৬. পাটিদেসনীযকণ্ডং

১. পঠমপাটিদেসনীযসিক্খাপদৱণ্ণনা

৫৫৩. পাটিদেসনীযেসু পঠমে পটিদেসেতব্বাকাৰদস্সনন্তি এৱং আপত্তিং নৱকস্স সন্তিকে দেসেতব্বাকাৰদস্সনং. ইমিনা লক্খণেন সম্বহুলানং আপত্তীনম্পি ৱুড্ঢস্স সন্তিকে চ দেসেতব্বাকাৰো সক্কা ৱিঞ্ঞাতুন্তি. তত্ৰাযং নযো – ‘‘গাৰয্হে, আৱুসো, ধম্মে আপজ্জিং অসপ্পাযে পাটিদেসনীযে’’তি এৱং সম্বহুলাসু. ৱুড্ঢস্স পন সন্তিকে ‘‘গাৰয্হং, ভন্তে, ধম্মং…পে… গাৰয্হে, ভন্তে, ধম্মে’’তি যোজনা ৱেদিতব্বা. তত্থ অসপ্পাযন্তি সগ্গমোক্খন্তৰাযকৰন্তি অত্থো. অঞ্ঞাতিকায ভিক্খুনিযা অন্তৰঘৰে ঠিতায হত্থতো সহত্থা যাৱকালিকগ্গহণং, অজ্ঝোহৰণন্তি দ্ৱে অঙ্গানি.

পঠমপাটিদেসনীযসিক্খাপদৱণ্ণনা নিট্ঠিতা.

৫৫৮. দুতিযে পৰিপুণ্ণূপসম্পন্নায অননুঞ্ঞাতাকাৰেন ৱোসাসনা, অনিৱাৰেত্ৱা ভোজনজ্ঝোহাৰোতি দ্ৱে অঙ্গানি.

৫৬৩. ততিযে সেক্খসম্মততা, ঘৰূপচাৰে অনিমন্তিততা, গিলানস্স অনিচ্চভত্তাদিং গহেত্ৱা ভুঞ্জনন্তি তীণি অঙ্গানি.

৫৭০. চতুত্থে সাসঙ্কাৰঞ্ঞসেনাসনতা, অননুঞ্ঞাতং যাৱকালিকং অপ্পটিসংৱিদিতং অজ্ঝাৰামে পটিগ্গহেত্ৱা অগিলানস্স অজ্ঝোহৰণন্তি দ্ৱে অঙ্গানি. সেসং উত্তানমেৱ.

পাটিদেসনীযৱণ্ণনানযো নিট্ঠিতো.