৯. ৰতনৱগ্গো

১. অন্তেপুৰসিক্খাপদৱণ্ণনা

৪৯৪-৭. যথা ভগৱন্তং পযিৰুপাসতি, এৱমাকাৰেন নাৰহতাযং পুৰিসো পাপো হোতুং, ন হোতি পাপোতি অত্থো, কাৰণত্থং ৱা. তন্তি নিপাতমত্তং, যতোতি ৱা অত্থো. হত্থিসম্মদ্দন্তি সঙ্ঘাটসম্মদ্দো, অক্কমনং চুণ্ণতাতি অত্থো.

৪৯৮. ৰতনং নাম অগ্গমহেসী, তথাপি ইধ অঞ্ঞাপি দেৱিগোত্তা ন ৰক্খতি, অনাপত্তিৱাৰে ‘‘ন মহেসী হোতী’’তি ৱচনাভাৱতো. সচে খত্তিযোৱ হোতি, নাভিসিত্তো. অভিসিত্তোযেৱ হোতি, ন খত্তিযো ৰক্খতীতি আচৰিযো. অনাপত্তিৱাৰে মাতিকাট্ঠকথাযং অঙ্গভাৱেন চ ৱুত্তত্তা অভিসিত্তভাৱোৱপমাণং. সেসং উক্কট্ঠপৰিচ্ছেদোতি একে.

৫০০-৫০১. ‘‘ন সযনিঘৰে সযনিঘৰসঞ্ঞী’’তি তিকচ্ছেদোপি এত্থ লব্ভতি. ন সযনিঘৰং নাম অপৰিক্খিত্তৰুক্খমূলাদি.

অন্তেপুৰসিক্খাপদৱণ্ণনা নিট্ঠিতা.

২. ৰতনসিক্খাপদৱণ্ণনা

৫০৪. ‘‘অধিৱাসেন্তু গহপতিনো ভত্ত’’ন্তি চ ‘‘মে গহপতিনো’’তি চ অত্থি.

৫০৬. কুৰুন্দিৱচনেন ঘৰেপি যদি ভিক্খূ আসঙ্কন্তি, তত্থ ঠত্ৱা আচিক্খিতব্বন্তি ৱুত্তং হোতি. পতিৰূপাতি ‘‘ৰতনসম্মতে পংসুকূলগ্গহণং ৱা ৰতনে নিৰুস্সুক্কগমনং ৱা’’তি লিখিতং. ‘‘তাৱকালিকৱসেনপি অনামাসং পটিগ্গণ্হিতুং ন লভতী’’তি ৱদন্তি. সমাদপেত্ৱাতি যাচিত্ৱা ‘‘উদ্দিস্স অৰিযা তিট্ঠন্তি, এসা অৰিযান যাচনা’’তি (জা. ১.৭.৫৯) ৱুত্তনযেন.

ৰতনসিক্খাপদৱণ্ণনা নিট্ঠিতা.

৩. ৱিকালগামপ্পৱিসনসিক্খাপদৱণ্ণনা

৫১১-২. অহিনা ডট্ঠৱত্থুম্হি সো ভিক্খু সন্তং ভিক্খুং অনাপুচ্ছা গতো, তস্স কুক্কুচ্চং উদপাদি. অদিন্নাদানে ৱুত্তনযেনাতি গামো গামূপচাৰোতি ইদং সন্ধায ৱুত্তং.

ৱিকালগামপ্পৱিসনসিক্খাপদৱণ্ণনা নিট্ঠিতা.

৪. সূচিঘৰসিক্খাপদৱণ্ণনা

৫১৭. তন্তি ভেদনকং. অস্সাতি পাচিত্তিযস্স পঠমং ভেদনকং কত্ৱা পচ্ছা দেসেতব্বত্তা. এস নযো ইতৰেসুপি.

৫২০. ৱাসিজটেতি ৱাসিদণ্ডকে.

সূচিঘৰসিক্খাপদৱণ্ণনা নিট্ঠিতা.

৫. মঞ্চসিক্খাপদৱণ্ণনা

৫২১-২. ‘‘উচ্চে মঞ্চে’’তি চ ‘‘উচ্চা মঞ্চে’’তি চ কত্থচি. আযতোতি ৱিত্থতো. অট্ঠঙ্গুলপাদকন্তি ভাৱনপুংসকং, অট্ঠঙ্গুলপ্পমাণং পাদকং ৱা.

মঞ্চসিক্খাপদৱণ্ণনা নিট্ঠিতা.

৬. তূলোনদ্ধসিক্খাপদৱণ্ণনা

৫২৮. পোটকিতূলন্তি যং কিঞ্চি তিণতূলং. পটিলাভেন উদ্দালেত্ৱা পাচিত্তিযং দেসেতব্বন্তি এত্থ কিঞ্চাপি পটিলাভমত্তেনেৱ পাচিত্তিযন্তি ৱিয দিস্সতি, পৰিভোগেযেৱ পন আপত্তি দট্ঠব্বা, ‘‘অঞ্ঞেন কতং পটিলভিত্ৱা পৰিভুঞ্জতি, আপত্তি দুক্কটস্সা’’তি ৱচনং এত্থ সাধকং.

তূলোনদ্ধসিক্খাপদৱণ্ণনা নিট্ঠিতা.

৭. নিসীদনসিক্খাপদৱণ্ণনা

৫৩১. কিঞ্চাপি নিসীদনস্স জাতি ন দিস্সতি এত্থ, তথাপি চীৱৰক্খন্ধকে অনুঞ্ঞাতত্তা, ‘‘নৱ চীৱৰানি অধিট্ঠাতব্বানী’’তি এত্থ চ পৰিযাপন্নত্তা চীৱৰজাতিযেৱস্স জাতীতি ৱেদিতব্বা. ‘‘সন্থতসদিসং সন্থৰিত্ৱাতি সদস’’ন্তি পুব্বে ৱুত্তনিসীদনসন্থতত্তা উপমেতি. লাভে সদসং, অলাভে অদসম্পি ৱট্টতীতি একে, তং ন যুত্তং. ‘‘নিসীদনং নাম সদসং ৱুচ্চতী’’তি তস্স সণ্ঠাননিযমনতো.

নিসীদনসিক্খাপদৱণ্ণনা নিট্ঠিতা.

৮. কণ্ডুপটিচ্ছাদিসিক্খাপদৱণ্ণনা

৫৩৯. যদি কণ্ডুপটিচ্ছাদি নাম অধোনাভি উব্ভজাণুমণ্ডলা উপ্পন্নকণ্ডুপীড়কাদিপটিচ্ছাদিকা অধিপ্পেতা, তস্স সুগতস্স সুগতৱিদত্থিযা দীঘসো চতস্সো ৱিদত্থিযো তিৰিযং দ্ৱেতি ইদম্পি অতিমহন্তং পমাণং দিস্সতি. সব্বো হি পুৰিসো অত্তনো অত্তনো ৱিদত্থিযা সত্তৱিদত্থিকো হোতি, সুগতস্স চ একাৱিদত্থি মজ্ঝিমস্স পুৰিসস্স তিস্সো ৱিদত্থিযো হোন্তি, তস্মা কণ্ডুপটিচ্ছাদি পকতিপুৰিসস্স পমাণং আপজ্জতি তিৰিযং, দীঘসো পন দিগুণং আপজ্জতীতি. আপজ্জতু, উক্কট্ঠপৰিচ্ছেদো তস্সা, চে ইচ্ছতি, সব্বম্পি সৰীৰং পটিচ্ছাদেস্সতি, সব্বসৰীৰগতসঙ্ঘাটি ৱিয বহুগুণং কত্ৱা নিৱাসেতুকামো নিৱাসেস্সতীতি অযং ভগৱতো অধিপ্পাযো সিযা.

কণ্ডুপটিচ্ছাদিসিক্খাপদৱণ্ণনা নিট্ঠিতা.

৯. ৱস্সিকসাটিকসিক্খাপদৱণ্ণনা

৫৪২. ৱস্সিকসাটিকাপি উক্কট্ঠপটিচ্ছেদৱসেন অনুঞ্ঞাতা. ৱস্সকালে কেচি সঙ্ঘাটিপৰিভোগেনেৱ পৰিভুঞ্জিস্সন্তীতি অযং ভগৱতো অধিপ্পাযো সিযা. কিঞ্চাপি ইমিনা তক্কেন অনুঞ্ঞাতা, ‘‘অপ্পমাণিকাযো কণ্ডুপটিচ্ছাদিযো ধাৰেন্তি, ৱস্সিকসাটিকাযো ধাৰেন্তী’’তি ইমস্মিং ৱত্থুস্মিং পঞ্ঞত্তত্তা পন অঞ্ঞথা পুণ্ণপৰিচ্ছেদতো অধিকপ্পমাণাযো তে ভিক্খূ ধাৰেসুন্তি কত্ৱা এতপৰমতা তাসং অনুঞ্ঞাতাতি ৱেদিতব্বা. এসেৱ নযো দসমেপি.

ৱস্সিকসাটিকসিক্খাপদৱণ্ণনা নিট্ঠিতা.

১০. নন্দত্থেৰসিক্খাপদৱণ্ণনা

৫৫১. তত্থ ভিসিং ৱা বিব্বোহনং ৱা কৰোতীতি দীঘসো বহূনং ভিক্খূনং সাধাৰণত্থং কৰোতীতি যুজ্জতি.

নন্দত্থেৰসিক্খাপদৱণ্ণনা নিট্ঠিতা.

সমত্তো ৱণ্ণনাক্কমেন ৰতনৱগ্গো নৱমো.

পাচিত্তিযকণ্ডৱণ্ণনা নিট্ঠিতা.

৬. পাটিদেসনীযকণ্ডো

১. পঠমপাটিদেসনীযসিক্খাপদৱণ্ণনা

৫৫৩-৫. ‘‘পটিদেসেতব্বাকাৰদস্সন’’ন্তি অট্ঠকথাযং ৱুত্তত্তা পাড়িযং আগতৱসেনেৱ আপত্তি দেসেতব্বা, ন অঞ্ঞথা. ‘‘অন্তৰঘৰে অন্তৰঘৰসঞ্ঞী’’তিআদিনা চ ‘‘খাদনীযভোজনীযে অখাদনীযঅভোজনীযসঞ্ঞী’’তিআদিনা চ ‘‘ভিক্খুনিযা অভিক্খুনিসঞ্ঞী’’তিআদিনা চ নযেন অপৰেপি তযো তিকচ্ছেদা যোজেত্ৱা দস্সেতব্বা.

পঠমপাটিদেসনীযসিক্খাপদৱণ্ণনা নিট্ঠিতা.

২. দুতিযপাটিদেসনীযসিক্খাপদৱণ্ণনা

৫৫৯. ‘‘নিমন্তিতা ভুঞ্জন্তীতি পঞ্চন্নং ভোজনানং অঞ্ঞতৰেন ভোজনেন নিমন্তিতা ভুঞ্জন্তী’’তি কিঞ্চাপি ৱুত্তং, অথ খো অকপ্পিযনিমন্তনেন নিমন্তিততা এত্থ ন অঙ্গং, মাতিকাট্ঠকথাযং ৱা ইধ ৱা অনাপত্তিৱাৰে লেসাভাৱতো, তস্মা ‘‘নিমন্তিতা’’তি পদস্স অত্থো পুব্বে আচিণ্ণৱসেনেৱ ৱুত্তো. অপৰেপি তযো তিকচ্ছেদা যোজেত্ৱা দস্সেতব্বা পদভাজনে ৱুত্তত্তাতি ৱেদিতব্বং. যথা তথা হি ভুঞ্জন্তানং তাদিসং ভিক্খুনিং অৱাৰেন্তানং পাটিদেসনীযমেৱ. ‘‘এসা ৱোসাসতি নাম, ৱোসাসন্তী’’তি চ দুৱিধো পাঠো. ‘‘অজ্ঝোহাৰে অজ্ঝোহাৰে’’তি ৱচনেন পুন ‘‘গাৰয্হং আৱুসো ধম্ম’’ন্তি একৱচনং ৱিৰুদ্ধন্তি. পঠমং অজ্ঝোহাৰেযেৱ আপন্নং সন্ধায ৱুত্তং, তথা অঞ্ঞত্ৰাপি আগচ্ছতি ‘‘আপজ্জিম্হা’’তি ৱচনতো. একেন বহূনম্পি ৱট্টতীতি কেচি, তং ন সুন্দৰং. ‘‘তেহি ভিক্খূহী’’তিআদিনা পাঠে ৱুত্তত্তাতি মম তক্কো. একেন সহেৱ ‘‘অহং আপজ্জি’’ন্তিপি ৱত্তব্বন্তি একেন দ্ৱীহি তীহি দেসেতব্বতো, সব্বেহি এৱং ৱত্তুং ৱট্টতি. ‘‘আপজ্জিম্হাতি সহেৱা’’তি ৱদন্তি. একেন চে অৱাৰিতো, ‘‘অহং, আৱুসো, গাৰয্হং ধম্মং আপজ্জি’’ন্তিপি ৱত্তব্বং.

দুতিযপাটিদেসনীযসিক্খাপদৱণ্ণনা নিট্ঠিতা.

৫৬২-৫৭০. ততিযচতুত্থসিক্খাপদানি উত্তানত্থানিযেৱ.

পাটিদেসনীযকণ্ডৱণ্ণনা নিট্ঠিতা.

৭. সেখিযকণ্ডো

১. পৰিমণ্ডলৱগ্গৱণ্ণনা

৫৭৬. ‘‘সিক্খিতসিক্খেনাতি চতূহি মগ্গেহী’’তি ৱুত্তং. যস্মা অট্ঠঙ্গুলমত্তং ওতাৰেত্ৱা নিৱত্থমেৱ নিসিন্নস্স চতুৰঙ্গুলমত্তং হোতি, তস্মা উভোপেতে অট্ঠকথাৱাদা একপৰিচ্ছেদা, ‘‘অড্ঢতেয্যহত্থ’’ন্তি সুখুমং, একপত্তং ৱা সন্ধায ৱুত্তং. তঞ্হি যথাঠানেন তিট্ঠতি. দুপট্টং সন্ধায ‘‘দ্ৱিহত্থপ্পমাণম্পী’’তি ৱুত্তন্তি উপতিস্সত্থেৰো. একপট্টং, দ্ৱিপট্টং ৱা হেট্ঠিমপৰিচ্ছেদেন ‘‘দ্ৱিহত্থপ্পমাণ’’ন্তি ৱুত্তন্তি ৱেদিতব্বং. ৱুত্তঞ্হি নিস্সগ্গিযঅট্ঠকথাযং ‘‘তিৰিযং দ্ৱিহত্থোপি ৱট্টতী’’তি, তঞ্চ খো অলাভে এৱ ‘‘অলাভে তিৰিযং দ্ৱিহত্থপ্পমাণম্পি ৱট্টতী’’তি ৱুত্তত্তা. ইদং সব্বং অধিট্ঠানুপগং সন্ধায ৱুত্তং. ৱিৰুদ্ধং দিস্ৱা সজ্জেতব্বং. নো চে সজ্জেতি, দুক্কটং. সচিত্তকং পণ্ণত্তিৱিজাননচিত্তেনেৱ ‘‘অনাদৰিযং পটিচ্চা’’তি ৱুত্তত্তা, ন ৱত্থুৱিজাননচিত্তেন ‘‘ইদমেৱং কত’’ন্তি জানতোপি আপত্তিযা অভাৱতো. ফুস্সদেৱত্থেৰৱাদোপি একেন পৰিযাযেন যুজ্জতি. তথা উপতিস্সত্থেৰৱাদোপি. পঞ্ঞত্তেপি সিক্খাপদে অপঞ্ঞত্তেপি যং পকতিযা ৱজ্জং, তং লোকৱজ্জং. ইদং পন পঞ্ঞত্তেযেৱ ৱজ্জং, নাপঞ্ঞত্তে, তস্মা ইতৰলোকৱজ্জেন অসদিসত্তা ন লোকৱজ্জং. পণ্ণত্তিতো পট্ঠায ৱজ্জতো পণ্ণত্তিৱজ্জং. অনাদৰিযচিত্তেনেৱ আপজ্জিতব্বত্তা সচিত্তকং, তস্স চিত্তস্স তিৱেদনত্তা তিৱেদনং. যস্মা অনাদৰিযচিত্ততা নাম কেৱলং অকুসলমেৱ, তঞ্চ পকতিযা ৱজ্জং, তস্মা ইদং লোকৱজ্জং. সঞ্চিচ্চ ৱীতিক্কমনং নাম দোমনস্সিকস্সেৱ হোতীতি দুক্খৱেদনং. গণ্ঠিপদে পন ‘‘পাণাতিপাতাদি ৱিয নিৱাসনাদিদোসো লোকগৰহিতো ন হোতীতি পণ্ণত্তিৱজ্জন্তি ফুস্সদেৱত্থেৰো’’তি লিখিতং.

৫৭৭. ৱিহাৰেপীতি বুদ্ধুপট্ঠানাদিকালে, তস্মা ‘‘পাৰুপিতব্ব’’ন্তি উত্তৰাসঙ্গকিচ্চৱসেন ৱুত্তং. পঠমদুতিযসিক্খাপদেসু পৰিড়াহাদিপচ্চযা কপ্পতি, ন অন্তৰঘৰপটিসংযুত্তেসু.

৫৮২. ‘‘একস্মিং পন ঠানে ঠত্ৱা’’তি এত্থ ‘‘গচ্ছন্তোপি পৰিস্সযাভাৱং ওলোকেতুং লভতিযেৱ. তথা গামে পূজ’’ন্তি লিখিতং, তং পন ‘‘একস্মিং ঠানে ঠত্ৱা’’তি ৱুত্তত্তা তাদিসং অন্তৰাযং সন্ধায ৱুত্তন্তি ৱেদিতব্বং.

পৰিমণ্ডলৱগ্গৱণ্ণনা নিট্ঠিতা.

২. উজ্জগ্ঘিকৱগ্গৱণ্ণনা

৫৮৬. হসনীযস্মিন্তি হেত্ৱত্থে ভুম্মং, হসিতব্বৱত্থুকাৰণাতি অত্থো. অন্তৰঘৰে উচ্চাসদ্দেন অনুমোদনাদিং কৰোন্তস্স অনাপত্তি কিৰ. তথা হি মহিন্দত্থেৰোপি হত্থিসালাদীসু মহাজনস্স কথেসি.

৫৯১. কেচি ভিক্খূ ‘‘পৰিক্খাৰট্ঠপনমত্তেন ৱাসূপগতো হোতী’’তি ৱদন্তি, তং তেসং মতিমত্তমেৱ. ভিক্খুনিযো চে ৱাসূপগা হোন্তি, ভিক্খুনুপস্সযোৱ কপ্পিযভূমি. ‘‘যত্থ ভিক্খুনিযো একৰত্তম্পি ৱসন্তি, অযং ভিক্খুনুপস্সযো’’তি (পাচি. ১৬১) ৱচনতো তাসং সমীপং ৱা তাহি গহিতৱাসাগাৰং ৱা ‘‘গচ্ছামী’’তি গচ্ছতো যথাসুখং গন্তুং ৱট্টতি. ন হি তাৱতা তং ঘৰং অন্তৰঘৰসঙ্খ্যং গচ্ছতীতি নো তক্কোতি আচৰিযো.

উজ্জগ্ঘিকৱগ্গৱণ্ণনা নিট্ঠিতা.

৩. খম্ভকতৱগ্গৱণ্ণনা

৬০৪. সূপো পত্তপ্পমাণৱণ্ণনাযং ৱুত্তাকাৰো. ওলোণী ৱুচ্চতি কুধিতং, গোৰসতো পূৰা থূপিতোতি অত্থো.

৬০৫. হেট্ঠা ওৰোহতীতি এত্থ ‘‘ওৰোহনপ্পমাণে সতি একদেসে থূপীকতেপি অনাপত্তী’’তি ৱদন্তি. ‘‘পত্তস্স পন হেট্ঠা চ উপৰি চ পদুমিনিপণ্ণাদীহি পটিচ্ছাদেত্ৱা ওদহন্তিযা লদ্ধং নাম ৱট্টতী’’তি চ ৱদন্তি. এত্থ ‘‘যস্মা ‘সমতিত্তিকো পিণ্ডপাতো পটিগ্গহেতব্বো’তি ৱচনং পিণ্ডপাতো সমপুণ্ণো পটিগ্গহেতব্বোতি দীপেতি, তস্মা অত্তনো হত্থগতে পত্তে পিণ্ডপাতো দিয্যমানো থূপীকতোপি চে হোতি, ৱট্টতীতি দীপেতি. ‘থূপীকতং পিণ্ডপাতং পটিগ্গণ্হাতি, আপত্তি দুক্কটস্সা’তি হি ৱচনং পঠমং থূপীকতং পিণ্ডপাতং পচ্ছা পটিগ্গণ্হতো, আপত্তীতি দীপেতি. পত্তেন পটিগ্গণ্হতো চেপি থূপীকতং হোতি, ৱট্টতি অথূপীকতস্স পটিগ্গহিতত্তা. পযোগো পন নত্থি অঞ্ঞত্ৰ পুব্বদেসা’’তি চ ‘‘সমতিত্তিকন্তি ৱা ভাৱনপুংসক’’ন্তি চ ৱদন্তি, তস্মা ৱিচাৰেত্ৱা গহেতব্বং.

খম্ভকতৱগ্গৱণ্ণনা নিট্ঠিতা.

৪. সক্কচ্চৱগ্গৱণ্ণনা

৬০৯. সূপোদনৱিঞ্ঞত্তিসিক্খাপদে ‘‘সূপো নাম দ্ৱে সূপা’’তি ন ৱুত্তং সূপগ্গহণেন পণীতভোজনেহি অৱসেসানং সব্বভোজনানং সঙ্গণ্হনত্থং. অনাপত্তিৱাৰে চস্স ‘‘ঞাতকানং পৱাৰিতানং অঞ্ঞস্সত্থায অত্তনো ধনেনা’’তি ইদং অধিকং. কত্থচি পোত্থকে ‘‘অনাপত্তি অসঞ্চিচ্চ অসতিযা অজানন্তস্স গিলানস্স আপদাসূ’’তি এত্তকমেৱ ৱুত্তং, তং ন, ‘‘সমসূপকং পিণ্ডপাতং ভুঞ্জিস্সামী’’তি ইমস্স অনাপত্তিৱাৰে ‘‘অঞ্ঞস্সত্থাযা’’তি কত্থচি লিখিতং, তঞ্চ পমাদৱসেন লিখিতং. ‘‘মুখে পক্খিপিত্ৱা পুন ৱিপ্পটিসাৰী হুত্ৱা ওগিলিতুকামস্সপি সহসা চে পৱিসতি, এত্থ ‘অসঞ্চিচ্চা’তি ৱুচ্চতি. ৱিঞ্ঞত্তম্পি অৱিঞ্ঞত্তম্পি একস্মিং ঠানে ঠিতং সহসা অনুপধাৰেত্ৱা গহেত্ৱা ভুঞ্জন্তো ‘অসতিযা’তি ৱুচ্চতী’’তি লিখিতং, অনাপত্তিৱাৰে একচ্চেসু পোত্থকেসু ‘‘ৰসৰসেতি লিখিতং, তং গহেতব্ব’’ন্তি ৱুত্তং.

সক্কচ্চৱগ্গৱণ্ণনা নিট্ঠিতা.

৫. কবড়ৱগ্গৱণ্ণনা

৬১৮. ‘‘সব্বং হত্থ’’ন্তি ৱচনতো একদেসং মুখে পক্খিপন্তস্স অনাপত্তীতি একচ্চে. ‘‘সব্বন্তি ৱচনতো একদেসম্পি ন ৱট্টতী’’তি ৱদন্তি, তং যুত্তং অনাপত্তিৱাৰে অৱিসেসিতত্তা.

৬২৪. সিত্থাৱকাৰকে ‘‘কচৱৰং ছড্ডেন্তং সিত্থং ছড্ডিয্যতী’’তি চ ‘‘কচৱৰং ছড্ডেন্তো’’তি চ পাঠো.

কবড়ৱগ্গৱণ্ণনা নিট্ঠিতা.

৬. সুৰুসুৰুৱগ্গৱণ্ণনা

৬২৭. ‘‘সুৰুসুৰু’’ন্তি চ ‘‘সুৰোসুৰো’’তি চ পাঠো. সীতীকতোতি সীতঙ্কো. ‘‘সিলকবুদ্ধোতি অৰিযানং পৰিহাসৱচনমেৱেত’’ন্তি লিখিতং.

৬৩১. পটিক্কূলৱসেনাতি এত্থ যদি পটিক্কূলৱসেন পটিক্খিত্তং, ‘‘সেয্যথাপি কামভোগিনো’’তি ন ৱত্তব্বং. ন হি তে পটিক্কূলং কৰোন্তীতি চে? ন, ইস্সৰিযলিঙ্গৱসেন গহণসম্ভৱতো. তে হি অনাদৰা হোন্তি. পত্তধোৱনন্তি পত্তধোৱনোদকং ভোজনপটিসংযুত্তং.

৬৩৪. ‘‘ছত্তপাদুকায’’ন্তি চ ‘‘ছত্তপাদে’’তি চ পাঠো.

৬৩৭. চাপোতি সত্তখাদনৱধো. ‘‘সেসা সব্বা ধনুৱিকতি কোদণ্ডে পৱিট্ঠা’’তি চ লিখিতং, পটিমুক্কন্তি পৱেসিতং, লগ্গিতং হোতীতি অত্থো.

সুৰুসুৰুৱগ্গৱণ্ণনা নিট্ঠিতা.

৭. পাদুকৱগ্গৱণ্ণনা

৬৪০. সযং যানগতো হুত্ৱা, যথা যানগতস্স ৱে.

অলং ৱত্তুং তথা নালং, সছত্তো ছত্তপাণিনো.

যথা এত্থ, এৱং অঞ্ঞত্ৰাপি.

৬৪৭. ছপকৱত্থুস্মিং ‘‘সচাহং ন লভিস্সামী’’তি পাঠো, ‘‘দস চে ন লভিস্সামী’’তি চ অত্থি, ‘‘ৱত্থুস্মিং অগিলানস্সা’’তি চ আগচ্ছতি, তং ন সুন্দৰং, সিক্খাপদেযেৱ সুন্দৰং. থোমিতোতি অহম্পি জানামীতি সম্বন্ধো. যা ধনযসলাভসঙ্খাতা ৱুত্তি ৱিনিপাতেন হোতি সম্পৰাযে অপাযেসু ৱিনিপাতহেতু হুত্ৱা পৱত্ততি. অথ ৱা ৱিনিপাতেনাতি হেত্ৱত্থে কৰণৱচনং, ৱিনিপাতনায পৱত্ততীতি অধিপ্পাযো. অধম্মচৰণেন অধম্মচৰণায. ‘‘অস্মা কুম্ভিমিৱা’’তি চ পঠন্তি.

পাদুকৱগ্গৱণ্ণনা নিট্ঠিতা.

পকিণ্ণকৱণ্ণনা

কাযৱাচাচিত্ততো সমুট্ঠহন্তীতি কত্ৱা ‘‘সমনুভাসনসমুট্ঠানানী’’তি ৱুত্তানি. সমনুভাসনং কিৰিযং. ইমানি কিৰিযানি. ধম্মদেসনসমুট্ঠানানি ৱাচাচিত্ততোতি এত্থ কাযৱচীৱিঞ্ঞত্তিভাৱতো উজ্জগ্ঘিকউচ্চাসদ্দাদীসু ৱিয ‘‘কাযৱাচাচিত্ততো’’তি ৱত্তব্বানীতি চে? ন ৱত্তব্বানি. নিসীদনগমনাহাৰপক্খিপনাদিকাযৱিঞ্ঞত্তিযা সব্ভাৱা তত্থ যুত্তং, ন ধম্মদেসনে তাদিসস্সাভাৱা.

পকিণ্ণকৱণ্ণনা নিট্ঠিতা.

সেখিযকণ্ডৱণ্ণনা নিট্ঠিতা.

৮. সত্তাধিকৰণসমথৱণ্ণনা

‘‘যেভুয্যসিকা কাতব্বা…পে… তিণৱত্থাৰকো কাতব্বো, সো পুগ্গলো’’তি চ লিখিতং.

সত্তাধিকৰণসমথৱণ্ণনা নিট্ঠিতা.

ভিক্খুৱিভঙ্গো নিট্ঠিতো.

নমো তস্স ভগৱতো অৰহতো সম্মাসম্বুদ্ধস্স