৪. তুৱট্টৱগ্গৱণ্ণনা

১. পঠমসিক্খাপদৱণ্ণনা

৯৩৪-৫. একায নিপন্নায অপৰা নিপজ্জতি, আপত্তি পাচিত্তিযস্সাতি ‘‘উভিন্নম্পি পঠমনিপন্নায অনুট্ঠাপনা’’তি ৱত্ৱা এত্থ কিৰিযাকিৰিযন্তি একে, তং অট্ঠকথায ৱিৰুজ্ঝতি. ‘‘কিৰিয’’ন্তি হি অট্ঠকথাযং ৱুত্তং. অথ কস্সা আপত্তীতি? উভিন্নম্পি নিপজ্জনকিৰিযং পটিচ্চ. ইমস্স অনাপত্তিৱাৰে ‘‘ৱৱত্থানং দস্সেত্ৱা’’তি নত্থি, তস্মা ৱৱত্থানং কত্ৱা নিপজ্জিতুং ন ৱট্টতীতি একে. ৱিপুলতৰে ৱট্টতীতি একে. ‘‘অন্তৰং কত্ৱা নিপজ্জিতুং ৱট্টতী’’তি পোৰাণগণ্ঠিপদে লিখিতং.

পঠমসিক্খাপদৱণ্ণনা নিট্ঠিতা.

২. দুতিযসিক্খাপদৱণ্ণনা

৯৪০. ৱৱত্থানং দস্সেত্ৱাতি এত্থ উপৰি পাৰুপনম্পি মজ্ঝে ওভোগং কত্ৱা উভিন্নং অন্তৰে ওতাৰেতি, ৱট্টতীতি একে. ৱৱত্থানঞ্চ যথা ঠানে ন তিট্ঠতি, তথা অতিক্কমিত্ৱা তুৱট্টেন্তিযা আপত্তিযেৱাতি. ‘‘কিৰিযাকিৰিয’’ন্তি চ পোৰাণগণ্ঠিপদে ৱুত্তং.

দুতিযসিক্খাপদৱণ্ণনা নিট্ঠিতা.

৩. ততিযসিক্খাপদৱণ্ণনা

৯৪১. অত্তনো সজ্ঝাযনট্ঠানে চে ৱুড্ঢতৰা আগচ্ছতি, ৱন্দনকালে ৱা, আপুচ্ছনকিচ্চং নত্থি. একস্মিং ওৱৰকে আপুচ্ছিতব্বং. ‘‘অথ ওৱৰকে মহাথেৰী ৱসতি, সম্মুখে ইতৰা, আপুচ্ছিতব্বা তস্সা উপচাৰত্তা’’তি পোৰাণগণ্ঠিপদে ৱুত্তং.

ততিযসিক্খাপদৱণ্ণনা নিট্ঠিতা.

৯৪৬-৯৫০. চতুত্থপঞ্চমসিক্খাপদং উত্তানত্থমেৱ.

৬. ছট্ঠসিক্খাপদৱণ্ণনা

৯৫৬. গহপতি নাম ঠপেত্ৱা সহধম্মিকে ৱেদিতব্বো, তস্মা ভিক্খুনা ৱা সামণেৰেন ৱা অননুলোমিকেন সংসগ্গেন সংসট্ঠাপি ন সমনুভাসিতব্বাতি সম্ভৱতি এৱ.

ছট্ঠসিক্খাপদৱণ্ণনা নিট্ঠিতা.

৯৬১-৫. সত্তমঅট্ঠম সিক্খাপদং উত্তানত্থমেৱ.

৯. নৱমসিক্খাপদৱণ্ণনা

৯৬৯. একিন্দ্ৰিযন্তি কাযিন্দ্ৰিযেনেৱ একিন্দ্ৰিযং, নিগণ্ঠানং অচেলকানং মতং. কাপিলা পন ‘‘পঞ্চিন্দ্ৰিযা’’তি মঞ্ঞন্তা এৱং ৱদন্তি ‘‘সচক্খুকত্তা অলাবুমালুৱাদযো যত্থ আলম্বনং, তত্থ গচ্ছন্তি. সসোতকত্তা কদলিযো মেঘগজ্জিতং সুত্ৱা গব্ভং গণ্হন্তি. সঘানকত্তা পনসাদযো কুণপগন্ধেন ফলন্তি. সজিৱ্হকত্তা উদকং পিৱন্তি যেন, সব্বেপি ‘পাদপা’তি ৱুচ্চন্তি. সকাযপসাদত্তা ইত্থিসম্ফস্সেন অসোকৰুক্খা পুপ্ফন্তী’’তি. সঙ্ঘাতন্তি ৱিনাসং.

৯৭০. ইধ চ ৱস্সচ্ছেদেন দুক্কটং. পঠমং আৱসিত্ৱা পচ্ছা চাৰিকা চৰণপচ্চযা পাচিত্তিযং আপজ্জতীতি ৱেদিতব্বং. অথ ৱস্সং অৱসিত্ৱা চৰতি, অৱস্সুপগমনপচ্চযা দুক্কটং আপজ্জতি. পোৰাণগণ্ঠিপদে পন ‘‘অন্তোসত্তাহে অন্তোৱস্সে চাৰিকং চৰন্তিযা পাচিত্তিযং. সত্তাহকৰণীযেন পন ৱট্টতি, ভিক্খুনো দুক্কটং হোতী’’তি ৱুত্তং.

৯৭২. কেনচি উব্বাড়্হাতি ৱস্সচ্ছেদকাৰণেনাতি নো তক্কোতি আচৰিযো. কিত্তাৱতা চাৰিকা হোতীতি? ইদং ন সব্বত্থ ৱিচাৰিতং. অনন্তৰসিক্খাপদে ‘‘অন্তমসো ছপ্পঞ্চযোজনানিপী’’তি ৱুত্তত্তা সো চ মঞ্ঞে হেট্ঠিমপৰিচ্ছেদোতি.

নৱমসিক্খাপদৱণ্ণনা নিট্ঠিতা.

১০. দসমসিক্খাপদৱণ্ণনা

৯৭৩. দসমে ‘‘আহুন্দৰিকা’’তি পঠন্তি কিৰ.

দসমসিক্খাপদৱণ্ণনা নিট্ঠিতা.

তুৱট্টৱগ্গৱণ্ণনা নিট্ঠিতা.