৪. দুতিযঞাণৱত্থুসুত্তৱণ্ণনা

৩৪. সত্তৰীতি ত-কাৰস্স ৰ-কাৰাদেসং ৱুত্তং. সত্ততিসদ্দেন ৱা সমানত্থো সত্তৰিসদ্দো. ব্যঞ্জনৰুচিৱসেন ব্যঞ্জনং ভণন্তীতি ব্যঞ্জনভাণকা. তেনাহ ‘‘বহুব্যঞ্জনং কত্ৱা’’তিআদি. তিট্ঠতি তত্থ ফলং তদাযত্তৱুত্তিতাযাতি ঠিতি, পচ্চুপ্পন্নলক্খণস্স ধম্মস্স ঠিতি ধম্মট্ঠিতি. অথ ৱা ধম্মোতি কাৰণং, পচ্চযোতি অত্থো. ধম্মস্স যো ঠিতিসভাৱো, সোৱ ধম্মতো অঞ্ঞো নত্থীতি ধম্মট্ঠিতি, পচ্চযো. তত্থ ঞাণং ধম্মট্ঠিতিঞাণং. তেনাহ আযস্মা ধম্মসেনাপতি – ‘‘পচ্চযপৰিগ্গহে পঞ্ঞা ধম্মট্ঠিতিঞাণ’’ন্তি (পটি. ম. মাতিকা ৪). তথা চাহ ‘‘পচ্চযাকাৰে ঞাণ’’ন্তিআদি. তত্থ ধম্মানন্তি পচ্চযুপ্পন্নধম্মানং. পৱত্তিট্ঠিতিকাৰণত্তাতি পৱত্তিসঙ্খাতায ঠিতিযা কাৰণত্তা. ‘‘জাতিপচ্চযা জৰামৰণ’’ন্তিআদিনা অদ্ধত্তযে অন্ৱযব্যতিৰেকৱসেন পৱত্তিযা ছব্বিধস্স ঞাণস্স. খযো নাম ৱিনাসো, সোৱ ভেদোতি. ৱিৰজ্জনং পলুজ্জনং. নিৰুজ্ঝনং অন্তৰধানং. একেকস্মিন্তি জৰামৰণাদীসু একেকস্মিং. পুব্বে ‘‘যথাভূতঞাণ’’ন্তি তৰুণৱিপস্সনং আহ. তস্মা ইধাপি ধম্মট্ঠিতিঞাণং ৱিপস্সনাতি গহেত্ৱা ‘‘ৱিপস্সনাপটিৱিপস্সনা কথিতা’’তি ৱুত্তং.

দুতিযঞাণৱত্থুসুত্তৱণ্ণনা নিট্ঠিতা.