৫. অচেলকৱগ্গো

১. অচেলকসিক্খাপদৱণ্ণনা

২৬৯. ৱিঘাসাদানং অন্তৰা পূৱলাভেন অঞ্ঞতৰা পৰিব্বাজিকা পৱিসিত্ৱা ঠিতা. দাপেতীতি অনুপসম্পন্নেন.

অচেলকসিক্খাপদৱণ্ণনা নিট্ঠিতা.

২. উয্যোজনসিক্খাপদৱণ্ণনা

২৭৬. ৱিজহন্তস্সাতি অনাদৰত্থে সামিৱচনং. উয্যোজকস্স ৱিজহন্তস্স সতো আপত্তি দুক্কটস্সাতিপি অত্থো. ইধ অনুপসম্পন্নো নাম সামণেৰোৱাধিপ্পেতো.

উয্যোজনসিক্খাপদৱণ্ণনা নিট্ঠিতা.

৩. সভোজনসিক্খাপদৱণ্ণনা

২৮০. সভোজনেতি এত্থ পঠমৱিকপ্পো ‘‘ইত্থী চ পুৰিসো চা’’তি ইমিনা ততিযপদেন যুজ্জতি, দুতিযৱিকপ্পো পঠমেহি দ্ৱীহি. কুলেতি ঘৰে. অনুপৱিসিত্ৱা নিসীদনচিত্তেন সচিত্তকং.

সভোজনসিক্খাপদৱণ্ণনা নিট্ঠিতা.

৪. ৰহোপটিচ্ছন্নসিক্খাপদৱণ্ণনা

২৮৪. ইধ পঞ্চমং উপনন্দস্স চতুত্থং হোতি, তস্মা ভিক্খুনিৱগ্গস্স দসমট্ঠকথাযং উপৰি উপনন্দস্স ‘‘ততিযসিক্খাপদেনা’’তি ন পাঠো, ‘‘চতুত্থেনা’’তি পাঠোতি ৱেদিতব্বো.

ৰহোপটিচ্ছন্নসিক্খাপদৱণ্ণনা নিট্ঠিতা.

৫. ৰহোনিসজ্জসিক্খাপদৱণ্ণনা

২৮৯. ৰহোনিসজ্জসিক্খাপদং উত্তানত্থমেৱ.

৬. চাৰিত্তসিক্খাপদৱণ্ণনা

২৯৪. সভত্তোতি নিমন্তনভত্তোতি পোৰাণা.

পুৰেভত্তঞ্চ পিণ্ডায, চৰিত্ৱা যদি ভুঞ্জতি;

সিযা পৰম্পৰাপত্তি, পচ্ছাভত্তং ন সা সিযা.

পচ্ছাভত্তঞ্চ গমিকো, পুব্বগেহং যদি গচ্ছে;

একে আপত্তিযেৱাতি, অনাপত্তীতি একচ্চে.

কুলন্তৰস্সোক্কমনে, আপত্তিমতযো হি তে;

সমানভত্তপচ্চাসা, ইতি আহু ইধাপৰে.

মতা গণিকভত্তেন, সমেন্তি নং নিমন্তনে;

ৱিস্সজ্জনং সমানন্তি, একে সম্মুখতাপৰে.

সন্নিট্ঠানত্থিকেহেৱ, ৱিচাৰেতব্বভেদতো;

ৱিঞ্ঞূ চাৰিত্তমিচ্চেৱ, সিক্খাপদমিদং ৱিদূতি.

চাৰিত্তসিক্খাপদৱণ্ণনা নিট্ঠিতা.

৭. মহানামসিক্খাপদৱণ্ণনা

৩১০. কালন্তি সো. যস্মা সঙ্ঘপৱাৰণাযমেৱাযং ৱিধি, তস্মা ‘‘ঞাতকানং পৱাৰিতান’’ন্তি ৱুত্তং. ‘‘ইমিনা হি তযা পৱাৰিতম্হ, অম্হাকঞ্চ ইমিনা চ ইমিনা চ অত্থো’’তি যথাভূতং আচিক্খিত্ৱা ৱিঞ্ঞাপেতুং গিলানোৱ লভতি. যং পন ৱুত্তং পণীতভোজনসিক্খাপদে ‘‘মহানামসিক্খাপদেন কাৰেতব্বো’’তি, তং সঙ্ঘৱসেন পৱাৰিতং, ভেসজ্জত্থায সপ্পিআদিভেসজ্জপঞ্চকং ৱিঞ্ঞাপেতি চে, ‘‘ন ভেসজ্জেন কৰণীযেন ভেসজ্জং ৱিঞ্ঞাপেতী’তি ৱচনেন পাচিত্তিযন্তি অত্থো’’তি (পাচি. ৩০৯) লিখিতং.

মহানামসিক্খাপদৱণ্ণনা নিট্ঠিতা.

৮. উয্যুত্তসেনাসিক্খাপদৱণ্ণনা

৩১১-৫. মং দিট্ঠেনাতি মযা দিট্ঠেন, মম দস্সনেন ৱা. একম্পি সৰহত্থং পুৰিসন্তি অঙ্গপৰিযাপন্নং.

উয্যুত্তসেনাসিক্খাপদৱণ্ণনা নিট্ঠিতা.

৯. সেনাৱাসসিক্খাপদৱণ্ণনা

৩১৯. নৱমে সেনাপৰিক্খেপেন ৱা পৰিক্খেপাৰহট্ঠানেন ৱা সঞ্চৰণট্ঠানপৰিযন্তেন ৱা পৰিচ্ছিন্দিতব্বা.

সেনাৱাসসিক্খাপদৱণ্ণনা নিট্ঠিতা.

১০. উয্যোধিকসিক্খাপদৱণ্ণনা

৩২৪. দসমে একমেকং দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি পাচিত্তিযস্সাতিআদি. অট্ঠমে পন একমেকং দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি দুক্কটস্সাতি পাড়ি. কস্মা? অঙ্গপ্পমাণাভেদেপি অনীকৱিসেসতো. দসমে পন অট্ঠমঙ্গস্স দস্সনেন দুক্কটং সিযাতি.

উয্যোধিকসিক্খাপদৱণ্ণনা নিট্ঠিতা.

সমত্তো ৱণ্ণনাক্কমেন অচেলকৱগ্গো পঞ্চমো.