৭. সপ্পাণকৱগ্গো

১. সঞ্চিচ্চপাণসিক্খাপদৱণ্ণনা

৩৮২. সঞ্চিচ্চপাণসিক্খাপদং উত্তানত্থমেৱ.

২. সপ্পাণকসিক্খাপদৱণ্ণনা

৩৮৭. ‘‘পাণো অত্থী’’তি জানন্তোপি ‘‘মৰিস্সন্তী’’তি অৱিচাৰেত্ৱা পিৱতিচে, অনাপত্তি.

জলে পক্খিপনং পুপ্ফং, জলপ্পৱেসনং ইদং;

এৱং উভিন্নং নানত্তং, ঞেয্যং ঞাণৱতা সদাতি.

সপ্পাণকসিক্খাপদৱণ্ণনা নিট্ঠিতা.

৩. উক্কোটনসিক্খাপদৱণ্ণনা

৩৯২. ততিযে দ্ৱাদস উক্কোটা ৱেদিতব্বা. তত্থ অকতং কম্মং, দুক্কটং কম্মং, পুন কাতব্বং কম্মন্তি অনুৱাদাধিকৰণে লব্ভন্তি. অনিহটং, দুন্নিহটং, ন পুন হৰিতব্বন্তি ৱিৱাদাধিকৰণে লব্ভন্তি, অৱিনিচ্ছিতং, দুৱিনিচ্ছিতং, পুন ৱিনিচ্ছিতব্বন্তি আপত্তাধিকৰণে লব্ভন্তি. অৱূপসন্তং, দুৱূপসন্তং, পুন ৱূপসমেতব্বন্তি কিচ্চাধিকৰণে লব্ভন্তীতি অট্ঠকথানযো, পাড়িযং পনেত্থ মুখমত্তমেৱ দস্সিতং.

উক্কোটনসিক্খাপদৱণ্ণনা নিট্ঠিতা.

৪. দুট্ঠুল্লসিক্খাপদৱণ্ণনা

৩৯৯. ‘‘পাৰাজিকানীতি অত্থুদ্ধাৰৱসেন দস্সিতানী’’তি কথং ৱিঞ্ঞাযতীতি চে? পৰিৱাৰপাড়িতো. ৱুত্তঞ্হি তত্থ ‘‘আপত্তাধিকৰণপচ্চযা কতি আপত্তিযো আপজ্জতি. আপত্তাধিকৰণপচ্চযা চতস্সো আপত্তিযো আপজ্জতি. ভিক্খুনী জানং পাৰাজিকং ধম্মং পটিচ্ছাদেতি, আপত্তি পাৰাজিকস্স. ৱেমতিকা পটিচ্ছাদেতি, আপত্তি থুল্লচ্চযস্স. ভিক্খু সঙ্ঘাদিসেসং পটিচ্ছাদেতি, আপত্তি পাচিত্তিযস্স. আচাৰৱিপত্তিং পটিচ্ছাদেতি, আপত্তি দুক্কটস্সা’’তি (পৰি. ২৯০). পাৰাজিকং পটিচ্ছাদেন্তো ভিক্খু অনাপত্তি, নো আপত্তিং আপজ্জতি অৱুত্তত্তাতি চে? ন, সংকিলিট্ঠেন চিত্তেন পটিচ্ছাদনে ৱিনা আপত্তিযা অসম্ভৱতো. দুক্কটৱাৰে ৱত্তব্বাপি পাৰাজিকাপত্তিযো পঠমং অত্থুদ্ধাৰৱসেন সঙ্ঘাদিসেসেহি সহ ৱুত্তত্তা ন সক্কা পুন ৱত্তুন্তি ন ৱুত্তাতি ৱেদিতব্বা.

যাৱ কোটি ন ছিজ্জতীতি চেত্থ যো অন্তমসো পটিচ্ছাদনত্থং অঞ্ঞস্স আৰোচেতু ৱা, মা ৱা, পটিচ্ছাদনচিত্তেনেৱ আপত্তিং আপন্নো. তস্স পুন অঞ্ঞস্স পটিচ্ছাদনত্থং অনাৰোচনেনেৱ ন কোটি ছিন্না হোতি, কিং পুন পটিনিৱত্তিত্ৱা ৱচনেন পযোজনন্তি ন অন্তিমস্স অনাৰোচনেন ছিন্না হোতি, অপ্পটিচ্ছাদনেন এৱ ছিন্না হোতি, ততো অপ্পটিচ্ছাদনত্থং অপুব্বস্স আৰোচেতব্বং, ততো পট্ঠায কোটি ছিন্না হোতি, তদভাৱো পটিনিৱত্তিত্ৱা অপ্পটিচ্ছাদনত্থং আৰোচেতব্বং, এৱম্পি কোটি ছিন্না হোতীতি এৱং নো পটিভাতীতি আচৰিযো. ততিযেন দুতিযস্সাতি এত্থ ‘‘দুতিযো নাম পঠমো’’তি ৱদন্তানং ‘‘ৱত্থু পুগ্গলো ন ৱত্তব্বো’’তি ৱাৰিতত্তা ন সুন্দৰং. অঞ্ঞস্স চতুত্থস্স আৰোচনেপি ন সুন্দৰং. কস্মা? পুব্বেৱ সুত্ৱা অঞ্ঞস্স অনাৰোচিতত্তা. ‘‘সুতেন অঞ্ঞস্স আৰোচেতব্বং সিযা’’তি ৱদন্তি.

দুট্ঠুল্লসিক্খাপদৱণ্ণনা নিট্ঠিতা.

৫. ঊনৱীসতিৱস্সসিক্খাপদৱণ্ণনা

৪০৪. পুনপ্পুনং উপ্পজ্জনতো বহুধা. হাযনৱড্ঢনন্তি মাতুকুচ্ছিস্মিং চে দ্ৱাদসন্নং মাসানং ঊনতায হাযনং কতং. পসূতস্স ৱড্ঢনং কাতব্বং. মাতুকুচ্ছিস্মিং চে ৱড্ঢনং কতং. পসূতস্স হাযনং কাতব্বং. নিক্খমনীযপুণ্ণমাসী নাম সাৱণমাসস্স পুণ্ণমাসী. ‘‘পাটিপদদিৱসেতি দুতিযে উপগচ্ছতি দিৱসে’’তি লিখিতং. সো হি পসূতদিৱসতো পট্ঠায পৰিপুণ্ণৱীসতিৱস্সো হোতি. অৱসেসানং দ্ৱিন্নং ৱস্সানং অধিকদিৱসানি হোন্তেৱ, তস্মা নিক্কঙ্খা হুত্ৱা উপসম্পাদেন্তি. তং সন্ধাযাতি গব্ভৱস্সঞ্চ পৱাৰেত্ৱা লদ্ধৱস্সঞ্চ অগণেত্ৱা জাতদিৱসতো পট্ঠায গণেত্ৱা একূনৱীসতিৱস্সং. একূনৱীসতিৱস্সোতি ‘‘গব্ভৱস্সং এৱ পহাযা’’তি লিখিতং, তং দুল্লিখিতং.

৪০৬. অঞ্ঞং উপসম্পাদেতীতি উপজ্ঝাযো ৱা আচৰিযো ৱা হুত্ৱা উপসম্পাদেতি. ‘‘ওপপাতিকস্স সোড়সৱস্সুদ্দেসিকভাৱতো পুন চত্তাৰো ৱস্সে অতিক্কমিত্ৱা উপসম্পদা কাতব্বা’’তি আচৰিযা ৱদন্তীতি কেচি.

ঊনৱীসতিৱস্সসিক্খাপদৱণ্ণনা নিট্ঠিতা.

৬. থেয্যসত্থসিক্খাপদৱণ্ণনা

৪০৯. থেয্যসত্থো চে সুদ্ধমাতুগামো দ্ৱে আপত্তিযো. অথ ভিক্খুনিযো, সমযো ৰক্খতি. থেয্যসত্থভাৱস্স ঠানং কত্ৱা ৰক্খণীযত্তা সহধম্মিকানং ৰক্খতিযেৱাতি একে. থেয্যভাৱে ন সহধম্মিকতা, তস্মা ন ৰক্খতি এৱাতি একে. অপাৰাজিকথেয্যভাৱে সতি সহধম্মিকভাৱোতি চে? ইতৰস্মিং ইতৰন্তি সমযো অনিস্সটো আপজ্জতি. ভিক্খু থেয্যসত্থো চে, যথাৱত্থুকমেৱ. থেয্যসত্থে থেয্যসত্থসঞ্ঞী সদ্ধিং সংৱিধাযাতি চ. ‘‘সদ্ধি’’ন্তি পদং কেসুচি নত্থি, তং অননুৰূপং. তথা দুতিযেপি.

থেয্যসত্থসিক্খাপদৱণ্ণনা নিট্ঠিতা.

৭. সংৱিধানসিক্খাপদৱণ্ণনা

৪১২. ‘‘তেন খো পন সমযেন অঞ্ঞতৰা ইত্থী’’তি চ পাঠো অত্থি, কেসুচি নত্থি. নত্থিভাৱো সুন্দৰো ‘‘তেন খো সমযেনা’’তি অধিকাৰত্তাতি কেচি. ইধ একতোউপসম্পন্না, সিক্খমানা, সামণেৰীতি ইমাপি তিস্সো সঙ্গহং গচ্ছন্তি. ইমাসং পন সমযো ৰক্খতি, অযমিমাসং, মাতুগামস্স চ ৱিসেসো.

৪১৪. অপিচেত্থ ‘‘ৱিঞ্ঞূ পটিবলা’’তি ৱচনতো অপ্পটিবলা অনাপত্তিৱত্থুকাতি একে, তং ন যুত্তং দুক্কটৱত্থুকত্তা. ‘‘ভিক্খু সংৱিদহতি, মাতুগামো ন সংৱিদহতি, আপত্তি দুক্কটস্সা’’তি হি ৱুত্তং. তথা হি উপপৰিক্খিতব্বং.

সংৱিধানসিক্খাপদৱণ্ণনা নিট্ঠিতা.

৮. অৰিট্ঠসিক্খাপদৱণ্ণনা

৪১৭. গহট্ঠস্সাপি ভিক্খুনীদূসককম্মং মোক্খন্তৰাযিকমেৱ, তস্মা তস্স পব্বজ্জাপি পটিক্খিত্তা. ৱিপাকন্তৰাযিকা অহেতুকত্তা. পুব্বে সঞ্চিচ্চ আপন্না সম্মুট্ঠা সুদ্ধসঞ্ঞিনো অন্তৰাযিকা এৱ. সেসাতি জাতিকা. ৰসেনাতি ভাৱেন. অধিকুট্টনট্ঠেনাতি অধিকৰণং কত্ৱা কুট্টনট্ঠেন ছিন্দনট্ঠেন. অসিসূনূপমা কুসলধম্মচ্ছেদনট্ঠেন. সত্তিসূলূপমা চিত্তৱিতুদনট্ঠেনাতি পোৰাণা. অনাপত্তিপাড়িযং ‘‘আদিকম্মিকস্সা’’তি মুখাৰুড়্হৱসেন লিখিতং.

অৰিট্ঠসিক্খাপদৱণ্ণনা নিট্ঠিতা.

৯. উক্খিত্তসম্ভোগসিক্খাপদৱণ্ণনা

৪২৫. ‘‘তং দিট্ঠিং অপ্পটিনিস্সট্ঠেনাতি ইমিনা লদ্ধিনানাসংৱাসকতং দীপেতী’’তি ৱুত্তং. তিচিত্তন্তি এত্থ ৱিপাকাব্যাকতচিত্তেন সহৱাসেয্যং কপ্পেয্যাতি এৱমত্থো দট্ঠব্বো. অঞ্ঞথা সচিত্তকত্তা সিক্খাপদস্স কিৰিযাব্যাকতং সন্ধায ন যুজ্জতি.

উক্খিত্তসম্ভোগসিক্খাপদৱণ্ণনা নিট্ঠিতা.

১০. কণ্টকসিক্খাপদৱণ্ণনা

৪২৮. যত্থ তে ন পস্সামাতি তেতি তং. অথ ৱা তৱ ৰূপাদিং ন পস্সাম. অযং সমণুদ্দেসো পাৰাজিকো হোতি. ‘‘সচে তং দিট্ঠিং পটিনিস্সজ্জতি, সঙ্ঘস্স আৰোচেত্ৱা সঙ্ঘানুমতিযা পব্বাজেতব্বো’’তি পোৰাণগণ্ঠিপদে ৱুত্তং, তং ন যুত্তং, দণ্ডকম্মনাসনা হি ইধাধিপ্পেতা. যদি সো পাৰাজিকো, লিঙ্গনাসনা নাম সিযা. তে পটিসেৱতো নালং অন্তৰাযাযাতি চ দিট্ঠি সত্থৰি অসত্থাদিদিট্ঠি ন হোতি. সচে সা যস্স উপ্পজ্জতি, সো পাৰাজিকো হোতি, তস্মিম্পি এৱমেৱ পটিপজ্জিতব্বং সংৱৰে অতিট্ঠন্তো লিঙ্গনাসনাযেৱ নাসেতব্বোতি আচৰিযস্স তক্কো.

কণ্টকসিক্খাপদৱণ্ণনা নিট্ঠিতা.

সমত্তো ৱণ্ণনাক্কমেন সপ্পাণকৱগ্গো সত্তমো.