৯. ৰাজৱগ্গো

১. অন্তেপুৰসিক্খাপদৱণ্ণনা

৪৯৯. নৱমৱগ্গস্স পঠমে পাড়িযং সংসুদ্ধগহণিকোতি এত্থ গহণীতি গব্ভাসযসঞ্ঞিতো মাতু কুচ্ছিপ্পদেসো, পুৰিসন্তৰসুক্কাসম্ফুট্ঠতায সংসুদ্ধগহণিকো. অভিসিত্তখত্তিযতা, উভিন্নম্পি সযনিঘৰতো অনিক্খন্ততা, অপ্পটিসংৱিদিতস্স ইন্দখীলাতিক্কমোতি তীণি অঙ্গানি.

অন্তেপুৰসিক্খাপদৱণ্ণনা নিট্ঠিতা.

২. ৰতনসিক্খাপদৱণ্ণনা

৫০৬. দুতিযে আৱসথস্সাতি এত্থ অন্তোআৰামে ৱা হোতু অঞ্ঞত্থ ৱা, যত্থ কত্থচি অত্তনো ৱসনট্ঠানং আৱসথো নাম. ছন্দেনপি ভযেনপীতি ৱড্ঢকিআদীসু ছন্দেন, ৰাজৱল্লভেসু ভযেন. আকিণ্ণমনুস্সেপি জাতে…পে… আসঙ্কন্তীতি তস্মিং নিম্মনুস্সট্ঠানে পচ্ছা আকিণ্ণমনুস্সে জাতেপি ৱিসৰিত্ৱা গমনকালে অঞ্ঞস্স অদিট্ঠত্তা তমেৱ ভিক্খুং আসঙ্কন্তি. পতিৰূপং নাম কপ্পিযভণ্ডে সযং পংসুকূলং গহেত্ৱা অকপ্পিযভণ্ডে পতিৰূপানং উপাসকাদীনং দস্সেত্ৱা চেতিযাদিপুঞ্ঞে নিযোজনং ৱা দাপেত্ৱা নিৰপেক্খগমনং ৱা. সমাদপেত্ৱাতি যাচিত্ৱা. পৰসন্তকতা, ৱিস্সাসগ্গাহপংসুকূলসঞ্ঞানং অভাৱো, অননুঞ্ঞাতকাৰণা উগ্গহণাদি চাতি তীণি অঙ্গানি.

ৰতনসিক্খাপদৱণ্ণনা নিট্ঠিতা.

৩. ৱিকালগামপ্পৱিসনসিক্খাপদৱণ্ণনা

৫০৮. ততিযে পাড়িযং ভযকথন্তি ৰাজচোৰাদিভযং ৱা ৰোগামনুস্সদুব্ভিক্খকন্তাৰাদিভযং ৱা আৰব্ভ পৱত্তং. ৱিসিখাকথন্তি সুনিৱিট্ঠাদিৱীথিকথং. কুম্ভট্ঠানকথন্তি উদকতিত্থকথং, কুম্ভদাসীকথং ৱা. পুব্বপেতকথন্তি অতীতঞাতিকথং. নানত্তকথন্তি ৱুত্তাহি, ৱক্খমানাহি চ ৱিমুত্তং নানাসভাৱং নিৰত্থককথং. লোকক্খাযিকন্তি ‘‘অযং লোকো কেন নিম্মিতো’’তিআদিনা লোকসভাৱক্খানৱসেন পৱত্তনকথা. এৱং সমুদ্দক্খাযিকা ৱেদিতব্বা. ইতি ভৱো ইতি অভৱোতি যং ৱা তং ৱা নিৰত্থককাৰণং ৱত্ৱা পৱত্তিতকথা ইতিভৱাভৱকথা. এত্থ চ ভৱো সস্সতং, ৱুড্ঢি, কামসুখঞ্চাতি তিৱিধো, অভৱো তব্বিপৰীতৱসেন. ইতি ইমায ছব্বিধায ইতিভৱাভৱকথায সদ্ধিং দ্ৱত্তিংসতিৰচ্ছানকথা নাম হোন্তি. অথ ৱা পাড়িযং সৰূপতো অনাগতাপি অৰঞ্ঞপব্বতনদীদীপকথা ইতি-সদ্দেন সঙ্গহেত্ৱা দ্ৱত্তিংসতিৰচ্ছানকথাতি ৱুচ্চন্তি. ইতি ৱাতি এত্থ ইতি-সদ্দো পকাৰত্থে. ৱা-সদ্দো ৱিকপ্পত্থে. তস্মা এৱং পকাৰং ইতো অঞ্ঞং ৱা তাদিসং নিৰত্থককথং কথেতীতি অত্থো গহেতব্বো.

৫১২. উস্সাহং পটিপ্পস্সম্ভেত্ৱা ৱিহাৰং গচ্ছন্তাতি এত্থ গামূপচাৰতো বহি নিক্খন্তে অন্তৰাৰামাদীনমুপচাৰং পৱিট্ঠে সন্ধায ৱুত্তং. গামূপচাৰব্ভন্তৰে পন পটিপস্সদ্ধুস্সাহানম্পি পুন তমেৱ ৱা অঞ্ঞং ৱা গামং পৱিসিতুকামতায সতি আপুচ্ছনকিচ্চং নত্থি. ‘‘কুলঘৰে ৱা…পে… গন্তব্ব’’ন্তি ইদং পন পুৰেভত্তং পৱিট্ঠানং ৱিকালে সঞ্জাতে ৱিকালে গামপ্পৱেসস্স আপুচ্ছিতব্বতায ৱুত্তং. অদিন্নাদানে ৱুত্তনযেনাতি দুতিযলেড্ডুপাতং সন্ধায ৱুত্তং.

৫১৫. অন্তৰাৰামন্তিআদীসূতি এত্থ উস্সৱদিৱসাদীসু মনুস্সেহি গামে পদক্খিণং কাৰেন্তং জিনবিম্বাদিং পূজেতুকামেহি ৱা ৰোগৱূপসমাদিযত্থং মনুস্সেহি যাচিতেহি ৱা ভিক্খূহি সুপ্পটিচ্ছন্নাদিৱিধিং অকত্ৱাপি ৱীথিমজ্ঝেনেৱ গামং পদক্খিণং কাতুং ৱট্টতীতি ৱদন্তি, তং ন গহেতব্বং অনাপত্তিৱাৰে অৱুত্তত্তা, ‘‘মগ্গা অনোক্কমিত্ৱা…পে… পাচিত্তিয’’ন্তি (কঙ্খা. অট্ঠ. ৱিকালগামপ্পৱেসনসিক্খাপদৱণ্ণনা) পটিক্খিত্তত্তা চ. ৱেসালিং অনুপৰিযাযিত্ৱা পৰিত্তং কৰোন্তেনাপি আনন্দত্থেৰেন সুপ্পটিচ্ছন্নতাদিং অকোপেন্তেনেৱ, অপঞ্ঞত্তে ৱা সিক্খাপদে কতন্তি দট্ঠব্বং. কেচি পন ‘‘অন্তৰাৰামাদিগামন্তৰে ঠিতেহি গৰুট্ঠানীযানং পচ্চুগ্গমনানুগ্গমনাদিৱসেন গামৱীথিং ওতৰিতুং ৱট্টতী’’তি ৱদন্তি, তম্পি অন্তৰঘৰং পৱিসন্তং পতি কাতুং ন ৱট্টতি এৱ. অন্তৰাৰামাদিকপ্পিযভূমিং পন উদ্দিস্স গচ্ছন্তং পতি কাতুং ৱট্টতীতি খাযতি, ৱীমংসিতব্বং. সন্তং ভিক্খুং অনাপুচ্ছনা, অননুঞ্ঞাতকাৰণা ৱিকালে গামপ্পৱেসোতি দ্ৱে অঙ্গানি.

ৱিকালগামপ্পৱিসনসিক্খাপদৱণ্ণনা নিট্ঠিতা.

৪. সূচিঘৰসিক্খাপদৱণ্ণনা

৫২০. চতুত্থে পাড়িযং ৱাসিজটেতি ৱাসিদণ্ডকে. অট্ঠিমযাদিসূচিঘৰতা, কৰণকাৰাপনাদিৱসেন অত্তনো পটিলাভোতি দ্ৱে অঙ্গানি.

সূচিঘৰসিক্খাপদৱণ্ণনা নিট্ঠিতা.

৫. মঞ্চপীঠসিক্খাপদৱণ্ণনা

৫২১. পঞ্চমে পাড়িযং আসযতো, ভিক্খৱে, মোঘপুৰিসো ৱেদিতব্বোতি হীনজ্ঝাসযৱসেন অযং তুচ্ছপুৰিসোতি ঞাতব্বো, হীনায পচ্চযে লোলতায পুগ্গলস্স তুচ্ছতা ঞাতব্বাতি অধিপ্পাযো. ইমস্মিং সিক্খাপদে, ইতো পৰেসু চ পঞ্চসু অত্তনা কাৰাপিতস্স পটিলাভে এৱ পাচিত্তিযং. পৰিভোগে পনস্স, অঞ্ঞেসঞ্চ দুক্কটমেৱ. পমাণাতিক্কন্তমঞ্চপীঠতা, অত্তনো কৰণকাৰাপনৱসেন পটিলাভোতি দ্ৱে অঙ্গানি.

মঞ্চপীঠসিক্খাপদৱণ্ণনা নিট্ঠিতা.

৬. তূলোনদ্ধসিক্খাপদৱণ্ণনা

৫২৬. ছট্ঠে পোটকিতূলন্তি তিণগচ্ছজাতিকানং তূলং. সেসং ৱুত্তনযমেৱ.

তূলোনদ্ধসিক্খাপদৱণ্ণনা নিট্ঠিতা.

৭. নিসীদনসিক্খাপদৱণ্ণনা

৫৩১-৫৩৬. সত্তমে নিসীদনস্স পমাণাতিক্কন্ততা, অত্তনো কৰণাদিনা পটিলাভোতি দ্ৱে অঙ্গানি.

নিসীদনসিক্খাপদৱণ্ণনা নিট্ঠিতা.

৫৩৭-৫৪৭. ইমিনা নযেন অট্ঠমনৱমদসমেসুপি অঙ্গানি ৱেদিতব্বানি. সেসং সব্বত্থ সুৱিঞ্ঞেয্যমেৱাতি.

নিট্ঠিতো ৰাজৱগ্গো নৱমো.

খুদ্দকৱণ্ণনানযো নিট্ঠিতো.