১১. যৱকলাপিসুত্তৱণ্ণনা

২৪৮. যৱপুঞ্জো সুপৰিপক্কযৱসমুদাযো. কাজহত্থাতি দণ্ডহত্থা. পোথেয্যুন্তি যথা যৱসঙ্খাতং ধঞ্ঞং ৱণ্টতো মুচ্চতি, এৱং পোথেয্যুং. যৱে সাৱেত্ৱাতি যৱসীসতো যৱে পোথনেন মোচেত্ৱা ৱিৱেচেত্ৱা.

চতুমহাপথো ৱিয ছ আযতনানি আৰম্মণদণ্ডকেহি হননট্ঠানত্তা. যৱকলাপী ৱিয সত্তো তেহি হঞ্ঞমানত্তা. ছ ব্যাভঙ্গিযো ৱিয সভাৱতো ছধাপি পচ্চেকং ইট্ঠানিট্ঠমজ্ঝত্তৱসেন অট্ঠাৰস আৰম্মণানি যৱকলাপট্ঠানিযস্স সত্তস্স হননতো. ভৱপত্থনায অপৰাপৰুপ্পত্তিং সন্ধায ‘‘ভৱপত্থনা কিলেসা’’তি বহুৱচননিদ্দেসো. ভৱপত্থনা চ তস্স পচ্চযভূতা কিলেসা চাতি ভৱপত্থনাকিলেসাতি এৱং ৱা এত্থ অত্থো দট্ঠব্বো. যস্মা সত্তানং ৱট্টদুক্খং নাম সব্বম্পি তং ভৱপত্থনামূলকং, তস্মা ৱুত্তং ‘‘এৱং সত্তা’’তিআদি. ভৱপত্থনকিলেসাতি চ ভৱপত্থনামূলকং কিলেসং.

ভুম্মন্তি সমীপত্থে ভুম্মং. তেনাহ ‘‘সুধম্মায দ্ৱাৰে’’তি. ন কতন্তি দুক্খুপ্পাদনং ন কতং. নৱগূথসূকৰং ৱিযাতি নৱগূথভক্খসূকৰং ৱিয. চিত্তেনেৱাতি যো বজ্ঝতি, তস্স চিত্তেনেৱ. তস্মাতি যস্মা ৱেপচিত্তিবন্ধনস্স বন্ধনমুচ্চনং ৱিয, তস্মা ‘‘ৱেপচিত্তিবন্ধন’’ন্তি ৱুত্তং. ঞাণমোক্খং বন্ধনন্তি ঞাণেন মুচ্চনং বন্ধনং.

মঞ্ঞমানোতি পৰিকপ্পিততণ্হাৱসেন ‘‘এতং মমা’’তি, দিট্ঠিৱসেন ‘‘এসো মে অত্তা’’তি, মানৱসেন ‘‘এসোহমস্মী’’তি মঞ্ঞন্তো. খন্ধৱিনিমুত্তস্স মঞ্ঞমানৱত্থুনো অভাৱা ‘‘খন্ধে মঞ্ঞন্তো’’তি ৱুত্তং. এতন্তি ‘‘মাৰস্সা’’তি এতং সামিৱচনং. কিলেসমাৰেন বদ্ধোতি কিলেসমাৰেন তেনেৱ কিলেসবন্ধনেন বদ্ধো. মুত্তোতি এত্থাপি এসেৱ নযো.

তণ্হামঞ্ঞনায সতি দিট্ঠিমানমঞ্ঞনানং পসঙ্গো এৱ নত্থীতি যথা ‘‘অস্মী’’তি পদেন দিট্ঠিমানমঞ্ঞনা ৱুত্তা হোন্তি, এৱং তণ্হামঞ্ঞিতাপীতি ৱুত্তং ‘‘অস্মীতি পদেন তণ্হামঞ্ঞিতং ৱুত্ত’’ন্তি. অযমহমস্মীতি পদেন দিট্ঠিমঞ্ঞিতন্তি এতৰহি লব্ভমানদিট্ঠিৱত্থুৱসেনেৱ. ভৱিস্সন্তি অনাগতদিট্ঠিৱত্থুপৰিকপ্পনৱসেনেৱ দিট্ঠিমঞ্ঞিতং. যেভুয্যেন হি অনাগতালিঙ্গনা সস্সতদিট্ঠি. উচ্ছেদৱসেন দিট্ঠিমঞ্ঞিতমেৱাতি আনেত্ৱা সম্বন্ধো. ৰূপীতিআদীনি পদানি. সস্সতস্সেৱাতি সস্সতগাহস্সেৱ পভেদদীপনানি. যস্মা মঞ্ঞিতং আবাধৱসেন ৰোগো, অন্তোদোসৱসেন গণ্ডো, অঙ্গনিকন্তৱসেন সল্লং, তস্মা ইমেহি তণ্হাদীহি কিলেসেহি পাকটচলনৱসেন ইঞ্জন্তি চেৱ, অপাকটসঞ্চলনৱসেন ফন্দন্তি চ. পপঞ্চিতং সংসাৰে চিৰাযনং দট্ঠব্বং, খন্ধসন্তানস্স ৱা ৱিত্থাৰণং. পমত্তাকাৰপ্পত্তা মুচ্ছনাকাৰপ্পত্তা. তেসন্তি তণ্হাদিট্ঠিকিলেসানং. আকাৰদস্সনত্থন্তি পৱত্তিআকাৰদস্সনত্থং.

মানো নাম ‘‘সেয্যোহমস্মী’’তিআদিনা মজ্জনাকাৰপ্পৱত্তি. তণ্হায সম্পযুত্তমানৱসেনাতি কস্মা ৱুত্তং? ননু সব্বো মানো তণ্হাসম্পযুত্তো? সতি হি ব্যভিচাৰে ৱিসেসনং ইচ্ছিতব্বন্তি. সচ্চমেতং, তণ্হা পন অত্থি মানস্স পচ্চযভূতা, অত্থি মানস্স অপ্পচ্চযভূতা, যতো মানো অনিযতো ৱুচ্চতি. তথা হি পট্ঠানে ‘‘সংযোজনং ধম্মং পটিচ্চ সংযোজনো ধম্মো উপ্পজ্জতি হেতুপচ্চযা’’তি এত্থ সংযোজনানি সংযোজনেহি যথালাভং যোজেত্ৱা দস্সিতযোজনায ‘‘কামৰাগসংযোজনং পটিচ্চ মানসংযোজনং অৱিজ্জাসংযোজন’’ন্তি ৱত্ৱা ‘‘কামৰাগসংযোজনং পটিচ্চ অৱিজ্জাসংযোজন’’ন্তি, ‘‘মানসংযোজনং পটিচ্চ ভৱৰাগসংযোজনং অৱিজ্জাসংযোজন’’ন্তি চ ৱত্ৱা ‘‘ভৱৰাগসংযোজনং পটিচ্চ অৱিজ্জাসংযোজন’’ন্তি ৱুত্তং. এত্থ চ কামৰাগভৱৰাগসংযোজনেহি মানস্স অনিযতভাৱো পকাসিতো. তত্থ যা তণ্হা বলৱতী, তং সন্ধায ইদং ৱুত্তং ‘‘তণ্হায সম্পযুত্তমানৱসেনা’’তি. বলৱতণ্হাসম্পযুত্তো হি মানো সযম্পি বলৱা হুত্ৱা অস্মীতি সৱিসেসং মজ্জনৱসেন পৱত্ততীতি.

দিট্ঠিৱসেনাতি মানমূলকদিট্ঠিৱসেন. ‘‘সেয্যোহমস্মী’’তিআদিনা হি বহুলমানুপেতস্স পুগ্গলস্স ৰূপাদীসু একং উদ্দিস্স অযমহমস্মীতি দিট্ঠিযা উপ্পন্নায মানস্স অপ্পহীনত্তা মানোপি তত্থ তত্থেৱ উপ্পজ্জতি. ইতি মানমূলকং দিট্ঠিং সন্ধাযাহ ‘‘অযমহমস্মীতি দিট্ঠিৱসেন ৱুত্ত’’ন্তি. চোদকো পন ইমমত্থং অজানন্তো অনুপলব্ভমানমেৱ সম্পযোগত্থং গহেত্ৱা ‘‘ননু চা’’তিআদিনা চোদেতি. ইতৰো ‘‘আম নত্থী’’তি তমত্থং সম্পটিচ্ছিত্ৱা ‘‘মানস্স পনা’’তিআদিনা পৰিহাৰমাহ. তস্সত্থো ৱুত্তো এৱ.

যৱকলাপিসুত্তৱণ্ণনা নিট্ঠিতা.

আসীৱিসৱগ্গৱণ্ণনা নিট্ঠিতা.

চতুত্থো পণ্ণাসকো.

সড়াযতনসংযুত্তৱণ্ণনা নিট্ঠিতা.