৩. ৱস্সূপনাযিকক্খন্ধকো

ৱস্সূপনাযিকঅনুজাননকথাদিৱণ্ণনা

১৮৪. ৱস্সূপনাযিকক্খন্ধকে অপৰস্মিং দিৱসেতি দুতিযে পাটিপদদিৱসে.

১৮৫. অঞ্ঞত্থ অৰুণং উট্ঠাপনেন ৱাতি সাপেক্খস্স অকৰণীযেন গন্ত্ৱা অঞ্ঞত্থ অৰুণং উট্ঠাপনেন ৱা. পৰিহানীতি গুণপৰিহানি.

১৮৭. পাড়িযং সত্তাহং সন্নিৱত্তো কাতব্বোতি সকলং সত্তাহং বহি এৱ অৱীতিনামেত্ৱা সত্তাহপৰিযোসানভূতং অৰুণুট্ঠানকালং পুন ৱিহাৰেৱ সম্বন্ধৱসেন সত্তাহং ৱিহাৰে সন্নিৱত্তং কাতব্বং. সত্তাহপৰিযোসানকালো হি ইধ সত্তাহ-সদ্দেন ৱুত্তো, তদপেক্খায চ ‘‘সন্নিৱত্তো’’তি পুল্লিঙ্গেন ৱুত্তং. তীণি পৰিহীনানীতি ভিক্খুনীনং ৱচ্চকুটিআদীনং পটিক্খিত্তত্তা পৰিহীনানি.

১৮৯. ন পলুজ্জতীতি অঞ্ঞেসং অপ্পগুণত্তা, মম চ মৰণেন ন ৱিনস্সতি.

ৱস্সূপনাযিকঅনুজাননকথাদিৱণ্ণনা নিট্ঠিতা.

পহিতেযেৱঅনুজাননকথাৱণ্ণনা

১৯৯. ভিক্খূহি সদ্ধিং ৱসনকপুৰিসোতি অনঞ্ঞগতিকোতি দস্সেতি. গন্তব্বন্তি সঙ্ঘকৰণীযেন অপ্পহিতেপি গন্তব্বং. এত্থ চ অনুপাসকেহিপি সাসনভাৱং ঞাতুকামেহি পহিতে তেসং পসাদৱড্ঢিং সম্পস্সন্তেহিপি সত্তাহকৰণীযেন গন্তুং ৱট্টতীতি গহেতব্বং.

ৰত্তিচ্ছেদৱিনিচ্ছযোতি সত্তাহকৰণীযেন গন্ত্ৱা বহিদ্ধা অৰুণুট্ঠাপনসঙ্খাতস্স ৰত্তিচ্ছেদস্স ৱিনিচ্ছযো. গন্তুং ৱট্টতীতি অন্তোউপচাৰসীমাযং ঠিতেনেৱ সত্তাহকৰণীযনিমিত্তং সল্লক্খেত্ৱা ইমিনা নিমিত্তেন গন্ত্ৱা ‘‘অন্তোসত্তাহে আগচ্ছিস্সামী’’তি আভোগং কত্ৱা গন্তুং ৱট্টতি. পুৰিমক্খণে আভোগং কত্ৱা গমনক্খণে ৱিস্সৰিত্ৱা গতেপি দোসো নত্থি ‘‘সকৰণীযো পক্কমতী’’তি (মহাৱ. ২০৭) ৱুত্তত্তা. সব্বথা পন আভোগং অকত্ৱা গতস্স ৱস্সচ্ছেদোতি ৱদন্তি. যো পন সত্তাহকৰণীযনিমিত্তাভাৱেপি ‘‘সত্তাহব্ভন্তৰে আগমিস্সামী’’তি আভোগং কত্ৱা গন্ত্ৱা সত্তাহব্ভন্তৰে আগচ্ছতি, তস্স আপত্তিযেৱ, ৱস্সচ্ছেদো নত্থি সত্তাহস্স সন্নিৱত্তত্তাতি ৱদন্তি. ৱীমংসিত্ৱা গহেতব্বং. ভণ্ডকন্তি চীৱৰভণ্ডং. সম্পাপুণিতুং ন সক্কোতি, ৱট্টতীতি তদহেৱ আগমনে সউস্সাহত্তা ৱস্সচ্ছেদো ৱা আপত্তি ৱা ন হোতীতি অধিপ্পাযো. আচৰিযন্তি অগিলানম্পি নিস্সযাচৰিযঞ্চ ধম্মাচৰিযঞ্চ, পগেৱ উপসম্পদাচৰিযউপজ্ঝাযেসু. ৱদতি, ৱট্টতীতি সত্তাহাতিক্কমে আপত্তিঅভাৱং সন্ধায ৱুত্তং, ৱস্সচ্ছেদো পন হোতি এৱ.

পহিতেযেৱঅনুজাননকথাৱণ্ণনা নিট্ঠিতা.

অন্তৰাযেঅনাপত্তিৱস্সচ্ছেদকথাৱণ্ণনা

২০০. পাড়িযং গণ্হিংসূতি গহেত্ৱা খাদিংসু. পৰিপাতিংসূতি পলাপেসুং, অনুবন্ধিংসূতি অত্থো.

২০১. সত্তাহৱাৰেন অৰুণো উট্ঠাপেতব্বোতি এত্থ ছদিৱসানি বহিদ্ধা ৱীতিনামেত্ৱা সত্তমে দিৱসে পুৰাৰুণা এৱ অন্তোউপচাৰসীমায পৱিসিত্ৱা অৰুণং উট্ঠাপেত্ৱা পুনদিৱসে সত্তাহং অধিট্ঠায গন্তব্বন্তি অধিপ্পাযো. কেচি পন ‘‘সত্তমে দিৱসে আগন্ত্ৱা অৰুণং অনুট্ঠাপেত্ৱা তদহেৱ দিৱসভাগেপি গন্তুং ৱট্টতী’’তি ৱদন্তি, তং ন গহেতব্বং ‘‘অৰুণো উট্ঠাপেতব্বো’’তি ৱুত্তত্তা. সত্তমে দিৱসে তত্থ অৰুণুট্ঠাপনমেৱ হি সন্ধায পাড়িযম্পি ‘‘সত্তাহং সন্নিৱত্তো কাতব্বো’’তি ৱুত্তং. অৰুণং অনুট্ঠাপেত্ৱা গচ্ছন্তো অন্তো অপ্পৱিসিত্ৱা বহিদ্ধাৱ সত্তাহং ৱীতিনামেন্তেন সমুচ্ছিন্নৱস্সো এৱ ভৱিস্সতি অৰুণস্স বহি এৱ উট্ঠাপিতত্তা. ইতৰথা ‘‘অৰুণো উট্ঠাপেতব্বো’’তি ৱচনং নিৰত্থকং সিযা ‘‘সত্তাহৱাৰেন অন্তোৱিহাৰে পৱিসিত্ৱা অৰুণং অনুট্ঠাপেত্ৱাপি গন্তব্ব’’ন্তি ৱত্তব্বতো. অঞ্ঞেসু চ ঠানেসু অৰুণুট্ঠাপনমেৱ ৱুচ্চতি. ৱক্খতি হি চীৱৰক্খন্ধকে ‘‘একস্মিং ৱিহাৰে ৱসন্তো ইতৰস্মিং সত্তাহৱাৰেন অৰুণমেৱ উট্ঠাপেতী’’তি (মহাৱ. অট্ঠ. ৩৬৪).

অথাপি যং তে ৱদেয্যুং ‘‘সত্তমে দিৱসে যদা কদাচি পৱিট্ঠেন তংদিৱসনিস্সিতো অতীতঅৰুণো উট্ঠাপিতো নাম হোতীতি ইমমত্থং সন্ধায অট্ঠকথাযং ৱুত্ত’’ন্তি, তং সদ্দগতিযাপি ন সমেতি. ন হি উট্ঠিতে অৰুণে পচ্ছা পৱিট্ঠো তস্স পযোজকো উট্ঠাপকো ভৱিতুমৰহতি. যদি ভৱেয্য, ৱস্সং উপগন্ত্ৱা পনস্স অৰুণং অনুট্ঠাপেত্ৱা তদহেৱ সত্তাহকৰণীযেন পক্কন্তস্সাপীতি এত্থ ‘‘অৰুণং অনুট্ঠাপেত্ৱা’’তি ৱচনং ৱিৰুজ্ঝেয্য, তেনপি তংদিৱসসন্নিস্সিতস্স অৰুণস্স উট্ঠাপিতত্তা. আৰঞ্ঞকস্সাপি হি ভিক্খুনো সাযন্হসমযে অঙ্গযুত্তং অৰঞ্ঞট্ঠানং গন্ত্ৱা তদা এৱ নিৱত্তন্তস্স অৰুণো উট্ঠাপিতো ধুতঙ্গঞ্চ ৱিসোধিতং সিযা, ন চেতং যুত্তং অৰুণুগ্গমনকালে এৱ অৰুণুট্ঠাপনস্স ৱুত্তত্তা. ৱুত্তঞ্হি ‘‘কালস্সেৱ পন নিক্খমিত্ৱা অঙ্গযুত্তে ঠানে অৰুণং উট্ঠাপেতব্বং. সচে অৰুণুট্ঠানৱেলাযং তেসং আবাধো ৱড্ঢতি, তেসং এৱ কিচ্চং কাতব্বং, ন ধুতঙ্গৱিসুদ্ধিকেন ভৱিতব্ব’’ন্তি (ৱিসুদ্ধি. ১.৩১). তথা পাৰিৱাসিকাদীনম্পি অৰুণং অনুট্ঠাপেত্ৱা ৱত্তং নিক্খিপন্তানং ৰত্তিচ্ছেদো ৱুত্তো. ‘‘উগ্গতে অৰুণে নিক্খিপিতব্ব’’ন্তি (চূড়ৱ. ৯৭) হি ৱুত্তং. সহসেয্যসিক্খাপদেপি অনুপসম্পন্নেহি সহ নিৱুত্থভাৱপৰিমোচনত্থং ‘‘পুৰাৰুণা নিক্খমিত্ৱা’’তিআদি ৱুত্তং. এৱং চীৱৰৱিপ্পৱাসাদীসু চ সব্বত্থ ৰত্তিপৰিযোসানে আগামিঅৰুণৱসেনেৱ অৰুণুট্ঠাপনং দস্সিতং, ন অতীতাৰুণৱসেন. তস্মা ৱুত্তনযেনেৱেত্থ অৰুণুট্ঠাপনং ৱেদিতব্বং অঞ্ঞথা ৱস্সচ্ছেদত্তা.

যং পন ৱস্সং উপগতস্স তদহেৱ অৰুণং অনুট্ঠাপেত্ৱা সকৰণীযস্স পক্কমনৱচনং, তং ৱস্সং উপগতকালতো পট্ঠায যদা কদাচি নিমিত্তে সতি গমনস্স অনুঞ্ঞাতত্তা যুত্তং, ন পন সত্তাহৱাৰেন গতস্স অৰুণং অনুট্ঠাপেত্ৱা তদহেৱ গমনং ‘‘অৰুণো উট্ঠাপেতব্বো’’তি ৱুত্তত্তা এৱ. যথা ৱা ‘‘সত্তাহং অনাগতায পৱাৰণায সকৰণীযো পক্কমতি, আগচ্ছেয্য ৱা সো, ভিক্খৱে, ভিক্খু তং আৱাসং, ন ৱা আগচ্ছেয্যা’’তিআদিনা (মহাৱ. ২০৭) পচ্ছিমসত্তাহে অনাগমনে অনুঞ্ঞাতেপি অঞ্ঞসত্তাহেসু ন ৱট্টতি. এৱং পঠমসত্তাহে অৰুণং অনুট্ঠাপেত্ৱা গমনে অনুঞ্ঞাতেপি ততো পৰেসু সত্তাহেসু আগতস্স অৰুণং অনুট্ঠাপেত্ৱা গমনং ন ৱট্টতীতি নিট্ঠমেত্থ গন্তব্বং. ইধ আহটন্তি ৱিহাৰতো বহি আগতট্ঠানে আনীতং.

অন্তৰাযেঅনাপত্তিৱস্সচ্ছেদকথাৱণ্ণনা নিট্ঠিতা.

ৱজাদীসু ৱস্সূপগমনকথাৱণ্ণনা

২০৩. উপগন্তুং ৬৮ ন ৱট্টতীতি কুটিকাদীনং অভাৱেন ‘‘ইধ ৱস্সং উপেমী’’তি এৱং ৱচীভেদং কত্ৱা উপগন্তুং ন ৱট্টতি.

২০৪. পাড়িযং পিসাচিল্লিকাতি পিসাচদাৰকা. পৱিসনদ্ৱাৰং যোজেত্ৱাতি সকৱাটদ্ৱাৰং কত্ৱা. ৰুক্খং ছিন্দিত্ৱাতি সুসিৰট্ঠানস্স উপৰিভাগং ছিন্দিত্ৱা. খাণুমত্থকেতি সুসিৰখাণুমত্থকে. টঙ্কিতমঞ্চো নাম দীঘে মঞ্চপাদে ৱিজ্ঝিত্ৱা অটনিযো পৱেসেত্ৱা কতো, সো হেট্ঠুপৰিযৱসেন পঞ্ঞত্তোপি পুৰিমসদিসোৱ হোতি, তং সুসানে, দেৱতাঠানে চ ঠপেন্তি. চতুন্নং পাসাণানং উপৰি পাসাণফলকে অত্থৰিত্ৱা কতগেহম্পি ‘‘টঙ্কিতমঞ্চো’’তি ৱুচ্চতি.

ৱজাদীসুৱস্সূপগমনকথাৱণ্ণনা নিট্ঠিতা.

অধম্মিককতিকাদিকথাৱণ্ণনা

২০৫. মহাৱিভঙ্গেতি চতুত্থপাৰাজিকৱণ্ণনাযং. পৰতো সেনাসনক্খন্ধকেপি অধম্মিকং কতিকৱত্তং আৱি ভৱিস্সতি এৱ.

২০৭. যস্মা নানাসীমাযং দ্ৱীসু আৱাসেসু ৱস্সং উপগচ্ছন্তস্স ‘‘দুতিযে ৱসিস্সামী’’তি উপচাৰতো নিক্খন্তমত্তে পঠমো সেনাসনগ্গাহো পটিপ্পস্সম্ভতি. তস্মা পাড়িযং ‘‘তস্স, ভিক্খৱে, ভিক্খুনো পুৰিমিকা চ ন পঞ্ঞাযতী’’তি পঠমং সেনাসনগ্গাহং সন্ধায ৱুত্তং. দুতিযে সেনাসনগ্গাহে পন পুৰিমিকা পঞ্ঞাযতেৱ, তত্থেৱ তেমাসং ৱসন্তো পুৰিমৱস্সংৱুত্থো এৱ হোতি, ততো ৱা পন দুতিযদিৱসাদীসু ‘‘পঠমসেনাসনে ৱসিস্সামী’’তি উপচাৰাতিক্কমে পুৰিমিকাপি ন পঞ্ঞাযতীতি দট্ঠব্বং.

২০৮. পাড়িযং ‘‘সো সত্তাহং অনাগতায পৱাৰণায সকৰণীযো পক্কমতী’’তি ৱুত্তত্তা পৱাৰণাদিৱসেপি সত্তাহকৰণীযং ৱিনা গন্তুং ন ৱট্টতীতি ৱেদিতব্বং. কোমুদিযা চাতুমাসিনিযাতি পচ্ছিম-কত্তিকপুণ্ণমায. সা হি তস্মিং কালে কুমুদানং অত্থিতায কোমুদী, চতুন্নং ৱস্সিকমাসানং পৰিযোসানত্তা চাতুমাসিনীতি চ ৱুচ্চতি.

অধম্মিককতিকাদিকথাৱণ্ণনা নিট্ঠিতা.

ৱস্সূপনাযিকক্খন্ধকৱণ্ণনানযো নিট্ঠিতো.