৪. পৱাৰণাক্খন্ধকো

অফাসুৱিহাৰকথাদিৱণ্ণনা

২০৯. পৱাৰণাক্খন্ধকে পাড়িযং পিণ্ডায পটিক্কমেয্যাতি পিণ্ডায চৰিত্ৱা পটিক্কমেয্য. অৱক্কাৰপাতিন্তি অতিৰেকপিণ্ডপাতঠপনকং একং ভাজনং. অৱিসয্হন্তি উক্খিপিতুং অসক্কুণেয্যং. ৱিলঙ্ঘনং উক্খিপনং ৱিলঙ্ঘো, সো এৱ ৱিলঙ্ঘকো, হত্থেহি ৱিলঙ্ঘকো হত্থৱিলঙ্ঘকোতি আহ ‘‘হত্থুক্খেপকেনা’’তি. অথ ৱা ৱিলঙ্ঘকেন উক্খেপকেন হত্থেনাতিপি অত্থো, অঞ্ঞমঞ্ঞং সংসিব্বিতহত্থেহীতি ৱুত্তং হোতি.

২১৩. সচে পন ৱুড্ঢতৰো হোতীতি পৱাৰণাদাযকো ভিক্খু ৱুড্ঢতৰো হোতি. এৱঞ্হি তেন তস্সত্থায পৱাৰিতং হোতীতি এত্থ এৱং তেন অপ্পৱাৰিতোপি তস্স সঙ্ঘপ্পত্তিমত্তেন সঙ্ঘপৱাৰণাকম্মং সমগ্গকম্মমেৱ হোতীতি দট্ঠব্বং. তেন চ ভিক্খুনাতি পৱাৰণাদাযকেন ভিক্খুনা.

২৩৪. বহূপি সমানৱস্সা একতো পৱাৰেতুং লভন্তীতি একস্মিং সংৱচ্ছৰে লদ্ধূপসম্পদতায সমানুপসম্পন্নৱস্সা সব্বে একতো পৱাৰেতুং লভন্তীতি অত্থো.

২৩৭. পাড়িযং মিচ্ছাদিট্ঠীতি ‘‘নত্থি দিন্ন’’ন্তিআদি (দী. নি. ১.১৭১; ম. নি. ১.৪৪৫; ২.৯৪, ৯৫, ২২৫; ৩.৯১, ১১৬, ১৩৬; সং. নি. ৩.২১০; ধ. স. ১২২১) নযপ্পৱত্তা. অন্তগ্গাহিকাতি সস্সতুচ্ছেদসঙ্খাতস্স অন্তস্স গাহিকা. যং খো ত্ৱন্তিআদীসু যং পৱাৰণং ঠপেসি, তং দিট্ঠেন ঠপেসীতি তং-সদ্দং অজ্ঝাহৰিত্ৱা যোজেতব্বং.

২৩৯. ৱত্থুং পকাসেন্তোতি পুগ্গলে পৰিসঙ্কুপ্পত্তিযা নিমিত্তভূতং ৱত্থুমত্তংযেৱ সন্ধায ৱুত্তং. যং পন ৱত্থুং সন্ধায ‘‘পুগ্গলো পঞ্ঞাযতি, ন ৱত্থূ’’তি আহ, ন তং সন্ধাযেতং ৱুত্তং. যদি পন তস্স ভিক্খুনো ৱসনট্ঠানে পোক্খৰণিতো মচ্ছগ্গহণাদি দিস্সেয্য, তদা ‘‘ৱত্থু চ পুগ্গলো চ পঞ্ঞাযতী’’তি ৱত্তব্বং ভৱেয্য. তেনাহ ‘‘পুৰিমনযেনেৱ চোৰেহী’’তিআদি. ভিক্খুনো সৰীৰে মালাগন্ধঞ্চ অৰিট্ঠগন্ধঞ্চ দিস্ৱা এৱং ‘‘ৱত্থু চ পুগ্গলো চ পঞ্ঞাযতী’’তি ৱুত্তন্তি ৱেদিতব্বং.

অফাসুৱিহাৰকথাদিৱণ্ণনা নিট্ঠিতা.

ভণ্ডনকাৰকৱত্থুকথাৱণ্ণনা

২৪০. দ্ৱে চাতুদ্দসিকা হোন্তীতি ততিযপক্খে চাতুদ্দসিযা সদ্ধিং দ্ৱে চাতুদ্দসিকা হোন্তি. ‘‘ভণ্ডনকাৰকানং তেৰসে ৱা চাতুদ্দসে ৱা ইমে পন্নৰসীপৱাৰণং পৱাৰেস্সন্তী’’তি ইমিনা যথাসকং উপোসথকৰণদিৱসতো পট্ঠায ভিক্খূনং চাতুদ্দসীপন্নৰসীৱোহাৰো, ন চন্দগতিসিদ্ধিযা তিথিযা ৱসেনাতি দস্সেতি. কিঞ্চাপি এৱং ‘‘অনুজানামি, ভিক্খৱে, ৰাজূনং অনুৱত্তিতু’’ন্তি (মহাৱ. ১৮৬) ৱচনতো পনেত্থ লোকিযানং তিথিং অনুৱত্তন্তেহিপি অত্তনো উপোসথক্কমেন চাতুদ্দসিং পন্নৰসিং ৱা, পন্নৰসিং চাতুদ্দসিং ৱা কৰোন্তেহেৱ অনুৱত্তিতব্বং, ন পন সোড়সমদিৱসং ৱা তেৰসমদিৱসং ৱা উপোসথদিৱসং কৰোন্তেহি. তেনেৱ পাড়িযম্পি ‘‘দ্ৱে তযো উপোসথে চাতুদ্দসিকে কাতু’’ন্তি ৱুত্তং. অঞ্ঞথা দ্ৱাদসিযং, তেৰসিযং ৱা উপোসথো কাতব্বোতি ৱত্তব্বতো. ‘‘সকিং পক্খস্স চাতুদ্দসে, পন্নৰসে ৱা’’তিআদিৱচনম্পি উপৱুত্থক্কমেনেৱ ৱুত্তং, ন তিথিক্কমেনাতি গহেতব্বং.

ভণ্ডনকাৰকৱত্থুকথাৱণ্ণনা নিট্ঠিতা.

পৱাৰণাসঙ্গহকথাৱণ্ণনা

২৪১. ‘‘পৱাৰেত্ৱা পন অন্তৰাপি চাৰিকং পক্কমিতুং লভন্তী’’তি ইমিনা পৱাৰণাসঙ্গহে কতে অন্তৰা পক্কমিতুকামা সঙ্ঘং সন্নিপাতাপেত্ৱা পৱাৰেতুং লভন্তীতি দস্সেতি.

পৱাৰণাসঙ্গহকথাৱণ্ণনা নিট্ঠিতা.

পৱাৰণাক্খন্ধকৱণ্ণনানযো নিট্ঠিতো.