৯-১০. পঠমদ্ৱযসুত্তাদিৱণ্ণনা

৯২-৯৩. দ্ৱযন্তি দুকং. পাড়িযং আমেডিতলোপেন নিদ্দেসোতি আহ ‘‘দ্ৱে দ্ৱে কোট্ঠাসে’’তি. এৱমেতন্তি এৱং অনিচ্চাদিভাৱেন এতং চক্খুৰূপঞ্চাতি দ্ৱযং. চলতীতি অনৱট্ঠানেন পচলতি. ব্যথতীতি জৰায মৰণেন চ পৱেধতি. হেতু চেৱ উপ্পত্তিনিমিত্তত্তা. সহগতীতি সহপ্পৱত্তি, তায গহেতব্বত্তা ‘‘সঙ্গতী’’তি ফস্সো ৱুত্তো. এস নযো সেসপদদ্ৱযেপি. যস্মা চ সংগচ্ছমানধম্মৱিমুত্তা সঙ্গতি নাম নত্থি, তথা সন্নিপাতসমৱাযা, তেসং ৱসেন নিব্বত্তো ফস্সো তথা ৱুচ্চতীতি. তেনাহ ‘‘ইমিনা’’তিআদি.

ৱত্থূতি চক্খু নিস্সযপচ্চযাদিভাৱেন. আৰম্মণন্তি ৰূপং আৰম্মণপচ্চযাদিভাৱেন. সহজাতা তযো খন্ধা ৱেদনাদযো, তে সহজাতাদিপচ্চযভাৱেন. অযং হেতূতি অযং তিৱিধো হেতূ. ফস্সেনাতিআদীসু অযং সঙ্খেপত্থো – যস্মা ৰূপাৰম্মণে ফস্সে অত্তনো ফুসনকিচ্চং কৰোন্তে এৱং ৱেদনা অনুভৱনকিচ্চং, সঞ্ঞা সঞ্জাননকিচ্চং কৰোতি, তস্মা ‘‘ফস্সেন ফুট্ঠমেৱা’’তিআদিৱুত্তমেৱ অত্থং ইদানি পুগ্গলাধিট্ঠানেন দস্সেতুং ‘‘ফুট্ঠো’’তিআদি ৱুত্তং. পঞ্চেৱ খন্ধা ভগৱতা সমতিংসায আকাৰেহি ৱুত্তা. কস্মাতি আহ ‘‘কথ’’ন্তিআদি. ৰুক্খসাখাসু ৰুক্খৱোহাৰো ৱিয একেকধম্মেপি খন্ধৱোহাৰো হোতিযেৱ. তেনাহ ভগৱা – ‘‘ৱিঞ্ঞাণং ৱিঞ্ঞাণক্খন্ধো’’তি (যম. খন্ধযমক ২).

পঠমদ্ৱযসুত্তাদিৱণ্ণনা নিট্ঠিতা.

ছন্নৱগ্গৱণ্ণনা নিট্ঠিতা.