১০. পঠমসঙ্ঘভেদসিক্খাপদৱণ্ণনা

৪১০. দসমে বহূনন্তি দুব্বলতায অৰঞ্ঞাদিসেৱায চিত্তং সমাহিতং কাতুং অসক্কোন্তানং. দুক্খস্সন্তকিৰিযায তস্মিং অত্তভাৱে বুদ্ধৱচনগ্গহণধাৰণাদিসঙ্খাতং ব্যঞ্জনপদমেৱ পৰমং অস্স, ন মগ্গলাভোতি পদপৰমো. অভিসম্ভুণিত্ৱাতি নিপ্ফাদেত্ৱা. ধম্মতো অপেতং উদ্ধম্মং. পটিক্খিত্তমেৱাতি ‘‘ন, ভিক্খৱে, অসেনাসনিকেন ৱস্সং উপগন্তব্ব’’ন্তি (মহাৱ. ২০৪) ৱচনতো ৱুত্তং, ইদমেৱ ৱচনং সন্ধায পাড়িযম্পি ‘‘অট্ঠ মাসে’’তিআদি (পাৰা. ৪০৯) ৱুত্তং.

তীহি কোটীহীতি অসুদ্ধমূলেহি. এত্থ চ ভিক্খূনং চতূসু কুলেসু পক্কপিণ্ডিযালোপভোজননিস্সিততায, মচ্ছমংসভোজনৱিৰহিতস্স চ কুলস্স দুল্লভতায তত্থ লদ্ধেসু ভত্তব্যঞ্জনেসু মচ্ছমংসসংসগ্গসঙ্কায, দুন্নিৱাৰণতায চ ভিক্খূনং সৰীৰযাপনম্পি ন সিযাতি ভগৱতা মচ্ছমংসং সব্বথা অপ্পটিক্খিপিত্ৱা তীহি কোটীহি অপৰিসুদ্ধমেৱ পটিক্খিত্তং. যদি হি তং ভগৱা সব্বথা পটিক্খিপেয্য, ভিক্খূ মৰমানাপি মচ্ছাদিসংসগ্গসঙ্কিতং ভত্তং ন ভুঞ্জেয্যুং, ততো তণ্ডুলধঞ্ঞাদিং পটিগ্গহেত্ৱা নিদহিত্ৱা সযং পচিত্ৱা ভুঞ্জিতুং তদুপকৰণভূতং দাসিদাসং, উদুক্খলমুসলাদিকঞ্চ ভিক্খূনং পত্তাদি ৱিয অৱস্সং গহেতুং অনুজানিতব্বং সিযাতি তিত্থিযানং ৱিয গহট্ঠাৱাসো এৱ সিযা, ন ভিক্খুআৱাসোতি ৱেদিতব্বং. জালং মচ্ছবন্ধনং. ৱাগুৰা মিগবন্ধনী. কপ্পতীতি যদি তেসং ৱচনেন সঙ্কা ন ৱত্ততি, ৱট্টতি, ন তং ৱচনং লেসকপ্পং কাতুং ৱট্টতি. তেনেৱ ৱক্খতি ‘‘যত্থ চ নিব্বেমতিকো হোতি, তং সব্বং কপ্পতী’’তি.

পৱত্তমংসন্তি আপণাদীসু পৱত্তং ৱিক্কাযিকং মতমংসং. ভিক্খূনংযেৱ অত্থায অকতন্তি এত্থ অট্ঠানপ্পযুত্তো এৱ-সদ্দো, ভিক্খূনং অত্থায অকতমেৱাতি সম্বন্ধিতব্বং, তস্মা ভিক্খূনঞ্চ মঙ্গলাদীনঞ্চাতি মিস্সেত্ৱা কতম্পি ন ৱট্টতীতি ৱেদিতব্বং. কেচি পন যথাঠিতৱসেন অৱধাৰণং গহেত্ৱা ‘‘ৱট্টতী’’তি ৱদন্তি, তং ন সুন্দৰং. ‘‘ৱত্ত’’ন্তি ইমিনা আপত্তি নত্থীতি দস্সেতি.

কপ্পন্তি অসঙ্খেয্যকপ্পং, ‘‘আযুকপ্প’’ন্তিপি (সাৰত্থ. টী. ২.৪১০) কেচি. মহাকপ্পস্স হি চতুত্থভাগো অসঙ্খেয্যকপ্পো, ততো ৱীসতিমো ভাগো সঙ্ঘভেদকস্স আযুকপ্পন্তি ৱদন্তি, তং অট্ঠকথাসু কপ্পট্ঠকথায ন সমেতি ‘‘কপ্পৱিনাসে এৱ মুচ্চতী’’তিআদি (ৱিভ. অট্ঠ. ৮০৯) ৱচনতো. ব্ৰহ্মং পুঞ্ঞন্তি সেট্ঠং পুঞ্ঞং. কপ্পং সগ্গম্হীতি এত্থ পটিসন্ধিপৰম্পৰায কপ্পট্ঠতা ৱেদিতব্বা.

৪১১. লদ্ধিনানাসংৱাসকেনাতি উক্খিত্তানুৱত্তকভাৱেন ভাৱপ্পধানত্তা নিদ্দেসস্স. কম্মনানাসংৱাসকেনাতি উক্খিত্তভাৱেন. ‘‘ভেদায পৰক্কমেয্যা’’তি ৱিসুং ৱুত্তত্তা ভেদনসংৱত্তনিকস্স অধিকৰণস্স সমাদায পগ্গণ্হনতো পুব্বেপি পক্খপৰিযেসনাদিৱসেন সঙ্ঘভেদায পৰক্কমন্তস্স সমনুভাসনকম্মং কাতুং ৱট্টতীতি ৱেদিতব্বং. যোপি চাযং সঙ্ঘভেদো হোতীতি সম্বন্ধো.

কম্মেনাতি অপলোকনাদিনা. উদ্দেসেনাতি পাতিমোক্খুদ্দেসেন. ৱোহাৰেনাতি তাহি তাহি উপপত্তীহি ‘‘অধম্মং ধম্মো’’তিআদিনা (অ. নি. ৩.১০-৩৯, ৪২; চূড়ৱ. ৩৫২) ৱোহাৰেন, পৰেসং পঞ্ঞাপনেনাতি অত্থো. অনুসাৱনাযাতি অত্তনো লদ্ধিযা গহণত্থমেৱ অনু পুনপ্পুনং কণ্ণমূলে মন্তসাৱনায, কথনেনাতি অত্থো. সলাকগ্গাহেনাতি এৱং অনুসাৱনায তেসং চিত্তং উপত্থম্ভেত্ৱা অত্তনো পক্খে পৱিট্ঠভাৱস্স সঞ্ঞাণত্থং ‘‘গণ্হথ ইমং সলাক’’ন্তি সলাকগ্গাহেন. এত্থ চ কম্মমেৱ, উদ্দেসো ৱা সঙ্ঘভেদে পধানং কাৰণং, ৱোহাৰাদযো পন সঙ্ঘভেদস্স পুব্বভাগাতি ৱেদিতব্বা. অব্ভুস্সিতন্তি অব্ভুগ্গতং. অচ্ছেয্যাতি ৱিহৰেয্য.

‘‘লজ্জী ৰক্খিস্সতী’’তি (ৱিসুদ্ধি. ১.৪২; পাৰা. অট্ঠ. ১.৪৫) ৱচনতো আপত্তিভযেন আৰোচনং লজ্জীনং এৱ ভাৰোতি আহ ‘‘লজ্জীহি ভিক্খূহী’’তি, অলজ্জিস্সপি অনাৰোচেন্তস্স আপত্তিযেৱ. অপ্পটিনিস্সজ্জতো দুক্কটন্তি ৱিসুং ৱিসুং ৱদন্তানং গণনায দুক্কটং. পহোন্তেনাতি গন্তুং সমত্থেন, ইচ্ছন্তেনাতি অত্থো. আপত্তি পন অড্ঢযোজনব্ভন্তৰেনেৱ অগিলানস্স ৱসেন ৱেদিতব্বা.

৪১৬. ঞত্তিযাদীহি দুক্কটাদিসব্ভাৱং সন্ধায ‘‘সঙ্ঘাদিসেসেন অনাপত্তী’’তি ৱুত্তং. অস্সাতি দেৱদত্তস্স. অপঞ্ঞত্তে সিক্খাপদে সমনুভাসনকম্মস্সেৱ অভাৱতো ‘‘ন হি পঞ্ঞত্তং সিক্খাপদং ৱীতিক্কমন্তস্সা’’তি ৱুত্তং. সিক্খাপদং পঞ্ঞপেন্তেনেৱ হি সমনুভাসনকম্মং অনুঞ্ঞাতং. উদ্দিস্স অনুঞ্ঞাততোতি ‘‘অনুজানামি, ভিক্খৱে, ৰোমন্থকস্স ৰোমন্থন’’ন্তিআদিং (চূড়ৱ. ২৭৩) উদ্দিস্সানুঞ্ঞাতং সন্ধায ৱদতি. অনাপত্তিযন্তি অনাপত্তিৱাৰে. আপত্তিং ৰোপেতব্বোতি সমনুভাসনায পাচিত্তিযআপত্তিং ৰোপেতব্বো. আপত্তিযেৱ ন জাতাতি সঙ্ঘাদিসেসাপত্তি ন জাতা এৱ.

‘‘ন পটিনিস্সজ্জামী’’তি সঞ্ঞায অভাৱেন মুচ্চনতো সঞ্ঞাৱিমোক্খং. সচিত্তকন্তি ‘‘ন পটিনিস্সজ্জামী’’তি জাননচিত্তেন সচিত্তকং. যো ৱিসঞ্ঞী ৱা ভীতো ৱা ৱিক্খিত্তো ৱা ‘‘পটিনিস্সজ্জিতব্ব’’ন্তিপি, ‘‘কম্মং কৰিস্সতী’’তি ৱা ন জানাতি, তস্স অনাপত্তি. ভেদায পৰক্কমনং, ধম্মকম্মেন সমনুভাসনং, কম্মৱাচাপৰিযোসানং, ন পটিনিস্সজ্জামীতি চিত্তেন অপ্পটিনিস্সজ্জনন্তি ইমানেত্থ চত্তাৰি অঙ্গানি.

পঠমসঙ্ঘভেদসিক্খাপদৱণ্ণনা নিট্ঠিতা.