৩. নগ্গৱগ্গৱণ্ণনা

১-২. পঠমদুতিযসিক্খাপদৱণ্ণনা

৮৮৩. নগ্গৱগ্গস্স পঠমদুতিযানি উত্তানানি. পঠমে অযং ৱিসেসো – ভিক্খুস্স তথা ন্হাযন্তস্স দুক্কটং অঞ্ঞত্ৰ জন্তাঘৰউদকপটিচ্ছাদীহি. ন চ ৱিগৰহি তত্থ ভগৱা অত্তনাৱ অননুঞ্ঞাতত্তা উদকসাটিকাযাতি পোৰাণা. ‘‘একমেৱ নিৱাসেত্ৱা, পাৰুপিত্ৱা চ নহাযিতুং ন ৱট্টতী’’তি পোৰাণগণ্ঠিপদে ৱুত্তং.

পঠমদুতিযসিক্খাপদৱণ্ণনা নিট্ঠিতা.

৩. ততিযসিক্খাপদৱণ্ণনা

৮৯৪. ততিযে অন্তোচতূহপঞ্চাহং ধুৰং নিক্খিপন্তিযাপি আপত্তি এৱ. লিঙ্গপৰিৱত্তে ধুৰং নিক্খিপন্তিযা দুক্কটং তিকদুক্কটত্তা. ‘‘সম্বহুলাহি ভিক্খুনীহি সদ্ধিন্তি এত্থ চতস্সোপি সম্বহুলা’’তি পোৰাণগণ্ঠিপদে ৱুত্তং.

ততিযসিক্খাপদৱণ্ণনা নিট্ঠিতা.

৪. চতুত্থসিক্খাপদৱণ্ণনা

৮৯৮. চতুত্থে সঙ্ঘাটিচাৰন্তি এত্থ সঙ্ঘাটিআদিৱসেন অধিট্ঠিতানংযেৱাযং ৱিধি, নেতৰাসং কিৰ. তত্থ তিচীৱৰে এৱ ৱিপ্পৱাসপচ্চযা নিস্সগ্গিযং. অন্তোচীৱৰকালেপি পঞ্চাহিকং সঙ্ঘাটিচাৰং অতিক্কামেন্তিযা আপত্তিযেৱ. ‘‘ৱিনা এতেহি চীৱৰেহি উপসম্পদং কাতুং ন ৱট্টতী’’তি পোৰাণগণ্ঠিপদে ৱুত্তং.

চতুত্থসিক্খাপদৱণ্ণনা নিট্ঠিতা.

৫. পঞ্চমসিক্খাপদৱণ্ণনা

৯০৬. পঞ্চমস্স অনাপত্তিৱাৰে তায ৱা অৱিপ্পৱাসাযাতি অত্থতো লব্ভতি.

পঞ্চমসিক্খাপদৱণ্ণনা নিট্ঠিতা.

৯০৭-৯১১. ছট্ঠসত্তমানি উত্তানানি.

৮. অট্ঠমসিক্খাপদৱণ্ণনা

৯১৬. সোকজ্ঝাযিকা নাম কিৰ মাযাকাৰা. ৱিলুম্পকা ভণ্ডকাতি চ পোৰাণা.

অট্ঠমসিক্খাপদৱণ্ণনা নিট্ঠিতা.

৯. নৱমসিক্খাপদৱণ্ণনা

৯২০. ‘‘কথঞ্হি নাম অতিক্কামেস্সতী’’তি ৱুত্তত্তা থুল্লনন্দা চীৱৰকালসমযং আগমেথাতি অতিক্কমাপেসীতি সিদ্ধং হোতি.

নৱমসিক্খাপদৱণ্ণনা নিট্ঠিতা.

১০. দসমসিক্খাপদৱণ্ণনা

৯২৭. দসমে এককুলং এতদৱোচুন্তি এত্থ কুলং নাম তস্মিং মনুস্সা, তস্মা বহুৱচনং.

দসমসিক্খাপদৱণ্ণনা নিট্ঠিতা.

নগ্গৱগ্গৱণ্ণনা নিট্ঠিতা.