৮. ৱত্তক্খন্ধকৱণ্ণনা

আগন্তুকৱত্তকথাৱণ্ণনা

৩৫৭. একস্মিং গামে অঞ্ঞৱিহাৰতো আগতোপি আগন্তুকোৱ. তত্থ কেচি এৱং ৱদন্তি ‘‘আৱাসিকো কত্থচি গন্ত্ৱা সচে আগতো, ‘তেনাপি আগন্তুকভত্তং ভুঞ্জিতব্ব’ন্তি ৱুত্তত্তা দূৰাগমনং ৱুত্তং হোতি, ন গামে, তস্মা ন যুত্ত’’ন্তি. তে ৱত্তব্বা ‘‘আগন্তুকভত্তং নাম গহট্ঠেহি ঠপিতং. যস্মিং নিবদ্ধং, ততো অঞ্ঞগামতোতি আপন্নং. তথা ৱিহাৰাধিকাৰত্তা অঞ্ঞৱিহাৰতো আগতোপি আগন্তুকো ৱা’’তি আচৰিযানং সন্নিট্ঠানং. পানীযং পুচ্ছিতব্বং, পৰিভোজনীযং পুচ্ছিতব্বন্তি উদ্ধৰিত্ৱা ঘটসৰাৱাদিগতং সন্ধায পঠমং, দুতিযং কূপতড়াকাদিগতন্তি আচৰিযো. দুতিযৱাৰে অত্তনো ৱসনট্ঠানত্তা ৱিসুং পুচ্ছিতব্বমেৱ, তস্মা ৱুত্তং এতং ‘‘পৰিচ্ছিন্নভিক্খো ৱা গামো’’তি. বহূসু পোত্থকেসু দুৱিধাপি যুজ্জতি.

অনুমোদনৱত্তকথাৱণ্ণনা

৩৬২-৪. পঞ্চমে অনুমোদনত্থায নিসিন্নে. ‘‘মনুস্সানং পৰিৱিসনট্ঠানন্তি যত্থ মনুস্সা সপুত্তদাৰা আৱসিত্ৱা দেন্তী’’তি লিখিতং. ইমস্মিং খন্ধকে আগন্তুকাৱাসিকগমিকানুমোদনভত্তগ্গপিণ্ডচাৰিকাৰঞ্ঞকসেনাসনজন্তাঘৰৱচ্চকুটিউপজ্ঝাচৰিযসদ্ধিৱিহাৰিকন্তেৱাসিকৱত্তানি চুদ্দস মহাৱত্তানি নাম. অগ্গহিতগ্গহণেন গণিযমানানি অসীতি খন্ধকৱত্তানি নাম হোন্তি.

ৱত্তক্খন্ধকৱণ্ণনা নিট্ঠিতা.