৭. কথিনক্খন্ধকো

কথিনানুজাননকথাৱণ্ণনা

৩০৬. কথিনক্খন্ধকে সীসৱসেনাতি পধানৱসেন. কথিনন্তি পঞ্চানিসংসে অন্তোকৰণসমত্থতায থিৰন্তি অত্থো. সো নেসং ভৱিস্সতীতি যুজ্জতীতি ‘‘সো তুম্হাক’’ন্তি অৱত্ৱা ‘‘নেস’’ন্তি ৱচনং যুজ্জতি. যে অত্থতকথিনাতি ন কেৱলং তুম্হাকমেৱ, যে অঞ্ঞেপি অত্থতকথিনা, তেসং ভৱিস্সতীতি অত্থো. অথ ৱা ৱোতি তদা সম্মুখীভূতেহি সদ্ধিং অসম্মুখীভূতে চ অনাগতে চ ভিক্খূ সব্বে একতো সম্পিণ্ডেত্ৱা ৱুত্তং, তুম্হাকন্তি অত্থো. সো নেসন্তি এত্থ সো তেসন্তি যোজেতব্বং. তেনাহ ‘‘অত্থতকথিনানং ৱো, ভিক্খৱে, ইমানি পঞ্চ কপ্পিস্সন্তী’’তি. মতকচীৱৰন্তি মতস্স চীৱৰং. ‘‘ৱুত্থৱস্সৱসেনা’’তি ইদং পচ্ছিমৱস্সংৱুত্থানম্পি সাধাৰণন্তি আহ ‘‘পুৰিমিকায ৱস্সং উপগন্ত্ৱা পঠমপৱাৰণায পৱাৰিতা লভন্তী’’তি. উপগতা ৱা ন লভন্তীতি পচ্ছিমিকায ৱুত্থৱস্সেপি সন্ধায ৱুত্তং.

খলিমক্খিতসাটকোতি অহতৱত্থং সন্ধায ৱুত্তং. ‘‘অকাতুং ন লব্ভতী’’তি ইমিনা অনাদৰিযে সতি দুক্কটন্তি দীপেতি.

‘‘অপলোকেত্ৱা’’তি ইদং অঞ্ঞেসং ৱস্সংৱুত্থভিক্খূনং অদত্ৱা দাতুকামেহি কত্তব্বৱিধিদস্সনং. যদি এৱং কম্মৱাচায এৱ দানং অৱুত্তন্তি আহ ‘‘কম্মৱাচা পনা’’তিআদি. কথিনচীৱৰং ৱিয কম্মৱাচায দাতুং ন ৱট্টতীতি অপলোকেত্ৱাৱ দাতব্বন্তি অধিপ্পাযো.

৩০৮. মহাভূমিকন্তি মহাৱিসযং, চতুৱীসতিআকাৰৱন্ততায মহাৱিত্থাৰিকন্তি ৱুত্তং হোতি. পঞ্চকন্তি পঞ্চখণ্ডং. এসেৱ নযো সেসেসুপি. পঠমচিমিলিকাতি কথিনৱত্থতো অঞ্ঞা অত্তনো পকতিচিমিলিকা. কুচ্ছিচিমিলিকং কত্ৱা সিব্বিতমত্তেনাতি থিৰজিণ্ণানং চিমিলিকানং একতো কত্ৱা সিব্বনস্সেতং অধিৱচনন্তি ৱদন্তি. মহাপচ্চৰিযং, কুৰুন্দিযঞ্চ ৱুত্তৱচনন্তি দস্সনং, ব্যঞ্জনতো এৱ ভেদো, ন অত্থতোতি দস্সনত্থং কতন্তিপি ৱদন্তি. পিট্ঠিঅনুৱাতাৰোপনমত্তেনাতি দীঘতো অনুৱাতস্স আৰোপনমত্তেন. কুচ্ছিঅনুৱাতাৰোপনমত্তেনাতি পুথুলতো অনুৱাতস্স আৰোপনমত্তেন. ৰত্তিনিস্সগ্গিযেনাতি ৰত্তিঅতিক্কন্তেন.

৩০৯. হতৱত্থকসাটকেনাতি অতিজিণ্ণসাটকো. ন হি তেনাতিআদীসু তেন পৰিৱাৰাগতপাঠেন ইধ আনেত্ৱা অৱুচ্চমানেন কথিনত্থাৰকস্স জানিতব্বেসু ন কিঞ্চি পৰিহাযতি, তস্স সব্বস্স ইধেৱ ৱুত্তত্তাতি অধিপ্পাযো.

৩১০. মাতা ৱিযাতি মাতিকা, ইৱত্থে ক-পচ্চযো দট্ঠব্বো. তেন সিদ্ধমত্থং দস্সেন্তো আহ ‘‘মাতিকাতি মাতৰো’’তিআদি. অস্সাতি এতিস্সা মাতিকায. পক্কমনন্তিকো কথিনুব্ভাৰো এৱ হি সযং অত্তনো উপ্পজ্জতীতি এৱমভেদূপচাৰেন ‘‘মাতিকা’’তি ৱুত্তো উব্ভাৰস্সেৱ পক্কমনন্তে সমুপ্পত্তিতো, তব্বিনিমুত্তায চ মাতিকায অভাৱা, তপ্পকাসিকাপি চেত্থ পাড়ি ‘‘মাতিকা’’তি ৱত্তুং যুজ্জতি. সাপি হি পক্কমনন্তিকুব্ভাৰপ্পকাসনেন ‘‘পক্কমনন্তিকা’’তি ৱুত্তা. এসেৱ নযো সেসুব্ভাৰেসুপি. পক্কমনন্তি চেত্থ উপচাৰসীমাতিক্কমনং দট্ঠব্বং.

কথিনানুজাননকথাৱণ্ণনা নিট্ঠিতা.

আদাযসত্তককথাৱণ্ণনা

৩১১. ‘‘ন পুন আগমিস্স’’ন্তি ইদং আৱাসপলিবোধুপচ্ছেদকাৰণদস্সনং. পঞ্চসু হি চীৱৰমাসেসু যদা কদাচি ন পচ্চেস্সন্তি চিত্তেন উপচাৰসীমাতিক্কমেন আৱাসপলিবোধো ছিজ্জতি. পচ্চেস্সন্তি বহিউপচাৰগতস্স পন যত্থ কত্থচি ন পচ্চেস্সন্তি চিত্তে উপ্পন্নমত্তে ছিজ্জতি. পঠমং চীৱৰপলিবোধো ছিজ্জতীতি ন পচ্চেস্সন্তি পক্কমনতো পুৰেতৰমেৱ চীৱৰস্স নিট্ঠিতত্তা ৱুত্তং. ‘‘কতচীৱৰমাদাযা’’তি হি ৱুত্তং. অত্থতকথিনস্স হি ভিক্খুনো যাৱ ‘‘সঙ্ঘতো ৱা দাযককুলাদিতো ৱা চীৱৰং লভিস্সামী’’তি চীৱৰাসা ৱা লদ্ধৱত্থানং সহাযসম্পদাদিযোগং লভিত্ৱা সঙ্ঘাটিআদিভাৱেন ‘‘ছিন্দিত্ৱা কৰিস্সামী’’তি কৰণিচ্ছা ৱা পৱত্ততি, তাৱ চীৱৰপলিবোধো অনুপচ্ছিন্নো এৱ. যদা পন যথাপত্থিতট্ঠানতো চীৱৰাদীনং সব্বথা অলাভেন ৱা চীৱৰাসা চেৱ লদ্ধানং কত্ৱা নিট্ঠানেন ৱা নট্ঠৱিনট্ঠাদিভাৱেন ৱা চীৱৰে নিৰপেক্খতায ৱা কৰণিচ্ছা চ ৱিগচ্ছতি, তদা চীৱৰপলিবোধো উপচ্ছিন্নো হোতি.

সো চ ইধ ‘‘কতচীৱৰং আদাযা’’তি ৱচনেন পকাসিতো. এৱং উপৰি সব্বত্থ পাড়িৱচনক্কমং নিস্সায নেসং পঠমং, পচ্ছা চ উপচ্ছিজ্জনং ৱুত্তন্তি দট্ঠব্বং. সব্বথাপি চ ইমেসং উভিন্নং পলিবোধানং উপচ্ছেদেনেৱ কথিনুব্ভাৰো, ন একস্স. তেসঞ্চ পুব্বাপৰিযেন, একক্খণে চ উপচ্ছিজ্জনং দস্সেতুং ইমা অট্ঠ মাতিকা ঠপিতাতি ৱেদিতব্বা. অন্তোসীমাযন্তি চীৱৰনিট্ঠানক্খণেযেৱ ছিন্নত্তা ৱুত্তং. নেৱিমং চীৱৰং কাৰেস্সন্তি চীৱৰে অপেক্খায ৱিগতত্তা কৰণপলিবোধস্সাপি উপচ্ছিন্নতং দস্সেতি. যো পন অপ্পিচ্ছতায ৱা অনত্থিকতায ৱা সব্বথা চীৱৰং ন সম্পটিচ্ছতি, তস্স বহিসীমাগতস্স সব্বথাপি চীৱৰপলিবোধাভাৱেন ন পচ্চেস্সন্তি সন্নিট্ঠানমত্তেন সন্নিট্ঠানন্তিকো কথিনুব্ভাৰো ৱেদিতব্বো. সো পনাতি পলিবোধুপচ্ছেদো. অযং পনাতি আসাৱচ্ছেদকো কথিনুব্ভাৰো ৱিসুং ৱিত্থাৰেত্ৱা ৱুত্তো, ইধ ন ৱুত্তোতি সম্বন্ধো.

অনাসায লভতীতি ‘‘যস্মিং কুলে চীৱৰং লভিস্সামা’’তি আসা অনুপ্পন্নপুব্বা, তত্থ চীৱৰাসায অনুপ্পন্নট্ঠানে যত্থ কত্থচি লভতীতি অত্থো. আসায ন লভতীতি আসীসিতট্ঠানে ন লভতীতি অত্থো. ইধ ন ৱুত্তোতি ইধ সৱনন্তিকানন্তৰে ন ৱুত্তো. তত্থাতি তস্মিং সীমাতিক্কন্তিকে. সীমাতিক্কন্তিকো নাম চীৱৰমাসানং পৰিযন্তদিৱসসঙ্খাতায সীমায অতিক্কমনতো সঞ্জাতো. কেচি ‘‘বহিসীমায কালাতিক্কমো সীমাতিক্কমো’’তি মঞ্ঞন্তি, তেসং অন্তোউপচাৰে চীৱৰকালাতিক্কমেপি কথিনুব্ভাৰো অসম্মতো নাম সিযাতি ন চেতং যুত্তং. তস্মা যত্থ কত্থচি কালাতিক্কমো সীমাতিক্কমোতি ৱেদিতব্বো. এত্থ চ পাড়িযং ‘‘কতচীৱৰো’’তি ইদং উপলক্খণমত্তং, অকতচীৱৰস্সপি কালাতিক্কমেন সীমাতিক্কন্তিকো হোতি, দ্ৱে চ পলিবোধা একতো ছিজ্জন্তি. এৱং অঞ্ঞত্থাপি যথাসম্ভৱং তংতং ৱিসেসনাভাৱেপি কথিনুব্ভাৰতা, পলিবোধুপচ্ছেদপ্পকাৰো চ ৱেদিতব্বো. ‘‘সহুব্ভাৰে দ্ৱেপি পলিবোধা অপুব্বং অচৰিমং ছিজ্জন্তী’’তি ইদং অকতচীৱৰস্স পচ্চেস্সন্তি অধিট্ঠানসম্ভৱপক্খং সন্ধায ৱুত্তং, তেসু অঞ্ঞতৰাভাৱেপি সহুব্ভাৰোৱ হোতি.

৩১২-৩২৫. সমাদাযৱাৰো আদাযৱাৰসদিসোৱ. উপসগ্গমেৱেত্থ ৱিসেসো. তেনাহ ‘‘পুন সমাদাযৱাৰেপি…পে… তেযেৱ দস্সিতা’’তি. ৱিপ্পকতচীৱৰে পক্কমনন্তিকস্স অভাৱতো ‘‘যথাসম্ভৱ’’ন্তি ৱুত্তং. তেনেৱ ৱিপ্পকতচীৱৰৱাৰে ছড়েৱ উব্ভাৰা ৱুত্তা, চীৱৰে হত্থগতে চ আসাৱচ্ছেদিকস্স অসম্ভৱা, সো এতেসু ৱাৰেসু যত্থ কত্থচি ন ৱুত্তো, ৱিসুঞ্ঞেৱ ৱুত্তো. ৱিপ্পকতৱাৰে চেত্থ আদাযৱাৰসমাদাযৱাৰৱসেন দ্ৱে ছক্কৱাৰা ৱুত্তা.

ততো পৰং নিট্ঠানসন্নিট্ঠাননাসনন্তিকানং ৱসেন তীণি তিকানি দস্সিতানি. তত্থ ততিযত্তিকে অনধিট্ঠিতেনাতি ‘‘পচ্চেস্সং, ন পচ্চেস্স’’ন্তি এৱং অনধিট্ঠিতেন, ন এৱং মনসিকত্ৱাতি অত্থো. ততিযত্তিকতো পন পৰং একং ছক্কং দস্সিতং. এৱং তীণি তিকানি, একং ছক্কঞ্চাতি পঠমং পন্নৰসকং ৱুত্তং, ইমিনা নযেন দুতিযপন্নৰসকাদীনি ৱেদিতব্বানি.

পাড়িযং আসাদ্ৱাদসকে বহিসীমাগতস্স কথিনুদ্ধাৰেসু তেসম্পি চীৱৰাসাদিৱসেন চীৱৰপলিবোধো যাৱ চীৱৰনিট্ঠানা তিট্ঠতীতি আহ ‘‘সো বহিসীমাগতো সুণাতি ‘উব্ভতং কিৰ তস্মিং আৱাসে কথিনন্তি…পে… সৱনন্তিকো কথিনুদ্ধাৰো’’’তি. এত্থ চ সৱনক্খণে আৱাসপলিবোধো পঠমং ছিজ্জতি, নিট্ঠিতে চীৱৰপলিবোধোতি ৱেদিতব্বো.

দিসংগমিকনৱকে দিসংগমিকো পক্কমতীতি ন পচ্চেস্সন্তি পক্কমতি, ইমিনা আৱাসপলিবোধাভাৱো দস্সিতো হোতি. তেনেৱ ৱস্সংৱুত্থাৱাসে পুন গন্ত্ৱা চীৱৰনিট্ঠাপিতমত্তে নিট্ঠানন্তিকো কথিনুদ্ধাৰো ৱুত্তো. ‘‘চীৱৰপটিৱিসং অপৱিলাযমানো’’তি ইমিনা চীৱৰপলিবোধসমঙ্গিকত্তমস্স দস্সেতি, অপৱিলাযমানোতি আকঙ্খমানো. সেসং সুৱিঞ্ঞেয্যমেৱ.

আদাযসত্তককথাৱণ্ণনা নিট্ঠিতা.

কথিনক্খন্ধকৱণ্ণনানযো নিট্ঠিতো.