৯. দুতিযদুট্ঠদোসসিক্খাপদৱণ্ণনা

৩৯১. নৱমে মেত্তিযং ভিক্খুনিন্তি লিঙ্গনাসনায নাসিতাযপি তস্সা ভূতপুব্বৱোহাৰং গহেত্ৱা ৱুত্তং. অঞ্ঞভাগস্সাতি থেৰস্স মনুস্সজাতিভিক্খুভাৱতো অঞ্ঞস্স তিৰচ্ছানজাতিছগলকভাৱসঙ্খাতস্স কোট্ঠাসস্স. ইদন্তি সামঞ্ঞতো নপুংসকলিঙ্গেন ৱুত্তং, অযং ছগলকোতি অত্থো. অঞ্ঞভাগোতি যথাৱুত্ততিৰচ্ছানজাতিছগলকভাৱসঙ্খাতো অঞ্ঞো কোট্ঠাসো, অঞ্ঞভাগস্স ইদন্তি অঞ্ঞভাগিযন্তি পঠমৱিগ্গহস্স অত্থো, অঞ্ঞভাগমত্থীতি দুতিযৱিগ্গহস্স, দ্ৱীহিপি ছগলকোৱ ৱুত্তো. ইদানি দ্ৱীহিপি ৱিগ্গহেহি ৱুত্তমেৱত্থং ৱিত্থাৰতো দস্সেন্তো ‘‘যো হি সো’’তিআদিমাহ. তত্থ যো হি সো ছগলকো ৱুত্তো, সো অঞ্ঞস্স ভাগস্স হোতীতি চ অঞ্ঞভাগিযসঙ্খ্যং লভতীতি চ যোজনা. দুতিযৱিগ্গহস্স অত্থং দস্সেতুং ‘‘সো ৱা’’তিআদি ৱুত্তং. অধিকৰণন্তি ৱেদিতব্বোতি এত্থাপি যো হি সো ‘‘দব্বো মল্লপুত্তো নামা’’তি ছগলকো ৱুত্তো, সোতি আনেত্ৱা সম্বন্ধিতব্বং. তঞ্হি সন্ধাযাতি ‘‘দব্বো’’তি নামকৰণস্স অধিট্ঠানভূতং ছগলকং সন্ধায. তে ভিক্খূতি তে অনুযুঞ্জন্তা ভিক্খূ. আপত্তিযাপি পুগ্গলাধিট্ঠানত্তা ‘‘পুগ্গলানংযেৱ লেসা’’তি ৱুত্তং.

৩৯৩. যা চ সা অৱসানে…পে… চোদনা ৱুত্তাতি ‘‘ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি সঙ্ঘাদিসেসে সঙ্ঘাদিসেসদিট্ঠি হোতি, তঞ্চে পাৰাজিকেন চোদেতী’’তিআদিং (পাৰা. ৪০৭) চোদনাভেদং সন্ধায ৱদতি. সত্তন্নম্পি আপত্তীনং পচ্চেকং পাৰাজিকত্তাদিসামঞ্ঞেপি মেথুনাদিন্নাদানাদিৱত্থুতো, ৰাগদোসত্তাদিসভাৱতো চ ৱিসভাগতাপি অত্থীতি আহ ‘‘যস্মা পন…পে… ন হোতী’’তি.

ৱুত্তনযেনেৱাতি ‘‘সভাগৱিসভাগৱত্থুতো’’তিআদিনা (পাৰা. অট্ঠ. ২.৩৯৩) ৱুত্তনযেন. কম্মলক্খণং, তংমনসিকাৰো চ অৱিপন্নকম্মস্স নিমিত্ততো ফলূপচাৰেন কম্মন্তি ৱুচ্চতীতি আহ ‘‘তং নিস্সায উপ্পজ্জনতো’’তি. পৰিৱাসাদিং নিস্সায মানত্তাদীনং উপ্পজ্জনতো ‘‘পুৰিমং পুৰিম’’ন্তিআদি ৱুত্তং.

৩৯৫. সৱত্থুকং কত্ৱাতি পুগ্গলাধিট্ঠানং কত্ৱা. দীঘাদিনোতি দীঘৰস্সাদিলিঙ্গস্স. দিট্ঠাদিনোতি দিট্ঠপুব্বাদিনো.

৪০৮. এৱং তথাসঞ্ঞীতি অঞ্ঞস্স মেথুনাদিকিৰিযং দিস্ৱা ‘‘অযং সো’’তি এৱং তথাসঞ্ঞী. অঙ্গানি পঠমদুট্ঠদোসে ৱুত্তসদিসানি, ইধ পন কিঞ্চিদেসং লেসমত্তং উপাদিযনা অধিকা.

দুতিযদুট্ঠদোসসিক্খাপদৱণ্ণনা নিট্ঠিতা.