৬. আৰামৱগ্গৱণ্ণনা

১০২১. পঠমসিক্খাপদং উত্তানত্থমেৱ.

২. দুতিযসিক্খাপদৱণ্ণনা

১০৩০. ভিক্খুনী চে ভিক্খুং অক্কোসতি, ইমিনা সিক্খাপদেন পাচিত্তিযং. ভিক্খুনিং চে অক্কোসতি, ওমসৱাদেন আপজ্জতি. ওমসৱাদে সম্মুখাৱ ৰুহতি, ইধ পন পৰম্মুখাপি.

তত্ৰাযং ৱিচাৰণা – ভিক্খুৱিভঙ্গে ওসমৱাদসিক্খাপদে ভিক্খুনী অনুপসম্পন্নট্ঠানে তিট্ঠতীতি কত্ৱা ভিক্খুনিৱিভঙ্গেপি ওমসৱাদসিক্খাপদে ভিক্খু ভিক্খুনিযা অনুপসম্পন্নট্ঠানে তিট্ঠতীতি সিদ্ধং. ইধ চ অনুপসম্পন্নস্স অক্কোসনে দুক্কটং ৱুত্তং, ভিক্খুস্স উপসম্পন্নস্স অক্কোসনে পাচিত্তিযং ৱুত্তং, তস্মা ইমানি দ্ৱে সিক্খাপদানি ভিক্খুম্হি সংসন্দিযমানানি অঞ্ঞমঞ্ঞং ন সমেন্তি. যথা সমেন্তি, তথা জানিতব্বং. তত্থ পোৰাণগণ্ঠিপদে ৱুত্তনযেন ভিক্খুনীনং ওমসৱাদসিক্খাপদে অনুপসম্পন্নোতি ন গহেতব্বো, ইদমেত্থ যুত্তং. পৰিভাসেয্যাতি অঞ্ঞত্ৰ অক্কোসৱত্থূহি. তেসু হি অঞ্ঞতৰস্মিং সতি ওমসৱাদপাচিত্তিযমেৱাতি একে, তং ন যুত্তং. ওমসৱাদে পাড়িমুত্তকঅক্কোসে হি দুক্কটং হোতীতি. দুক্কটোকাসে ইদং পাচিত্তিযং তেহি নিদ্দিট্ঠং হোতি, তস্মা ‘‘বালা এতা’’তি পাড়িযং ইধ আগতপদানংযেৱ ৱসেন পৰিভাসনং ৱেদিতব্বং.

দুতিযসিক্খাপদৱণ্ণনা নিট্ঠিতা.

১০৩৩. ততিযসিক্খাপদং উত্তানত্থমেৱ.

৪. চতুত্থসিক্খাপদৱণ্ণনা

১০৩৮. নিমন্তিতা ৱা পৱাৰিতা ৱাতি এত্থ পোৰাণগণ্ঠিপদে তাৱ এৱং ৱুত্তং ‘‘পৱাৰিতাপি যাগুং পাতুং লভতি, ভোজ্জযাগুং ন লভতি. যাগু পনেত্থ খাদনীযভোজনীযসঙ্খ্যং ন গচ্ছতি. নিমন্তিতা ভিক্খুনী পিণ্ডায চৰিত্ৱা ভুঞ্জিতুকামা সামিকে অপলোকেত্ৱাৱ ভুঞ্জিতুং লভতি. পৰম্পৰভোজনাপত্তি ভিক্খুনীনং নত্থি. নিমন্তিতা তং ভত্তং ভুঞ্জিত্ৱা ৱা অভুঞ্জিত্ৱা ৱা পৱাৰিতা কপ্পিযং কাৰাপেত্ৱা ভুঞ্জিতুং ন লভতি, অকপ্পিযনিমন্তনেন নিমন্তিযমানা দ্ৱে নিমন্তনানি সম্পটিচ্ছিতুঞ্চ ন লভতী’’তি. তত্থ ‘‘পৱাৰিতাপি যাগুং পাতুং লভতী’’তি ৱুত্তং পাড়িযং, অট্ঠকথাযঞ্চ অনুঞ্ঞাতত্তা. ‘‘নিমন্তিতা অপ্পৱাৰিতা যাগুং পিৱতী’’তি হি পাড়িযং ৱুত্তং. তত্ৰিদং সিক্খাপদৱণ্ণনাপুব্বঙ্গমসন্নিট্ঠানং – নিমন্তিতা ৱা পৱাৰিতা ৱাতি এত্থ ৱাসদ্দেন অকপ্পিযনিমন্তনেন নিমন্তিতা অপ্পৱাৰিতা ঠপেত্ৱা যাগুং অঞ্ঞং খাদনীযং ৱা ভোজনীযং ৱা খাদেয্য ৱা ভুঞ্জেয্য ৱা, পাচিত্তিযং অঞ্ঞত্ৰ সামিকানং অপলোকনা. পৰম্পৰভোজনাভাৱেন ভিক্খুনীনং কো গুণো জাতোতি? ন এতাসং গুণলাভো, কেৱলং পাকটতৰং জাতং. ভিক্খূপি ৱিকপ্পেত্ৱা মিস্সেত্ৱাৱ ভুঞ্জিতুং লভন্তি. সমযে যথাসুখং লভন্তি. ইমিনা অপলোকনেন কিন্তি? পৱাৰিতা ৱা অনিমন্তিতা ৱা ন কিঞ্চি কপ্পিযং কাৰাপেত্ৱা গিলানাতিৰিত্তম্পি লভন্তি, নিমন্তিতা চ পৱাৰিতা চ যাগুম্পি ন লভন্তি, অপলোকেত্ৱাপি ন লভন্তীতি.

চতুত্থসিক্খাপদৱণ্ণনা নিট্ঠিতা.

আৰামৱগ্গৱণ্ণনা নিট্ঠিতা.