৩. দ্ৱেভাগসিক্খাপদৱণ্ণনা

৫৫২. ‘‘ধাৰযিত্ৱা দ্ৱে তুলা আদাতব্বা’’তি ৱচনতো যথা তুলাধাৰণায কাড়কা অধিকা ন হোন্তি, তথা কাড়কানং দ্ৱে ভাৱা গহেতব্বা উক্কট্ঠপৰিচ্ছেদেন. কথং পঞ্ঞাযতীতি? সুদ্ধকাড়কপটিসেধননিদানেন. ততিযং ওদাতানং চতুত্থং গোচৰিযানন্তি হেট্ঠিমপৰিচ্ছেদো. মাতিকাট্ঠকথাযং পন ‘‘একস্সপি কাড়কলোমস্স অতিৰেকভাৱে নিস্সগ্গিয’’ন্তি (কঙ্খা. অট্ঠ. দ্ৱেভাগসিক্খাপদৱণ্ণনা) ৱুত্তং, তং তুলাধাৰণায কিঞ্চাপি ন সমেতি, অচিত্তকত্তা পন সিক্খাপদস্স পুব্বে তুলায ধাৰযিত্ৱা ঠপিতেসু একম্পি লোমং তত্থ পতেয্য নিস্সগ্গিযন্তি অধিপ্পাযোতি নো তক্কো. অঞ্ঞথা দ্ৱে তুলা নাদাতব্বা, ঊনকতৰা আদাতব্বা সিযুং. ন হি লোমং গণেত্ৱা তুলাধাৰণা কৰীযতি. অথ গণেত্ৱাৱ কাতব্বং. কিং তুলাধাৰণায পযোজনন্তি কেচি. ‘‘গোচৰিযওদাতেসু একমেৱ দিগুণং কত্ৱা গহেতুং ৱট্টতী’’তি ৱদন্তি, অট্ঠকথাযং অৱিচাৰিতত্তা ৱীমংসিতব্বং.

দ্ৱেভাগসিক্খাপদৱণ্ণনা নিট্ঠিতা.