৫. অচেলকৱগ্গো

১. অচেলকসিক্খাপদৱণ্ণনা

২৭৩. পঞ্চমৱগ্গস্স পঠমে ময্হং নামাতি ভিক্খুনা ভূমিযং ঠপেত্ৱা দিন্নম্পি সন্ধায ৱদতি. অঞ্ঞতিত্থিযতা, অননুঞ্ঞাততা, অজ্ঝোহৰণীযতা, অজ্ঝোহৰণত্থায সহত্থা অনিক্খিত্তভাজনে দানন্তি ইমানেত্থ চত্তাৰি অঙ্গানি.

অচেলকসিক্খাপদৱণ্ণনা নিট্ঠিতা.

২. উয্যোজনসিক্খাপদৱণ্ণনা

২৭৪. দুতিযে অনাচাৰং আচৰিতুকামতা, তদত্থমেৱ উপসম্পন্নস্স উয্যোজনা, তস্স উপচাৰাতিক্কমোতি ইমানেত্থ তীণি অঙ্গানি.

উয্যোজনসিক্খাপদৱণ্ণনা নিট্ঠিতা.

৩. সভোজনসিক্খাপদৱণ্ণনা

২৮১. ততিযে পাড়িযং খুদ্দকে ঘৰেতি এত্থ খুদ্দকং ঘৰং নাম পঞ্চহত্থতো ঊনকৱিত্থাৰং অধিপ্পেতং. তত্থ চ পিট্ঠসঙ্ঘাটতো হত্থপাসে অৱিজহিতেপি পিট্ঠিৱংসাতিক্কমো হোতীতি আহ ‘‘পিট্ঠিৱংসং অতিক্কমিত্ৱা’’তি. যথা তথা ৱা কতস্সাতি পিট্ঠিৱংসং আৰোপেত্ৱা ৱা অনাৰোপেত্ৱা ৱা কতস্স.

২৮৩. পাড়িযং ৱীতৰাগাতি অপৰিযুট্ঠিতৰাগানং, অনাগামীনঞ্চ সঙ্গহো. সচিত্তকন্তি অনুপৱিসিত্ৱা নিসীদনচিত্তেন সচিত্তকং. পৰিযুট্ঠিতৰাগজাযম্পতিকানং সন্নিহিততা, সযনিঘৰতা, দুতিযস্স ভিক্খুনো অভাৱো, অনুপখজ্জ নিসীদনন্তি ইমানেত্থ চত্তাৰি অঙ্গানি.

সভোজনসিক্খাপদৱণ্ণনা নিট্ঠিতা.

২৮৪-২৮৯. চতুত্থপঞ্চমানি ৱুত্তত্থানি.

৬. চাৰিত্তসিক্খাপদৱণ্ণনা

২৯৮. ছট্ঠে ‘‘পৰিযেসিত্ৱা আৰোচনকিচ্চং নাম নত্থী’’তি ৱুত্তত্তা যো অপৰিযেসিতব্বো উপসঙ্কমিতুং যুত্তট্ঠানে দিস্সতি, সো সচেপি পকতিৱচনস্স সৱনূপচাৰং অতিক্কম্ম ঠিতো উপগন্ত্ৱা আপুচ্ছিতব্বো. তেনাহ ‘‘অপি চ…পে… যং পস্সতি, সো আপুচ্ছিতব্বো’’তিআদি.

৩০২. অনাপত্তিৱাৰে চেত্থ অন্তৰাৰামাদীনঞ্ঞেৱ ৱুত্তত্তা ৱিহাৰতো গামৱীথিং অনুঞ্ঞাতকাৰণং ৱিনা অতিক্কমন্তস্সাপি আপত্তি হোতি, ন পন ঘৰূপচাৰং অতিক্কমন্তস্সেৱ.

যং পন পাড়িযং ‘‘অঞ্ঞস্স ঘৰূপচাৰং ওক্কমন্তস্স…পে… পঠমং পাদং উম্মাৰং অতিক্কামেতী’’তিআদি ৱুত্তং. তং গামে পৱিট্ঠং সন্ধায ৱুত্তং, তথাপি অঞ্ঞস্স ঘৰূপচাৰং অনোক্কমিত্ৱা ৱীথিমজ্ঝেনেৱ গন্ত্ৱা ইচ্ছিতিচ্ছিতঘৰদ্ৱাৰাভিমুখে ঠত্ৱা মনুস্সে ওলোকেত্ৱা গচ্ছন্তস্সাপি পাচিত্তিযমেৱ. তত্থ কেচি ‘‘ৱীথিযং অতিক্কমন্তস্স ঘৰূপচাৰগণনায আপত্তিযো’’তি ৱদন্তি. অঞ্ঞে পন ‘‘যানি কুলানি উদ্দিস্স গতো, তেসং গণনাযা’’তি. পঞ্চন্নং ভোজনানং অঞ্ঞতৰেন নিমন্তনসাদিযনং, সন্তং ভিক্খুং অনাপুচ্ছনা, ভত্তিযঘৰতো অঞ্ঞঘৰূপসঙ্কমনং, মজ্ঝন্হিকানতিক্কমো, সমযাপদানং অভাৱোতি ইমানেত্থ পঞ্চ অঙ্গানি.

চাৰিত্তসিক্খাপদৱণ্ণনা নিট্ঠিতা.

৭. মহানামসিক্খাপদৱণ্ণনা

৩০৩. সত্তমে মহানামোতি সুক্কোদনস্স পুত্তো অনুৰুদ্ধত্থেৰস্স, সত্থু চ জেট্ঠভাতা. আনন্দত্থেৰো অমিতোদনস্স পুত্তো, নন্দত্থেৰো পন সুদ্ধোদনস্সেৱ.

৩০৫. পাড়িযং কালং আহৰিস্সথাতি অজ্জতনং কালং ৱীতিনামেস্সথ, স্ৱে ভেসজ্জং হৰিস্সথাতি ৱা অত্থো. ‘‘অত্থি পৱাৰণা ভেসজ্জপৰিযন্তা চ ৰত্তিপৰিযন্তা চা’’তি ততিযকোট্ঠাসে নিযমিতমেৱ ভেসজ্জং নিযমিতকালন্তৰেযেৱ গহেতব্বং, ন ততো বহি. ইতৰথা ৱিসুং পযোজনং নত্থীতি দট্ঠব্বং. সপৰিযন্তা সঙ্ঘপৱাৰণা, তদুত্তৰি ভেসজ্জৱিঞ্ঞত্তি, অগিলানতাতি ইমানেত্থ তীণি অঙ্গানি.

মহানামসিক্খাপদৱণ্ণনা নিট্ঠিতা.

৮. উয্যুত্তসেনাসিক্খাপদৱণ্ণনা

৩১৫. অট্ঠমে একমেকন্তি এত্থ দুৱঙ্গিনীপি তিৱঙ্গিনীপি সেনা সঙ্গয্হতি. উয্যুত্তচতুৰঙ্গসেনাদস্সনায তথাৰূপপচ্চযাদিং ৱিনা গমনং, অননুঞ্ঞাতোকাসে দস্সনন্তি ইমানেত্থ দ্ৱে অঙ্গানি.

উয্যুত্তসেনাসিক্খাপদৱণ্ণনা নিট্ঠিতা.

৯. সেনাৱাসসিক্খাপদৱণ্ণনা

৩১৯. নৱমে সেনায চতুত্থো সূৰিযত্থঙ্গমো, অগিলানতাতি ইমানেত্থ দ্ৱে অঙ্গানি.

সেনাৱাসসিক্খাপদৱণ্ণনা নিট্ঠিতা.

১০. উয্যোধিকসিক্খাপদৱণ্ণনা

৩২২. দসমে পাড়িযং কতি তে লক্খানি লদ্ধানীতি কিত্তকা তযা লদ্ধাতি অত্থো. উয্যোধিকাদিদস্সনায তথাৰূপপচ্চযং ৱিনা গমনং, অননুঞ্ঞাতোকাসে দস্সনন্তি ইমানেত্থ দ্ৱে অঙ্গানি.

উয্যোধিকসিক্খাপদৱণ্ণনা নিট্ঠিতা.

নিট্ঠিতো অচেলকৱগ্গো পঞ্চমো.