৬. কৰোতোসুত্তৱণ্ণনা

২১১. সহত্থা কৰোন্তস্সাতি সহত্থেন কৰোন্তস্স. নিস্সগ্গিযথাৱৰাদযোপি ইধ সহত্থকৰণেনেৱ সঙ্গহিতা. হত্থাদীনীতি হত্থপাদকণ্ণনাসাদীনি. পচনং দহনং ৱিবাধনন্তি আহ ‘‘দণ্ডেন পীড়েন্তস্সা’’তি. পপঞ্চসূদনিযং ‘‘তজ্জেন্তস্স চা’’তি অত্থো ৱুত্তো, ইধ পন সুমঙ্গলৱিলাসিনিযং ৱিয তজ্জনং পৰিভাসনং দণ্ডেনেৱ সঙ্গহেত্ৱা ‘‘দণ্ডেন পীড়েন্তস্স’’ইচ্চেৱ ৱুত্তং. সোকং সযং কৰোন্তস্সাতি পৰস্স সোককাৰণং সযং কৰোন্তস্স, সোকং ৱা উপ্পাদেন্তস্স. পৰেহি অত্তনো ৱচনকৰেহি. সযম্পি ফন্দতোতি পৰস্স ৱিবাধনপ্পযোগেন সযম্পি ফন্দতো. অতিপাতযতোতি পদং সুদ্ধকত্তুঅত্থে হেতুকত্তুঅত্থে চ ৱত্ততীতি আহ – ‘‘হনন্তস্সপি হনাপেন্তস্সপী’’তি. কাৰণৱসেনাতি কাৰাপনৱসেন.

ঘৰস্স ভিত্তি অন্তো চ বহি চ সন্ধিতা হুত্ৱা ঠিতাৱ ঘৰসন্ধি. কিঞ্চিপি অসেসেত্ৱা নিৰৱসেসো লোপো নিল্লোপো. একাগাৰে নিযুত্তো ৱিলোপো একাগাৰিকো. পৰিতো সব্বসো পন্থে হননং পৰিপন্থো. পাপং ন কৰীযতি পুব্বে অসতো উপ্পাদেতুং অসক্কুণেয্যত্তা, তস্মা নত্থি পাপং. যদি এৱং কথং সত্তা পাপে পৱত্তন্তীতি আহ ‘‘সত্তা পন কৰোমাতি এৱংসঞ্ঞিনো হোন্তী’’তি এৱং কিৰস্স হোতি ইমেসঞ্হি সত্তানং হিংসাদিকিৰিযা ন অত্তানং ফুসতি তস্স নিচ্চতায নিব্বিকাৰত্তা, সৰীৰং পন অচেতনং কট্ঠকলিঙ্গৰূপমং, তস্মিং ৱিকোপিতেপি ন কিঞ্চি পাপন্তি. খুৰনেমিনাতি নিসিতখুৰমযনেমিনা, খুৰসদিসনেমিনাতি অত্থো.

গঙ্গায দক্খিণা দিসা অপ্পতিৰূপদেসো, উত্তৰদিসা পতিৰূপদেসোতি অধিপ্পাযেন ‘‘দক্খিণঞ্চেপী’’তিআদি ৱুত্তন্তি আহ ‘‘দক্খিণতীৰে মনুস্সা কক্খড়া’’তিআদি. মহাযাগন্তি মহাৱিজিতযঞ্ঞসদিসং মহাযাগং. উপোসথকম্মেনাতি উপোসথকম্মেন চ. চ-সদ্দো হেত্থ লুত্তনিদ্দিট্ঠো. দমসদ্দো হি ইন্দ্ৰিযসংৱৰস্স উপোসথসীলস্স চ ৱাচকো ইধাধিপ্পেতো. কেচি পন ‘‘উপোসথকম্মেনা’’তি ইদং ইন্দ্ৰিযদমনস্স ৱিসেসনং, তস্মা ‘‘উপোসথকম্মভূতেন ইন্দ্ৰিযদমেনা’’তি অত্থং ৱদন্তি. সীলসংযমেনাতি সীলসংৱৰেন. সচ্চৱচনেনাতি সচ্চৱাচায. তস্সা ৱিসুং ৱচনং লোকে গৰুতৰপুঞ্ঞসম্মতভাৱতো. যথা হি পাপধম্মেসু মুসাৱাদো গৰু, এৱং পুঞ্ঞধম্মেসু সচ্চৱাচা. তেনাহ ভগৱা – ‘‘একং ধম্মং অতীতস্সা’’তিআদি (ইতিৱু. ২৫). পৱত্তীতি যো কৰোতীতি ৱুচ্চতি, তস্স সন্তানে ফলস্স নিব্বত্তিযা পচ্চযভাৱেন পৱত্তি. সব্বথাতি ‘‘কৰোতো’’তিআদিনা ৱুত্তেন সব্বপ্পকাৰেন কিৰিযমেৱ পটিক্খিপন্তি.

কৰোতোসুত্তৱণ্ণনা নিট্ঠিতা.