৭. দুক্খধম্মসুত্তৱণ্ণনা

২৪৪. দুক্খধম্মানন্তি দুক্খকাৰণানং. তেনাহ ‘‘দুক্খসম্ভৱধম্মান’’ন্তিআদি. তত্থ কিং দুক্খং, কা দুক্খধম্মাতি তদুভযং দস্সেতুং ‘‘পঞ্চসু হী’’তি ৱুত্তং. তেতি পঞ্চক্খন্ধা. দুক্খসম্ভৱধম্মত্তাতি দুক্খুপ্পত্তিকাৰণত্তা. অস্সাতি তেন. কৰণে হেতং সামিৱচনং. কামেতি ৱত্থুকামে কিলেসকামে চ. পুন অস্সাতি সামিঅত্থে এৱ সামিৱচনং. চাৰন্তি চিত্তাচাৰং. ৱিহাৰন্তি পঞ্চদ্ৱাৰপ্পৱত্তিচাৰৱিহাৰং. ‘‘একট্ঠা’’তি চ ৱদন্তি. তেনেৱ হি ‘‘অনুবন্ধিত্ৱা চৰন্তং’’ইচ্চেৱ ৱুত্তং. অনুবন্ধিত্ৱাতি চ ৱীথিচিত্তপ্পৱত্তিতো পট্ঠায যাৱ ততিযজৱনৱাৰা অনু অনু বন্ধিত্ৱা. পক্খন্দনাদীতি আদি-সদ্দেন কসিগোৰক্খাদিৱসেনপি কামানং পৰিযেসনদুক্খং সঙ্গণ্হাতি.

দাযতীতি দাযো, ৱনং. তেনাহ ‘‘অটৱি’’ন্তি. কণ্টকগব্ভন্তি ওৱৰকসদিসং ৱনং. নামপদং নাম কিৰিযাপদাপেক্খন্তি ‘‘ৱিজ্ঝী’’তি ৱচনসেসেন কিৰিযাপদং গণ্হাতি.

দন্ধাযিতত্তং উপ্পন্নকিলেসানং অৱট্ঠানং. তেনাহ ‘‘উপ্পন্নমত্তাযা’’তিআদি. তাযাতি সতিযা. কাচি কিলেসাতি চুদ্দসৱিধে চিত্তস্স কিচ্চে জৱনকিচ্চে এৱ চিত্তকিলেসানং উপ্পত্তিং কত্ৱা তথা ৱুত্তং. নিগ্গহিতাৱ হোন্তি পৱত্তিতুং অপ্পদানৱসেন. তেনাহ ‘‘ন সণ্ঠাতুং সক্কোন্তী’’তি. চক্খুদ্ৱাৰস্মিন্তি পাড়িযং তস্স পঠমং গহিততায ৱুত্তং, তেন নযেন সেসদ্ৱাৰানিপি গহিতানেৱ হোন্তি. ৰাগাদীসু উপ্পন্নেসু পঠমজৱনৱাৰে. সতিসম্মোসেন ‘‘কিলেসা মে উপ্পন্না’’তি ঞত্ৱা তথা পচ্চামাসসতিযা লব্ভনতো. তেনাহ – ‘‘অনচ্ছৰিযং চেত’’ন্তি. আৱট্টেত্ৱাতি অযোনিসো আৱট্টেত্ৱা. আৱজ্জনাদীসূতি ততো এৱ অযোনিসো আৱজ্জনাদীসু উপ্পন্নেসু ইট্ঠাৰম্মণস্স লদ্ধত্তা পচ্চযসিদ্ধিযা সম্পত্তং পৱত্তনাৰহং. নিৱত্তেত্ৱাতি দুতিযজৱনৱাৰেপি কিলেসুপ্পত্তিং নিৱত্তেত্ৱা. কথং পনস্স এৱং লদ্ধুং সক্কাতি আহ ‘‘আৰদ্ধৱিপস্সকানং হী’’তিআদি. ভাৱনাপটিসঙ্খানেতি ভাৱনাযং পটিসঙ্খানে চ যোগিনো পতিট্ঠিতভাৱো. তস্স অযমানিসংসো – যং পচ্চযলাভেন উপ্পজ্জিতুং লদ্ধোকাসাপি কিলেসা পুব্বে পৱত্তভাৱনানুভাৱেন ৱিক্খম্ভিতা তথা তথা নিগ্গহিতা এৱ হুত্ৱা নিৱত্তন্তি, কুসলা ধম্মাৱ লদ্ধোকাসা উপৰূপৰি ৱড্ঢন্তি.

অভিহট্ঠুন্তি অভিহৰিত্ৱা. অনুদহন্তীতি অনুদহন্তা ৱিয হোন্তি. অনুসেন্তীতি এত্থাপি এসেৱ নযো. অনাৱট্টন্তেতি অনিৱত্তন্তে সামঞ্ঞতোতি অধিপ্পাযো. ৱিপস্সনাবলমেৱ দীপিতং মগ্গফলাধিগমস্স অজোতিতত্তা.

দুক্খধম্মসুত্তৱণ্ণনা নিট্ঠিতা.