৬. সুৰাপানৱগ্গো

১. সুৰাপানসিক্খাপদৱণ্ণনা

৩২৮. ছট্ঠৱগ্গস্স পঠমে পাড়িযং কিণ্ণপক্খিত্তাতি পিট্ঠপূৱাদিং অপক্খিপিত্ৱা কিণ্ণসঙ্খাতং ধঞ্ঞঙ্কুৰাদিসুৰাবীজং পক্খিপিত্ৱা কতা. সম্ভাৰসংযুত্তাতি সাসপাদিঅনেকসম্ভাৰেহি সঞ্ঞুত্তা.

মধুকতালনাড়িকেৰাদিপুপ্ফাদিৰসো চিৰপৰিৱাসিতো পুপ্ফাসৱো নাম. তথা পনসাদি ফলাসৱো. মুদ্দিকৰসো মধ্ৱাসৱো. উচ্ছুৰসো গুড়াসৱো. তিফলতিকটুকাদিনানাসম্ভাৰানং ৰসো চিৰপৰিৱাসিতো সম্ভাৰসংযুত্তো. বীজতো পট্ঠাযাতি যথাৱুত্তানং পিট্ঠাদীনং মজ্জত্থায ভাজনে পক্খিত্তকালতো পট্ঠায.

৩২৯. লোণসোৱীৰকং সুত্তঞ্চ অনেকেহি দব্বসম্ভাৰেহি অভিসঙ্খতো ভেসজ্জৱিসেসো. উয্যুত্তসিক্খাপদানং অচিত্তকলোকৱজ্জেসু লোকৱজ্জতা পুব্বে ৱুত্তনযাৱাতি তত্থ কিঞ্চিপি অৱত্ৱা ইধ তেহি অসাধাৰণৱত্থুৱিসেসসিদ্ধায অচিত্তকপক্খেপি অকুসলচিত্ততায তং লোকৱজ্জতাদিৱিসেসং দস্সেতুমেৱ ‘‘ৱত্থুঅজাননতায চেত্থা’’তিআদিনা ৱুত্তন্তি ৱেদিতব্বং. যং পনেত্থ ৱত্তব্বং, তং পঠমপাৰাজিকৱণ্ণনাযং ৱিত্থাৰতো সাৰত্থদীপনিযং ৱিৰদ্ধট্ঠানৱিসোধনৱসেন ৱুত্তন্তি তত্থেৱ গহেতব্বং. মজ্জভাৱো, তস্স পানঞ্চাতি ইমানেত্থ দ্ৱে অঙ্গানি.

সুৰাপানসিক্খাপদৱণ্ণনা নিট্ঠিতা.

২. অঙ্গুলিপতোদকসিক্খাপদৱণ্ণনা

৩৩০. দুতিযে হসাধিপ্পাযতা, উপসম্পন্নস্স কাযেন কাযামসনন্তি ইমানেত্থ দ্ৱে অঙ্গানি.

অঙ্গুলিপতোদকসিক্খাপদৱণ্ণনা নিট্ঠিতা.

৩. হসধম্মসিক্খাপদৱণ্ণনা

৩৩৮. ততিযে পাড়িযং হসধম্মে হসধম্মসঞ্ঞীতিআদীসু উপ্লৱাদিমত্তং কিং হসধম্মো হোতীতি গহণৱসেন সতি কৰণীযে কৰিযমানং হসধম্মং হসধম্মোতি গহণৱসেন অত্থো ৱেদিতব্বো. উস্সাৰেন্তোতি উদকে ঠিতং নাৱং তীৰে আৰোপেন্তো.

পতনুপ্পতনৱাৰেসূতি উদকস্স উপৰিতলে মণ্ডূকগতিযা পতনুপ্পতনৱসেন গমনত্থং খিত্তায একিস্সা কথলায ৱসেন ৱুত্তং. উদকস্স উপৰিগোপ্ফকতা, হসাধিপ্পাযেন কীড়নন্তি দ্ৱে অঙ্গানি.

হসধম্মসিক্খাপদৱণ্ণনা নিট্ঠিতা.

৪. অনাদৰিযসিক্খাপদৱণ্ণনা

৩৪৪. চতুত্থে সুত্তানুলোমন্তি মহাপদেসা. অট্ঠকথাতিপি ৱদন্তি. উপসম্পন্নস্স পঞ্ঞত্তেন ৱচনং, অনাদৰিযকৰণন্তি দ্ৱে অঙ্গানি.

অনাদৰিযসিক্খাপদৱণ্ণনা নিট্ঠিতা.

৫. ভিংসাপনসিক্খাপদৱণ্ণনা

৩৪৫. পঞ্চমে উপসম্পন্নতা, তস্স দস্সনসৱনৱিসযে ভিংসাপেতুকামতায ৱাযমনন্তি দ্ৱে অঙ্গানি.

ভিংসাপনসিক্খাপদৱণ্ণনা নিট্ঠিতা.

৬. জোতিসিক্খাপদৱণ্ণনা

৩৫৪. ছট্ঠে অলাতং পতিতন্তি অগ্গিকপালতো বহি পতিতং. ৱিজ্ঝাতন্তি ৱিজ্ঝাতং অলাতং কপালগ্গিম্হি পক্খিপিত্ৱা জালেন্তস্স পাচিত্তিযং, তথা কেৱলং ইন্ধনং পাতেন্তস্সপি ৱিজ্ঝাতং কপালগ্গিং মুখৱাতাদিনা উজ্জালেন্তস্সপি. গিলানতাদিকাৰণাভাৱো, ৱিসিব্বেতুকামতা, সমাদহনন্তি তীণি অঙ্গানি.

জোতিসিক্খাপদৱণ্ণনা নিট্ঠিতা.

৭. নহানসিক্খাপদৱণ্ণনা

৩৫৭. সত্তমে পাড়িযং নগৰে থকিতেতি এত্থ ৰঞ্ঞা চিৰং নহাযিতুকামেন ‘‘অহং বহি উয্যানে কতাৰক্খো ৱসিস্সামি, নগৰং থকেত্ৱা গোপেথা’’তি অনুঞ্ঞাতা, তে থকিংসূতি দট্ঠব্বং. অসম্ভিন্নেনাতি অনট্ঠেন, তং দিৱসং পুন অগ্গহিতালঙ্কাৰেন পবুদ্ধমত্তেনাতি অধিপ্পাযো. মজ্ঝিমদেসে ঊনকদ্ধমাসনহানং, সমযাদীনং অভাৱোতি দ্ৱে অঙ্গানি.

নহানসিক্খাপদৱণ্ণনা নিট্ঠিতা.

৮. দুব্বণ্ণকৰণসিক্খাপদৱণ্ণনা

৩৬৮. অট্ঠমে পটিলদ্ধনৱচীৱৰেনাতি এত্থ পুব্বে অকতকপ্পং কতিপাহং নিৱাসনত্থায তাৱকালিকৱসেন লদ্ধম্পি সঙ্গয্হতীতি ৱদন্তি.

৩৬৯. ‘‘নৱং নাম অকতকপ্প’’ন্তি সামঞ্ঞতো ৱুত্তত্তা অঞ্ঞেন ভিক্খুনা কপ্পবিন্দুং দত্ৱা পৰিভুত্তং চীৱৰং, তেন ৱা, ততো লভিত্ৱা অঞ্ঞেন ৱা কেনচি দিন্নম্পি কতকপ্পমেৱ নৱং নাম ন হোতীতি দট্ঠব্বং. ‘‘নিৱাসেতুং ৱা পাৰুপিতুং ৱা’’তি ৱুত্তত্তা অংসবদ্ধকাসাৱম্পি পাৰুপিতব্বতো কপ্পং কাতব্বন্তি ৱদন্তি. চম্মকাৰনীলং নাম চম্মং নীলৱণ্ণং কাতুং যোজিযমানং নীলং. পকতিনীলমেৱাতি কেচি. যথাৱুত্তচীৱৰস্স অকতকপ্পতা, অনট্ঠচীৱৰাদিতা, নিৱাসনাদিতাতি তীণি অঙ্গানি.

দুব্বণ্ণকৰণসিক্খাপদৱণ্ণনা নিট্ঠিতা.

৯. ৱিকপ্পনসিক্খাপদৱণ্ণনা

৩৭৪. নৱমে যেনাতি যেন সদ্ধিং, যস্স সন্তিকেতি অত্থো. সামং ৱিকপ্পিতস্স অপচ্চুদ্ধাৰো, ৱিকপ্পনুপগচীৱৰতা, অৱিস্সাসেন পৰিভোগোতি তীণি অঙ্গানি.

ৱিকপ্পনসিক্খাপদৱণ্ণনা নিট্ঠিতা.

১০. চীৱৰঅপনিধানসিক্খাপদৱণ্ণনা

৩৭৮. দসমে পাড়িযং অন্তমসো হসাপেক্খোপীতি অপি-সদ্দেন অথেয্যচিত্তং কোধেন দুক্খাপেতুকামং, অৱণ্ণং পকাসেতুকামঞ্চ সঙ্গয্হতি. তেনেৱ ‘‘তিৱেদন’’ন্তি ৱুত্তং. উপসম্পন্নস্স পত্তাদীনং অপনিধানং, ৱিহেসেতুকামতাদীতি দ্ৱে অঙ্গানি.

চীৱৰঅপনিধানসিক্খাপদৱণ্ণনা নিট্ঠিতা.

নিট্ঠিতো সুৰাপানৱগ্গো ছট্ঠো.