১. লসুণৱগ্গো

১. পঠমলসুণসিক্খাপদৱণ্ণনা

৭৯৩-৭. অহং লসুণেনাতি এত্থ ‘‘পৱাৰেমী’’তি পাঠসেসো. বদৰসাড়ৱং কিৰ বদৰফলানি সুক্খাপেত্ৱা চুণ্ণেত্ৱা কত্তব্বা খাদনীযৱিকতি.

পঠমলসুণসিক্খাপদৱণ্ণনা নিট্ঠিতা.

২. দুতিযসিক্খাপদৱণ্ণনা

৮০০. সংহৰাপেয্যাতি ‘‘সংহৰতি ৱা সংহৰাপেতি ৱা’’তি পদভাজনং ৱেদিতব্বং. কিঞ্চাপি এত্থ আপত্তিভেদো ন দস্সিতো, তথাপি খুৰসণ্ডাসকত্তৰিআদিপৰিযেসনঘংসনাদীসু পুব্বপযোগেসু দুক্কটং যুজ্জতি, যথা চেত্থ, এৱং তলঘাতকাদিম্হি চ আপত্তিভেদো পাড়িযং ন ৱুত্তো. যথাসম্ভৱং পন পুব্বপযোগেসু দুক্কটং সম্ভৱতি. এৱং ভিক্খুস্স এত্থ চ লসুণে চ দুক্কটং. ইদং কিৰিযাকিৰিযন্তি পোৰাণা. তত্থ ‘‘কিৰিযাকিৰিয’’ন্তি ন ৱুত্তং.

দুতিযসিক্খাপদৱণ্ণনা নিট্ঠিতা.

৮০২-৬. ততিযচতুত্থসিক্খাপদং উত্তানত্থমেৱ.

৫. পঞ্চমসিক্খাপদৱণ্ণনা

৮১২. পঞ্চমে উদকসুদ্ধিপচ্চযে সতিপি ফস্সসাদিযনে যথাৱুত্তপৰিচ্ছেদে অনাপত্তি. তত্থ দ্ৱিন্নং পব্বানন্তি ‘‘দ্ৱিন্নং অঙ্গুলানং সহপৱেসনে একেকঅঙ্গুলস্স একেকং পব্বং কত্ৱা দ্ৱে পব্বা, একঙ্গুলপ্পৱেসনে দ্ৱিন্নং পব্বানং উপৰি ন ৱট্টতীতি ৱেদিতব্বং. মহাপচ্চৰিযম্পি অযমেৱ নযো দস্সিতো’’তি লিখিতং.

পঞ্চমসিক্খাপদৱণ্ণনা নিট্ঠিতা.

৮১৫. ছট্ঠসিক্খাপদং উত্তানত্থমেৱ.

৭. সত্তমসিক্খাপদৱণ্ণনা

৮২০-৮২২. ‘‘নগৰং অতিহৰন্তী’’তি পাঠো. ‘‘নগৰদ্ৱাৰে অতিহৰন্তী’’তি কত্থচি, তত্থ দ্ৱাৰেনাতি অত্থো. অযমেৱ ৱা পাঠো. তং পুব্বাপৰৱিৰুদ্ধন্তি ‘‘পুনপি ৱুত্ত’’ন্তি ৱুত্তং ৱাদং সন্ধায, ন ততো পুব্বে তত্থ ৱুত্তং ৱাদং. এত্থ ‘‘মাতৰম্পি ৱিঞ্ঞাপেত্ৱাতি ৱচনেন ৱিৰুজ্ঝতী’’তি লিখিতং, তং দুল্লিখিতং, ন হি তেন ৱিৰোধং সন্ধায ইদং ৱুত্তন্তি. কৰণে চে পাচিত্তিযং, কাৰাপনেপি পাচিত্তিযেনেৱ ভৱিতব্বং. অথ কাৰাপনে দুক্কটং, কৰণেপি দুক্কটেনেৱ ভৱিতব্বং. ন হি কৰণে ৱা কাৰাপনে ৱা ৱিসেসো অত্থি আপজ্জনে সতীতি অধিপ্পাযো.

৮২৩. সম্পটিচ্ছিতুং ৱট্টতীতি অপ্পটিক্খিপিত্ৱা ‘‘সাধূ’’তি ৱত্তুং ৱট্টতীতি অধিপ্পাযো. ন হি পটিগ্গহেতুং ৱট্টতি. অনামাসত্তা ‘‘আমকধঞ্ঞং পন ঞাতকপৱাৰিতট্ঠানেপি ন ৱট্টতী’’তি ৱুত্তং. অনুগণ্ঠিপদে পন ‘‘কপ্পিযেন লদ্ধং ধঞ্ঞং ভজ্জিত্ৱা ভুঞ্জন্তিযা দুক্কটং. অপৰণ্ণেপি এসেৱ নযো’’তি চ ‘‘অনাপত্তি আবাধপচ্চযাতি ৱচনতো সত্ত ধঞ্ঞানিপি অনামাসানীতি সিদ্ধং, তেনেৱ হেট্ঠা অট্ঠকথাযং দুক্কটৱত্থুম্হি সত্ত ধঞ্ঞানিপি গহিতানি অনামাসানী’’তি চ ৱুত্তানি. আমাসানি কপ্পিযৱত্থূনি চ যদি ভৱেয্যুং, যথা ঞাতকপৱাৰিতে সন্ধায ‘‘অপৰণ্ণং ৱিঞ্ঞাপেতী’’তি অৱিসেসেন ৱুত্তং, এৱং ‘‘অনাপত্তি ঞাতকানং পৱাৰিতানং অঞ্ঞস্স অত্থায ৱিঞ্ঞাপেতি, উম্মত্তিকায আদিকম্মিকাযা’’তি ৱত্তব্বং. যস্মা দুক্কটৱত্থুত্তা চ অনামাসত্তা চ মাতৰম্পি সত্তৱিধং ধঞ্ঞং ৱিঞ্ঞাপেতুং ন ৱট্টতি, তস্মা তদত্থদীপনত্থং সত্তৱিধং ধঞ্ঞং সন্ধায ‘‘অনাপত্তি আবাধপচ্চযা’’তি ৱুত্তং, যথা ভিক্খুনিযা আবাধপচ্চযা ৱট্টতি, তথা ভিক্খুস্সাপীতি চ. যথা ৱা পন ভিক্খুনিযা ভজ্জনাদীনি কাৰাপেতুং ন ৱট্টতি, এৱং ভিক্খুস্সাপি. ৱুত্তম্পি চেতং অন্ধকট্ঠকথাযং ‘‘অঞ্ঞতৰো বালভিক্খু কপ্পিযং অজানন্তো এতদৱোচ ‘আমকধঞ্ঞং সম্পটিচ্ছিতুং ভিক্খূনং ন ৱট্টতি. এতং ধঞ্ঞং ভজ্জিত্ৱা কোট্টেত্ৱা পচিত্ৱা যাগুখজ্জকং ভত্তঞ্চ দেথা’তি, আণাপকস্সেৱ ভিক্খুস্স আপত্তি, সব্বেসং অনাপত্তী’’তি. তস্মা ‘‘সঙ্ঘৱাৰিকানং ধঞ্ঞং কোট্টেথা’’তি আৰামিকানং ৱত্তুঞ্চ ন ৱট্টতি. ‘‘দিৱসং পৰিব্বযং গণ্হথ, তণ্ডুলে সম্পাদেথ, ত্ৱং এত্তকে গণ্হ, ত্ৱং এত্তকে’’তি এৱমাদীনি পন ৱত্তুং ৱট্টতীতি চ. যং পন ‘‘অৱিঞ্ঞত্তিযা লব্ভমানং পন নৱকম্মত্থায সম্পটিচ্ছিতুং ৱট্টতী’’তি ৱুত্তং, তম্পি হেট্ঠা ‘‘ইমং তড়াকং খেত্তং ৱত্থুং ৱিহাৰস্স দেমা’তি ৱুত্তে ‘সম্পটিচ্ছিতুং ৱট্টতী’’তি ৱুত্তং নযং সন্ধায ৱুত্তত্তা সুৱুত্তমেৱ. ‘‘নৱকম্মত্থায ধঞ্ঞং দেমা’’তি ৱুত্তে ‘‘সাধূ’’তি ৱত্তব্বং. যং পন হেট্ঠা ‘‘তত্থ নিস্সগ্গিযৱত্থুং অত্তনো ৱা সঙ্ঘগণপুগ্গলচেতিযানং ৱা অত্থায সম্পটিচ্ছিতুং ন ৱট্টতি…পে… দুক্কটৱত্থুং সব্বেসম্পি অত্থায সম্পটিচ্ছতো দুক্কটমেৱা’’তি ৱুত্তং, তম্পি সুৱুত্তমেৱ. কস্মা? ‘‘চেতিযস্স অত্থায ধঞ্ঞং দাতুকামোম্হি, তুম্হে ভন্তে তদত্থায সম্পটিচ্ছথা’’তি ৱুত্তে পটিগ্গহেতুং অকপ্পিযত্তা. ‘‘ইদং পন তাদিসং ন হোতী’’তি চ ৱুত্তং. সব্বোপাযং উপতিস্সত্থেৰৱাদো কিৰ. ধম্মসিৰিত্থেৰো পনেৱমাহ ‘‘পুব্বেপি নৱকম্মত্থায পটিগ্গহো ন ৱাৰিতো, সঙ্ঘস্সত্থায পটিগ্গহিতম্পি পটিগ্গাহকস্সেৱ অকপ্পিয’’ন্তি.

সত্তমসিক্খাপদৱণ্ণনা নিট্ঠিতা.

৮. অট্ঠমসিক্খাপদৱণ্ণনা

৮২৪. পোৰাণা ‘‘নিব্বিট্ঠৰাজভটো’’তি পঠন্তি. তস্সত্থো ৱাৰিতভত্তৱেতনো ৰাজভটোতি. ‘‘তঞ্ঞেৱ ভটপথন্তি তংযেৱ ভত্তৱেতন’’ন্তি অত্থং ৱদন্তি. উম্মুকন্তি অলাতং.

৮২৬. এত্থ ছড্ডিতং কিৰিযা. অনোলোকনং অকিৰিযা.

অট্ঠমসিক্খাপদৱণ্ণনা নিট্ঠিতা.

৯. নৱমসিক্খাপদৱণ্ণনা

৮৩২. ‘‘সামিকে অপলোকেত্ৱা ছড্ডেতী’’তি কত্থচি পোত্থকে নত্থি, কত্থচি অত্থি, অত্থিভাৱোৱ সেয্যো কিৰিযাকিৰিযত্তা সিক্খাপদস্স. ইধ খেত্তপালকা, আৰামাদিগোপকা চ সামিকা এৱ. ‘‘সঙ্ঘস্স খেত্তে, আৰামে চ তত্থ কচৱৰং ন ছড্ডেতব্বন্তি কতিকা চে নত্থি, ভিক্খুস্স ছড্ডেতুং ৱট্টতি সঙ্ঘপৰিযাপন্নত্তা, ন ভিক্খুনীনং. তাসম্পি ভিক্খুনিসঙ্ঘসন্তকে ৱুত্তনযেন ৱট্টতি, ন তত্থ ভিক্খুস্স, এৱং সন্তেপি সাৰুপ্পৱসেনেৱ কাতব্ব’’ন্তি ৱুত্তং.

নৱমসিক্খাপদৱণ্ণনা নিট্ঠিতা.

১০. দসমসিক্খাপদৱণ্ণনা

৮৩৩. সাধুকীড়িতগীতং ৱাতি এত্থ পাচিণ্ণগীতম্পি সোতুং ন ৱট্টতি. ‘‘গীতুপসঞ্হিতং পন ধম্মং সোতুং ৱট্টতীতি দীঘনিকাযট্ঠকথাযং ৱুত্ত’’ন্তি ৱুত্তং. পোৰাণগণ্ঠিপদে পন ‘‘ধম্মগীতম্পি ন ৱট্টতী’’তি ৱত্ৱা ‘‘বুদ্ধস্স গাযাম ৱাদেমাতি ৱুত্তে সম্পটিচ্ছিতুং ন ৱট্টতি, দুক্কটং হোতী’’তি ৱুত্তং, ‘‘পূজং কৰোম, জাতকং ৱা ৱত্থুং ৱা দেসেমাতি ৱুত্তে ‘সাধূ’তি সম্পটিচ্ছিতুং ৱট্টতী’’তি চ ৱুত্তং.

৮৩৬. একপযোগো নাম একদিৱসাৱলোকনং. তেসংযেৱাতি যেসং নচ্চং পস্সতি. ‘‘ভিক্খুনী সযম্পি নচ্চিতুং ৱা গাযিতুং ৱা ৱাদিতুং ৱা ন লভতী’’তিআদি ইধ সিক্খাপদে নত্থি. কস্মা? এড়কলোমসমুট্ঠানত্তা. যদি এৱং কস্মা ৱুত্তন্তি চে? সুত্তানুলোমমহাপদেসতো. যদি নচ্চাদীনি পস্সিতুং ৱা সোতুং ৱা ন লভতি, পগেৱ অত্তনা কাতুন্তি নযতো লব্ভমানত্তা ৱুত্তং. ইতৰথা মহাপদেসা নিৰত্থকা সিযুং. এৱমঞ্ঞত্থাপি নযো নেতব্বো. ‘‘সমুট্ঠানম্পি ইধ ৱুত্তমেৱ অগ্গহেত্ৱা ছসমুট্ঠানৱসেন গহেতব্ব’’ন্তি লিখিতং. তং ‘‘অঞ্ঞে নচ্চ, গায, ৱাদেহী’’তি ৱত্তুং ন লব্ভতীতিআদিৱচীকম্মং সন্ধায লিখিতঞ্চে, তং সুলিখিতং এড়কলোমসমুট্ঠানে ৱাচায অভাৱতো. ‘‘সযম্পি নচ্চিতু’’ন্তিআদিকাযকম্মঞ্চে সন্ধায লিখিতং, দুল্লিখিতং. এড়কলোমসমুট্ঠানঞ্হি একন্ততো কাযকম্মং হোতি, তস্মা উদ্ধটং অগ্গহেত্ৱা আদিসদ্দেন সঙ্গহিতমেৱ ইধ গহেতব্বন্তি. এতং এড়কলোমসমুট্ঠানত্তাতি এত্থ কাৰণৱচনে সুত্তানুলোমমহাপদেসতোতি এত্থ পন উদ্ধটং গহেতব্বং, এৱং যথালাভৱসেন তং লিখিতন্তি ৱেদিতব্বং. ‘‘আহচ্চভাসিতসিক্খাপদৱসেন এড়কলোমসমুট্ঠান’’ন্তি ৱুত্তন্তি উপতিস্সত্থেৰো. ‘‘এড়কলোমসমুট্ঠানঞ্চে ইদং সিক্খাপদং, আণাপকো মুচ্চেয্য, ন চ মুচ্চতী’’তি ৱুত্তং. তং ‘‘কস্মা’’তি ৱুত্তে ‘‘সব্বঅট্ঠকথাসু ৱুত্ত’’ন্তি অট্ঠকথাচৰিযো আহাতি ধম্মসিৰিত্থেৰো.

৮৩৭. আৰামে ঠত্ৱাতি ন কেৱলং ঠত্ৱা, ততো গন্ত্ৱা পন সব্বিৰিযাপথেহিপি লভতি. ‘‘আৰামে ঠিতাতি পন আৰামপৰিযাপন্নাতি অত্থো, ইতৰথা নিসিন্নাপি ন লভেয্যা’’তি লিখিতং, তং সুলিখিতমেৱ.

দসমসিক্খাপদৱণ্ণনা নিট্ঠিতা.

লসুণৱগ্গৱণ্ণনা নিট্ঠিতা.