৫. চিত্তাগাৰৱগ্গৱণ্ণনা

১. পঠমসিক্খাপদৱণ্ণনা

৯৭৮. কীড়নউপৱনং নাম কঞ্চিনগৰস্স নগৰুপৱনং ৱিয দট্ঠব্বং. উয্যানং নাম তত্থেৱ নন্দৱনউয্যানং ৱিয দট্ঠব্বং. ‘‘তত্থেৱ ঠত্ৱা তং তং দিসাভাগং ৱিলোকেত্ৱা পস্সন্তিযা পন পাটেক্কা আপত্তিযো’’তি পাঠো. এৱং ৱুত্তে যং পুব্বে ৱুত্তং পদং ‘‘অনুদ্ধৰমানা’’তি, তং একস্মিংযেৱ দিসাভাগেতি সিদ্ধন্তি একে. উপচাৰো দ্ৱে লেড্ডুপাতোতি চ.

পঠমসিক্খাপদৱণ্ণনা নিট্ঠিতা.

২. দুতিযসিক্খাপদৱণ্ণনা

৯৮৪. ‘‘আহৰিমেহি ৱাড়েহী’’তি ‘‘অসংহাৰিমেনা’’তি চ দুৱিধো পাঠো. ‘‘ৱিসুং কত্ৱা পচ্ছা সদ্ধিং তেহি ৱাড়েহী’’তি লিখিতং. যথা তথা ৱাড়ৰূপে উট্ঠপেত্ৱা কতপাদং ‘‘পল্লঙ্ক’’ন্তি ৱুচ্চতি অনাপত্তিৱাৰে ‘‘অসংহাৰিমেহি ৱাড়েহি কতং পৰিভুঞ্জতী’’তি ৱচনাভাৱতো.

দুতিযসিক্খাপদৱণ্ণনা নিট্ঠিতা.

৩. ততিযসিক্খাপদৱণ্ণনা

৯৮৮. ‘‘উজ্জৱুজ্জৱেতি হত্থপ্পসাৰণে’’তি লিখিতং, তং ন যুত্তং ‘‘যত্তকং হত্থেন অঞ্ছিতং হোতি, তস্মিং তক্কম্হি ৱেঠিতে একাপত্তী’’তি ৱচনতো.

ততিযসিক্খাপদৱণ্ণনা নিট্ঠিতা.

৪. চতুত্থসিক্খাপদৱণ্ণনা

৯৯৩. ‘‘যাগুপানেতি যাগুদানে’’তি লিখিতং. পোৰাণগণ্ঠিপদে ‘‘মাতাপিতূনং দাতুং ৱট্টতী’’তি ৱুত্তং.

চতুত্থসিক্খাপদৱণ্ণনা নিট্ঠিতা.

৯৯৪. পঞ্চমসিক্খাপদং উত্তানত্থমেৱ.

৬. ছট্ঠসিক্খাপদৱণ্ণনা

১০০১. ছট্ঠে ভিক্খুৱিভঙ্গে অচেলকসিক্খাপদেন একপৰিচ্ছেদং. ইধ অগাৰিকো ৱিসেসো, তস্মা ‘‘অসাধাৰণ’’ন্তি ৱদন্তি.

ছট্ঠসিক্খাপদৱণ্ণনা নিট্ঠিতা.

১০০৩-৮. সত্তমট্ঠমেসু ৱত্তব্বং নত্থি.

৯. নৱমসিক্খাপদৱণ্ণনা

১০১৫. ‘‘খীলনমন্তং দাৰুসাৰখীলং মন্তেত্ৱা পথৱিযং পৱেসেত্ৱা মাৰণমন্তং. নাগমণ্ডলংনাম নাগৰোধমন্তং, পিট্ঠাদীহি ৱা পৰিক্খেপং কত্ৱা তত্থ মনুস্সে পৱেসেন্তি গুত্তত্থাযা’’তি লিখিতং.

নৱমসিক্খাপদৱণ্ণনা নিট্ঠিতা.

১০১৭. দসমসিক্খাপদং উত্তানত্থমেৱ.

চিত্তাগাৰৱগ্গৱণ্ণনা নিট্ঠিতা.