৫. অৱিজ্জাপচ্চযসুত্তৱণ্ণনা

৩৫. দেসনং ওসাপেসীতি যথাৰদ্ধকথং ঠপেসি. তত্থ নিসিন্নস্স দিট্ঠিগতিকস্স লদ্ধিযা ভিন্দনৱসেন উপৰি কথেতুকামো. বুদ্ধানঞ্হি দেসনাৱাৰং পচ্ছিন্দাপেত্ৱা পুচ্ছিতুং সমত্থো নাম কোচি নত্থি. তেনাহ ‘‘দিট্ঠিগতিকস্স ওকাসদানত্থ’’ন্তি. দুপ্পঞ্হো এসো সত্তূপলদ্ধিযা পুচ্ছিতত্তা. সত্তূপলদ্ধিৱাদপদেনাতি ‘‘সত্তো জীৱো উপলব্ভতী’’তি এৱং পৱত্তদিট্ঠিদীপকপদৱসেন. ৱদন্তি এতেনাতি ৱাদো. দিট্ঠি-সদ্দো পন দ্ৱযসঙ্গহিতো, ব্ৰহ্মচৰিযৱাসো পন পৰমত্থতো অৰিযমগ্গভাৱনাতি আহ ‘‘অৰিযমগ্গৱাসো’’তি. অযং দিট্ঠীতি অনঞ্ঞে সৰীৰজীৱাতি দিট্ঠি. ‘‘জীৱো’’তি চ জীৱিতমেৱ ৱদন্তি. ৱট্টন্তি দুৱিধং ৱট্টং. নিৰোধেন্তোতি অনুপ্পত্তিধম্মতং আপাদেন্তো. সমুচ্ছিন্দন্তোতি অপ্পৱত্তিযং পাপনেন উপচ্ছিন্দন্তো. তদেতং মগ্গেন নিৰোধেতব্বং ৱট্টং নিৰুজ্ঝতীতি যোজনা. ‘‘অযং সত্তো ৱিনাসং অভাৱং পত্ৱা সব্বসো উচ্ছিজ্জতী’’তি এৱং উচ্ছেদদিট্ঠিযা গহিতাকাৰস্স সম্ভৱে সচ্চভাৱে সতি. ন হোতীতি সাত্থকো ন হোতি.

গচ্ছতীতি সৰীৰতো নিক্খমিত্ৱা গচ্ছতি. ৱিৱট্টেন্তোতি অপ্পৱত্তিং কৰোন্তোতি অত্থো. ৱিৱট্টেতুং ন সক্কোতি নিচ্চস্স অপ্পৱত্তিং পাপেতুং অসক্কুণেয্যত্তা. মিচ্ছাদিট্ঠি সম্মাদিট্ঠিং ৱিজ্ঝতি অসমাহিতপুগ্গলসেৱনৱসেন তথা পৱত্তিতুং অপ্পদানৱসেন চ পজহিতব্বাপজহনৱসেন সম্মাদিট্ঠিং ৱিজ্ঝতি. ৱিসূকমিৱাতি কণ্ডকো ৱিয. ন কেৱলং অননুৱত্তকোৱ, অথ খো ৱিৰোধোপি ‘‘নিচ্চ’’ন্তিআদিনা পৱত্তনধম্মতায ৱিঞ্ঞাপনতো. ৱিৰূপং বীভচ্ছং ফন্দিতং ৱিপ্ফন্দিতং. পণ্ণপুপ্ফফলপল্লৱানং অৱত্থুভূতো তালো এৱ তালাৱত্থু ‘‘অসিৱে সিৱা’’তি ৱোহাৰো ৱিয. কেচি পন ‘‘তালৱত্থুকতানী’’তি পঠন্তি, অৱত্থুভূততায তালো ৱিয কতানীতি অত্থো. তেনাহ ‘‘মত্থকচ্ছিন্নতালো ৱিযা’’তি. অনুঅভাৱন্তি ৱিনাসং.

অৱিজ্জাপচ্চযসুত্তৱণ্ণনা নিট্ঠিতা.