৫. নত্থিদিন্নসুত্তৱণ্ণনা

২১০. দিন্নন্তি দেয্যধম্মসীসেন দানং ৱুত্তন্তি আহ ‘‘দিন্নস্স ফলাভাৱং সন্ধাযা’’তি, দিন্নং পন অন্নাদিৱত্থুং কথং পটিক্খিপন্তি. এস নযো ‘‘যিট্ঠং হুত’’ন্তি এত্থাপি. মহাযাগোতি সব্বসাধাৰণং মহাদানং. পহেণকসক্কাৰোতি পাহুনকানং কাতব্বসক্কাৰো. ফলন্তি আনিসংসফলং নিস্সন্দফলঞ্চ. ৱিপাকোতি সদিসফলং. পৰলোকে ঠিতস্স অযং লোকো নত্থীতি পৰলোকে ঠিতস্স কম্মুনা লদ্ধব্বো অযং লোকো ন হোতি. ইধলোকে ঠিতস্সপি পৰলোকো নত্থীতি ইধলোকে ঠিতস্স কম্মুনা লদ্ধব্বো পৰলোকো ন হোতি. তত্থ কাৰণমাহ – ‘‘সব্বে তত্থ তত্থেৱ উচ্ছিজ্জন্তী’’তি. ইমে সত্তা যত্থ যত্থ ভৱে যোনিআদীসু চ ঠিতা, তত্থ তত্থেৱ উচ্ছিজ্জন্তি নিৰুদযৱিনাসৱসেন নস্সন্তি. ফলাভাৱৱসেনাতি মাতাপিতূসু সম্মাপটিপত্তিমিচ্ছাপটিপত্তীনং ফলস্স অভাৱৱসেন ‘‘নত্থি মাতা, নত্থি পিতা’’তি ৱদন্তি, ন মাতাপিতূনং, নাপি তেসু ইদানি কৰিযমানসক্কাৰাসক্কাৰানং অভাৱৱসেন তেসং লোকপচ্চক্খত্তা. পুব্বুড়কস্স ৱিয ইমেসং সত্তানং উপ্পাদো নাম কেৱলো, ন ভৱতো চৱিত্ৱা আগমনপুব্বকোতি দস্সনত্থং ‘‘নত্থি সত্তা ওপপাতিকা’’তি ৱুত্তন্তি আহ – ‘‘চৱিত্ৱা উপ্পজ্জনকসত্তা নাম নত্থী’’তি. সমণেন নাম যাথাৱতো জানন্তেন কস্সচি অকথেত্ৱা সঞ্ঞতেন ভৱিতব্বং, অঞ্ঞথা আহোপুৰিসিকা নাম সিযা. কিঞ্হি পৰো পৰস্স কৰিস্সতি, তথা চ অত্তনো সম্পাদনস্স কস্সচি অৱস্সযো এৱ ন সিযা তত্থ তত্থেৱ উচ্ছিজ্জনতোতি আহ ‘‘যে ইমঞ্চ…পে… পৱেদেন্তী’’তি.

চতূসু মহাভূতেসু নিযুত্তোতি চাতুমহাভূতিকো. যথা পন মত্তিকায নিব্বত্তং ভাজনং মত্তিকামযং, এৱমযং চতূহি মহাভূতেহি নিব্বত্তোতি আহ ‘‘চতুমহাভূতমযো’’তি. অজ্ঝত্তিকা পথৱীধাতূতি সত্তসন্তানগতা পথৱীধাতু. বাহিৰং পথৱীধাতুন্তি বহিদ্ধা মহাপথৱিং. অনুযাতীতি তস্স অনুৰূপভাৱেন যাতি উপেতি. উপগচ্ছতীতি পুব্বে বাহিৰপথৱীকাযতো তদেকদেসভূতা পথৱী আগন্ত্ৱা অজ্ঝত্তিকভাৱপ্পত্তিযা সত্তভাৱেন সণ্ঠিতা ইদানি ঘটাদিপথৱী ৱিয তমেৱ বাহিৰপথৱীকাযং উপেতি উপগচ্ছতি, সব্বসো তেন নিব্বিসেসতং একীভাৱমেৱ গচ্ছতীতি অত্থো. আপাদীসুপি এসেৱ নযোতি এত্থ পজ্জুন্নেন মহাসমুদ্দতো গহিতআপো ৱিয ৱস্সোদকভাৱেন পুনপি মহাসমুদ্দং, সূৰিযৰংসিতো গহিতইন্দগ্গিসঙ্খাততেজো ৱিয পুনপি সূৰিযৰংসিং, মহাৱাযুখন্ধতো নিগ্গতমহাৱাযো ৱিয তমেৱ ৱাযুখন্ধং উপেতি উপগচ্ছতীতি দিট্ঠিগতিকো সযমেৱ অত্তনো ৱাদং ভিন্দতি. উম্মত্তকপচ্ছিসদিসঞ্হি দিট্ঠিগতিকদস্সনং. মনচ্ছট্ঠানি ইন্দ্ৰিযানি আকাসং পক্খন্দন্তি তেসং ৱিসযভাৱা ৱিসযাপীতি ৱদতি. ৱিসযিগ্গহণেন হি ৱিসযা গহিতা এৱ হোন্তীতি. গুণাগুণপদানীতি গুণদোসকোট্ঠাসা. সৰীৰমেৱ পদানীতি অধিপ্পেতং সৰীৰেন তংতংকিৰিযায পজ্জিতব্বতো. দব্বন্তি মুয্হন্তীতি দত্তূ, মূড়্হপুগ্গলা. তেহি দত্তূহি বালমনুস্সেহি পঞ্ঞত্তং.

নত্থিদিন্নসুত্তৱণ্ণনা নিট্ঠিতা.