছন্তোতি পৰিনিট্ঠিতউদ্দেসো হুত্ৱা গচ্ছন্তো. ‘‘ৱত্তং কত্ৱা উদ্দেসপৰিপুচ্ছাদীনি গহেত্ৱা ৱিচৰন্তান’’ন্তি ইদং ‘‘উদ্দেসন্তেৱাসিকান’’ন্তি ইমস্সেৱ ৱিসেসনং, তেন উদ্দেসকালে আগন্ত্ৱা উদ্দেসং গহেত্ৱা গন্ত্ৱা অঞ্ঞত্থ নিৱসন্তে অনিবদ্ধচাৰিকে নিৱত্তেতি.

অট্ঠচীৱৰমাতিকাকথাৱণ্ণনা নিট্ঠিতা.

চীৱৰক্খন্ধকৱণ্ণনানযো নিট্ঠিতো.