৪. মোগ্গল্লানসুত্তৱণ্ণনা

৮২৬. উদ্ধচ্চপকতিকাতি ৱিক্খিত্তসভাৱা, ৱিব্ভন্তচিত্তাতি অত্থো. অনৱট্ঠিততায ৱিপ্ফন্দিতচিত্ততায ৱিপ্ফন্দমানচিত্তা. তুচ্ছতায নড়ো ৱিযাতি নড়ো, মানো, উগ্গতো নড়ো এতেসন্তি উন্নড়াতি আহ – ‘‘উন্নড়াতি…পে… ৱুত্তং হোতী’’তি. চপলাতি চাপল্যতা নাম লোলভাৱো. মুৰাতি খৰৱচনা, ফৰুসৱচনাতি অত্থো. ৱিকিণ্ণৱাচা নাম সম্ফপ্পলাপিনোতি ৱুত্তং ‘‘অসংযতৱচনা’’তিআদি. পটিপত্তিধম্মে পমুট্ঠা ৱিনট্ঠা পটিৱিনট্ঠা সতি এতেসন্তি মুট্ঠসতীতি আহ – ‘‘নট্ঠস্সতিনো’’তি. উব্ভন্তচিত্তাতি সমাধিনো অভাৱেন উদ্ধচ্চেনেৱ উপৰূপৰি ভন্তচিত্তা. পাকতিন্দ্ৰিযা অভাৱিতকাযতায গামদাৰকা ৱিয পকতিভূতইন্দ্ৰিযা. নেমো ৱুচ্চতি ভূমিযা বদ্ধভাৱনিমিত্তপদেসো, গম্ভীৰো নেমো এতস্সাতি গম্ভীৰনেমো. সুট্ঠু নিখাতোতিআদি তস্স পাদস্স সুপ্পতিট্ঠিতভাৱদস্সনং.