৮. চীৱৰক্খন্ধকৱণ্ণনা

জীৱকৱত্থুকথাৱণ্ণনা

৩২৬. ৰাজগহকোতি ৰাজগহৱাসী.

৩২৮. অমোহজাতিকত্তা ন চিৰস্সেৱ ৱিঞ্ঞুতং পাপুণি. অহং তে পিতা, কেনট্ঠেন? যস্মা ত্ৱং মযা পোসাপিতো.

৩২৯. ‘‘সক্কে ৱিস্সট্ঠমত্তে’’তি পাঠো, অট্ঠমসিক্খাপদে ৱিস্সট্ঠমত্তোৱ.

পজ্জোতৰাজৱত্থুকথাৱণ্ণনা

৩৩৪. ভুঞ্জিতুং নিসিন্নস্সাতি এত্থ ‘‘ধম্মপদে ‘বহিনগৰে দিস্ৱা’তি ৱুত্তং, তস্মা দ্ৱীসু দিৱসেসু দিন্নং তেন তেসু একেকং গহেত্ৱা দ্ৱীসু অট্ঠকথাসু ৱুত্তন্তি যুজ্জতী’’তি ৱদন্তি.

সমত্তিংসৱিৰেচনকথাৱণ্ণনা

৩৩৬. কবড়ে কবড়েতি এত্থ কিঞ্চাপি গুড়াদীসু পক্খিত্তং, তং পন ভগৱাৱ পৰিভুঞ্জি, তস্মা নত্থি দোসো.

ৱৰযাচনকথাৱণ্ণনা

৩৩৭. মহাপিট্ঠিযকোজৱং নাম অতিৰেকচতুৰঙ্গুলপুপ্ফং কিৰ.

কম্বলানুজাননাদিকথাৱণ্ণনা

৩৪০. উপচাৰেতি সুসানস্স উপচাৰে. বহিপি ৱট্টতীতি একে. কতিককৰণং দস্সেত্ৱা ‘‘ময্হং সন্তকং তৱ চ মম চ হোতূতি ৱত্ৱা ইতৰেন চ তথাৱুত্তে ৱট্টতী’’তি সমানপৰিক্খাৰৱিধিং ৱদন্তি.

৩৪২. ‘‘খণ্ডসীমাযপি সম্মন্নিতুং ৱট্টতীতি ৱুত্তত্তা সেসকম্মানিপি তত্থ নিসীদিত্ৱা কাতুং ৱট্টতী’’তি ৱুত্তং. ‘‘এৱং সন্তে চোৰিকায কতসদিসং হোতি, তস্মা ন ৱট্টতী’’তি দীপৱাসিনো ৱদন্তি কিৰ. ‘‘চোৰিকায গহিতত্তা ন পাপুণাতীতি সেনাসনক্খন্ধকে আগতসুত্তঞ্চ সাধক’’ন্তি ৱদন্তি, তস্মা তেসং মতেন ইদং আৱেণিকলক্খণন্তি ৱেদিতব্বং.

ভণ্ডাগাৰসম্মুতিআদিকথাৱণ্ণনা

৩৪৩. ‘‘ইদং পন ভণ্ডাগাৰন্তি আৱেণিকলক্খণ’’ন্তি ৱুত্তং.

চীৱৰৰজনকথাৱণ্ণনা

৩৪৪. গোমযে আপত্তি নত্থি, ৱিৰূপত্তাৱাৰিতং. ‘‘কুঙ্কুমপুপ্ফং ন ৱট্টতী’’তি ৱদন্তি. ‘‘অল্লিকাযা’’তিপি পাঠো অত্থি.

নিসীদনাদিঅনুজাননকথাৱণ্ণনা

৩৫৩. অট্ঠানমেতন্তি এত্থ ৰূপকণ্ডে ‘‘চতুসমুট্ঠানিক’’ন্তি ৱুত্তত্তা কম্মসমুট্ঠানং ৰাগচিত্তাভাৱা ন মুচ্চতীতি ৱা ৰাগপচ্চযে সতি কম্মসমুট্ঠানং হোতীতি ৱা ৱিচাৰেত্ৱা গহেতব্বং কথাৱত্থুনা চ.

৩৬২. অগ্গড়গুত্তিযেৱ পমাণন্তি ইমেহি চতূহি নিক্খেপকাৰণেহি ঠপেন্তেন অগ্গড়গুত্তিৱিহাৰেযেৱ ঠপেতুং ৱট্টতীতি অধিপ্পাযো.

সঙ্ঘিকচীৱৰুপ্পাদকথাৱণ্ণনা

৩৬৩. নো চে অত্থতং হোতি ‘‘একং চীৱৰমাস’’ন্তি ন ৱত্তব্বং. কস্মা? ‘‘অনুজানামি, ভিক্খৱে, তস্সেৱ তানি চীৱৰানি যাৱ চীৱৰমাসা’’তি ৱচনস্স অভাৱতো, তস্মা অনত্থতকথিনস্স অননুঞ্ঞাতন্তি চে? ন, হেট্ঠা অনুঞ্ঞাতত্তা, ততো লীনত্থদীপনত্থমিধ তথা ৱুত্তত্তা চ. হেট্ঠা হি ‘‘অকালচীৱৰং নাম অনত্থতে কথিনে একাদসমাসে উপ্পন্নং, অত্থতে কথিনে সত্তমাসে উপ্পন্নং, কালেপি আদিস্স দিন্নং, এতং অকালচীৱৰং নামা’’তি (পাৰা. ৫০০) ৱচনতো অনত্থতকথিনানং একচীৱৰমাসে উপ্পন্নং, তেসংযেৱ হোতীতি সিদ্ধং, তস্মা ইধ তং অৱত্ৱা একোপি তযো গণপূৰকে লভিত্ৱা কথিনং অত্থৰিতুং লভতীতি ইমং লীনত্থং পকাসেতুং ‘‘যাৱ কথিনস্স উব্ভাৰাযা’’তি ৱুত্তং. ইতৰথা অযমত্থো ন ঞাযতি. ‘‘জানিতব্বো চ ৱিনযধৰেহীতি তথা ৱুত্তোতি অপৰে’’তি ৱুত্তং. অত্থতং হোতি, পঞ্চ মাসে সব্বং তস্সেৱ ভিক্খুনো হোতীতি সম্বন্ধো. অচ্চন্তসংযোগৱসেন উপযোগৱচনং. ‘‘ইধ ৱস্সংৱুত্থসঙ্ঘস্সা’’তি নিযমিতত্তা ‘‘ৱস্সাৱাসিকং দেমা’’তি এত্থ চ ‘‘ইধা’’তি অধিকাৰত্তা তস্মিং ৱুত্তে লভতি. ‘‘পিট্ঠিসমযে উপ্পন্নত্তাতি চীৱৰকালস্সাসন্নত্তা চ অনত্থতকথিনানম্পি ৱুত্থৱস্সানঞ্চ অনুঞ্ঞাতট্ঠানত্তা এৱ ৱুত্ত’’ন্তি অঞ্ঞতৰস্মিং গণ্ঠিপদে লিখিতং. কেচি পন ‘‘যং পন ইদং ‘ইধ ৱস্সংৱুত্থসঙ্ঘস্সা’তিআদিং কত্ৱা যাৱ ‘অনাগতৱস্সে’তি পদং, তাৱ পুচ্ছিত্ৱা ‘কস্মা? পিট্ঠিসমযে উপ্পন্নত্তা’তি ইদং পৰতো ‘তত্ৰ সম্মুখীভূতানং সব্বেসং পাপুণাতী’তি ইমস্স পৰিযোসানে ‘কস্মা? পিট্ঠিসমযে উপ্পন্নত্তা’তি লিখিতব্বং. কস্মাতি চে? পৰতো ‘চীৱৰমাসতো পট্ঠায যাৱ হেমন্তস্সা’তি ৱুত্তেন নিব্বিসেসত্তা, তস্মা এৱ একচ্চেসু পণ্ডিতন্তি ৱদন্তী’’তি ৱদন্তি. ইধ পন ইধ-সদ্দেন ৱিসেসিতং, তত্থ নত্থি, তস্মা অঞ্ঞমঞ্ঞৱিৰোধো নত্থীতি গহেতব্বং. ‘‘ময্হিমানি চীৱৰানি পাপুণন্তী’’তি ৱচনমেৱাধিট্ঠানং, ইদমেত্থ উক্কট্ঠৱসেন ৱুত্তং. ‘‘ময্হিমানি চীৱৰানী’তি ৱুত্তেপি অধিট্ঠিতমেৱ হোতী’’তি ৱুত্তং. ‘‘ময্হিমানী’তি ৱুত্তে তস্স চীৱৰানি নাম নত্থি, তস্মা ‘চীৱৰানি পাপুণন্তী’তি ৱত্তব্বমেৱা’’তি ৱদন্তি. দুগ্গহিতানীতি সঙ্ঘিকানেৱ হোন্তি. ‘‘গহিতমেৱ নামা’তি ইমস্স ইদং পত্তন্তি কিঞ্চাপি ন ৱিদিতং, তে পন ভাগা তেসং অত্থতো পত্তাযেৱাতি অধিপ্পাযো’’তি লিখিতং. ‘‘একস্মিং অপতিতে পুন আগতা লভন্তী’’তি ৱুত্তং.

উপনন্দসক্যপুত্তৱত্থুকথাৱণ্ণনা

৩৬৪. ‘‘ন, ভিক্খৱে, অঞ্ঞত্ৰ ৱস্সংৱুত্থেনা’’তি চীৱৰসমযং উপাদায পটিক্খেপো কতো.একস্মিং ৱিহাৰে ‘‘ৰাজৱিহাৰে ৱিয নানাপৰিৱেণেসু ৱা ইধ ৱা ৱুত্থা লভতূ’’তি ৱত্ৱা দিন্নং. ‘‘সত্তাহৱাৰেন অৰুণমেৱ উট্ঠাপেতীতি এতং ৱচনমত্তমেৱ একৱিহাৰে সত্তাহকিচ্চাভাৱা’’তি চ লিখিতং.

মতসন্তককথাৱণ্ণনা

৩৬৯. ভিক্খুস্সাতি ভিক্খুস্মিং কালংকতে. তত্থ ‘‘পত্তচীৱৰে’’তি পধানপৰিক্খাৰদস্সনমুখেন সব্বপৰিক্খাৰনিদস্সনন্তি ৱেদিতব্বং. অধম্মেন উপ্পন্নঞ্চেতং হোতি, সঙ্ঘস্স কপ্পিযমেৱ মতত্তাতি একে. নোতি তক্কো পত্তচতুক্কে সব্বথা অকপ্পিযপত্তনযৱিৰোধতো. অধম্মেন উপ্পন্নসেনাসনে চ ৱসতো অনাপত্তি. অঞ্ঞতৰস্মিং আৱাসে দ্ৱে ভিক্খূ ৱসন্তি, তত্থ চেকো কালংকতো, ইতৰো তস্স পৰিক্খাৰং অপাপেত্ৱা তং থেয্যচিত্তেন গণ্হাতি, সঙ্ঘসন্তকং গহিতং হোতি, ভণ্ডগ্ঘেন কাৰেতব্বো. অনাৱাসে গণ্হাতি, ন কাৰেতব্বো অস্সামিকস্স গহিতত্তা. মৰণসমযে ৱত্তুং অসহন্তো চে চিত্তেনেৱ দেতি, পুঞ্ঞং পসৱতি, সঙ্ঘোৱ তস্স সামী. পৰো ৱা অৱিস্সাসিকো সযমেৱ গণ্হাতি, গহণং ন ৰুহতি, থেয্যচিত্তেন চে, ভণ্ডগ্ঘেন কাৰেতব্বো. তস্স চ আৱাসগতস্স কো সামী. ‘‘সঙ্ঘো সামী’’তি ৱচনতো সঙ্ঘেন বলক্কাৰেন সো ৱাৰেতব্বোতি একে. জীৱমানকালে গহিতত্তা ন সঙ্ঘো সামীতি একে. সামিকো চে সযং পস্সিত্ৱা অচ্ছিন্দিতুং লভতি, সঙ্ঘোপি লভতি সামিঠানে ঠিতত্তাতি ইতৰে, ৱিচাৰেত্ৱা গহেতব্বং.

মতকস্স হিৰঞ্ঞাদিঅকপ্পিযভণ্ডং হোতি. উগ্গহিতঞ্চেতং হোতি, উগ্গহিতে ৱুত্তনযেন পটিপজ্জিতব্বং. ধম্মেন উপ্পন্নং চে, কপ্পিযকাৰকো আচিক্খিতব্বো. দাসো চে গহিতো হোতি, ন সঙ্ঘো সামী, আৰামিকো চে, সঙ্ঘো সামী. গাৱীমহিংসীআদযো হোন্তি, আৱাসগতানং সঙ্ঘো সামী, অনাৱাসগতানং ন সঙ্ঘো সামী. সঙ্ঘো চে আৱাসং আনেত্ৱা অত্তনো সন্তকং কত্ৱা পচ্ছা সমীপে বহিসীমায ঠপেতি, কাৰকসঙ্ঘো সামী, তথা আৰামিকে. মতকস্স পৰিক্খাৰো নিক্খেপৱসেন ঠপিতো হোতি, এসোৱ সামী. মহগ্ঘো চে হোতি, সেসস্স সঙ্ঘো সামী. ‘‘কেনচি গিলানুপট্ঠাকেনা’’তি ৱত্তব্বক্কমো এতেন দস্সিতো. পুন উপট্ঠাকানং বহুভাৱে সতি সব্বেসং দাতব্বকম্মং দস্সেন্তেন ভগৱতা কম্মৱাচাযং ‘‘গিলানুপট্ঠাকান’’ন্তি ৱুত্তং. সামণেৰৱাৰে ‘‘চীৱৰ’’ন্তি পাঠো. ‘‘ইমং তুয্হং দেমি দদামি দজ্জামি ওণোজেমি পৰিচ্চজামি ৱিস্সজ্জামি নিস্সজ্জামী’তি ৱা ‘ইত্থন্নামস্স দেমি…পে… নিস্সজ্জামী’তি ৱা ৱদতি, ‘সম্মুখা ৱা পৰম্মুখা ৱা ৱুত্তে দিন্নংযেৱ হোতী’তি দানলক্খণস্স চ ‘তুয্হং গণ্হাহী’তি ৱুত্তে ‘ময্হং গণ্হামী’তি ৱদতি, ‘সুদিন্নং সুগ্গহিতঞ্চা’তি (পাৰা. অট্ঠ. ২.৪৬৯) গহণলক্খণস্স চ ৱুত্তত্তা ‘মম সন্তকং তৱ চ মম চ হোতূ’তি এৱমাদিৱচনেন সমানপৰিক্খাৰং কাতুং ৱট্টতীতি আচৰিযা’’তি লিখিতং.

অনুগণ্ঠিপদে পন অতীৱ পপঞ্চং কত্ৱা পুন ‘‘ইদমেত্থ আচৰিযানং সন্নিট্ঠানং – সচেসম্বহুলা, দ্ৱে ৱা সমানপৰিক্খাৰং কত্তুকামা হোন্তি, তে সব্বে অত্তনো সন্তকং ৱত্তমানং উপ্পজ্জনকেন সদ্ধিং পেসলস্স একস্স পৰিচ্চজন্তি, সো পুন তেসমেৱ পৰিচ্চজতি, এত্তাৱতা তে সমানপৰিক্খাৰিকা হোন্তীতি. ইদং সমানপৰিক্খাৰলক্খণং পাড়িআদীসু ৱুত্তলক্খণেযেৱ পতনতো অচলপ্পত্তং হোতি, তথাপি পোৰাণৱিধিং অজ্ঝোত্থৰিত্ৱা ৱত্তনতো পটিসেধেতব্বো, আচৰিযানং মতানুসাৰেন কাতব্বং কাতুকামেনাতি অপৰে’’তি ৱুত্তং, ‘‘ৱস্সংৱুত্থসামণেৰো পঞ্চসু সিক্খাপদেসু একং অতিক্কমিত্ৱা পুন গহিতো লাভং ন লভতি, অন্তিমৱত্থুং অজ্ঝাপন্নো নাম হোতী’’তি ৱদন্তি.

ৱস্সংৱুত্থানংঅনুপ্পন্নচীৱৰকথাৱণ্ণনা

৩৭৫. উপ্পন্নে চীৱৰে অভাজিতে পক্কমতীতি এত্থ ‘‘সঙ্ঘেন তত্ৰুপ্পাদতো একেকস্স ভিক্খুনো এত্তকং ৱস্সাৱাসিকং দাতুং সঙ্ঘস্স ৰুচ্চতী’’তি সাৱিতেপি ৱিব্ভমতি, ততো ন লভতি, পুন পব্বজিত্ৱা উপসম্পজ্জিত্ৱা চীৱৰভাজনং সম্ভাৱেন্তোপি ন লভতিযেৱ পুব্বপকতিতো ভট্ঠত্তা. অথ পাপিতে ৱিব্ভমতি, লভতী’’তি চ ৱুত্তং.

সঙ্ঘেভিন্নেচীৱৰুপ্পাদকথাৱণ্ণনা

৩৭৬. পৰসমুদ্দেতি জম্বুদীপে.

অট্ঠচীৱৰমাতিকাকথাৱণ্ণনা

৩৭৯. যস্মা অপৰিক্খিত্তস্স পৰিক্খেপাৰহট্ঠানং দুব্বিজানং, তস্মা ‘‘অপিচা’’তিআদি ৱুত্তং. তত্থ ধুৱসন্নিপাতট্ঠানম্পি পৰিযন্তগতমেৱ গহেতব্বং. ‘‘মহাপচ্চৰিযং পন ভিক্খূসুপি…পে… পাপুণাতীতি ‘উপচাৰসীমায দেমা’তি এৱং দিন্নমেৱ সন্ধাযা’’তি লিখিতং. ‘‘সমানসংৱাসকসীমাযা’’তি ৱুত্তে খণ্ডসীমাদীসু ঠিতানং ন পাপুণাতি তাসং ৱিসুং সমানসংৱাসকসীমত্তা. সমানসংৱাসকঅৱিপ্পৱাসসীমানং ইদং নানত্তং – ‘‘অৱিপ্পৱাসসীমায দম্মী’’তি দিন্নং গামট্ঠানং ন পাপুণাতি. কস্মা? ‘‘ঠপেত্ৱা গামঞ্চ গামূপচাৰঞ্চা’’তি ৱুত্তত্তা. ‘‘সমানসংৱাসকসীমাযা’’তি দিন্নং পন যস্মিং ঠানে অৱিপ্পৱাসসীমা অত্থি, তত্থ ঠিতানং, ইতৰত্ৰ ঠিতানঞ্চ পাপুণাতি. ‘‘খণ্ডসীমাযং ঠত্ৱা ‘সীমট্ঠকসঙ্ঘস্স দম্মী’তি ৱুত্তে উপচাৰসীমায এৱ পৰিচ্ছিন্দিত্ৱা দাতব্ব’’ন্তি ৱুত্তং. ‘‘অৱিপ্পৱাসসীমায দেমা’’তি খণ্ডসীমাযং ঠত্ৱা দিন্নে তত্থেৱ পাপুণাতীতি কেচি. যোজনসতম্পি পূৰেত্ৱা নিসীদন্তীতি এত্থ ৱিহাৰূপচাৰে হত্থপাসেন, বহিগামাদীসু দ্ৱাদসহত্থেন উপচাৰোতি একে. ‘‘ইমস্মিং ৱিহাৰে সঙ্ঘস্সা’’তি ৱুত্তে একাবদ্ধা হুত্ৱাপি পৰিক্খেপপৰিক্খেপাৰহট্ঠানং অতিক্কমিত্ৱা ঠিতানং ন পাপুণাতীতি একে. ‘‘ভিক্খুনিৱিহাৰতো বহি যত্থ কত্থচি ঠত্ৱা ‘সঙ্ঘস্সা’তি ৱুত্তে ভিক্খুসঙ্ঘোৱ সামী’’তি ৱদন্তি. একোপি গন্ত্ৱাতি এত্থ সব্বেসং ৱা পাপেত্ৱা গন্তব্বং, আনেত্ৱা ৱা পাপেতব্বং, ইতৰথা গতস্স ন পাপুণাতি. সমানলাভকতিকা মূলাৱাসে সতি সিযা, মূলাৱাসৱিনাসেন কতিকাপি ৱিনস্সতি. সমানলাভৱচনং সতি দ্ৱীসু, বহূসু ৱা যুজ্জতি. তেনেৱ একস্মিং অৱসিট্ঠে যুজ্জতীতি নো মতি.

‘‘তাৱকালিককালেন, মূলচ্ছেদৱসেন ৱা;

অঞ্ঞেসং কম্মং অঞ্ঞস্স, সিযা নাৱাসসঙ্গমো’’তি. –

আচৰিযো.

সব্বত্থ দিন্নমেৱাতি ‘‘সমানভাগোৱ হোতী’’তি ৱদন্তি. ‘‘একমেকং অম্হাকং পাপুণাতীতি চে ৱদতি, ৱট্টতী’’তি ৱদন্তি ৱিভাগস্স কতত্তা. ‘‘ভিক্খুসঙ্ঘস্স চীৱৰে দিন্নে পংসুকূলিকানং ন ৱট্টতী’’তি ৱদন্তি. ‘‘উভতোসঙ্ঘস্সা’’তি ৱুত্তে ‘‘ভিক্খুসঙ্ঘস্সা’’তি অৱুত্তত্তা ভিক্খুনিসঙ্ঘেন মিস্সিতত্তা, তত্থ অপৰিযাপন্নত্তা চ পুগ্গলো ৱিসুং লভতি. এৱং সন্তে ‘‘ভিক্খুসঙ্ঘস্স চ ভিক্খুনিসঙ্ঘস্স চ দম্মী’’তি ৱুত্তেপি ‘‘উভতোসঙ্ঘস্স দিন্নমেৱ হোতী’’তি ইমিনা ৱিৰুজ্ঝতীতি চে? ন ৱিৰুজ্ঝতি, তং দ্ৱিন্নং সঙ্ঘানং দিন্নভাৱমেৱ দীপেতি, ন উভতোসঙ্ঘপঞ্ঞত্তিং, তস্মা এৱ ‘‘ভিক্খুসঙ্ঘস্স চ ভিক্খুনিসঙ্ঘস্স চ তুয্হঞ্চা’’তি ৱাৰো ন ৱুত্তো. অথ ৱা অট্ঠকথাৱচনমেৱ পমাণং, ন ৱিচাৰণাতি একে. যস্মা একো অদ্ধানাদিযকো ৱিয দুৱিধো ন হোতি, তস্মা উভতোসঙ্ঘগ্গহণেন একো ভিক্খু ন গহিতোতি. ‘‘সব্বাৱাসস্স চ চেতিযস্স চ ধম্মস্স চা’তি ৱুত্তে সব্বৱিহাৰেসু চেতিযধম্মানং একেকস্স ভিক্খুনো ভাগো দাতব্বো’’তি ৱদন্তি. ‘‘ভিক্খুসঙ্ঘস্স চ চেতিযস্স চা’’তি ৱুত্তে ন ৱিৰুজ্ঝতীতি চে? ন, তত্থ ‘‘ভিক্খুসঙ্ঘস্সা’’তি ৱুত্তত্তা, ইধ ৱিহাৰেন ঘটিতত্তা চ তম্হি তম্হি ৱিহাৰে একভাগং লভিতব্বমেৱাতি পৰিহৰন্তি. অত্তনো পাপেত্ৱাতি ৱিকালে অপৰিভোগত্তা সকলোপি ৱট্টেয্যাতি চে? ‘‘ভিক্খুসঙ্ঘস্স হৰা’’তি ৱুত্তত্তা, তেন ‘‘হৰামী’’তি গহিতত্তা চ ন ৱট্টতি. পচ্ছিমৱস্সংৱুত্থানম্পীতি এত্থ অপি-সদ্দো অৱধাৰণত্থো, পচ্ছিমৱস্সংৱুত্থানমেৱাতি অত্থো, ইতৰথা সমুচ্চযত্থে গহিতে ‘‘লক্খণঞ্ঞূ ৱদন্তী’’তি ৱচনং নিৰত্থকং সিযা. কস্মাতি আৰভিত্ৱা পপঞ্চং কৰোন্তি. কিং তেন, পৰতো ‘‘চীৱৰমাসতো পট্ঠায…পে… অতীতৱস্সংৱুত্থানমেৱ পাপুণাতী’’তি ইমিনা সিদ্ধত্তা ন ৱিচাৰিতং, তেন ৱুত্তং ‘‘লক্খণঞ্ঞূ’’তি অচলৱসেন. সচে পন বহিউপচাৰসীমায ঠিতো…পে… সম্পত্তানং সব্বেসং পাপুণাতীতি যত্থ কত্থচি ৱুত্থৱস্সানন্তি অধিপ্পাযো ‘‘যত্থ কত্থচি ৱুত্থৱস্সানং সব্বেসং সম্পত্তানং পাপুণাতী’’তি (কঙ্খা. অট্ঠ. অকালচীৱৰসিক্খাপদৱণ্ণনা) কঙ্খাৱিতৰণিযং ৱুত্তত্তা. গিম্হানং পঠমদিৱসতো পট্ঠায ৱুত্তে পন যস্মা অনন্তৰাতীতং হেমন্তং এৱ ৱুত্থা নাম হোন্তি, ন ৱস্সং, তস্মা ‘‘মাতিকা আৰোপেতব্বা’’তি ৱুত্তং. যে ৱা থেৰেহি পেসিতা, তেসং পাপুণাতীতি কিৰ অত্থো.

চীৱৰক্খন্ধকৱণ্ণনা নিট্ঠিতা.